THAMA 33

1 # Kĩam 12.7; Kĩam 26.3; Kĩam 28.13. Nake Jehova akĩarĩria Musa, akĩmwĩra atĩrĩ, Ũkĩrai, mũthenge haha, wee mwene, o na andũ aya warutire bũrũri wa Misiri, ũmatware bũrũri ũrĩa ndaheire Iburahimu ũhoro waguo, o na Isaaka, o na Jakubu, ngĩĩhĩta ngiuga atĩrĩ, Bũrũri ũcio nĩguo ngahe rũciaro rũaku; 2na nĩngũrekia mũraika athiage mbere yaku; na nĩngaingata Akanaani, na Amori, na Ahiti, na Aperizi, na Ahivi, na Ajebusi, 3nĩguo mũkinye bũrũri wĩ bũthi wa iria, o na ũũkĩ; nĩ ũndũ niĩ mwene ndingĩambatania na inyuĩ atĩ ’thiĩ ndĩ hamwe na inyuĩ, nĩ ũndũ mũrĩ andũ aremu mũno, nĩguo ndikae kũmũninĩra njĩra tũgĩthiĩ. 4Nao andũ acio rĩrĩa maaiguire ndeto icio njũru, makĩrĩra nĩ kĩeha; na gũtirĩ mũndũ o na ũmwe wekĩrire mathaga make ma kwĩgemia. 5Ningĩ Jehova akĩarĩria Musa, akĩmwĩra atĩrĩ, Ĩra ciana cia Isiraeli ũũ: Inyuĩ mũrĩ andũ aremu mũno, na ingĩambatania na inyuĩ, ’thiĩ ndĩ thĩinĩ wanyu kahinda o kanini, nĩ kũnina ingĩmũnina; tondũ ũcio wĩcumei mathaga manyu ma kwĩgemia, nĩguo ’menye ũrĩa ngũmwĩka. 6Nacio ciana cia Isiraeli ikĩrutia gwĩcuma mathaga ma cio ma kwĩgemia hau kĩrĩma-inĩ kĩa Horebu.

7Na rĩrĩ, Musa aamenyerete gũkuua hema, akamĩamba na kũu gĩthaka-inĩ mbarĩ ĩrĩa ĩngĩ ya kĩraaro, handũ haraihanĩrĩirie na harĩa andũ maambĩte hema ciao, nake aamĩtuĩte: Hema-ya-gũtũnganwo. Na gũgĩkinya atĩrĩ, atĩ mũndũ o wothe ũrĩa wendaga gũtuĩria ũhoro kwĩ Jehova, agathiaga hema-inĩ-ĩo-ya-gũtũnganwo, o ĩo yaambĩtwo haraya na kĩraaro kĩao. 8Na gũgĩkinya atĩrĩ, atĩ hĩndĩ ĩrĩa Musa oimagara athiĩ Hema-inĩ ĩo-rĩ, andũ othe magokĩra makarũgama na igũrũ, o mũndũ mũromo-inĩ wa hema yake, agaikara acũthĩrĩirie Musa, o nginya rĩrĩa arĩrĩkia gũtonya Hema-inĩ ĩo. 9Na gũgakinya atĩrĩ, atĩ Musa aatonya Hema thĩinĩ, gĩtugĩ kĩu gĩa itu gĩgaikũrũka, gĩkarũgama mũromo-inĩ wa Hema ĩo; nake Jehova akaaria na Musa. 10Nao andũ othe makona gĩtugĩ kĩu gĩa itu kĩrũgamĩte o mũromo-inĩ wa Hema ĩo; andũ othe magagĩũkĩra na igũrũ makahoya, o mũndũ arĩ mũromo-inĩ wa hema yake. 11Nake Jehova akaaragia na Musa makĩonanaga ũthiũ na ũthiũ, o ta mũndũ akĩaranĩria na mũratawe. Thutha wa ũguo akahũndũka agacoka kĩraaro-inĩ; no rĩrĩ, mwanake ũrĩa wamũtungatagĩra, wetagwo Joshua mũrũ wa Nuni, ndoimaga Hema-inĩ ĩo.

12Nake Musa akĩarĩria Jehova, akĩmwĩra atĩrĩ, Ta rora wone atĩ ũkũnjĩra ũũ: Ũkĩra woe andũ aya ũthiĩ nao; na ndũrĩ ũra’menyithia ũrĩa ũkũrekia tũthiĩ nake. No rĩrĩ, uugĩte atĩrĩ, Ngwaragĩria ngĩgwetaga rĩĩtwa rĩaku kĩũmbe, ningĩ nĩwĩtĩkĩrĩkĩte nĩ niĩ. 13Nĩ ũndũ ũcio ndagũthaitha atĩ ingĩkorũo nĩnjĩtĩkĩrĩkĩte nĩwe, ũnyonie ũrĩa mĩthiĩre yaku ĩtariĩ, nĩ getha ngũmenye wega, nĩguo njoke njĩtĩkĩrĩke nĩwe ningĩ ũririkane rũrĩrĩ rũrũ, atĩ nĩruo andũ aku wee mwene. 14Nake Jehova akĩmwĩra atĩrĩ, Niĩ mwene, nĩ niĩ ngũtwarana nawe, na nĩngatũma muone ũhurũko. 15Nake Musa akĩmwĩra atĩrĩ, Ũngĩkorũo ndũgũtwarana na niĩ wee mwene-rĩ, gĩtige gũtuoya atĩ nĩguo tuume haha. 16Nĩ ũndũ-rĩ, kaĩ kũngĩkĩmenyeka atĩa atĩ nĩnjĩtĩkĩrĩkĩte nĩwe, niĩ mwene o na andũ aya aku? Githĩ ũndũ ũrĩa ũngĩtũma ũndũ ũcio woneke to rĩrĩa ũngĩtwarana na ithuĩ, nĩ getha niĩ, o na andũ aya aku, tũtuĩke ta andũ aamũre mekũũranĩte na andũ arĩa angĩ othe matũũraga gũkũ thĩ?

17Nake Jehova akĩĩra Musa atĩrĩ, O naguo ũndũ ũcio uugĩte nĩngũwĩka nĩ gũkorũo wee nĩwĩtĩkĩrĩkĩte nĩ niĩ, na rĩrĩa ngũkwarĩria nĩ rĩĩtwa rĩaku kĩũmbe ngwetaga. 18Nake agĩcokia atĩrĩ, Ta kĩnyonie ũrĩa riri waku ũtariĩ. 19#Rom 9.15.Nake Jehova akiuga atĩrĩ, Wega wakwa wothe nĩngũũhĩtũkĩria mbere yaku, ningĩ nyanĩrĩre ngwetere rĩĩtwa rĩa Jehova mbere yaku; na rĩrĩ, ũtugi wakwa ndĩrĩũkinyagĩria o mũndũ ũrĩa ndenda kũũkinyĩria, na njiguagĩre tha o mũndũ ũrĩa ndenda kũiguĩra tha. 20Ningĩ akĩmwĩra atĩrĩ, Ũthiũ wakwa ndũngĩwona, nĩ ũndũ gũtirĩ mũndũ ũngĩnyona na acoke gũtũũra muoyo. 21Jehova agĩkiuga ũũ: Atĩrĩrĩ, haha he handũ hakuhanĩrĩirie na harĩa ndĩ, nawe ũgũũka ho ũrũgame ihiga igũrũ; 22na gũgakinya atĩrĩ, atĩ rĩrĩa riri wakwa ũrĩitĩka kũhĩtũka, ngũtonyie mwanya-inĩ wa ihiga, ngũthiĩkĩrĩrie na guoko gwakwa o nginya rĩrĩa ndĩrĩrĩkia kũhĩtũka; 23na thutha wa ũguo, njoke njeherie guoko gwakwa, nĩguo ũnyone mwena wakwa wa na thutha; no rĩrĩ, ũthiũ wakwa ndũngĩonwo.

Currently Selected:

THAMA 33: OGKBIBLE

Highlight

Compare

Copy