GŨCOKERITHIA MAATHANI 17
17
1Ndũkanarutĩre Jehova Ngai waku igongona rĩa ndegwa, kana rĩa ndũrũme ĩrĩ na kaũũgũ, kana ĩrĩ na kawogomo; nĩ gũkorũo ũndũ ũcio wĩ thahu harĩ Jehova Ngai waku.
2Na atĩrĩrĩ, matũũra-inĩ o na marĩkũ maku marĩa Jehova Ngai waku akũheaga, kũngĩkoneka mũndũ mũrũme, kana mũndũ-wa-nja wĩkaga ũndũ ũyũ wonagwo wĩ mũũru nĩ Jehova Ngai waku, wa atĩ akaagarara kĩrĩkanĩro kĩrĩa Jehova aarĩkanĩire na inyuĩ, 3#Thama 22.20.na akorũo athiĩte gũtungatĩra ngai ingĩ, na agaciturĩria ndu, acihoe, kana akahoya riũa, kana mweri, kana kĩndũ o na kĩ kĩa mbũtũ ciothe cia igũrũ, o maũndũ marĩa itagwathĩte wĩkage; 4nawe ũheo ũhoro ũcio, na ũũigue-rĩ, nĩũkaũtuĩria na kĩyo na atĩrĩrĩ, ũndũ ũcio ũngĩgakorũo nĩ wa ma, o ma, na gũkorũo nĩkũruĩrĩirũo atĩ ũndũ ũcio wĩ thahu nĩwĩkagwo thĩinĩ wa Isiraeli-rĩ, 5nĩũgatwarithia mũndũ mũrũme ũcio, kana mũndũ-wa-nja ũcio wĩkĩte ũndũ ũcio mũũru, kĩhingo-inĩ gĩa ĩtũũra rĩaku, nao andũ o ro acio, mũndũ mũrũme ũcio, kana mũndũ-wa-nja ũcio, ũmahũrithie na mahiga nyuguto, makue. 6#Ndar 35.30; Gũcok 19.15; Mat 18.16; 2 Kor 13.1; 1 Tim 5.19; Ahib 10.28.Kũngĩkorũo he ũira ũheanĩtwo nĩ andũ erĩ, kana atatũ, mũndũ ũcio ũkũũragwo no mũhaka oragwo; no rĩrĩ, gũtikanagĩe mũndũ ũkũũragwo nĩ ũndũ wa ũira wa mũndũ o ũmwe. 7#1 Kor 5.13.Namo moko ma aira acio nomo makamwambia mũtĩ akĩũragwo, na thutha wa ũguo acokererũo nĩ moko ma andũ arĩa angĩ othe. Uguo nĩguo mũkeheragia ũũru ũcio, uume thĩinĩ wanyu.
8Na rĩrĩ, hangĩkoneka cira ũgũkũgĩtĩra hinya gũtua-rĩ, o na ũngĩtuĩka nĩ wa thakame ĩitanĩtwo, kana wa gũtuithanio mũndũ na mũndũ, kana wa igũtha rĩrĩa rĩgũthanĩtwo, namo maũndũ macio monekete magĩe na ngarari matũũra-inĩ maku nĩũkaarahũka ũthiĩ handũ harĩa Jehova Ngai waku agathura; 9ũkinye harĩ Alawii arĩa athĩnjĩri-Ngai, o na harĩ mũciri ũrĩa ũgakorũo kuo matukũ macio, ũkĩmahoe ũhoro ũcio, nao makuonie ũrĩa cira ũcio wagĩrĩire gũtuo; 10nawe ũgĩcoke wĩke o ta ũrĩa itua rĩthiĩte rĩrĩa andũ acio makuonetie, me handũ hau Jehova agathura, nawe ũkĩmenyagĩrĩre gwĩka maũndũ mothe o ta ũrĩa magũtaarĩte, 11wĩkage o ta ũrĩa watho ũrĩa magakuonereria ũtariĩ, o na ituĩro rĩa cira ũrĩa makuonetie; ndũkanagarũrũke na mwena wa ũrĩo, kana wa ũmotho, ũtige kũrũmĩrĩra ituĩro rĩu makuonetie. 12Nake mũndũ ũrĩa ũgetĩa arege kũigua mũthĩnjĩri-Ngai ũcio ũrũgamaga handũ hau agĩtungatĩra Jehova Ngai waku, kana arege kũigua mũciri-rĩ, mũndũ ũcio no mũhaka akue; nĩguo weherie ũũru ũcio uume thĩinĩ wa Isiraeli. 13Nao andũ othe nĩmakaigua ũhoro ũcio, metigĩre, na maticoke gwĩtĩa.
14 #
1 Sam 8.5. Hĩndĩ ĩrĩa ũgakinya bũrũri ũrĩa Jehova Ngai waku akũheaga, na ũwĩgwatĩre ũtuĩke waku, na ũũtũũre, na ũcoke wĩĩre ũũ: Atĩrĩrĩ, nĩngwĩthurĩra mũthamaki a’thamakagĩre, nduĩke o ta ndũrĩrĩ ciothe iria injikarĩte na mĩena yothe; 15ndũkanethurĩre mũthamaki ũngĩ o na atĩa agwathage, tiga o ũrĩa Jehova Ngai waku agagũthurĩra; nĩ mũndũ ũmwe wa ariũ a ithe wanyu ũgathurũo atuĩke mũthamaki agũthamakagĩre. Ndũkanatue mũndũ wa kũngĩ, ũtarĩ mũrũ wa ithe wanyu, mũgwathi. 16#1 Ath 10.28; 2 Maũ 1.16; 9.28.No rĩrĩ, nĩemenyerere ndakaneingĩhĩrie mbarathi, kana areke andũ aya macoke Misiri nĩ getha akeingĩhĩrie mbarathi; kuona atĩ Jehova nĩaamwĩrire atĩrĩ, Gwata ũmũthĩ mũtikanacokere njĩra ĩo; 17#1 Ath 11.1-8; 1 Ath 10.14-22,27; 2 Maũ 1.15; 9.27.ningĩ ndakaneingĩhĩrie aka, nĩguo ngoro yake ndĩkanagarũrũke, ningĩ ndakaneingĩhĩrie mũno betha na thahabu. 18Na nĩgũgakinya atĩrĩ, atĩ hĩndĩ ĩrĩa agaikarĩra gĩtĩ gĩake kĩa ũnene athamake-rĩ, ndarĩ hingo atakeandĩkĩra kobi ya watho ũyũ ibuku-inĩ, aũrutĩte ibuku-inĩ rĩrĩa rĩigĩtwo harĩ athĩnjĩri-Ngai arĩa Alawii. 19Narĩo ibuku rĩu atũũre narĩo, na arĩthomage matukũ mothe marĩa egũtũũra muoyo, nĩ getha erute gwĩtigĩra Jehova Ngai wake, nĩguo amenyagĩrĩre mohoro mothe ma watho ũyũ, o na irĩra ici cia watho wa kũrũmĩrĩrũo, nĩguo amekage; 20nĩ getha ngoro yake ndĩgetũũgĩrie eyone ta akĩrĩte ariũ a ithe wanyu, na nĩ getha ndakanagarũrũke na mwena wa ũrĩo, kana wa ũmotho, atigane na maathani macio; nĩguo akaingĩhia matukũ make e bũrũri ũrĩa egũthamaka, we mwene, o na ciana ciake, marĩ thĩinĩ wa Isiraeli.
Currently Selected:
GŨCOKERITHIA MAATHANI 17: OGKBIBLE
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019