GŨCOKERITHIA MAATHANI 18
18
1Athĩnjĩri-ngai arĩa Alawii, hamwe na mũhĩrĩga ũcio wothe wa Lawii-rĩ, matikagwata gĩcunjĩ gĩa gĩthaka kana igai harĩ Aisiraeli arĩa angĩ; acio makarĩaga indo iria irutĩirũo Jehova cia mahaki ma gũcinwo na mwaki, hamwe na indo ciothe iria ituĩkĩte igai rĩake. 2#Ndar 18.20.Nao matikagĩa na igai thĩinĩ wa ariũ a ithe wao tondũ Jehova nĩwe igai rĩao, o ta ũrĩa aamerire. 3Nacio indo ici nĩcio athĩnjĩri-Ngai maagĩrĩirũo nĩ kũheagwo ciumĩte harĩ andũ arĩa mekũruta igongona, o na kũngĩtuĩka nĩ ng’ombe ĩkũrutwo, kana ndũrũme; mũrĩheaga mũthĩnjĩri-Ngai guoko, na thĩa cierĩ, na nyama cia nda. 4Ningĩ mũmũheage maciaro ma mbere ma ngano yaku, na ma ndibei yaku, o na ma maguta maku, o na ũmũheage guoya wa ng’ondu ĩrĩa yaambire kũmurũo guoya wayo. 5Nĩ gũkorũo Jehova Ngai waku nĩamũthurĩte mĩhĩrĩga-inĩ yanyu yothe nĩ getha we mwene, na ciana ciake, marũgamage marute wĩra thĩinĩ wa rĩĩtwa rĩa Jehova, tene na tene.
6Na rĩrĩ, Mũlawii angĩkinya harĩ wee, oimĩte kũndũ kũrĩa atũũrĩte itũũra-inĩ rĩmwe rĩa matũũra manyu marĩa ma Isiraeli guothe, erirĩirie mũno gũkinya o handũ harĩa Jehova agathura-rĩ, 7nĩagagĩtungata thĩinĩ wa rĩĩtwa rĩa Jehova Ngai wake, o ta ũrĩa Alawii othe arĩa ariũ a ithe wao matungataga, o acio marũgamaga hau mbere ya Jehova. 8Nake agayagĩrũo igai rĩa indo cia kũrĩa rĩiganaine na rĩa acio angĩ, thengia indo iria arĩ nacio nĩ ũndũ wa kwendia indo iria aatigiirũo nĩ ithe.
9Hĩndĩ ĩrĩa ũgakinya bũrũri ũrĩa Jehova Ngai waku akũheaga, ndũkanerute gwĩka maũndũ me thahu matariĩ ta marĩa mekagwo nĩ ndũrĩrĩ ciakuo. 10#Alaw 19.26; Thama 22.18.Thĩinĩ wanyu hatikanoneke mũndũ o na ũrĩkũ ũkũhĩtũkithĩria mũriũ mwaki-inĩ, o na kana mwarĩ, kana ũkũragũra, kana ũkũragũria, kana mũtuĩria wa nyoni ya mũndũ, kana mũrogi, 11#Alaw 19.31.kana mũthingi wa ithitũ, kana mũhoi ngoma ũhoro, kana mũndũ mũgo, o na kana mũndũ ũkũragũria ngoma. 12Nĩ gũkorũo mũndũ o wothe ũrĩa wĩkaga maũndũ macio, nĩonagwo nĩ Jehova e na thahu; na tondũ wa mathahu macio nĩkĩo Jehova Ngai waku aingataga ndũrĩrĩ icio ciehere mbere yaku. 13#Mat 5.48.Wee-rĩ, tuĩka mũndũ mwagĩrĩru kũna kũna harĩ Jehova Ngai waku. 14Nĩ gũkorũo ndũrĩrĩ icio ũkegwatĩra ituĩke ciaku, nĩciiguaga andũ arĩa maragũragia, o na arĩa maragũraga; no rĩrĩ, ha ũhoro waku-rĩ, Jehova Ngai waku ndakũrekete wĩke maũndũ macio. 15#Atũm 3.22; 7.37.Jehova Ngai waku nĩegũgũũkĩrĩria mũnabii o ta niĩ, oime thĩinĩ waku, wa ariũ a thoguo; ũcio nĩwe mũrĩiguaga; 16nĩ getha gũkoneka maũndũ maringaine na marĩa mwetirie Jehova Ngai waku, mũthenya ũrĩa mwacemanĩtie o kũrĩa Horebu, mũkiuga atĩrĩ, Reke ndige gũcoka kũigua mũgambo wa Jehova Ngai wakwa, kana njoke kuona mwaki ũyũ mũnene ũũ rĩngĩ o na rĩ, nĩ getha ndigakue. 17Nake Jehova agĩkĩnjĩra atĩrĩ, Ndeto icio maaria, nĩmoiga wega. 18Nĩngamokĩrĩria mũnabii oime thĩinĩ wa ariũ a ithe wao, o tawe, na nĩngekĩra ciugo ciakwa kanua gake, nake aarie nao maũndũ mothe marĩa ngamwatha. 19#Atũm 3.23.Na nĩgũgakinya atĩrĩ, atĩ mũndũ o wothe ũrĩa ũtakaigua ũhoro wakwa ũrĩa akaaria rĩĩtwa-inĩ rĩakwa-rĩ, ũcio nĩwe ngoria ũhoro ũcio. 20No rĩrĩ, mũnabii ũrĩa ũkaaria kiugo na mwĩgerero akĩgwetaga rĩĩtwa rĩakwa, kĩrĩa itamwathĩte aarie ũhoro wakĩo, kana ũrĩa ũkaaria ũhoro akĩgwetaga rĩĩtwa rĩa ngai ingĩ-rĩ, no mũhaka mũnabii ũcio akue. 21Ningĩ hihi ũngĩũria na ngoro yaku atĩrĩ, Ĩ ũhoro ũrĩa ũtaarĩtio nĩ Jehova tũgakĩũmenyithio nĩ kĩ? 22Atĩrĩrĩ, hĩndĩ ĩrĩa mũnabii ekwaria akĩgwetaga rĩĩtwa rĩa Jehova, naguo ũndũ ũcio aarĩtie wage kuoneka, kana wage gũkinya o ta ũguo warĩtio-rĩ, ũcio nĩguo ũrĩa ũtaarĩtio nĩ Jehova; mũnabii ũcio awarĩtie na mwĩgerero; mũtikanamwĩtigĩre.
Currently Selected:
GŨCOKERITHIA MAATHANI 18: OGKBIBLE
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019