THAMA 27

1Nakĩo kĩgongona-rĩ, nĩũgagĩthondeka na mbaũ cia mũtĩ ta mũgaa, na kũraiha gwakĩo gũtuĩke mĩkono ĩtano, o nakuo kwarama gwakĩo gũtuĩke mĩkono ĩtano; mĩena yothe ya kĩgongona kĩu ĩiganane, gĩtuĩke gĩĩ thikwea, nakuo kũraiha na igũrũ gwakĩo gũtuĩke mĩkono ĩtatũ. 2Ningĩ hĩa ciakĩo ũcithondeke igũrũ tuune-inĩ tuothe tũna twakĩo, nacio hĩa icio ituĩke kĩndũ o ro kĩmwe nakĩo; na ũkĩhumbe igũrũ guothe na gĩcango. 3Ningĩ ũgĩthondekere nyũngũ cia kũrutaga mũhu wakĩo, na ihakũri ciakĩo, na mbakũri ciakĩo, na njibe ciakĩo, o na ngĩo ciakĩo cia mwaki; indo ciothe cia kĩgongona-rĩ, ũgacithondeka na gĩcango gĩtheri. 4Ningĩ ũgĩthondekere kĩrũgara gĩa gĩcango, na ũgĩĩkĩre icũhĩ inya cia gĩcango tuune-inĩ tũna twakĩo. 5Ũcoke wĩkĩre kĩrũgara kĩu mũhurahuro wa mũnyamũ ũrĩa ũrigicũkĩte kĩgongona na kũu thĩ, gĩcoke kĩambate gĩkinye o igũrũ gatagatĩ ga kĩgongona. 6Ningĩ wacũhĩrie kĩgongona kĩu mĩtĩ mĩraya ya mũthemba ta mũgaa, na ũmĩhumbe igũrũ guothe na gĩcango. 7Nayo mĩtĩ ĩo mĩraya ĩtonyio icũhĩ-inĩ, ĩikarage mĩena-inĩ yerĩ ya kĩgongona kĩu hĩndĩ ĩrĩa gĩgũkuuwo. 8Ningĩ ũgathondeka kĩgongona kĩu na mbaũ mĩena yothe, nĩguo kĩgĩe irima gatagatĩ-inĩ gacio; o ta ũrĩa wonetio kĩrĩma-inĩ-rĩ, o ũguo noguo andũ magagĩthondeka.

9Ningĩ ũgathondeka handũ hatuĩke nja ya gĩikaro kĩu, nayo nja ĩo ĩirigwo na ciandarũa igetetwo cia gatani ya ndigi njeke ciogothetwo, nakuo kwarama kwa mũkĩgiĩ kwa iria igwĩkĩrũo mwena wa gũthini, ũcio ũrorete gũthini, gũtuĩke mĩkono igana; 10ningĩ mwena ũcio ũgĩe itugĩ mĩrongo ĩĩrĩ, na makinya ma cio mĩrongo ĩĩrĩ ma gĩcango na nĩngĩ atĩrĩ, tũhocio twa itugĩ icio, o natuo tũthanju twacio twa gũcinyitithania, tũtuĩke twa betha. 11O ũguo taguo mwena wa gathigathini ũwĩkĩre ciandarũa igetetwo; nakuo kwarama gwacio kwa mũkĩgiĩ gũtuĩke mĩkono igana nacio itugĩ cia mwena ũcio ituĩke mĩrongo ĩĩrĩ, na makinya ma cio mĩrongo ĩĩrĩ ma gĩcango; natuo tũhocio twa itugĩ icio, na tũthanju twacio twa gũcinyitithania tũtuĩke twa betha. 12Ningĩ hagĩe ciandarũa ingĩ igetetwo mwena wa ithũĩro, nakuo kwarama gwacio kwa mũkĩgiĩ gũtuĩke mĩkono mĩrongo ĩtano o ta ũrĩa nja ĩo yaramĩte; nacio itugĩ cia ciandarũa icio ituĩke ikũmi, o na makinya ma cio ikũmi. 13Nakuo kwarama kwa nja ĩo mwena wa irathĩro, o ũcio ũrorete irathĩro, gũtuĩke mĩkono mĩrongo ĩtano. 14Nakuo kwarama kwa mũkĩgiĩ gwa ciandarũa cia mwena ũmwe wa mũromo wa nja ĩo gũtuĩke mĩkono ikũmi na ĩtano, na itugĩ ciacio ithatũ, na makinya ma cio matatũ. 15O naguo mwena ũrĩa ũngĩ hagĩe ciandarũa ingĩ, nakuo kwarama gwacio kwa mũkĩgiĩ gũtuĩke mĩkono ikũmi na ĩtano, na itugĩ ciacio ithatũ, na makinya ma cio matatũ. 16Ningĩ mũromo-inĩ wa nja ĩo hagĩe tama wa kweheheragio, nakuo kwarama kwaguo gũtuĩke mĩkono mĩrongo ĩĩrĩ, naguo ũtumwo nĩ mũndũ ũrĩa mũũhĩgĩrĩru wĩra ũcio, aũtume na ndigi cia rangi wa bururu, na wa zambarau, na wa gakarakũ, na gatani ya ndigi njeke ciogothetwo. Nacio itugĩ ciaguo ituĩke inya, na makinya ma cio mana. 17Ningĩ itugĩ ciothe iria ikũrigicĩria nja ĩo inyitithanio na tũthanju twa betha, na tũhocio twacio tũtuĩke twa betha, na makinya ma cio matuĩke ma gĩcango. 18Na ũraihu wa nja ĩo ũtuĩke mĩkono igana, na kwarama kwayo gũtuĩke mĩkono mĩrongo ĩtano, na ĩrũngare o wega, naguo ũraihu wa rũirigo rũu rũayo wa na igũrũ ũtuĩke mĩkono ĩtano, naruo ruothe rũtuĩke rũa gatani ya ndigi njeke ciogothetwo; namo makinya maruo matuĩke ma gĩcango. 19Nacio indo ciothe iria irutagwo wĩra nacio rĩakĩro-inĩ rĩa hema ĩo, o na higĩ ciayo ciothe, o nacio higĩ ciothe iria irutagwo wĩra nacio hau nja yayo, icio ciothe igatuĩka cia gĩcango.

20Na rĩrĩ, atha ciana cia Isiraeli ikũrehere maguta makembu mũno ma ndamaiyũ hũre na mũũthĩ, nĩ ũndũ wa ũtheri, nĩ getha maakagio, hagĩe tawa ũgwakana hĩndĩ ciothe. 21Na rĩrĩ, nĩ Haruni na ariũ ake magatabarĩra ũndũ ũcio, nĩguo wĩkagwo mbere ya Jehova kuuma hwaĩ-inĩ nginya o rũcinĩ hema-inĩ-ya-gũtũnganwo thĩinĩ, mwena wa na nja wa gĩtama kĩrĩa gĩa kũhakania, o kĩu gĩcuurĩtio nyumĩrĩra ya ithandũkũ rĩa ũira; naguo ũndũ ũcio ũtuĩke kĩrĩra kĩa watho wa kũrũmagĩrĩrũo tene na tene njiaro-inĩ ciothe cia ciana cia Isiraeli.

Currently Selected:

THAMA 27: OGKBIBLE

Highlight

Compare

Copy