THAMA 40

1Nake Jehova akĩarĩria Musa, akĩmwĩra atĩrĩ, 2O mũthenya wa mbere wa mweri wa mbere, nĩguo ũgaaka gĩikaro kĩu kĩa hema-ya-gũtũnganwo. 3Narĩo ithandũkũ rĩa ũira, ũkaritonyia thĩinĩ, ũcoke ũrĩthiĩkĩrĩrie na gĩtama kĩu gĩa kũhakania. 4Ningĩ ũgatonyia metha thĩinĩ, na indo ciayo ũciige igũrũ rĩayo ũciare wega, o naguo mũtĩ ũrĩa wa kũigĩrĩrũo matawa ũũtonyie thĩinĩ, ũcoke wakie matawa maguo. 5Nakĩo kĩgongona kĩrĩa gĩa thahabu gĩa gũcinĩrũo ũbumba ũrĩa ũnungaga wega ũgakĩrũgamia nyumĩrĩra ya ithandũkũ rĩa ũira, ũcoke ũcuurie tama wa kweheheragio mũromo-inĩ wa gĩikaro kĩu, 6o nakĩo kĩgongona kĩa mahaki ma njino ũgakĩiga na hau kabere ka mũromo wa gĩikaro kĩa hema-ya-gũtũnganwo, kĩng’ethanĩire naguo. 7Nakĩo kĩnyũngũ gĩa gwĩthambĩrũo ũkĩige gatagatĩ-inĩ ka hema-ya-gũtũnganwo na kĩgongona kĩu, ũcoke ũgĩĩkĩre maĩ thĩinĩ. 8Ningĩ ũkarũgamia itugĩ cia nja ũmĩirige mĩena yothe, ũcoke ũcunjurie tama wa kweheheragio mũromo-inĩ wa nja ĩo. 9Thutha wa ũguo, ũkoya maguta marĩa maitanagĩrĩrio, ũitĩrĩrie gĩikaro, o na indo ciothe iria irĩ thĩinĩ wakĩo, ũkĩamũre ũgĩtherie, o na indo ciothe iria irĩ thĩinĩ wakĩo cia kũrutwo wĩra nacio, gĩcoke gũtuwo kĩamũre. 10O nakĩo kĩgongona kĩa mahaki ma njino ũgagĩitĩrĩria maguta hamwe na indo ciakĩo ciothe, nĩ getha wamũre kĩgongona kĩu ũgĩtherie, nakĩo kĩgongona kĩu gĩcoke gũtuwo kĩamũre mũno. 11Nakĩo kĩnyũngũ gĩa gwĩthambĩrũo hamwe na kũgũrũ gwakĩo ũgaciitĩrĩria maguta, ũciamũre ituĩke nyamũre. 12Nake Haruni me na ariũ ake, ũkamatwara mũromo-inĩ wa hema-ya-gũtũnganwo umathambĩrie ho na maĩ. 13Ũcoke ũhumbe Haruni nguo icio nyamũre, ũmũitĩrĩrie maguta, ũmwamũre ũmũtherie, nĩguo andu-ngatagĩre wĩra-inĩ ũcio wa mũthĩnjĩri-Ngai. 14O nao ariũ ake ũmatware ũmahumbe makanjũ, 15ũmaitĩrĩrie maguta, o ta ũrĩa waitĩrĩirie ithe wao, nĩguo mandungatagĩre wĩra-inĩ ũcio wa athĩnjĩri-Ngai; naguo ũhoro ũcio wao wa gũitĩrĩrio maguta nĩguo ũgatuĩka ũndũ wa kũmatuaga a thiritũ ya athĩnjĩri-Ngai, njiaro-inĩ ciao ciothe tene na tene. 16Nake Musa agĩgĩĩka o ta ũguo; o ta ũrĩa Jehova aamwathire eke-rĩ, ũguo noguo ekire.

17Na gũgĩkinya atĩrĩ, atĩ mwaka wa ĩĩrĩ, o mweri wa mbere waguo, mũthenya wa mbere wa mweri ũcio, gĩikaro kĩu gĩgĩakwo. 18Musa agĩgĩaka gĩikaro kĩu; makinya makĩo akĩmaiga thĩ akĩmaara wega, o nacio mbaũ ciakĩo agĩcirũgamia, o na mĩgamba yayo akĩmĩtonyia handũ hayo, na itugĩ ciakĩo agĩcirũgamia nĩguo ciikare ciĩhandĩte. 19Agĩcoka agĩtambũrũkia hema, akĩmĩara gĩikaro-inĩ kĩu igũrũ, agĩcoka akĩigĩrĩra kĩandarũa kĩrĩa kĩngĩ igũrũ rĩayo, o ta ũrĩa Jehova aathire Musa gwĩkwo. 20Thutha wa ũguo akĩoya ihengere icio cia ũira, agĩciĩkĩra ithandũkũ thĩinĩ, o nayo mĩtĩ ĩrĩa mĩraya akĩmĩĩkĩra ithandũkũ-inĩ rĩu mĩena-inĩ, o nakĩo gĩikaro-gĩa-tha agĩkĩigĩrĩra ithandũkũ-inĩ rĩu igũrũ; 21agĩcoka agĩtwara ithandũkũ rĩu, akĩrĩtonyia gĩikaro-inĩ kĩu thĩinĩ, o nakĩo gĩtama kĩrĩa gĩa kũhakania agĩgĩcuuria nyumĩrĩra yakĩo, agĩthiĩkĩrĩria ithandũkũ rĩu rĩa ũira nakĩo, o ta ũrĩa Jehova aathire Musa gwĩkwo. 22Nayo metha, akĩmĩiga hema-inĩ-ya-gũtũnganwo thĩinĩ, mwena wa gathigathini wa gĩikaro kĩu, o kũu mwena wa na nja wa gĩtama kĩrĩa gĩa kũhakania. 23Nayo mĩgate akĩmĩiga wega mbere ya Jehova igũrũ rĩayo, o ta ũrĩa Jehova aathire Musa gwĩkwo. 24O naguo mũtĩ wa kũigĩrĩrũo matawa akĩũtonyia hema-inĩ-ya-gũtũnganwo, akĩũiga ũng’ethanĩire na metha, mwena wa gũthini wa gĩikaro kĩu. 25O namo matawa akĩmaakia mbere ya Jehova, o ta ũrĩa Jehova aathire Musa gwĩkwo. 26Nakĩo kĩgongona kĩrĩa gĩa thahabu agĩgĩtonyia hema-inĩ-ya-gũtũnganwo, agĩkĩiga nyumĩrĩra ya gĩtama kĩu gĩa kũhakania 27agĩcoka agĩcinĩra igũrũ rĩakĩo ũbumba wa mahuti marĩa manungaga wega, o ta ũrĩa Jehova aathire Musa gwĩkwo. 28Ningĩ agĩcuuria gĩtama gĩa kweheheragio mũromo-inĩ wa gĩikaro. 29O nakĩo kĩgongona kĩa mahaki ma njino, agĩkĩiga mũromo-inĩ wa gĩikaro kĩu kĩa hema-ya-gũtũnganwo, agĩcoka akĩrutĩra mahaki ma njino igũrũ rĩakĩo, o na mũtu wa kũrutwo, o ta ũrĩa Jehova aathire Musa gwĩkwo. 30Nakĩo kĩnyũngũ gĩa gwĩthambĩrũo, agĩkĩiga gatagatĩ-inĩ ka hema-ya-gũtũnganwo na kĩgongona kĩu, agĩgĩitĩrĩra maĩ ma gwĩthamba. 31Nake Musa, me na Haruni na ariũ ake, magethambagĩra moko mao na magũrũ ho. 32Hĩndĩ ĩrĩa megũtonya hema-inĩ-ya-gũtũnganwo, na rĩrĩa megũkuhĩhĩria kĩgongona kĩu-rĩ, nĩguo methambaga, o ta ũrĩa Jehova aathire Musa gwĩkwo. 33Ningĩ akĩrũgamia itugĩ cia nja akĩirigĩra gĩikaro o na kĩgongona, na agĩcunjuria tama wa kweheheragio mũromo-inĩ wa nja ĩo. Ũguo nĩguo Musa aarĩkirie wĩra ũcio.

34 # 1 Ath 8.10,11; Isa 6.4; Ezek 43.4,5; Kũg 15.8. Na rĩrĩ, hĩndĩ o ĩo itu rĩu rĩa Jehova rĩkĩhumba hema-ya-gũtũnganwo, naguo riri wa Jehova ũkĩiyũra gĩikaro-inĩ kĩu. 35Nake Musa ndaigana kũhota gũtonya hema-inĩ-ya-gũtũnganwo, nĩ ũndũ itu rĩu nĩrĩaikarĩte igũrũ rĩayo, o naguo riri wa Jehova ũkaiyũra gĩikaro-inĩ kĩu. 36Na rĩrĩ, rĩrĩa itu rĩu rĩoyũo na igũrũ, rĩkoima gĩikaro-inĩ kĩu, hĩndĩ ĩo ciana cia Isiraeli igathiĩ na mbere ng’endo-inĩ ciacio ciothe; 37no itu rĩu rĩaaga kuoyũo na igũrũ-rĩ, igagĩtiga gũthiĩ rũgendo o nginya mũthenya ũrĩa rĩkoyũo na igũrũ. 38Nĩ gũkorũo itu rĩu rĩa Jehova rĩaikaraga igũrũ rĩa gĩikaro kĩu mũthenya, ningĩ ũtukũ hakagĩa mwaki itu-inĩ rĩu, namo maũndũ macio makonagwo nĩ andũ othe a nyũmba ya Isiraeli ng’endo-inĩ ciao ciothe.

Currently Selected:

THAMA 40: OGKBIBLE

Highlight

Compare

Copy