THAMA 7

1Nake Jehova akĩĩra Musa atĩrĩ, One, nĩngũtuĩte ngai harĩ Firauni; nake Haruni mũrũ wa nyũkwa nĩegũtuĩka mũnabii waku. 2Wee ũrĩaragia maũndũ mothe marĩa ndĩrĩkwĩraga warie; nake Haruni, mũrũ wa nyũkwa, nĩwe ũrĩaragia na Firauni, nĩ getha areke ciana cia Isiraeli ciume bũrũri wake. 3#Atũm 7.36.Na nĩngũũmia Firauni ngoro, njoke nyingĩhie ciama ciakwa, na morirũ, bũrũri wa Misiri. 4No rĩrĩ, Firauni ndarĩmũthikĩrĩria, na niĩ nĩndĩrĩigĩrĩra Misiri guoko gwakwa, nyumie mbũtũ ciakwa, andũ acio akwa ciana cia Isiraeli, bũrũri ũcio wa Misiri, ngĩtuanagĩra matuĩro manene. 5Na rĩrĩ, andũ a Misiri nĩmakamenya atĩ niĩ nĩ niĩ Jehova, rĩrĩa ngakorũo ndambũrũkĩirie Misiri guoko gwakwa, na ngoimia ciana cia Isiraeli thĩinĩ wao. 6Nao Musa na Haruni magĩgĩĩka ũguo; o ta ũguo Jehova aamaathĩte meke, noguo mekire. 7Na hĩndĩ ĩo maarĩirie Firauni, Musa aakorirũo akinyĩtie mĩaka mĩrongo ĩnana, o nake Haruni agakinyia mĩrongo ĩnana na ĩtatũ.

8NAKE Jehova akĩarĩria Musa na Haruni, akĩmera atĩrĩ, 9Hĩndĩ ĩrĩa Firauni arĩmwarĩria, amwĩre ũũ: Ringai kĩama nĩguo mwĩtĩkĩke-rĩ, wee Musa coka wĩre Haruni atĩrĩ, Oya rũthanju rũaku, ũrũikie rũgũe thĩ harĩ Firauni, nĩguo rũtuĩke nyamũ-ya-thĩ. 10Nao Musa na Haruni magĩgĩtonya kwa Firauni, magĩĩka o ta ũguo Jehova aamaathĩte; nake Haruni akĩgũithia rũthanju rũu rũake thĩ harĩ Firauni na ndungata ciake, naruo rũgĩtuĩka nyamũ-ya-thĩ. 11Hĩndĩ ĩo Firauni agĩcoka agĩĩta andũ arĩa ogĩ, o na andũ arĩa aragũri a maheni; na rĩrĩ, acio nĩo maarĩ ago a Misiri, nao magĩĩka o ro ta ũguo na ũgo ũcio wao. 12Nĩ ũndũ andũ acio othe, mũndũ o mũndũ, nĩaagũithirie rũthanju rũake thĩ, naruo rũgĩtuĩka nyamũ-ya-thĩ, no rĩrĩ, rũthanju rũu rũa Haruni rũkĩmerũkia thanju icio ciao. 13Nake Firauni akĩũma ngoro, akĩrega kũmathikĩrĩria o ta ũrĩa Jehova oigĩte.

14Nake Jehova akĩĩra Musa atĩrĩ, Ngoro ya Firauni nĩ nditũ; nĩaregete kũreka andũ mathiĩ. 15Rokera Firauni rũcinĩ, na atĩrĩ, nĩũkamũkora agĩthiĩ maĩ-inĩ; nawe nĩũkarũgama hũgũrũrũ-inĩ cia rũũĩ nĩguo muonane nake; naruo rũthanju rũu rũragarũrũkĩte rũgatuĩka nyamũ-ya-thĩ, thiĩ naruo ũgwete na guoko. 16Nawe ũcoke ũmwĩre atĩrĩ, Jehova, o we Ngai wa Ahibirania, nĩwe wandũma kũrĩ wee, nake oiga atĩrĩ, Reka andũ akwa mathiĩ, nĩguo makandungatĩre werũ-inĩ; nawe o na gwata rĩu, ndũrĩ ũrathikĩrĩria ũhoro ũcio. 17#Kũg 16.4.Jehova egũkiuga ũũ: Ũhoro ũyũ nĩguo ũgũkũmenyithia atĩ niĩ nĩ niĩ Jehova; atĩrĩrĩ, nĩngũgũtha maĩ ma rũũĩ na rũthanju rũrũ ndĩ naruo guoko, namo nĩmekũgarũrũka matuĩke thakame. 18Nacio ciũngũyũ iria irĩ rũũĩ nĩigũkua, o naruo rũũĩ rũgĩe na kĩhera kĩũru; nao andũ a Misiri mathũũre mũno kũnyua maĩ ma rũũĩ. 19Nake Jehova akĩĩra Musa atĩrĩ, Ĩra Haruni ũũ: Oya rũthanju rũaku ũcoke ũtambũrũkĩrie maĩ mothe ma Misiri guoko gwaku, o gwata njũĩ ciakuo, na mĩtaro yakuo, na maria makuo, o na marengeta makuo, maĩ ma cio matuĩke thakame; na nĩgũkũgĩa thakame kũndũ guothe bũrũri wa Misiri, thĩinĩ wa indo iria ii na maĩ, o na ingĩkorũo nĩ cia mĩtĩ, o na kana cia mahiga. 20Nao Musa na Haruni magĩgĩĩka ũguo, o ta ũrĩa Jehova aamaathĩte; we Haruni agĩkĩoya rũthanju na igũrũ, akĩgũtha maĩ me rũũĩ, Firauni o na ndungata ciake makĩonaga; namo maĩ mothe marĩa maarĩ rũũĩ makĩgarũrũka magĩtuĩka thakame. 21Nacio ciũngũyũ iria ciarĩ rũũĩ igĩkua, naruo rũũĩ rũkĩgĩa na kĩhera kĩũru, nao andũ a Misiri makĩremwo nĩ kũnyua maĩ ma rũũĩ; nayo thakame ĩkĩiyũra kũndũ guothe bũrũri wa Misiri. 22Nao ago a Misiri magĩĩka o ta ũguo na ũgo wao, nake Firauni akĩũma ngoro, akĩrega kũmathikĩrĩria, o ta ũrĩa Jehova oigĩte. 23Nake Firauni akĩhũndũka akĩinũka gwake mũciĩ, o namo maũndũ macio ndaigana kũmekĩra ngoro o na hanini. 24Nao andũ othe a Misiri makĩenjanga hũgũrũrũ-inĩ cia rũũĩ nĩguo mone maĩ ma kũnyua, nĩ ũndũ matiahotaga kũnyua maĩ ma rũũĩ. 25Na rĩrĩ, Jehova aarĩkia kũringa rũũĩ ũguo, gũkĩnina matukũ mũgwanja.

Currently Selected:

THAMA 7: OGKBIBLE

Highlight

Compare

Copy