1 AKORINTHO 8
8
1Na rĩu ũhoro wa nyama iria ikoragwo ihakĩirũo mĩhianano: Atĩrĩrĩ, nĩtũũĩ atĩ ithuothe gũtirĩ ũtarĩ na ũmenyo ũhoro-inĩ ũcio. Ũmenyo-rĩ, ũtũmaga mũndũ etũũgĩrie, no wendani nĩguo ũtũmaga mũndũ ongererũo hinya. 2Mũndũ angĩkorũo eciragia atĩ arĩ ũndũ amenyete wega-rĩ, mũndũ ũcio ndarĩ aragĩa na ũmenyo ta ũrĩa aagĩrĩirũo nĩ kũgĩa naguo. 3No rĩrĩ, mũndũ angĩkorũo endete Ngai, ũcio nĩwe ũũĩo nĩ Ngai. 4Naguo ũhoro ũcio wa kũrĩa nyama ithĩnjĩirũo mĩhianano-rĩ, nĩtũũĩ o wega atĩ gũkũ thĩ guothe mũhianano ti kĩndũ kũrĩ; na nĩtũũĩ atĩ gũtirĩ Ngai tiga o ũrĩa ũmwe. 5Amu o na gwatuĩka nĩkũrĩ iria ciĩtagwo ngai, o na ingĩtuĩka irĩ igũrũ o na kana gũkũ thĩ-rĩ, - na ngai ta icio nĩ nyingĩ, o nao aathani no aingĩ - 6ĩndĩ harĩ ithuĩ-rĩ, Ngai no ũmwe, nĩwe Ithe witũ, o we kĩhumo kĩa indo ciothe, na ithuĩ agatũtũũria no getha tũtuĩke ake; ningĩ harĩ ithuĩ Mwathani no ũmwe, nĩwe Jesu Kristo, o we njĩra ĩrĩa indo ciothe ciombirũo nayo, na ĩrĩa ithuĩ tũtũũragio nayo.
7No rĩrĩ, ti andũ othe marĩ na ũmenyo ũcio; amwe-rĩ, tondũ wa gũtũũra mamenyerete ũhoro wa mũhianano nginya rĩu, marĩaga nyama ta icio magĩĩtĩkagia atĩ nĩihakĩirũo mũhianano kũna; nacio thamiri#8.7 Thamiri: rora kohoro kaandĩkĩtwo Rom 2.15. ciao, tondũ wa ũrĩa ciagĩte hinya-rĩ, igagĩikara ithũkĩte. 8No rĩrĩ, irio iria tũrĩaga ticio ingĩtũma twĩtĩkĩrũo nĩ Ngai; tũngĩgĩtiga kũrĩa, gũtirĩ ũndũ twanyihĩrũo nĩguo; na tũngĩrĩa, gũtirĩ ũndũ twaingĩhĩrũo nĩguo. 9No atĩrĩ, wĩmenyererei atĩ rũtha rũu mũrĩ naruo rũtigatuĩke ũndũ wa kũgũithia andũ arĩa manyihĩtie hinya. 10Tondũ wee wĩ na ũmenyo-rĩ, mũndũ angĩkuona ũikaire thĩ mũkĩrĩa irio handũ hahoyagĩrũo mũhianano-rĩ, nake akorũo nĩ mũndũ ũnyihĩtie hinya, githĩ thamiri yake ndĩngĩũmĩrĩria arĩage nyama ihakĩirũo mĩhianano? 11Na nĩ ũndũ wa ũguo, ũmenyo ũcio waku no gũtũma mũndũ ũcio ũnyihĩtie hinya ore, nake nĩ mũrũ wa Ithe witũ, mũndũ wakuĩrĩirũo nĩ Kristo. 12Na rĩrĩa mwehia ariũ a Ithe witũ ũguo, mwakĩmaguraria thamiri rĩrĩa itarĩ na hinya-rĩ, nĩ kwĩhia mũkwĩhia Kristo. 13Tondũ ũcio-rĩ, kũngĩgĩtuĩka atĩ kĩrĩa ngũrĩa nĩkĩo gĩkũhĩngithia mũrũ wa Awa, niĩ ndingĩkarĩa nyama o na rĩ, ndikanagĩtũme mũrũ wa Awa ahĩngwo.
Currently Selected:
1 AKORINTHO 8: OGKBIBLE
Highlight
Share
Compare
Copy
Want to have your highlights saved across all your devices? Sign up or sign in
©Bible Society of Kenya, 2019