MAŨNDŨ MA ALAWII 1
1
1NAKE Jehova agĩĩta Musa, akĩmwarĩria arĩ hema-inĩ-ya-gũtũnganwo, akĩmwĩra atĩrĩ, 2Arĩria ciana cia Isiraeli, ũciĩre ũũ: Hĩndĩ ĩrĩa mũndũ o na ũrĩkũ wanyu egũtwarĩra Jehova kĩndũ gĩa kũmũrutĩra-rĩ, indo cianyu iria mũrĩrutaga nĩ ũhiũ, naguo ũguo nĩ ta kuuga ũhiũ wa ng’ombe, na mbũri.
3Na rĩrĩ, kĩndũ kĩrĩa mũndũ ũcio ekũruta kĩngĩkorũo nĩ kĩa ihaki rĩa njino kiumĩte rũũru-inĩ rũa ng’ombe-rĩ, akaruta kĩa njamba ĩtarĩ na kaũũgũ, amĩrutĩre mũromo-inĩ wa hema-ya-gũtũnganwo, nĩ getha etĩkĩrĩke arĩ mbere ya Jehova. 4Nake aambe aigĩrĩre guoko gwake mũtwe wa nyamũ ĩo ĩkũrutwo ihaki rĩa njino, nayo nĩĩgetĩkĩrĩka nĩ ũndũ wake nĩ getha ĩmũhoroherie. 5Nake agathĩnjĩra ndegwa ĩo mbere ya Jehova, nao athĩnjĩri-Ngai, acio ariũ a Haruni, matwaratware thakame yayo, mamĩminjaminje mbarĩ ciothe igũrũ rĩa kĩgongona kĩrĩa kĩrĩ mũromo-inĩ wa hema-ya-gũtũnganwo. 6Ningĩ nyamũ ĩo ya ihaki rĩa njino, acoke amĩrute rũũa, amĩtinangie icunjĩ. 7Nao ariũ a Haruni, mũthĩnjĩri-Ngai, maakie mwaki kĩgongona-inĩ kĩu igũrũ, macoke maare ngũ wega igũrũ rĩa mwaki ũcio, 8nao ariũ a Haruni, acio athĩnjĩri-Ngai, matandaiye icunjĩ icio wega igũrũ rĩa ngũ icio irĩ mwaki-inĩ igũrũ rĩa kĩgongona kĩu, hamwe na mũtwe na nyama cia maguta; 9no rĩrĩ, nyama ciayo cia nda, na mathagiro, mũruti igongona rĩu aambe acithambie na maĩ; nake mũthĩnjĩri-Ngai acoke acicinĩre ciothe kĩgongona-inĩ kĩu igũrũ, ituĩke ihaki rĩa njino; o ihaki rĩa gũcinwo na mwaki, rĩa gũtũma mũtararĩko ũrĩa ũnungaga wega ũiguwo nĩ Jehova.
10Ningĩ kũngĩkorũo kĩndũ kĩrĩa mũndũ ekũruta kĩa ihaki rĩa njino gĩkuuma rũũru-inĩ rũa ng’ondu, kana rũa mbũri-rĩ, akaruta njamba ĩtarĩ na kaũũgũ; 11nake amĩthĩnjĩre mbere ya Jehova o hau mwena-inĩ wa kĩgongona ũrĩa ũrorete gathigathini; nao ariũ a Haruni, acio athĩnjĩri-Ngai, maminjaminje thakame yayo kĩgongona-inĩ kĩu igũrũ mbarĩ ciothe. 12Acoke amĩtinangie icunjĩ, ciigwo hamwe na mũtwe wayo, na nyama ciayo cia maguta, nake mũthĩnjĩri-Ngai acitandaiye wega igũrũ rĩa ngũ iria irĩ mwaki-inĩ kĩgongona-inĩ igũrũ; 13no rĩrĩ, nyama cia nda, na mathagiro, mũruti igongona rĩu aambe acithambie na maĩ, nake mũthĩnjĩri-Ngai acoke arute nyama icio ciothe, acicinĩre kĩgongona-inĩ kĩu igũrũ; rĩu nĩrĩo ihaki rĩa njino, o ihaki rĩa gũcinwo na mwaki, rĩa gũtũma mũtararĩko ũrĩa ũnungaga wega ũiguwo nĩ Jehova.
14Nĩngĩ kĩndũ gĩake gĩa kũrutĩra Jehova kĩngĩtuĩka nĩ ihaki rĩa njino rĩa mũthemba wa nyamũ iria ciũmbũkaga-rĩ, hĩndĩ ĩo kĩndũ gĩake gĩa kũruta gĩgatuĩka ndirahũgĩ, kana ndutura itarĩ ngũrũ. 15Nake mũthĩnjĩri-Ngai amĩtware kĩgongona-inĩ, amĩthiore mũtwe ĩtinĩke ngingo, amĩcinĩre kĩgongona-inĩ kĩu igũrũ; nayo thakame yayo ĩitwo mwena-inĩ wa kĩgongona; 16ningĩ arute kabutu kayo hamwe na tatha wako, agagaikie mwena-inĩ wa kĩgongona ũrĩa ũrorete irathĩro, handũ harĩa haitagwo mũhu, 17na amĩtarũre mathagu mayo, no ndakamĩteithũrane; nake mũthĩnjĩri-Ngai amĩcinĩre kĩgongona-inĩ kĩu ĩgũrũ, o igũrũ rĩa ngũ iria irĩ mwaki-inĩ; rĩu nĩrĩo ihaki rĩa njino, o ihaki rĩa gũcinwo na mwaki rĩa gũtũma mũtararĩko ũrĩa ũnungaga wega ũiguwo nĩ Jehova.
Currently Selected:
MAŨNDŨ MA ALAWII 1: OGKBIBLE
Highlight
Share
Compare
Copy
Want to have your highlights saved across all your devices? Sign up or sign in
©Bible Society of Kenya, 2019
