THAMA 21

1Na rĩrĩ, matuĩro marĩa ũkahe andũ nĩguo mamarũmagĩrĩre cira-inĩ nĩ maya, atĩrĩ,

2 # Alaw 25.39-46. Ũngĩgũra ngombo ya Mũhibirania, nĩĩgũtungatagĩre mĩaka ĩtandatũ; na mwaka wa mũgwanja wakinya, nĩĩkoima gwaku ĩĩthiĩre ĩtekũruta kĩndũ o na kĩ. 3Na rĩrĩ, ĩngĩkorũo yokire o ro ũguo ĩrĩ iiki, nĩĩthiĩre o ro ũguo ĩrĩ iiki; no rĩrĩ, ĩngĩkorũo nĩyahikanĩtie, nĩĩthiĩ na mũka. 4Na ĩngĩkorũo yaheirũo mũka nĩ mwathi wayo, nake mũka ũcio akorũo nĩamiciarĩire tũhĩĩ, kana tũirĩtu, mũka ũcio na ciana ciake othe marĩtuĩkaga a mwathi wa mũka ũcio, nayo ngombo ĩo ĩĩthiĩre o ro ũguo ĩrĩ iiki. 5No rĩrĩ, ngombo ĩo ĩngiumbũra na ma, yuge atĩrĩ, Nĩnyendete mwathi wakwa, na mũtumia wakwa, o na ciana ciakwa, ndingĩĩtĩkĩra gũthiĩ o ro ũguo nduĩke mwĩathi, 6hĩndĩ ĩo mwathi wayo amĩtware harĩ aciri, acoke amĩkuhĩhĩrie mũrango-inĩ, kana hingĩro-inĩ yaguo, nake mwathi wayo amĩtũre gũtũ na mũkuha; thutha wa ũguo ĩcoke ĩtũũre ĩrĩ ngombo yake ya kũmũtungatĩra tene na tene.

7Na rĩrĩ, mũndũ angĩendia mwarĩ, agatuĩke ngombo ya mũndũ ũngĩ-rĩ, ngombo ĩo ya mũirĩtu ndĩkoima kwa mũndũ ũcio ta ũrĩa ngombo cia arũme ciĩkaga. 8Ĩngĩkorũo ndĩgũkenia mwathi wayo ũrĩa wamĩĩyũrĩirie ĩtuĩke mũtumia wake-rĩ, mũndũ ũcio nĩakareka ĩkũũrũo, no ndangĩhota kũmĩenderia andũ a kũngĩ, kuona atĩ nĩamĩhenetie. 9Na angĩkorũo ekũmĩũrĩria mũriũ-rĩ, nĩamĩĩkage o ta ũrĩa andũ maagĩrĩirũo nĩ gwĩkaga airĩtu ao o ene. 10Na angĩĩcarĩria mũtumia ũngĩ amũgũre-rĩ, ndakananyihanyihĩrie ũcio wa mbere irio ciake, o na kana nguo, kana kũmwĩka ta ũrĩa aagĩrĩirũo nĩ gwĩkwo. 11Na angĩaga kũmwĩka maũndũ macio matatũ-rĩ, nĩoimage gwake agethiĩra o ro ũguo hatarĩ kĩndũ o na kĩ ekũrutĩrũo, o na hatarĩ mbia. 12#Alaw 24.17.Mũndũ ũrĩa ũngĩgũtha ũrĩa ũngĩ akue-rĩ, no mũhaka o nake oragwo. 13#Ndar 35.10-34; Gũcok 19.1-13; Josh 20.1-9.Na rĩrĩ, mũndũ angĩkorũo ti kuoha oheirie ũrĩa ũngĩ njĩra-inĩ, no gũtuĩke nĩ Ngai ũmũtwarĩrĩire moko-inĩ make-rĩ, nĩ niĩ ngakuonereria harĩa mũndũ ũcio ũũraganĩte ekũũrĩra. 14No rĩrĩ, mũndũ angĩkuhĩhĩria ũrĩa ũngĩ na ũhinga amũũrage na rũnano-rĩ, o na arĩ kĩgongona-inĩ gĩakwa nĩũkamũruta ho, nĩ getha o nake akue.

15Na rĩrĩ, mũndũ angĩgũtha ithe, kana nyina, ndarĩ hingo atakoragwo.

16 # Gũcok 24.7. Ningĩ mũndũ angĩiya mũndũ ũngĩ akamwendie, kana onwo amũnyitĩte-rĩ, ndarĩ hingo atakoragwo.

17 # Alaw 20.9; Mat 15.4; Mar 7.10. Na mũndũ angĩruma ithe, kana nyina, ndarĩ hingo atakoragwo.

18Ningĩ andũ mangĩtetania, na ũmwe wao agũthe ũrĩa ũngĩ na ihiga kana ngundi, na mũgũthwo aage gũkua, no arũare, akome ũrĩrĩ, 19na hihi thutha-inĩ akahota gũũkĩra etware etirimĩtie na mũtirima-rĩ, hĩndĩ ĩo mũmũgũthi no kũrekio akarekio; no nĩakamũrĩha ihinda rĩake rĩrĩa rĩũrĩte, na amũrũarie o nginya rĩrĩa akahona o kũhona.

20Ningĩ mũndũ angĩgũtha ngombo yake ya mũndũ mũrũme kana ya mũirĩtu na rũthanju, nayo ĩkue o ĩkĩhũrũo, ndarĩ hingo atakaherithio. 21No rĩrĩ, o na kũngĩkorũo nĩ ũguo-rĩ, ngombo ĩo ĩngĩnina mũthenya ũmwe, kana ĩĩrĩ, ĩĩ muoyo, mũndũ ũcio nĩatige kũherithio, nĩ ũndũ ndungata ĩo yumĩte mbia ciake.

22Ningĩ arũme mangĩtetania, na hihi magũthe mũndũ-wa-nja mũritũ mamũgere ngero, nake ahune, no haage ũũru ũngĩ ũkuoneka-rĩ, ndarĩ hingo atakaruta thĩnjo, o ta ũrĩa mũrũme wa mũka ũcio angĩmwĩtia, na arĩhe o ta ũrĩa aciri matuĩte. 23No rĩrĩ, hangĩoneka ũũru ũngĩ-rĩ, no mũhaka muoyo uumage muoyo, 24#Alaw 24.19,20; Gũcok 19.21; Mat 5.38.na riitho riumage riitho, na igego riumage igego, na guoko kuumage guoko, o na kũgũrũ kuumage kũgũrũ, 25ningĩ-rĩ, ihĩa nĩriumage ihĩa, na itihia riumage itihia, o na mũtunda uumage mũtunda.

26Ningĩ mũndũ angĩgũtha ngombo yake ya mũndũ mũrũme kana ya mũirĩtu riitho rĩtũrĩke, nĩakamĩrekia ĩĩthiĩre o ro ũguo, nĩ ũndũ wa riitho rĩu rĩayo. 27Ningĩ angĩgũtha ngombo yake ya mũndũ mũrũme kana ya mũirĩtu igego, rĩkũũrũke, nĩakamĩrekia ĩĩthiĩre o ro ũguo nĩ ũndũ wa igego rĩu rĩayo.

28Ningĩ ndegwa ĩngĩtheca mũndũ mũrũme kana mũndũ-wa-nja na rũhĩa, nake akue, ndegwa ĩo ndĩrĩ hingo itarĩhũragwo na mahiga nyuguto o nginya ĩkue, na nyama ciayo itikarĩo; no rĩrĩ, mwene ndegwa ĩo nĩagatuwo atĩ ndehĩtie. 29No ndegwa ĩo ĩngĩkorũo nĩĩtũire ithecanaga kuuma o tene, na mwene yo akorũo nĩaheetwo ũhoro ũcio, na ndamĩhingĩre, nayo ĩkorũo yũragĩte mũndũ mũrũme kana mũndũ-wa-nja, nĩĩkahũrũo na mahiga nyuguto o nginya ĩkue, na mwene yo o nake oragwo. 30No angĩĩtio mbia cia ũkũũri-rĩ, nĩarute o ta ũrĩa atuĩrĩirũo akũũre muoyo wake. 31Ningĩ ĩngĩkorũo nĩ mũrũ wa mũndũ ĩthecete, o na kana mwarĩ, mwene yo agekwo o ta ũrĩa cira ũcio ũtuĩtwo. 32No rĩrĩ, ndegwa ingĩtheca ngombo ya mũndũ mũrũme, o na kana ya mũirĩtu, mwene yo akahe mwathi wacio cekeri mĩrongo ĩtatũ cia betha, nayo ndegwa ĩo ĩhũrũo na mahiga nyuguto o nginya ĩkue.

33Ningĩ mũndũ angĩkunũra irima rĩake rĩa maĩ na ndarĩkunĩke, kana enje irima na ndarĩhumbe, nayo ndegwa kana ndigiri ya mũndũ ĩgũe thĩinĩ, 34mwene irima rĩu nĩ kũrĩha akarĩha, ahe mwene yo mbia, nayo nyamũ ĩo ĩtuĩke yake.

35Ningĩ ndegwa ya mũndũ ĩngĩgera ya ũrĩa ũngĩ ngero o nginya ĩkue-rĩ, nĩmendie ndegwa ĩo ĩĩ muoyo, magayane kĩrĩa yoima; o nayo ĩo ĩkuĩte mamĩatũrane. 36No rĩrĩ, kũngĩkorũo nĩkũmenyetwo atĩ ndegwa ĩo nĩĩtũire ĩhũranaga, na mwene yo akaaga kũmĩhingĩra-rĩ, akamũrĩha na ndegwa ĩngĩ, nayo ĩo ĩkuĩte ĩtuĩke yake.

Currently Selected:

THAMA 21: OGKBIBLE

Highlight

Compare

Copy