1 AKORINTHO 7
7
1NA rĩu, ha ũhoro wa maũndũ marĩa mwanyandĩkĩire marũa nĩ ũndũ wamo-rĩ, ũrĩa ngũgĩcokia nĩ atĩrĩ: Nĩ wega mũndũ mũrũme angĩtũũra atekũhutania na mũndũ-wa-nja. 2No tondũ wa ũrĩa gũtũire kũhũragwo maraya-rĩ, nĩ kaba o mũndũ mũrũme agĩe na mũtumia wake mwene, nake o mũndũ-wa-nja agĩe na mũthuri wake mwene. 3Mũndũ mũrũme nĩahingagĩrie mũtumia wake bata wake, mũtumia nake o taguo ahingagĩrie mũthuriwe. 4Mũtumia ndangĩhota kwĩathagĩra mwĩrĩ wake mwene, tiga mũthuriwe; mũthuri nake o taguo ndangĩhota kwĩathagĩra mwĩrĩ wake mwene, tiga mũtumia wake. 5Tigagai kũimana, thengia rĩrĩa mũngĩkorũo mũrĩkanĩire mwĩke ũguo ihinda nĩ getha mũgĩage na hingo ya kũhoya Ngai, na mũgacoka gũikarania, nĩguo Shaitani ndakae kũmũgeria tondũ wa ũrĩa mũremagwo nĩ kwĩgirĩrĩria. 6No rĩrĩ, maũndũ macio ndamoiga ta arĩ rũtha ngũheana, ti gwathana ngwathana. 7No ũrĩa ingĩenda-rĩ, nĩ kaba andũ othe maikare ta ũrĩa niĩ mwene ndariĩ. No rĩrĩ, o mũndũ akoragwo e na kĩheo gĩake kĩũmbe aheetwo nĩ Ngai, kiumanĩte na Wega wake, ũmwe akaheo ũũ, na ũrĩa ũngĩ ũũ.
8Andũ arĩa matarĩ na atumia ao, o na atumia arĩa a ndigwa-rĩ, acio ngũmera atĩrĩ, mangĩikara o ta ũrĩa niĩ njikaraga, ũguo wamaagĩrĩra. 9No mangĩkorũo matingĩhota gũtũũra o megiragĩrĩria-rĩ, kũhikania nĩmahikanie na kũhika nĩmahike; nĩ kaba kũhikania kũrĩ gũikara makĩhĩahĩaga.
10 #
Mat 5.32; 19.9; Mar 10.11,12; Luk 16.18. No rĩrĩ, andũ arĩa marĩkĩtie kũhikania kana kũhika-rĩ, acio nĩ gwatha ndamaatha - na ti niĩ, nĩ Mwathani ũgwathana ũguo - atĩ mũtumia ndakanatigane na mũthuriwe 11(no angĩkorũo atiganĩte nake-rĩ, nĩaikare atekũhikio nĩ mũndũ ũngĩ, kana agĩcoke kũiguana na mũthuriwe); ningĩ atĩ mũthuri ndakanaingate mũtumia wake.
12No andũ arĩa angĩ ngũmera atĩrĩ, - na nĩ niĩ ngwĩrana, ti Mwathani - atĩ mũrũ wa Ithe witũ o ũrĩkũ angĩkorũo arĩ na mũtumia ũtetĩkĩtie, nake mũtumia ũcio akorũo nĩegwĩtĩkĩra gũtũũrania nake, nĩatige kũmũingata. 13O nake mũtumia ũrĩa wakorũo arĩ na mũthuri ũtetĩkĩtie, nake mũthuri ũcio atuĩke nĩegwĩtĩkĩra gũtũũrania nake-rĩ, nĩatige gũtigana na mũthuriwe. 14Nĩ gũkorũo mũndũ mũrũme ũrĩa ũtetĩkĩtie nĩaamũragwo agatuwo mũtheru nĩ ũndũ wa ũrĩa manyitaine na mũtumia wake, nake mũtumia ũrĩa ũtetĩkĩtie nĩaamũragwo agatuwo mũtheru nĩ ũndũ wa ũrĩa manyitaine na mũndũ ũcio mũrũ wa Ithe witũ. Kũngĩkorũo ti ũguo-rĩ, ciana cianyu ciaya gũkorũo itarĩ theru; no rĩrĩ, rĩu nĩ theru. 15No ningĩ ũcio ũtetĩkĩtie angĩenda gwĩthiĩra-rĩ, nĩethiĩre. Thĩinĩ wa ũhoro ta ũcio mũrũ wa Ithe witũ kana mwarĩ wa Ithe witũ ti muohe ta ngombo; no rĩrĩ, Ngai aatwĩtire tũtũũranagie na thayũ. 16Tondũ wee, mũtumia ũyũ-rĩ, ũkĩũĩ atĩa kana waya kũhonokithia mũthuriguo? kana wee nawe, mũthuri ũyũ-rĩ, ũkĩũĩ atĩa kana waya kũhonokithia mũtumia waku?
17No rĩrĩ, ũhoro o ũrĩa Mwathani agaĩire o mũndũ o mũndũ atũũre naguo, o ũrĩa aarĩ naguo rĩrĩa etirũo nĩ Ngai, no nginya arũmanagĩrĩre naguo. Naguo ũguo noguo nduaga makanitha-inĩ mothe. 18Mũndũ angĩkorũo etirũo arĩ mũruu-rĩ, nĩatige gwĩtua ta mũndũ ũtaruĩte. Na mũndũ angĩkorũo etirũo atarĩ mũruu-rĩ, ũcio nĩatige kũrua. 19Kũrua ti ũndũ ũrĩ bata, o nakuo kwaga kũrua ti ũndũ ũrĩ bata; ũndũ ũrĩa ũrĩ bata no kũrũmia maathani ma Ngai. 20Wega no mũndũ o mũndũ aikare o ta ũrĩa ũhoro wake watariĩ hĩndĩ ĩrĩa etirũo. 21Ũngĩgĩkorũo hĩndĩ ĩrĩa wetirũo warĩ ngombo-rĩ, tiga kũũria: no ningĩ ũngĩona njĩra ya kuuma ũkombo inĩ no wega ũmĩgere. 22Nĩ gũkorũo mũndũ ũrĩa warĩ ngombo hĩndĩ ĩrĩa etirũo atuĩke wa Mwathani, atuĩkĩte mũndũ wa Mwathani ũtarĩ ngombo; ningĩ no taguo ũrĩa ũtaarĩ ngombo hĩndĩ ĩrĩa etirũo, atuĩkĩte ngombo ya Kristo. 23Nĩ kũgũrũo mwagũrirũo, mũgĩkĩrutĩrũo kĩndũ kĩĩ goro; menyai mwĩtue ngombo cia andũ. 24Ariũ a Ithe witũ, o ũrĩa ũhoro wa mũndũ o mũndũ watariĩ hĩndĩ ĩrĩa etirũo-rĩ, nĩaikarage o ũguo, me hamwe na Ngai.
25Rĩu-rĩ, ha ũhoro wa airĩtu, ndirĩ na watho wa Mwathani wa kũheana, no nĩ kũmwĩra ngũmwĩra ũrĩa niĩ nguona, ndĩ mũndũ ũiguĩrĩirũo tha nĩ Mwathani ngagĩtuĩka wa kwĩhokeka. 26Ũrĩa ngũgĩĩciria ũngĩagĩrĩra, nĩ ũndũ wa thĩna wa matukũ maya, nĩ atĩrĩ, atĩ wega no mũndũ aikare o ta ũguo atũire atariĩ. 27Akorũo nĩwohanĩtio na mũtumia-rĩ, tiga kwenda kuohorũo. Na akorũo ndũrĩ muohanie na mũtumia, tiga gũkĩenda kũgĩa na mũtumia. 28No rĩrĩ, o na ũngĩhikania-rĩ, ndũnehia; o na mũirĩtu nake angĩhika-rĩ, ndanehia. No ningĩ, andũ arĩa marĩĩkaga ũguo nĩmarĩonaga thĩna maũndũ-inĩ mao ma kĩĩmwĩrĩ; na niĩ ndenda kũgiria mũgĩe naguo. 29Ũrĩa nguuga, ariũ a Ithe witũ, nĩ atĩrĩ, nĩ atĩ hingo nĩĩnyihĩte; kuuma rĩu, andũ arĩa me na atumia nĩmaikarage ta matarĩ nao, 30na andũ arĩa marĩraga maikarage ta matekũrĩra, na arĩa makenaga maikarage ta mategũkena; nao arĩa megũragĩra indo maikarage ta matagĩĩte nacio, 31na arĩa mahũthagĩra maũndũ ma gũkũ thĩ maikarage ta matekũmahũthĩra mũno; nĩ gũkorũo mũtabarĩre wa thĩ ĩno nĩ gũthira ũrathira.
32No inyuĩ-rĩ, ndenda mũikare mũtegũtangĩka nĩ mĩhang’o. Mũndũ ũtahikanĩtie ahang’agĩra maũndũ ma Mwathani, amenyage ũrĩa angĩkenia Mwathani; 33no ũrĩa ũhikanĩtie ahang’agĩra maũndũ ma thĩ, amenyage ũrĩa angĩkenia mũtumia wake. 34Ningĩ ũhoro wa mũtumia wĩ na mũrũme wake nĩũtiganĩte na wa mũirĩtu. Ũcio ũtarĩ aahika ahang’agĩra maũndũ ma Mwathani, ahotage gũikara e mwamũre mwĩrĩ o na roho; no ũrĩa ũhikĩte ahang’agĩra maũndũ ma thĩ, amenyage ũrĩa angĩkenia mũthuriwe. 35Naguo ũhoro ũcio ndawaria nĩ getha mũgunĩke inyuene, ti ndĩmwĩkĩre mũhĩndo ngingo, no nĩ getha ndĩmuonie maũndũ marĩa maagĩrĩire, na nĩ getha mũikarage mwĩheanĩte kwĩ Mwathani mũtekũgucĩrĩrio nĩ maũndũ mangĩ.
36No rĩrĩ, mũndũ angĩona atĩ hihi ndegwĩka mũirĩtu wake wega, mũirĩtu ũcio angĩkorũo nĩahĩtũkĩtie ũirĩtu wake, na gũtuĩkĩte atĩ nĩkũbataire ahike-rĩ, mũndũ ũcio nĩeke o ũrĩa ekwenda gwĩka; ndarĩ kwĩhia ekwĩhia; nĩakĩreke ahike. 37No atĩrĩ, mũndũ ũtarĩ na njiriri ngoro, na ndarĩ na bata ekũhatĩrĩrio nĩguo, tiga eke o ũrĩa ekwenda we mwene-rĩ, na atuĩkĩte atĩ nĩetuĩrĩire na ngoro yake atĩ ũrĩa egwĩka no gũtũũra na mũirĩtu wake, atarĩ mũhiku-rĩ, ũcio no wega egwĩka. 38Hakĩrĩ ũguo-rĩ, ũrĩa wa kũneana mũirĩtu wake ahikio, nĩegwĩka wega; nake ũcio wa gũtiga kũmũneana ahikio, nĩegwĩka wega makĩria.
39Mũtumia-rĩ, atũũraga ohanĩtio na mũthuriwe o hĩndĩ ĩrĩa yothe mũthuriwe arĩ muoyo; no rĩrĩ, mũthuriwe angĩkorũo nĩakuĩte, ndangĩgirio ahikio nĩ mũndũ o wothe ũrĩa ekwenda; tiga no ahikirio nĩ mũndũ wĩ thĩinĩ wa Mwathani. 40No ũrĩa niĩ ingĩtua, niĩ atĩ hĩndĩ angĩtũũra na gĩkeno makĩria no rĩrĩa angĩikara o ũguo atariĩ; na ngwĩciria atĩ niĩ o na niĩ ndĩ na Roho wa Ngai.
Currently Selected:
1 AKORINTHO 7: OGKBIBLE
Highlight
Share
Compare
Copy
Want to have your highlights saved across all your devices? Sign up or sign in
©Bible Society of Kenya, 2019