THAMA 15

1 # Kũg 15.3. HĨNDĨ ĩo Musa, marĩ na ciana cia Isiraeli, makĩinĩra Jehova rũĩmbo rũrũ, makiuga atĩrĩ,

Nĩngũinĩra Jehova nĩ ũndũ gũtũũgĩrio nĩwe ũtũũgĩrĩtio;

Mbarathi nĩamĩikĩtie iria-inĩ hamwe na mũmĩhaici.

2 # Thab 118.14; Isa 12.2. Jehova nĩwe hinya wakwa, na nĩwe ndĩrĩinagĩra,

Ningĩ nowe ũ’honoketie.

Ũcio nĩwe Ngai wakwa, na nĩwe ndĩrĩgathaga;

Ũcio nĩwe Ngai wa awa, na nĩwe ndĩrĩnenehagia.

3Jehova nĩwe njamba ya ita;

Jehova nĩrĩo rĩĩtwa rĩake.

4Ngari cia Firauni, o na mbũtũ yake ya ita, nĩacikĩtie iria-inĩ thĩinĩ,

O nao anene ake arĩa athure nĩmarikĩtio Iria Itune, makorĩra kuo.

5Na rĩrĩ, maĩ ma kũndũ kũriku nĩmo mamathikĩte,

Nao marikĩte o ta ũrĩa ihiga rĩrikaga maĩ-inĩ, rĩgakinya o gĩtina-inĩ kĩamo.

6Guoko gwaku kwa ũrĩo, wee Jehova, nĩ kũnene mũno gũkagĩa hinya,

Guoko gwaku kwa ũrĩo, wee Jehova, nĩ gũthutha gũthuthangaga thũ.

7Nawe, tondũ wa ũrĩa ũnenehete ũgakĩrĩrĩria, nĩũkurumanagia na thĩ arĩa makwarahũkagĩra magũũkĩrĩre.

Wee nĩwe ũtũmaga mathũgũta maku moneke, makamacine o ta itira cia rũũa rũa ngano.

8Na ũndũ wa mĩhũmũ ya maniũrũ maku, maĩ nĩmaahaicanirio makĩigwo hĩba,

O namo maĩ maingĩ marĩa maathereraga makĩrũgama makĩĩhanda o ta hĩba ndaya,

Na rĩrĩ, o kũu rũrĩra-inĩ rũa iria, maĩ ma kũndũ kũriku makĩnyitithanio makĩmata.

9Nayo thũ ĩkiuga atĩrĩ,

Nĩngũmarũmĩrĩra na ihenya, nĩngũmakorerera, njoke ngayanie indo iria ndĩmatahĩte,

Namo maũndũ marĩa ndĩĩriragĩria nĩngamona harĩ o;

Ngacomora rũhiũ rũakwa, guoko gwakwa kũmanine biũ.

10Wee nĩwe watũmire rũhuho rũaku rũhurutane, narĩo iria rĩkĩmathika.

Maarikire maĩ-inĩ maingĩ ma iria, o ta ũrĩa kĩgera kĩa mbũrũbũrũ kĩrikaga maĩ thĩinĩ.

11Nĩ ngai ĩrĩkũ ya ngai iria ingĩ ĩhaana tawe, wee Jehova?

Nĩ ĩrĩkũ ĩhaana tawe, wee mũnene mũno, ũikaraga wamũrĩtwo mũno,

Na ũgetigĩrũo ũkĩgathagwo nĩ ũndũ wa magegania marĩa wĩkaga?

12Wee watambũrũkirie guoko gwaku kwa ũrĩo,

Thĩ nayo ĩkĩmameria biũ.

13Nawe, tondũ wa tha ciaku, nĩũtongoretie andũ arĩa wakũũrire,

Ũkamatongoria na hinya waku, ũkamatwara gĩikaro-inĩ gĩaku kĩamũre.

14Ndũrĩrĩ nĩciiguĩte ũhoro ũcio ikainaina,

Na andũ arĩa matũũraga bũrũri wa Filistia nĩmakinyĩrĩirũo nĩ ruo.

15Anene a Edomu o nao makĩgegeara;

O nacio njamba cia ita cia Moabi nĩigwatĩtwo nĩ kĩinaino;

Andũ othe a bũrũri wa Kanaani nĩ aiyũre nĩ maĩ nda.

16Nĩmakinyĩrĩirũo nĩ kĩmako, o na guoya

Tondũ wa ũnene wa guoko gwaku, maikarĩte o ta ihiga, matekwĩnyagunyia,

O nginya rĩrĩa andũ aku arĩa wegũrĩire, ũkĩmakũũra, maaringire.

17Wee nĩwe ũkamatonyia, ũmahande kĩrĩma-inĩ kĩa ũgai waku,

O handũ harĩa wee Jehova wĩthondekeire ha gũtũũra.

Naho nĩho haamũre, hagathondekwo harũmu na moko maku, wee Jehova.

18Jehova nĩwe ũgũtũũra athamakaga tene na tene.

19Nĩ gũkorũo mbarathi cia Firauni nĩciathiire ikĩrika iria-inĩ thĩinĩ irĩ hamwe na ngari ciake, o na andũ ake arĩa mathiaga mahaicĩte mbarathi, nake Jehova agĩcokania maĩ macio ma iria mamakorerere; no rĩrĩ, ciana cia Isiraeli ciagereire kũndũ kũũmũ gatagatĩ ka iria. 20Nake Miriamu, mwarĩ wa nyina na Haruni, ũrĩa warĩ mũnabii mũndũ-wa-nja, akĩoya kĩhembe gĩa kũinio na guoko; nao andũ-a-nja arĩa angĩ othe makiumagara, makĩmũrũmĩrĩra na ihembe ciao, makĩinaga. 21Nake Miriamu akaamũkagĩria akaina atĩrĩ,

Inĩrai Jehova nĩ ũndũ gũtũũgĩrio nĩwe ũtũũgĩrĩtio;

Mbarathi nĩamĩikĩtie iria-inĩ hamwe na mũmĩhaici.

22NAKE Musa agĩtongoria andũ a Isiraeli mathiĩ na mbere, magĩkiuma hau Iria Itune, magĩkinya werũ wa Shuri nao magĩthiĩ rũgendo rũa mĩthenya ĩtatũ werũ-inĩ o makĩagaga maĩ. 23Na maakinya Mara, makĩremwo nĩ kũnyua maĩ macio ma Mara, nĩ ũndũ maarĩ marũrũ; na nĩkĩo gĩatũmaga hetwo ũguo, Mara. 24Andũ magĩgĩtetia Musa, makiuga atĩrĩ, Tũgũkĩnyua kĩ? 25Nake agĩkaĩra Jehova; nake Jehova akĩmuonia mũtĩ, akĩũikia maĩ-inĩ, namo maĩ macio makĩagĩra. Ningĩ hau nĩho Jehova aamaheereire kĩrĩra kĩa watho wa kũrũmĩrĩrũo, o na mũtugo ũrĩa aatuĩte, na nĩho aamagereirie, 26akiuga atĩrĩ, Ũngĩkorũo nĩũrĩiguaga na kĩyo mũno mũgambo wa Jehova Ngai waku, na wĩkage maũndũ marĩa monagwo maagĩrĩire nĩwe, o na ũthikagĩrĩrie maathani make, o na ũmenyagĩrĩre irĩra ciothe cia watho wake wa kũrũmĩrĩrũo, niĩ na niĩ ndikamũrehithĩrie mũrimũ o na ũmwe wa ĩrĩa ndarehithĩirie andũ a Misiri; nĩ gũkorũo niĩ nĩ niĩ Jehova ũrĩa ũkuhonagia.

27Nao magĩkinya Elimu, kũrĩa kwarĩ ithima ikũmi na igĩrĩ cia maĩ, o na mĩtende mĩrongo mũgwanja; nao makĩamba hema ciao o hau, hakuhĩ na maĩ.

Currently Selected:

THAMA 15: OGKBIBLE

Highlight

Compare

Copy