THAMA 8

1Nake Jehova akĩĩra Musa atĩrĩ, Thiĩ ũtonye kwa Firauni, ũmwĩre atĩrĩ, Jehova ekuuga ũũ: Reka andũ akwa mathiĩ, nĩ getha makandungatĩre. 2Na rĩrĩ, warega kũreka mathiĩ-rĩ, nĩngũhũra bũrũri waku o nginya mĩhaka-inĩ yaguo ndĩũiyũrie ciũra: 3naruo rũũĩ nĩrũkũhunja ciũra o nginya ciambatĩrĩre nyũmba yaku imĩtonye, o gwata nyũmba yaku ya toro, o nginya ũrĩrĩ waku igũrũ, o na itonye nyũmba ya ndungata ciaku, na ciambatĩrĩre kwa andũ aku, o na itonye ndumbĩrĩra-inĩ ciaku thĩinĩ cia kũhĩhĩria irio, o na ndĩrĩ-inĩ ciaku cia kũmandĩra mũtu; 4nacio ciũra icio irĩgĩkũhaicaga igatamba mwĩrĩ waku wee mwene, o na mĩĩrĩ ya andũ aku, o na ya ndungata ciaku ciothe. 5Nake Jehova akĩĩra Musa atĩrĩ, Ĩra Haruni ũũ: Tambũrũkia guoko gwaku ũgwete rũthanju rũu rũaku, ũrũtambũrũkĩrie njũĩ, o na mĩtaro, o na maria, ũtũme ciũra ciambatĩrĩre bũrũri ũcio wa Misiri. 6Nake Haruni agĩgĩtambũrũkĩria maĩ ma Misiri guoko; nacio cĩura ikĩambata, ikĩiyũra bũrũri ũcio wa Misiri. 7Nao ago magĩĩka o ta ũguo na ũgo wao, magĩgĩtũma ciũra ciambatĩrĩre bũrũri wa Misiri. 8Hĩndĩ ĩo Firauni agĩĩta Musa na Haruni, akĩmera atĩrĩ, Thaithai Jehova anjehererie ciũra ici, na ehererie andũ akwa; na nĩngwĩtĩkĩria kĩrĩndĩ kĩu kĩanyu gĩthiĩ, nĩguo gĩkarute igongona rĩa kũhaka Jehova. 9Nake Musa akĩĩra Firauni atĩrĩ, Ta gĩa na gĩtĩo kũngĩra, ũkĩnjĩre atĩ nĩ ta ihinda rĩrĩkũ ingĩgũthaithanĩra, na ’thaithanĩre ndungata ciaku, o na kĩrĩndĩ gĩkĩ gĩaku, nĩguo ciũra ininwo ikweherere, o na ciehere nyũmba ciaku, itigare o rũũĩ gwiki? 10Nake akiuga atĩrĩ, Nĩgũtuĩke rũciũ. Nake akiuga atĩrĩ, Kũrotuĩka o ta ũguo woiga, nĩ getha ũmenye wega atĩ gũtirĩ ũngĩ ũtariĩ ta Jehova Ngai witũ. 11Nacio ciũra nĩigakweherera, na ciehere nyũmba ciaku, o na cieherere ndungata ciaku na kĩrĩndĩ kĩu gĩaku, itigare o rũũĩ gwiki. 12Nao Musa na Haruni makiuma kwa Firauni, nake Musa agĩkaĩra Jehova tondũ wa ciũra icio aatwarithĩirie Firauni. 13Nake Jehova agĩĩka o ta ũguo Musa oigĩte; nacio ciũra icio igĩkua, igĩthira nyũmba, o na mĩciĩ-inĩ, o na mĩgũnda-inĩ. 14Igĩgĩcokererio, ikĩigwo irũndo, naguo bũrũri ũgĩkĩgĩa na kĩhera kĩũru. 15No rĩrĩ, rĩrĩa Firauni onire atĩ hekũgĩa ihinda rĩa gũcokia mĩhũmũ, agĩcoka kwĩritũhia ngoro, akĩwarega kũmathikĩrĩria, o ta ũrĩa Jehova oigĩte.

16Nake Jehova akĩĩra Musa atĩrĩ, Ĩra Haruni ũũ: Ambararia rũthanju rũaku, ũgũthe rũkũngũ rũa thĩ, nĩ getha rũtuĩke rũagĩ kũndũ guothe bũrũri wa Misiri. 17Nao magĩĩka ũguo, nake Haruni agĩtambũrũkia guoko agwete rũthanju rũu rũake, akĩgũtha rũkũngũ rũa thĩ, naruo rũagĩ rũu rũkĩũmbĩrĩra andũ o na nyamũ; rũkũngũ ruothe rũa thĩ rũgĩtuĩka rũagĩ kũndũ guothe bũrũri wa Misiri. 18Nao ago magĩĩka o ta ũguo na ũgo wao nĩ getha o nao matũme gũũke rũagĩ, no makĩremwo; naruo rũagĩ rũu no rũombagĩrĩra andũ o na nyamũ. 19#Luk 11.20.Hĩndĩ ĩo ago acio makĩĩra Firauni atĩrĩ, Ũndũ ũyũ nĩ wa kĩara kĩa Ngai; nake Firauni akĩũma ngoro, akĩrega kũmathikĩrĩria, o ta ũrĩa Jehova oigĩte.

20Nake Jehova akĩĩra Musa atĩrĩ, Roka gũũkĩra rũcinĩ tene, ũkarũgame harĩ Firauni, na atĩrĩ, ũkamũkora akiuma mũciĩ agĩthiĩ maĩ-inĩ; ũmwĩre atĩrĩ, Jehova ekuuga ũũ: Reka andũ akwa mathiĩ nĩ getha makandungatĩre. 21Na rĩrĩ, ũngĩrega kũreka mathiĩ-rĩ, atĩrĩrĩ, nĩngũrehe ngi, mĩrumbĩ mĩingĩ, ikũũmbĩrĩre, o na ciũmbĩrĩre ndungata ciaku, o na kĩrĩndĩ kĩu gĩaku, na itonye nyũmba ciaku; o nacio nyũmba cia andũ aya a Misiri nĩikaiyũrũo nĩ ngi, mĩrumbĩ mĩingĩ, o gwata tĩri-inĩ kũu guothe marĩ. 22Naguo mũthenya ũcio nĩngaamũra bũrũri wa Gosheni, o kũu andũ akwa matũũraga, nĩ getha gũtikagĩe mĩrumbĩ ya ngi, nĩguo ũmenye atĩ niĩ nĩ niĩ Jehova, ũrĩa wĩ gũkũ thĩ gatagatĩ kayo. 23Na nĩngonania kĩmenyithia kĩa ngũũrani ya andũ akwa na andũ aku, nakĩo gĩkoneka rũciũ. 24Nake Jehova agĩĩka o ta ũguo, gũgĩgĩũka ngi mĩrumbĩ mĩũru, igĩtonya nyũmba ya Firauni, o na igĩtonya nyũmba cia ndungata ciake, naguo bũrũri wothe wa Misiri ũgĩthũka mũno nĩ ũndũ wa mĩrumbĩ ĩo ya ngi.

25Firauni agĩgĩĩta Musa na Haruni, akĩmera atĩrĩ, Thiĩi mũkarutĩre Ngai wanyu igongona mũrĩ o ro gũkũ bũrũri ũyũ. 26Nake Musa akiuga atĩrĩ, Gũtingĩagĩrĩra twĩke ũguo, nĩ ũndũ tũkũrutĩra Jehova Ngai witũ igongona rĩa indo thĩnje iria cionagwo ta irĩ thahu nĩ andũ a Misiri. Kaĩ tũngĩkĩruta igongona rĩa indo ikuonwo ta irĩ thahu nĩ andũ a Misiri magĩtuonaga, na matitũhũre na mahiga nyuguto? 27Tũgũthiĩ rũgendo rũa mĩthenya ĩtatũ werũ-inĩ, tũkarutĩre Jehova Ngai witũ igongona, tũgeke o ta ũrĩa arĩtwatha. 28Nake Firauni akiuga atĩrĩ, Nĩngũreka mũthiĩ nĩguo mũkarutĩre Jehova Ngai wanyu igongona werũ-inĩ; no rĩrĩ, menyai mũthiĩ kũraya mũno; o na niĩ-rĩ, ’hoerai Ngai. 29Nake Musa akiuga ũũ: Nĩndagĩthiĩ, na nĩngũhoya Jehova nĩguo mĩrumbĩ ĩno ya ngi yeherere Firauni, na ndungata ciake, o na andũ ake, o rũciũ; no rĩrĩ, nĩ kaba Firauni atige gũcoka gũtũhenia akĩgiria andũ mathiĩ makarutĩre Jehova igongona. 30Musa agĩkiuma he Firauni, akĩhoya Jehova. 31Nake Jehova agĩĩka o ta ũrĩa kiugo kĩa Musa gĩatariĩ, agĩkĩeheria mĩrumbĩ ĩo ya ngi yume kwa Firauni, na kwa ndungata ciake, o na kwa andũ ake, na gũtiatigarire o na ĩmwe. 32Nake Firauni, o na hĩndĩ ĩo nayo akĩũmia ngoro yake, o na ndaigana kũreka andũ mathiĩ.

Currently Selected:

THAMA 8: OGKBIBLE

Highlight

Compare

Copy