Ruka 8

Ade nagasa Yesu gene

1Si ki ta du wa gere fuo gi rago re toni, Yesu amerẽ rogo abaakporo na akporo dunduko nitungusi pai ki niyugu gu wene pangbanga nga ga ga Mbori ngbi, agu aboro nanidu bawe na ue i ki du na ko, 2na agu ade i ahusi yo be gbigbita atoro na kaza, nangia Maria, i aya ti ri Magadara, nga gu ri adaimona akuru kpotori yo saba, 3na Yoana dia Kusa nangia ga Erode buruku, na Susana na akura yo ni dungu yo, nga agu yo naamanga pa yo na gayo ũkumuko.

Sanza: bamitunga

(Mt. 13:1-9; Mk. 4:1-9)

4Ho bakere rimbasa atiria ku ho ni, aboro ki ye koyo du ko ni rogo abakporo yo dunduko, ko ki gumba pai fu yo ni sanza ki ya; 5“Bamitunga andu ka mi gani tunga; ho ni ami he ni gu bete he ki tiwi ku pangba gene; i ki si he asi ni nduyo, azire ari yo ki riti he. 6Gu kura ha ki tiwi ku auru mbia; ho si akuru ni, si ki kpi bambiko ime adu nga ti ni te. 7Gu kura ha ki tiwi ku dagba akiwe yo, akiwe ki sono asona, ki nikandasi he. 8Gu kura ha ki tiwi ku rogo mbudu sende ki nisono asona, si ki nizuku ki nisusi gu ni nimi he mbata bara 100.” Ho ko agumba agi apai ni re, ko ki poi ku ari niya, “Gu ni du na tu gia ha ti ni ni gí he.”

Ndu gu pai Yesu ape apai ti ni ni asanza

(Mt. 13:10-17; Mk. 4:10-12)

9Gako abawiriki ki sana ko ki ya. “Gine nga gi sanza re?” 10Ko, ki ya, “I ayugu gu gbugbu pai nga ga ga Mbori ngbi fu roni; ono i afu he fu kura aboro ni kina sanza; i ngere, ka i abi nga he ya; i gi pai, ka i aruga nga tiyo na ni ya.”

Gu pai sanza bamitunga nayugo

(Mt. 13:18-23; Mk. 4:13-20)

11Were, gi sanza re nga gere: Gu tunga re si nga ga Mbori pai. 12Gu nidu ku pangba gene nga agu yo nigi he; Satana ki ye, ki nidi pai kpotoyo yo, ka i aida nga pa ha ka bata ya. 13Gu nidu auru mbia si nga agu yo, ho i agi he ni i ki di pai ni ngbarago; ka tarãha adu nga ti yo ya, nga agu yo nidi pai ti toni rago; rago asada i ki koto akota. 14Gu nitiwi ku kiwe yo, nga agu yo nigi he, wa i namerã gayo gene berã pa zegino na ũkumuko na nyemu ahe rogo gi unga re ki kandasi he, ka si azu nga nzunzu ya. 15Gu i nimi rogo mbudu sende, i nga agu yo nigi gu pai re mbiko weneringiyo na gu rengo du kpotoyo yo, i ki ka kuti ni, ki nizu azu rogo hipai.

Baro tii ahe yo

(Mk. 4:21-25)

16“A nga boro sa, ho ka ni tigi baro ni, ni ka dada ha ni akoro, ki moi he tii barame yo te; ono ni ki moi he auru nguaha, agu aboro ka rimi ku dimo yo ki bi ima we. 17Bambiko a nga he sa ka du ni okooko ho te, si du adu ni kusikusi he; a nga he sa ka du ni gbuko te, si kuru akura ku imarago. 18Oni bánda tironi ti agu apai oni agia ha: bambiko gu ni du na he be ni, i afú he fu ni; gu ni adu nga he be ni ya, i adía kina gu du be ni.”

Na Yesu, na awirinako

(Mt. 12:46-50; Mk. 3:31-35)

19Na Yesu ki ye na awirinako koyo du Yesu ni, ka si adu nga wa ka i mbedi koyo du ko ni be rimbasa ya. 20Aboro ki gumba ha fu ko ya, “Anamo na awirinamo ru kina zegi yo, nikpi nyemu ka bi ro.” 21Ko ki ta karaga ha niya fu yo, “Anina na awirinami nga agu yo nagia pa Mbori, ki nimangi he.”

Yesu aza bayuge

(Mt. 8:23-27; Mk. 4:35-41)

22Si ki ta du wa gere ni gu rago re, Yesu azorõ ku kurungba yo, ko tigako, na gako abawiriki; ko ki ya fu yo, “Ani sí ku mbiti baime yo.” I ki tona ka ndu. 23Wa i andu ko ati ni rame. Yuge ki ye gbe ari yo ku bangiri baime yo; kurungba ki tona ka hi be ime, i ki du ngba pai yo. 24Abawiriki ki ta ye koyo du Yesu ni, nizingisi ko, niya, “Baira, Baira, ani nikakpi.” Ko ki zingi, ki niza yuge na sungburasungbura ime. Si ki ru, bakere zereda ki du. 25Ko ki ya fu yo, “Gaoni idapase si wari?” I ki gunde agunde, si ki iriwo ti yo, i ki ya dagba yo, “Da du re, yuge agia sangbani na baime a?”

Yesu abatasi kumba na adaimona ringara aGerasa yo

(Mt. 8:28-34; Mk. 5:1-20)

26I ki da ku rogo ga aGerasa ringara, nga gu mbedi na Gariraya. 27Ho Yesu akuru ni ku pia yo, kumba ki gbia ko naye bakporo yo naadu na adaimona ti ko, ko avo nga remu ti dungu arago te, ko asunga nga rogo bambu a te, ono dagba kina amurã. 28Ho ko abi Yesu ni, ko ki poi ku ari, ki ti sande barangba ko, ki ya na bakere fugo, “Mi namanga wãi na mo, Yesu, nga Wiri Mbori du ni Bahe ki susi? Mi nazungadi ro, ka mo rúngosi nga re ya.” 29Bambiko Yesu arugu gbigbita toro u guari ti kumba. Bambiko u azi ko ti dungu rago; i ki nibanda ko ki vodi ko ni azogbo na aganziri; ko ki kuadi azogbo, adaimona ki dandi ko adanda ku ngbakungba yo. 30Yesu ki sana ko ya, “Rimoro nga da?” Ko ki ya, “Rimbasa”; bambiko dungu adaimona arimi ku kpotoko yo. 31Ami ki kpari fu Yesu gbe ki ya ka ko kedi nga ra ku ngbungumu yo ya. 32Were, rimbasa amukuru nadu ho ni dungu ra niriki auru bagangara yo, ami ki kpari fu ko ko idi he fu ra ami rimi ku vuru amukuru yo. Ko ki idi he fu ra. 33Adaimona ki kuru kpoto kumba yo, ki nirimi ku vuru amukuru yo; rimbasara ki zorõ ti ngba gango ime ku rogo baime yo, ami ki kpiki ime yo.

34Agu aboro nariga ra ho i abi gu pai namangi ni, i ki oro ki gumba ha rogo bakporo na ringara yo. 35Aboro ki ye ka bi gu pai namangi; i ki ye koyo du Yesu ni, ki bi gu kumba adaimona niguari ti ko, ko sungu pati ndu Yesu, na remu ti kpotoko, nzanga nago ti ko; i ki nigunde agunde. 36Agu aboro nabi he ki gumba pa gu kumba adaimona azi ko wa ko ahu. 37Agu aboro nadu ringara aGerasa yo dunduko kirikiri i ki kpari fu Yesu ko guari ti yo; bambiko bakere gunde azi yo. Ko ki zorõ ku kurungba yo, ki nikaraga tiko. 38Ono gu kumba adaimona aguari ti ko ko ki kpari fu Yesu i ndu na ko; ono ko ki kedi ko, ki ya, 39“Mo gá ku kpuro yo, ki gumba pa gu bakere pai mangi Mbori foro.” Ko ki ndu gako nduge ki gbandaka gu bakere pai agbandaka rogo bakporo yo dunduko, nga gu Yesu amangi fu ko.

Wiri Yairo na gu de nazadi ga Yesu remu

(Mt. 9:18-26; Mk. 5:21-43)

40Ho Yesu akaraga tiko ni, aboro ki udi ko, bambiko i asungudi ko dunduko. 41Mo ngére, kumba ki ye rimoko nangia Yairo, baira bambutiria nangia ko. Ko ki ti barangba Yesu pati nduko, ki kpari fu ko ko ye ku kpuko yo; 42bambiko bangisa wiriko nadu ho, garãri adu bawe na ue, ri ki mbedi ka kpi. Wa ko andu rimbasa aboro ki gbisi ko.

43De kureri anaga garãha ki du bawe na ue, ri abagi agu ahe nadu be ri dunduko fu amunganga, ka ri ahu nga be yo wa sa ya. 44Ri ki ye aye gii ko yo, ki zadi ngba gako remu; gu kureri naaga si ki kiti ni ba sa. 45Yesu ki ya, “Da zadi re?” Ho i ati kangu he ni dunduko, Petero ki ya, na agu yo nadu na ko, “Baira, rimbasa nigbisi ro ki niturã ro.” 46Yesu ki ya, “Boro sa nizadi re; bambiko mi ini he ya tandu kuru ti re.” 47Ho gu de aini he ni ya ri adu nga ni okooko ri te, ri ki ta ye nikio akio, ki ti sande barangba ko ki gumba gu pai ri azadi ko ti ni fu ko ku bangiri aboro dunduko, na wa ri abati ni ba sa. 48Ko ki ya fu ri, “Vungu, ga idapase batasi ro; mo ndú zezeredi.”

49Ho ko agumba ha ni were, boro ki ye rogo gu kporo nga ga baira bambutiria, ki ya, “Wiro kpi, ka mo fúdi nga Bayugupai ya.” 50Ono ho Yesu agi he ni, ko ki karaga ha fu ko, “Ka mo gúnde nga ya, mo idi pai, ri abáta abata.” 51Ho ko ada ni ku kporo yo, ko aida nga fu boro ni peke ko te, kina aPetero na Yoane na Yakoba, na ba degude na nari. 52Aboro ata kpara ni aume dunduko, nita wawa tipa ri. Yesu ki ya, “Ka oni kpári nga ya; ri akpi nga te, ri nara ara.” 53Aboro ki nimomu ko amoma niini he ya ri kpi. 54Ono ko ki ta zia ri ti beri, niyambu ri ki ya, “Degude, mo gúari.” 55Torori ki yega, ri ki guari ni ba sa. Ko ki rugu yo ya i fu he fu ri ri ri he. 56Avunguri ki kigi akiga; ono ko ki rugu yo ya ka i gumba nga gu pai namangi fu boro wa sa ya.

Currently Selected:

Ruka 8: ZB1978

Highlight

Copy