THAMA 19

1Na rĩrĩ, mweri wa ĩtatũ wakinya gwata rĩrĩa ciana cia Isiraeli cioimire bũrũri wa Misiri-rĩ, mũthenya o ro ũcio noguo ciakinyire werũ wa Sinai. 2Ningĩ cioima Refidimu igĩkinya werũ wa Sinai-rĩ, igĩkĩamba hema ciacio werũ-inĩ ũcio; kũu nĩkuo Aisiraeli maakĩambire hema ciao, mang’etheire kĩrĩma kĩrĩa kĩrĩ kuo. 3Nake Musa akĩambata kĩrĩma-inĩ kĩu agĩthiĩ he Ngai, nake Jehova akĩmwĩta arĩ kĩrĩma-inĩ kĩu, akiuga atĩrĩ, Thiĩ warie na andũ a nyũmba ya Jakubu, wĩre ciana cia Isiraeli ũũ: 4Atĩrĩrĩ, nĩmweoneire maũndũ marĩa ndekire andũ a Misiri, na mũkĩona ũrĩa ’haana ta ndĩmũkuuĩte inyuĩ na mathagu ma nderi, ngĩmũrehe gũkũ kũrĩ niĩ, o niĩ mwene. 5#1 Pet 2.9.#Gũcok 4.20; 7.6; 14.2; 26.18; Tit 2.14.Tondũ ũcio, rĩu mũngĩathĩka mũigue mũgambo wakwa na ma o ma, na mũmenyagĩrĩre kĩrĩkanĩro giitũ na inyuĩ, ti-itherũ nĩmũgũtuĩka ta mũrĩ kĩndũ gĩakwa kĩĩ bata mũno kĩamũrĩtwo gũkĩra andũ a ndũrĩrĩ iria ingĩ ciothe; nĩ ũndũ thĩ yothe nĩ yakwa; 6#Kũg 1.6; 5.10.na nĩngũmũtua rũciaro rũa athĩnjĩri-Ngai, na ndĩmũtue rũrĩrĩ rũamũre. Icio nĩcio ciugo iria ũkwĩra ciana cia Isiraeli. 7Nake Musa agĩĩta athuri a andũ acio, akĩmahe ũhoro ũcio wothe o ta ũrĩa Jehova aamwathĩte. 8Nao andũ acio magĩĩtĩkanĩria othe hamwe, makiuga atĩrĩ, Maũndũ macio mothe Jehova oigĩte, nomo tũgwĩka. Nake Musa agĩkĩhe Jehova ũhoro ũcio warĩtio nĩ andũ acio. 9Nake Jehova akĩĩra Musa ũũ: Atĩrĩrĩ, ngũũka harĩ wee ndĩ itu-inĩ ithimbu mũno, nĩ getha andũ acio maigue ngĩaria nawe, nĩguo mehoke atĩ ndeto iria waragia hingo ciothe nĩ cia ma. Nake Musa agĩkĩhe Jehova ũhoro ũrĩa waarĩtio nĩ andũ acio. 10Nake Jehova akĩĩra Musa atĩrĩ, Thiĩ harĩ andũ acio ũmaamũre ũmatherie ũmũthĩ, o na rũciũ, na mathambie nguo ciao, 11naguo mũthenya wa ĩtatũ magakorũo mehaarĩirie; nĩ gũkorũo mũthenya ũcio wa ĩtatũ Jehova nĩagaikũrũka kĩrĩma-inĩ gĩa Sinai igũrũ, akĩonagwo nĩ andũ othe. 12#Ahib 12.18-20.Nawe nĩũgekĩrĩra andũ mũhaka ũũthiũrũrũkĩrie kĩrĩma gĩothe, ũkĩmeraga atĩrĩ, Wĩmenyererei mũtikaambate kĩrĩma-inĩ, o na kana mũhutie mũhaka-inĩ ũcio; mũndũ o wothe ũrĩa ũkahutia kĩrĩma-rĩ, ndarĩ hingo atakoragwo, 13no mũndũ ũcio ndakahutio nĩ mũndũ o na ũrĩkũ na guoko, tiga o ahũrũo na mahiga nyuguto kana arathwo; o na kũngĩkorũo nĩ nyamũ kana mũndũ-rĩ, itikanarekwo itũũre muoyo. Na rĩrĩ, hĩndĩ ĩrĩa coro wa rũhĩa rũa ndũrũme ũrĩgamba, nĩguo andũ marĩkuhĩhĩria kĩrĩma. 14Musa agĩgĩikũrũka akiuma kĩrĩma-inĩ, agĩthiĩ harĩ andũ acio, akĩmaamũra akĩmatheria; nao magĩthambia nguo ciao. 15Agĩkĩmera atĩrĩ, Mwĩthagathagei, nĩ getha mũgakorũo mwĩhaarĩirie mũthenya wa ĩtatũ; mũtigathengerere mũndũ-wa-nja. 16#Kũg 4.5.#Gũcok 4.11,12.Na gũgĩkinya atĩrĩ, atĩ mũthenya wa ĩtatũ wakinya, o gwakĩa, gũkĩgĩa ngwa nyingĩ o na heni, narĩo itu ithimbu mũno rĩkĩoneka kĩrĩma igũrũ, na mũgambo wa coro ũkĩiguwo ũnenehete mũno; na andũ othe arĩa maaikarĩte kĩraaro-inĩ makĩinaina. 17Nake Musa akĩumagaria andũ, akĩmaruta hau kĩraaro-inĩ magatũngane na Ngai; magĩkĩrũgama o kũu mũhuro wa kĩrĩma.

18Na rĩrĩ, kĩrĩma kĩu gĩa Sinai gĩothe gĩkĩiyũrũo nĩ ndogo, nĩ gũkorũo Jehova nĩaaikũrũkĩte agaikara igũrũ rĩakĩo, arĩ thĩinĩ wa mwaki; nayo ndogo ĩo ĩgĩtoga na igũrũ o ta ya icua inene, nakĩo kĩrĩma gĩothe gĩgĩthingitha o mũno mũno. 19Na rĩrĩ, rĩrĩa mũgambo wa coro wakĩrĩrĩirie kũneneha, Musa agĩkĩaria, nake Ngai akĩmũcokeria na mũgambo ũkũiguwo. 20Nake Jehova agĩikũrũka agĩkinya o igũrũ gacũmbĩrĩ ga kĩrĩma kĩu gĩa Sinai; ningĩ Jehova agĩgĩĩta Musa kũu gacũmbĩrĩ-inĩ ga kĩrĩma, nake Musa agĩkĩambata kuo. 21Nake Jehova akĩĩra Musa atĩrĩ, Ikũrũka ũgataare andũ matigetũrĩkĩrie njĩra moke kũrĩ Jehova macũthĩrĩrie, na aingĩ ao hihi maninwo. 22O nao athĩnjĩri-Ngai arĩa marĩkuhĩhĩria Jehova nĩmetherie, ndakamaguthũkĩre amanine. 23Nake Musa akĩĩra Jehova atĩrĩ, Andũ matingĩhota kwambata kĩrĩma gĩkĩ gĩa Sinai, tondũ nĩwatũtaarire mũno, ũgĩtwĩra atĩrĩ, Ĩkĩrai mĩhaka mũrigicĩrie kĩrĩma, mũkĩamũre mũgĩtherie. 24Nake Jehova akĩmwĩra atĩrĩ, Thiĩ ũikũrũke na ũcoke wambate, na mũũke na Haruni; no rĩrĩ, menya ũreke athĩnjĩri-Ngai o na andũ arĩa angĩ metũrĩkĩrie njĩra maambate gũkũ kwĩ Jehova, nĩguo hihi ndakamaguthũkĩre amanine. 25Musa agĩgĩikũrũka harĩ andũ, akĩmahe ũhoro ũcio.

Currently Selected:

THAMA 19: OGKBIBLE

Highlight

Compare

Copy