THAMA 14

1Nake Jehova akĩarĩria Musa akĩmwĩra atĩrĩ, 2Aria na ciana cia Isiraeli, ũciĩre ihũndũke ikaambe hema ciacio ing’etheire Pi-hahirothu gatagatĩ-inĩ ka Migidoli na iria, nĩguo hema ciacio ing’ethere itũũra rĩa Baali-zefoni; naguo mwena wa na mbere warĩo, o gũkuhĩ na iria, nĩkuo mũkaamba hema cianyu. 3Na rĩrĩ, ha ũhoro wa ciana icio cia Isiraeli Firauni nĩakoiga atĩrĩ, Thĩ nĩĩcirigithĩtie gũthiĩ, na werũ ũgacihingĩrĩria. 4Na niĩ-rĩ, nĩngũũmia ngoro ya Firauni acirũmĩrĩre, na nĩngwĩgĩĩra na gĩtĩo nĩ ũndũ wa Firauni, o na mbũtũ yake yothe ya ita; nao andũ acio a Misiri nĩmegũkĩmenya atĩ niĩ nĩ niĩ Jehova. Nacio ciana cia Isiraeli igĩĩka o ta ũguo. 5Nake mũthamaki ũcio wa Misiri akĩĩrũo atĩ andũ acio nĩmorĩte; nayo ngoro ya Firauni, o na cia ndungata ciake, ikĩĩricũkwo cieciria ũhoro wa andũ acio, makiuga atĩrĩ, Ĩ rĩu-rĩ, ũndũ ũyũ tweka nĩ ũrĩkũ, twareka andũ a Isiraeli mathiĩ matige gũtũtungatĩra? 6Nake agĩthondekithia ngari yake, akĩmĩhaarĩria, agĩtwarana na andũ ake. 7Agĩgĩthiĩ na ngari magana matandatũ thure, o na ngari ciothe cia Misiri, nacio ngari icio ciothe ciarĩ na akaburũ a cio. 8Nake Jehova akĩũmia ngoro ya Firauni mũthamaki wa Misiri, agĩkĩrũmĩrĩra ciana cia Isiraeli na ihenya; nĩ gũkorũo andũ a Isiraeli maathiire matarĩ na guoya o na hanini. 9Nao andũ a Misiri makĩmarũmĩrĩra na ihenya, makĩmateng’eria na mbarathi, o na ngari ciothe cia Firauni, hamwe na andũ ake arĩa maathiaga mahaicĩte mbarathi, o na athigari ake othe, nao makĩmakorerera maambĩte hema ciao hũgũrũrũ-inĩ cia iria, mwena-inĩ wa Pi-hahirothu, mang’etheire Baali-zefoni. 10Na rĩrĩ, Firauni aakuhĩhĩria-rĩ, ciana cia Isiraeli igĩtiira maitho, ikĩona andũ a Misiri maciumĩte thutha, igĩĩtigĩra mũno; nacio ciana icio cia Isiraeli igĩkaĩra Jehova. 11Ningĩ ikĩĩra Musa atĩrĩ, Githĩ kũu Misiri nĩ mbĩrĩra gũtaarĩ, atĩ nĩkĩo watũrutire kuo, tũũke tũkuĩre gũkũ werũ-inĩ? Rĩu-rĩ, wagĩtwĩkire ũũ nĩkĩ, ũgĩtũruta Misiri? 12Githĩ ũhoro ũyũ ti ũrĩa twakwĩraga twĩ Misiri, tũgĩkwĩra atĩrĩ, Tigana na ithuĩ, reka tũtungatĩre andũ a Misiri? Nĩ ũndũ nĩ kaba tũtungatĩre andũ a Misiri, gũkĩra gũkuĩra werũ-inĩ. 13Nake Musa akĩĩra andũ atĩrĩ, Menyai mwĩtigĩre, no rũgamai mwĩhandĩte o ro ũguo, muone ũrĩa Jehova ahonokanagia, na muone maũndũ marĩa egwĩka nĩ ũndũ wanyu ũmũthĩ; nĩ gũkorũo andũ aya a Misiri mwona ũmũthĩ-rĩ, mũtigacoka kũmona rĩngĩ o na rĩ, tene na tene. 14Jehova nĩwe ũkũmũhũranĩra; inyuĩ no gũkira mũgũkira ki.

15Nake Jehova akĩĩra Musa atĩrĩ, Ũrakĩngaĩra nĩkĩ? Aria na ciana cia Isiraeli ũciĩre ithiĩ na mbere. 16Nawe-rĩ, oya rũthanju rũaku na igũrũ, o nakuo guoko gwaku ũgũtambũrũkie gũikare igũrũ rĩa iria, ũrĩgayũkanie; nacio ciana cia Isiraeli ituĩkanirie iria-inĩ rĩu gatagatĩ ikinyĩte thĩ nyũmũ. 17Niĩ na niĩ-rĩ, nĩngũũmia ngoro cia andũ a Misiri, nĩguo matonye iria-inĩ macirũmĩrĩre na nĩngwĩgĩĩra na gĩtĩo nĩ ũndũ wa Firauni na mbũtũ yake yothe ya ita, na ngari ciake, o na andũ ake arĩa mathiaga mahaicĩte mbarathi. 18Nao andũ acio a Misiri nĩmekũmenya atĩ niĩ nĩ niĩ Jehova, rĩrĩa ndĩrĩkorũo ngĩĩte na gĩtĩo nĩ ũndũ wa Firauni, na ngari ciake, o na andũ ake arĩa mathiaga mahaicĩte mbarathi. 19Nake mũraika wa Ngai, ũrĩa watongoragia mbũtũ ya andũ a Isiraeli akĩehera hau mbere yao agĩcoka na thutha wao; o nakĩo gĩtugĩ gĩa itu kĩrĩa kĩamatongoragia gĩgĩthenga mbere yao, gĩgĩcoka gĩkĩrũgama na thutha wao 20gĩgĩgĩthiĩ gĩgĩikara gatagatĩ-inĩ ka handũ harĩa mbũtũ ya andũ a Misiri yaikarĩte, o na handũ harĩa mbũtũ ya andũ a Isiraeli yaikarĩte; itu rĩgĩkĩgĩa ho, o na nduma; no rĩrĩ, itu rĩu nĩrĩarehanagĩre ũtheri ũtukũ; nao andũ acio matiigana gũkuhanĩrĩria ũtukũ ũcio wothe. 21Nake Musa agĩtambũrũkia guoko gwake igũrũ rĩa iria; nake Jehova agĩtũma iria rĩcokio na thutha nĩ rũhuho rũĩ hinya mũno rũoimĩte mwena wa irathĩro ũtukũ ũcio wothe, agĩgĩtũma iria rĩtuĩke o thĩ nyũmũ, namo maĩ macio makĩgayũkana. 22#1 Kor 10.1,2; Ahib 11.29.Ciana cia Isiraeli igĩkĩgera iria gatagatĩ harĩa haatuĩkĩte thĩ nyũmũ, namo maĩ makĩĩhanda ta rũthingo guoko-inĩ kwao kwa ũrĩo, o na guoko-inĩ kwao kwa ũmotho. 23Nao andũ a Misiri makĩmarũmĩrĩra na ihenya magĩgĩtonya iria gatagatĩ, makĩmateng’eria na mbarathi ciothe cia Firauni, na ngari ciake, o na andũ ake arĩa maathiaga mahaicĩte mbarathi. 24Na gũgĩkinya atĩrĩ, atĩ ruoro rũatema, Jehova agĩcũthĩrĩria mbũtũ ya andũ a Misiri, arĩ gatagatĩ-inĩ ga gĩtugĩ kĩu kĩa mwaki na gĩa itu, akĩnyaririthia mbũtũ ĩo ya andũ a Misiri. 25Nake akĩrũkithia magũrũ ma ngari ciao, magĩcoka gũcitwara iritũhĩte mũno, o nginya andũ a Misiri makiuga atĩrĩ, Nĩtũũrei twehere harĩ andũ aya a Isiraeli tũtigane nao; nĩ gũkorũo Jehova nĩwe ũramorĩria, akĩhũrana na andũ a Misiri.

26Ningĩ Jehova akĩĩra Musa atĩrĩ, Tambũrũkia guoko gwaku igũrũ rĩa iria, maĩ macoke, maturĩrĩrie andũ a Misiri, na ngari ciao, o na andũ ao arĩa mathiaga mahaicĩte mbarathi. 27Nake Musa agĩtambũrũkia guoko gwake igũrũ rĩa iria, na rũcinĩ gwakĩa, iria rĩu rĩgĩcoka gũtherera na hinya warĩo, nao andũ a Misiri makĩrĩũrĩra; no Jehova agĩthinĩkania andũ a Misiri iria-inĩ thĩinĩ. 28Namo maĩ magĩcoka, magĩthika ngari, na andũ arĩa maathiaga mahaicĩte mbarathi, o na mbũtũ yothe ya ita ya Firauni ĩrĩa yathiĩte iria-inĩ ĩmarũmĩrĩre; na hatiatigarire mũndũ o na ũmwe wao. 29No rĩrĩ, ciana cia Isiraeli ciagereire kũndũ kũũmũ gatagatĩ ka iria; namo maĩ magĩikara mehandĩte ta rũthingo guoko-inĩ kwao kwa ũrĩo, o na kwa ũmotho. 30Ũguo nĩguo Jehova aahonokirie Aisiraeli mũthenya ũcio, akĩmaruta moko-inĩ ma andũ a Misiri; nao andũ a Isiraeli makĩĩonera andũ a Misiri hũgũrũrũ-inĩ cia iria marĩ akuũ. 31Andũ acio a Isiraeli magĩkĩĩonera ũndũ ũcio mũnene wekĩtwo andũ a Misiri nĩ Jehova, magĩgĩĩtigĩra Jehova; ningĩ makĩĩhoka Jehova, o na ndungata yake Musa.

Currently Selected:

THAMA 14: OGKBIBLE

Highlight

Compare

Copy