THAMA 34

1Ningĩ Jehova akĩĩra Musa atĩrĩ, Wĩicũhĩrie ihengere igĩrĩ cia mahiga ta iria cia mbere, nĩguo ngaandĩka ihengere-inĩ icio ciugo iria ciarĩ ihengere-inĩ cia mbere, iria woragire. 2Nawe ũroke gũkorũo wĩthagathagĩte rũciũ rũcinĩ, wambate kĩrĩma gĩa Sinai, ũũke ũrũgame mbere yakwa hau kĩrĩma igũrũ. 3Na hatikagĩe mũndũ o na ũrĩkũ ũkwambatania nawe, kana ũreke mũndũ o na ũrĩkũ onwo kũu guothe kĩrĩma-inĩ; na ndũkareke ndũru cia mbũri, kana ng’ombe, irĩithio mwena wa na mbere wa kĩrĩma kĩu. 4Musa agĩkĩĩicũhĩria ihengere igĩrĩ cia mahiga itariĩ o ta iria cia mbere; agĩkĩroka gũũkĩra rũcinĩ tene, akĩambata agĩthiĩ kĩrĩma-inĩ gĩa Sinai, o ta ũrĩa Jehova aamwathire, nake agĩthiĩ anyitĩte ihengere icio cierĩ cia mahiga na guoko. 5Nake Jehova agĩgĩikũrũka, arĩ thĩinĩ wa itu, akĩrũgama hakuhĩ nake, akĩanĩrĩra akĩgweta rĩĩtwa rĩa Jehova. 6#Thama 20.5,6; Ndar 14.18; Gũcok 5.9,10; 7.9,10.Nake Jehova akĩhĩtũkĩra mbere yake akĩanagĩrĩra akiugaga atĩrĩ, Ũyũ nĩwe Jehova, nĩwe Jehova, na nĩwe Ngai ũrĩa ũiguanagĩra tha mũno, na agakinyĩria andũ wega wake, na ndahiũhaga kũrakara, na nĩaiyũirũo nĩ tha, na ũhoro-wa-ma, 7na aiguagĩra andũ ngiri na ngiri tha; na nĩwe Ngai ũrĩa muohanĩri waganu, o na mahĩtia, o na mehia; na ndangiuga atĩ mũndũ mwaganu nĩ mwega o na atĩa; nĩwe ũkinyagĩria ciana waganu wa maithe, o na akaũkinyĩria ciana cia ciana icio, o nginya rũciaro rũa gatatũ na rũa kana. 8Nake Musa akĩhiũha kũinamia ũthiũ na thĩ, akĩhoya Ngai, akĩmũgooca, 9agĩkiuga atĩrĩ, Rĩu ingĩkorũo nĩnguonwo ta njĩtĩkĩrĩkĩte nĩwe Jehova-rĩ, ndagũthaitha ũreke Jehova atwarane na ithuĩ; nĩ gũkorũo andũ aya nĩ aremu mũno; na ũtuohere waganu witũ, o na mehia maitũ, na ũtũme tũtuĩke andũ aku kĩũmbe. 10Nake Jehova akiuga ũũ: Atĩrĩrĩ, nĩ kũrĩkanĩra ngũrĩkanĩra nawe. Niĩ-rĩ, nĩndĩĩringaga ciama, andũ aya aku othe magĩciĩonagĩra, o ciama iria itarĩ ciaringwo tacio gũkũ thĩ guothe, o na kana rũrĩrĩ-inĩ o na rũrĩkũ; na rĩrĩ, andũ aya angĩ othe mamũrigicĩirie nĩmariona wĩra wa Jehova, nĩ gũkorũo ũndũ ũcio ngeka nĩ ũndũ waku nĩũgatuĩka wa kĩmakanio kĩnene. 11Maũndũ marĩa mothe ngũgwatha ũmũthĩ-rĩ, mamenyagĩrĩre. Atĩrĩrĩ, nĩ kũingata ngaingata Aamori, na Akanaani, na Ahiti, na Aperizi, na Ahivi, na Ajebusi, makweherere. 12Wĩmenyagĩrĩre ndũkanagĩe karĩĩko o na kanini na andũ arĩa matũũraga bũrũri ũcio ũgũthiĩ, nĩ getha ũndũ ũcio ndũkanatuĩke ta arĩ kĩhenereria gĩĩ thĩinĩ waku gĩa gũgũthũkia; 13#Gũcok 16.21.no rĩrĩ, igongona ciao nĩmũgaciunanga, o nacio itugĩ ciao cia kũhoyũo mũgacibacania na thĩ, na Maashera mao mũmatemenge magũe. 14Nĩ gũkorũo ndũrĩ hingo ũkainamĩrĩra ũhoe ngai ingĩ, nĩ ũndũ Jehova ũrĩa wĩtagwo Mũigua-ũiru, nĩwe Ngai wĩ ũiru, 15nĩ getha ndũkanarĩkanĩre na andũ arĩa matũũraga bũrũri ũcio, na andũ anyu merirĩrie kũrũmĩrĩra ngai ciao, macirutĩre magongona, na hihi mũndũ ũmwe wao agwĩte, nawe ũkarĩe indo imwe cia magongona make, 16na hihi ũcoke ũgũrĩre ariũ aku airĩtu ao, nao airĩtu acio ao rĩrĩa mekwĩrirĩria kũrũmĩrĩra ngai icio ciao, matũme ariũ aku o nao merirĩrie o ro ũguo kũrũmĩrĩra ngai icio ciao. 17#Thama 20.4; Alaw 19.4; Gũcok 5.8; 27.15.Ndũkanetwekerie indo ũcitue ngai cia kũhoyũo. 18#Thama 12.14-20; Alaw 23.6-8; Ndar 28.16-25.Tũũra ũmenyereire gĩathĩ kĩa mĩgate ĩrĩa itarĩ mĩimbie. Mĩgate ĩo ĩtarĩ mĩimbie ũkamĩrĩaga mĩthenya mũgwanja, o ta ũrĩa ndagwathire wĩkage, o ihinda rĩrĩa rĩtuĩtwo rĩa mweri wa Abibu, nĩ gũkorũo mweri ũcio wa Abibu nĩguo woimire Misiri. 19#Thama 13.2.Kĩrĩa gĩothe kĩrĩrigithathagwo nĩ gĩakwa, ningĩ ũhiũ waku wothe wa njamba-rĩ, irigithathi rĩa ndegwa kana rĩa ndũrũme, nĩ ciakwa. 20#Thama 13.13.Narĩo irigithathi o rĩothe rĩa ndigiri, nĩ gũkũũra ũrĩrikũũraga na gatũrũme; na ũngĩaga kũrĩkũũra-rĩ, nĩũkariuna ngingo. O nao ariũ aku othe a marigithathi, nĩ gũkũũra ũkamakũũraga. Na rĩrĩ, gũtirĩ mũndũ o na ũrĩkũ ũkoneka okĩte mbere yakwa arĩ moko matheri. 21#Thama 20.9,10; 23.12; 31.15; 35.2; Alaw 23.3; Gũcok 5.13,14.Nĩũkarutaga wĩra mĩthenya ĩtandatũ, no rĩrĩ, mũthenya wa mũgwanja nĩũkahurũkaga; nayo hĩndĩ ya icimba, o na ya magetha, no ũkahurũkaga. 22#Alaw 23.15-21; Ndar 28.26-31; Alaw 23.39-43.Na ũmenyagĩrĩre gĩathĩ kĩrĩa gĩĩtagwo ’gĩathĩ gĩa Ciumia’, nakĩo nĩkĩo gĩathĩ kĩa magetha ma irio cia mũro wa mbere cia ngano, o na ũmenyagĩrĩre gĩathĩ kĩa rĩita rĩa irio makũmbĩ, mwaka ũgĩthiĩ gũthira. 23Nĩ mahinda matatũ, o mwaka, arũme othe thĩinĩ wanyu magathiaga kwĩonania mbere ya Jehova Ngai, o Ngai wa Isiraeli. 24Nĩ ũndũ nĩ kũingata ngaingata andũ a ndũrĩrĩ iria ingĩ makweherere, njoke ’nenehie mĩhaka ya bũrũri waku; na gũtirĩ mũndũ o na ũmwe ũkerirĩria bũrũri waku, rĩrĩa ũgakorũo ũthiĩte kwĩonania mbere ya Jehova Ngai waku mahinda macio matatũ. 25#Thama 12.10.Ndũkanathenganĩrĩrie thakame ya igongona rĩakwa na mĩgate mĩimbie; o nacio indo iria irutagwo cia igongona rĩa Bathaka ndũkanareke itigario iraare nginya rũcinĩ. 26#Gũcok 26.2; Gũcok 14.21.Na rĩrĩ, irio iria ikwamba kũgethwo cia mũro wa mbere cia mĩgũnda yaku-rĩ, ũgacitwaraga nyũmba ya Jehova Ngai waku. Ningĩ-rĩ, ndũkanaruge kori na iria rĩa nyina. 27Nake Jehova akĩĩra Musa atĩrĩ, Wĩandĩkĩre ciugo icio; nĩ ũndũ nĩtwarĩkanĩra nawe, o na andũ a Isiraeli, o ta ũrĩa ciugo icio ithiĩte. 28Nake agĩikara hau marĩ na Jehova mĩthenya mĩrongo ĩna, o na matukũ mĩrongo ĩna; na ndaigana kũrĩa irio, o na kana akĩnyua maĩ. Nake agĩkĩandĩka mohoro ma kĩrĩkanĩro kĩu ihengere-inĩ cia mahiga, na nĩmo maathani marĩa ikũmi.

29 # 2 Kor 3.7-16. Na gũgĩkinya atĩrĩ, atĩ Musa aaikũrũka kĩrĩma gĩa Sinai anyitĩte ihengere icio cierĩ cia ũira na moko make-rĩ, hĩndĩ o ĩo oima kĩrĩma igũrũ, ndaamenyaga atĩ rũũa rũa ũthiũ wake nĩrũakengaga mũno nĩ ũndũ wa kwaria na Jehova. 30Na rĩrĩ, rĩrĩa Haruni me na ciana cia Isiraeli monire Musa-rĩ, atĩrĩ, rũũa rũa ũthiũ wake ruonagwo rũgĩkenga mũno, nao magĩĩtigĩra kũmũkuhĩhĩria. 31Musa agĩkĩmeta, nake Haruni me na aathani a kĩrĩndĩ magĩcoka harĩ we; Musa agĩkĩaria nao. 32Thutha wa ũguo, ciana cia Isiraeli ciothe ikĩmũkuhĩhĩria nake agĩcihe ũhoro wa maũndũ mothe marĩa Jehova aamwarĩirie kũu kĩrĩma-inĩ gĩa Sinai, akĩmaatha mamamenyagĩrĩre. 33Na rĩrĩ, Musa aarĩkia kwaria nao, akeĩkĩra tama wa kwĩhumba ũthiũ. 34No rĩrĩ, hĩndĩ ĩrĩa Musa aathiaga gũtonya mbere ya Jehova maarie nake-rĩ, tama ũcio wa kwĩhumba ũthiũ akaweheria o nginya rĩrĩa arĩcoka kuuma ho; ningĩ akoima ho, agathiĩ kwaria na ciana cia Isiraeli, agacihe ũhoro ũrĩa aathĩtwo; 35nacio ciana cia Isiraeli ikĩona ũthiũ wa Musa-rĩ, ikona atĩ rũũa rũaguo nĩrũgũkenga mũno; Musa agagĩcoka kwĩĩkĩra tama ũcio wa kwĩhumba ũthiũ, o nginya hĩndĩ ĩrĩa arĩcoka gũthiĩ kwaria na Jehova rĩngĩ.

Currently Selected:

THAMA 34: OGKBIBLE

Highlight

Compare

Copy