THAMA 28

1Na rĩrĩ, wĩreharehere Haruni mũrũ wa nyũkwa hakuhĩ nawe, hamwe na ariũ ake, ũmwamũranie na ciana cia Isiraeli, nĩguo andungatagĩre, anyite wĩra wa mũthĩnjĩri-Ngai, naguo ũguo nĩ ta kuuga Haruni, na ariũ ake Nadabu, na Abihu, na Eleazaru, na Ithamaru. 2Ningĩ ũtumithĩrie Haruni mũrũ wa nyũkwa nguo nyamũre cia kũmũnenehagia, o na cia kũmũthakaragia. 3Aria na andũ othe arĩa me na ũũgĩ ngoro, o arĩa njiyũrĩtie ngoro ya ũũgĩ, nĩguo matume nguo icio cia Haruni, nĩguo aamũrũo atherio, nĩ getha andungatagĩre wĩra-inĩ ũcio wa mũthĩnjĩri-Ngai. 4Nacio nguo iria andũ acio magatuma nĩ ici: nĩ gakuo ga gĩthũri, na ebodi, o na nguo ĩngĩ ndaya, na kanjũ ũrĩa ũgemetio wega wĩ marooro, na kĩremba kĩa mũtwe, o na mwĩhotoro; magagĩtumĩra Haruni, mũrũ wa nyũkwa, nguo nyamũre, me na ariũ ake, nĩ getha andungatagĩre wĩra-inĩ ũcio wa mũthĩnjĩri-Ngai. 5Nao makaruta wĩra ũcio na thahabu, na ndigi cia rangi wa bururu, na wa zambarau, na wa gakarakũ, o na gatani ya ndigi njeke ciogothetwo.

6Nayo ebodi makamĩtuma na ndigi cia thahabu, na cia rangi wa bururu, na wa zambarau, na wa gakarakũ, na gatani ya ndigi njeke ciogothetwo; naguo wĩra ũcio ũrutwo nĩ mũndũ mũũhĩgĩrĩru wĩra ũcio. 7Nĩ wega ebodi ĩo ĩkagĩa na ngwa igĩrĩ cia kũmĩnyitithanĩria ciande-inĩ, ĩgwatanio mĩthia yerĩ yayo nacio, nĩ getha ndamĩ ciayo cierĩ inyitane. 8Naguo mwĩhotoro wayo ũrĩa ũgemetio wega wa kũmĩnyitia wa igũrũ rĩayo, ũthondekwo o ũndũ ũmwe na ebodi ĩo yo nyene, na ũtumanĩrio nayo; ũtuĩke o wa ndigi cia thahabu, na cia rangi wa bururu, na wa zambarau, na wa gakarakũ, na gatani ya ndigi njeke ciogothetwo. 9Ningĩ woe tũhiga twĩrĩ twa onigithi, ũtũkurure igũrũ rĩatuo marĩĩtwa ma ciana cia Isiraeli; 10marĩĩtwa matandatũ ma cio makururũo kahiga-inĩ kamwe, namo marĩa maatigara matandatũ ũmakurure kahiga-inĩ kau kangĩ, o ta ũrĩa mathingataine iciarĩro-inĩ. 11Tũhiga tũu twerĩ nĩũgatũkururithia marĩĩtwa ma ciana cia Isiraeli o ta ũrĩa matariĩ, tũkururũo nĩ mũndũ mũũhĩgĩrĩru wĩra ũcio, na ningĩ tũkururũo o ta ũrĩa kanyamũ ga gwĩkĩra rũũri gekagwo; o na ũtwĩkĩre tũkonyo-inĩ tũgemie twa thahabu. 12Natuo tũhiga tũu twerĩ ũtwĩkĩre ngwa-inĩ icio igĩrĩ cia kũnyitithanĩria ebodi ĩo ciande-inĩ, nĩ getha tũhiga tũu tũtuĩke twa gũtũma ciana cia Isiraeli iririkanwo; nake Haruni athiage mbere ya Jehova akuuĩte marĩĩtwa ma cio me ciande-inĩ ciake cierĩ ma gũtũmaga iririkanagwo.

13Ningĩ ũgathondeka tũkonyo tũgemie twa thahabu, 14na irengeri igĩrĩ cia thahabu ĩrĩa therie mũno, ithondeketwo ta mĩhĩndo mĩceke mĩogothe; nacio irengeri icio itariĩ ta mĩhĩndo mĩogothe ũcinyitithanie na tũkonyo tũu tũgemie. 15Ningĩ ũgathondeka gakuo ga ituĩro rĩa cira ga gĩthũri; nako gathondekwo nĩ mũtumi mũũhĩgĩrĩru wĩra ũcio, ũgagathondekithia na ndigi cia thahabu, na cia rangi wa bururu, na wa zambarau, na wa gakarakũ, o na gatani ya ndigi njeke ciogothetwo, nĩguo gathiĩ o ũndũ ũmwe na ebodi. 16Nako gathunanĩrũo kerĩ, na kagĩe thikwea, na kũraiha gwako gũtuĩke irata rĩmwe, o nakuo kwarama gwako gũtuĩke o ro ũguo irata rĩmwe. 17Na ũgagathecerera tũhiga twa goro tũkonyo-inĩ twatuo ũtũnyitithanie nako, wĩkĩre mĩhari ĩna ya tũhiga tũu; mũhari wa mbere-rĩ, wĩkĩrũo kahiga ka wakiki ũrĩa mũtune, na ka yakuti ya ngoikoni, o na karĩa getagwo baregathu, tũu tũtuĩke twa mũhari ũcio wa mbere; 18o naguo mũhari wa kerĩ wĩkĩrũo kahiga ga thumarati, na ka yakuti ya rangi wa bururu, o na ka arimathi; 19o naguo mũhari wa gatatũ, wĩkĩrũo kahiga ka wakiki wa rangi wa bururu, na ka yacimu, na ka amethuthito; 20o naguo mũhari wa kana wĩkĩrũo kahiga ga thumarati ĩrĩa theru, na ka onigithi, o na ka njathibi. Ningĩ tũhiga tũu tũthecererũo tũkonyo-inĩ twa thahabu tũgemie, tũnyitithanio natuo. 21O natuo tũhiga tũu tũiganane na marĩĩtwa ma ciana cia Isiraeli tũtuĩke ikũmi na twĩrĩ, o ta ũrĩa marĩĩtwa ma cio maigana; na ningĩ tũhiga tũu tũkururũo o ta ũrĩa kanyamũ ga gwĩkĩra rũũri gekagwo; kahiga o kahiga thĩinĩ wa tũhiga tũu, gakururũo rĩĩtwa igũrũ rĩako, o ta ũrĩa marĩĩtwa ma mĩhĩrĩga ĩo ikũmi na ĩĩrĩ ya ciana cia Isiraeli matariĩ. 22Nako gakuo kau ga gĩthũri, ũgagathondekera irengeri itariĩ ta mĩhĩndo mĩceke, ciogothetwo cia thahabu therie mũno. 23Ningĩ ũgekĩra gakuo-inĩ kau icũhĩ igĩrĩ cia thahabu, ciĩkĩrũo mĩthia-inĩ yerĩ yako. 24Nacio irengeri icio cierĩ njogothe cia thahabu, ũgaciĩkĩra icũhĩ-inĩ icio cierĩ mĩthia-inĩ ya gakuo kau. 25O nayo mĩthia ĩrĩa ingĩ yerĩ ya irengeri icio njogothe, ũkamĩnyitithania na tũkonyo tũu twerĩ tũgemie, ũmĩĩkĩre ngwa-inĩ cia kũnyitithanĩria ebodi ciande-inĩ, o mwena wa na mbere wayo. 26O na ningĩ ũgathondeka icũhĩ ingĩ igĩrĩ cia thahabu, ũciĩkĩre mĩthia-inĩ yerĩ ya mĩena ya gakuo kau ga gwĩkĩrũo gĩthũri, o mwena ũrĩa ũng’ethanĩire na ebodi na thĩinĩ. 27O na ningĩ ũgathondeka icũhĩ o ingĩ igĩrĩ cia thahabu, ũciĩkĩre ngwa-inĩ icio cierĩ cia ebodi ĩo mũhurahuro wa icio ingĩ o mwena-inĩ wa na mbere wayo, hakuhĩ na inyitithanĩrio, igũrũ rĩa harĩa mwĩnyitio ũrĩa ũgemetio wega wa ebodi ũrĩ. 28Nako gakuo kau ga gĩthũri kanyitithanio na ebodi, inyitithanio na karũkwa ka rangi wa bururu, na ũndũ wa kuohania icũhĩ cia gakuo kau na iria itumĩrĩirũo ebodi-inĩ, nĩ getha karũkwa kau gaikarage kaigaigũrũ ka harĩa mwĩnyitio ũcio ũgemetio wega wa ebodi ũrĩ, o na gakuo kau ga gĩthũri gatigatigithanio na ebodi. 29Nake Haruni agĩthiĩ gũtonya handũ harĩa hatheru mũno, athiage akuuĩte marĩĩtwa ma ciana cia Isiraeli me gĩthũri-inĩ gĩake, gakuo-inĩ kau ga gũtuaga cira ga gĩthũri, nĩguo iririkanagwo nĩ Jehova hĩndĩ ciothe. 30#Ndar 27.21; Gũcok 33.8; Ezar 2.63; Neh 7.65.Ningĩ ũgekĩra Urimu na Thumimu gakuo-inĩ kau ga gũtuaga cira, ga gĩthũri; nacio ciikarage irĩ gĩthũri-inĩ kĩa Haruni agĩthiĩ gũtonya mbere ya Jehova; ũguo noguo Haruni agathiaga mbere ya Jehova hĩndĩ ciothe akuuĩte ũhoro wa gũtuĩra ciana cia Isiraeli cira ũrĩ gĩthũri-inĩ gĩake.

31Nayo nguo ĩo ndaya ya kwĩhumbanĩrio na ebodi ũkamĩtũma ya rangi wa bururu yothe. 32Na igĩe irima gatagatĩ kayo rĩa gũtonyagĩria mũtwe, na ĩtumwo ĩrĩ o ũndũ ũmwe yothe; ningĩ ĩrigicĩrio gatamĩ irima-inĩ rĩu gatumanio nayo o ta ũrĩa irima rĩa nguo ya gĩthũri ya gwĩkĩrũo mbaara-inĩ ĩtariĩ, nĩ getha ndĩgatembũke. 33Na rĩrĩ, nĩũkamĩgemia mwena wa mũhuro wayo, ũmĩrigicĩrie mĩthia-inĩ guothe tũcunjura twa rangi wa bururu, na wa zambarau, o na wa gakarakũ, tũtariĩ ta matunda ma makomamanga; na ningĩ wĩkĩre njingiri cia thahabu gatagatĩ-inĩ gatuo ũrigicĩrie guothe, 34ũthiĩ ũkĩhakanagia o njingiri ĩmwe ya thahabu na ikomamanga rĩmwe, o njingiri ĩmwe ya thahabu na ikomamanga rĩmwe, irũmanĩrĩre o ro ũguo, irigicĩrie mwena wa mũhuro wa nguo ĩo ndaya. 35Nayo nguo ĩo ĩkehumbagwo nĩ Haruni akĩruta wĩra wake wa gũtungatĩra Jehova; nacio njingiri icio ciiguagwo ikĩgamba agĩtonya handũ harĩa hatheru mũno mbere ya Jehova, o na akiuma ho, nĩguo ndagakue.

36Ningĩ ũgathondeka gathuma ga thahabu therie mũno, ũgakurure igũrũ rĩako ciugo ici: ŨYŨ NĨWE MŨTHERU WAMŨRĨIRŨO JEHOVA; nacio ciugo icio ikururũo o ta ũrĩa kanyamũ ga gwĩkĩra rũũri gekagwo, 37ũgatumĩrĩre rũkwa-inĩ rũa rangi wa bururu, gaikare kĩremba-inĩ kĩa Haruni, mwena wa na mbere wa kĩremba kĩu gĩake. 38Nako gathuma kau gaikarage thiithi wake, nĩguo akuuage ũũru ũrĩa muoneku ũkoniĩ indo iria ciamũrĩtwo, iria ciana cia Isiraeli ciamũrĩire Ngai ituĩke iheo ciacio nyamũre; nako gatũũre gekĩrĩtwo thiithi wake hĩndĩ ciothe, nĩ getha iheo icio ciĩtĩkĩrĩkage nĩ Jehova irĩ mbere yake. 39Ningĩ kanjũ wa Haruni ũkaũtuma wĩ marooro wa gatani ĩrĩa njega; na ũmũthondekere kĩremba gĩa gatani ĩrĩa njega mũno; o na ũmũthondekĩthĩrie mwĩhotoro, ũthondekwo nĩ mũndũ ũrĩa mũũhĩgĩrĩru wĩra ũcio. 40O nao ariũ a Haruni ũkamathondekĩthĩria makanjũ, na mĩĩhotoro, o na ũmathondekĩthĩrie tũkũbia, nacio nguo icio ituĩke cia kũmanenehagia, o na cia kũmathakaragia. 41Na rĩrĩ, nguo icio nĩũgacihumba Haruni, mũrũ wa nyũkwa, na ariũ ake me hamwe nake; ũcoke ũmaitĩrĩrie maguta, ũmaamũre ũmatherie, nĩguo mandungatagĩre wĩra-inĩ ũcio wa athĩnjĩri-Ngai. 42Ningĩ ũmatumithĩrie thuruarĩ cia gatani cia kũhumbĩra njaga ya mĩĩrĩ yao; nacio thuruarĩ icio ciĩhumbagwo kuuma njohero-inĩ nginya ciero-inĩ; 43na ciĩhumbagwo nĩ Haruni na ariũ ake o magĩtonya hema-inĩ-ya-gũtũnganwo, kana magĩkuhĩhĩria kĩgongona marute wĩra handũ harĩa hatheru, nĩguo matikonwo ta mahĩtĩtie, nao makue; naguo ũndũ ũcio ũtuĩke kĩrĩra kĩa watho harĩ we, o na harĩ rũciaro rũake rũrĩa rũgoka thutha wake, wa kũrũmagĩrĩrũo tene na tene.

Currently Selected:

THAMA 28: OGKBIBLE

Highlight

Compare

Copy