MAŨNDŨ MA ALAWII 19
19
1NINGĨ Jehova akĩarĩria Musa, akĩmwĩra atĩrĩ, 2#Alaw 11.44,45; 1 Pet 1.16.Aria na kĩrĩndĩ gĩothe gĩa ciana cia Isiraeli, ũkĩĩre atĩrĩ, Wĩamũrei mũtuĩke atheru; nĩ gũkorũo niĩ Jehova Ngai wanyu ndĩ mũtheru. 3#Thama 20.12; Gũcok 5.16; Thama 20.8; Gũcok 5.12.Inyuothe-rĩ, o mũndũ wanyu nĩetigagĩre nyina na ithe, na mũmenyagĩrĩre thabatũ ciakwa; niĩ nĩ niĩ Jehova Ngai wanyu. 4#Alaw 26.1; Thama 20.23; 34.17; Gũcok 17.2-5.Menyai mũkanahũgũkĩra mĩhianano ĩtarĩ kĩene mũmĩhoe, kana mwĩthondekere ngai cia gũtwekio; niĩ nĩ niĩ Jehova Ngai wanyu. 5Na rĩrĩ, hĩndĩ ĩrĩa mũkũrutĩra Jehova igongona rĩa ũiguano, rĩrutagei na njĩra ĩrĩa ĩngĩtũma mwĩtĩkĩrĩke nĩwe. 6Mũrĩrĩage mũthenya ũrĩa mwarĩruta, o na rũciũ rũu rũngĩ; na hangĩgatigara gacunjĩ karĩo gakinyie mũthenya wa ĩtatũ, gacinwo na mwaki. 7Nako gacunjĩ o na karĩkũ karĩo kangĩkarĩo mũthenya wa ĩtatũ, igongona rĩu rĩgatuĩka ũndũ wĩ thahu; rĩtigetĩkĩrĩka; 8no mũndũ o wothe ũrĩa ũkarĩrĩa nĩagacokererũo nĩ ũũru ũcio ekĩte, nĩ gũkorũo nĩathahĩtie kĩndũ kĩu gĩtheru kĩa Jehova; nake mũndũ ũcio nĩakaingatwo athengio kũrĩ andũ ao.
9 #
Alaw 27.15; Gũcok 24.19-22. Na rĩrĩ, hĩndĩ ĩrĩa mũkũgetha irio cia bũrũri wanyu, ndũkanagethe ndere-inĩ cia mũgũnda waku, ũũninũkĩrĩrie, kana ũũnganie rũitĩki rũa magetha maguo rũrĩa rũngĩhaarĩka. 10O na ningĩ ndũkanahaare thabibu mũgũnda waku wa mĩthabibu, kana ũcokererie thabibu iria ciĩgũithĩtie mũgũnda ũcio; mũgatiga icio nĩ ũndũ wa mũthĩni, o na ũndũ wa mũũki; niĩ nĩ niĩ Jehova Ngai waku. 11#Thama 20.15; Gũcok 5.19; Thama 20.16; Gũcok 5.20.Mũtĩkanaiye, kana mwĩke maũndũ ma kũhenania, kana mũhenanie o mũndũ na mũndũ ũrĩa ũngĩ. 12#Thama 20.7; Gũcok 5.11; Mat 5.33.O na ningĩ mũtikanehĩte na maheni mũkĩgwetaga rĩĩtwa rĩakwa, ũthahie rĩĩtwa rĩa Ngai waku; niĩ nĩ niĩ Jehova. 13#Gũcok 24.14,15.Ndũkanahinyĩrĩrie mũndũ ũrĩa ũngĩ, kana ũmũtunye indo ciake; ningĩ mũcara wa ndungata ĩrĩa yandĩkĩtwo nĩwe, ndũkanarege naguo ũũraarie nginya o rũcinĩ. 14#Gũcok 27.18.Ndũkanarume gĩtaigua o na atĩa, kana ũhĩngithie mũtumumu; no rĩrĩ, wĩtigagĩre Ngai waku; niĩ nĩ niĩ Jehova. 15#Thama 23.6-8; Gũcok 16.19.Mũtikaneke ũndũ ũtarĩ wa kĩhooto mũgĩtua cira; na ndũkanacaĩre mũndũ nĩ ũndũ wa ũrĩa e mũthĩni, kana ũconokere mũndũ nĩ ũndũ wa ũrĩa arĩ igweta; no rĩrĩ, ciragĩra mũndũ ũrĩa ũngĩ na kĩhooto. 16Ndũkanorũre thĩinĩ wa andũ ũkĩheana ndeto cia njukũ; kana ũrũgame cira-inĩ ũitithie thakame ya mũndũ ũrĩa ũngĩ ũkĩmũigĩrĩra kĩgenyo; niĩ nĩ niĩ Jehova. 17#Mat 18.15.Ndũkanaikare ũthũũrĩte mũrũ wa thoguo na ngoro, ningĩ ndũkanaage gũkaania mũndũ ũrĩa ũngĩ maũndũ o na atĩa, nĩguo ndũkanacokererũo nĩ ũũru ta ũrĩ mwĩhia nĩ ũndũ wake. 18#Mat 5.43; 19.19; 22.39; Mar 12.31; Luk 10.27; Rom 13.9; Gal 5.14; Jak 2.8.Ndũkanerĩhĩrie o na atĩa, kana ũikare ũrakaire nĩ ũndũ wa ciana cia andũ anyu; no rĩrĩ, nĩ kaba wende mũndũ ũrĩa ũngĩ o ta ũrĩa wĩendete wee mwene; niĩ nĩ niĩ Jehova. 19#Gũcok 22.9-11.Menyagĩrĩrai irĩra cia watho wakwa wa kũrũmĩrĩrũo. Ndũkanareke ũhiũ waku ũciarane na nyamũ ya mũthemba ũngĩ; o naguo mũgũnda waku ndũkanaũhande mbeũ cia mĩthemba ĩĩrĩ; kana wĩhumbe nguo ĩtukanĩtio ndigi cia mĩthemba ĩĩrĩ ĩraihanĩrĩirie. 20Na rĩrĩ, mũndũ o wothe ũrĩa ũgakoma na mũndũ-wa-nja e ngombo, na akorũo nĩorĩtio nĩ mũrũme, no atuĩke ndakũũrĩtwo o na hanini, kana akarekio atige gũtuĩka ngombo, andũ acio erĩ-rĩ, ũhoro wao nĩũtuĩrio, no matikoragwo, nĩ ũndũ mũndũ-wa-nja ũcio ndaatigĩte gũtuĩka ngombo. 21Nake mũndũ mũrũme ũcio no mũhaka agatwarĩra Jehova kĩndũ gĩake gĩa kũrutwo igongona rĩa mahĩtia, o hau mũromo-inĩ wa hema-ya-gũtũnganwo, nakĩo gĩtuĩke ndũrũme nĩ ũndũ wa igongona rĩa mahĩtia. 22Nake mũthĩnjĩri-Ngai amũhoroherie na ndũrũme ĩo ya igongona rĩa mahĩtia mbere ya Jehova nĩ ũndũ wa wĩhia wake ũcio ehĩtie; nake nĩakoherũo wĩhia ũcio ehĩtie. 23Na rĩrĩ, hĩndĩ ĩrĩa mũgakinya bũrũri ũrĩa mũkũheo, na mũhande mĩtĩ ya mĩthemba yothe ĩmũciarĩre irio-rĩ, nĩmũkonaga maciaro mayo mahaana o ta ũrĩa andũ arĩa mataruithĩtio matariĩ; magaikara mĩaka ĩtatũ mahaana o ta andũ mataruithĩtio; na matikanarĩo. 24No rĩrĩ, mwaka wa ĩna-rĩ, maciaro mayo mothe makaamũrĩrũo Jehova agathwo namo. 25Naguo mwaka wa ĩtano nĩguo mũkarĩa maciaro mayo, nĩ getha ĩmũĩngĩhagĩrie irio; niĩ nĩ niĩ Jehova Ngai wanyu. 26#Kĩam 9.4; Alaw 7.26,27; 17.10-14; Gũcok 12.16,23; 15.23; Gũcok 18.10.Mũtikanarĩe kĩndũ o na kĩ kĩrĩ na thakame yakĩo thĩinĩ wakĩo; kana mwĩke maũndũ na ũndũ wa gũtuĩria nyoni ya mũndũ, kana kũragũria. 27#Alaw 21.5; Gũcok 14.1.Mũtikaneyenje mĩtwe yanyu thikĩrĩrio-inĩ, kana wĩenje nderu ciaku mĩthia-inĩ, ũcithũkie, 28kana mwĩtemenge mĩĩrĩ yanyu o na atĩa nĩ ũndũ wa kũhaka ngoma, kana mwĩore mĩokia o na hanini; niĩ nĩ niĩ Jehova. 29#Gũcok 23.17.Ndũkanathahie mwarĩguo ũkĩmũrekereria atuĩke mũmaraya, nĩguo andũ a bũrũri matigaitĩke kwĩrirĩria ũmaraya mũno, naguo bũrũri ũiyũre waganu. 30#Alaw 26.2.Menyagĩrĩrai thabatũ ciakwa, o na mũtĩage handũ hakwa harĩa haamũre; niĩ nĩ niĩ Jehova. 31#Gũcok 18.11; 1 Sam 28.3; 2 Ath 23.4; Isa 8.19.Mũtikanahũgũkĩre andũ arĩa marĩ na maroho maragũraga, kana arogi; mũtikanatuĩrie ũhoro kũrĩ o mamũthũkie; niĩ nĩ niĩ Jehova Ngai wanyu. 32Ũkagĩrĩra mũthuri ũragĩa mbuĩ, na ũtĩage gĩthiithi kĩa mũndũ ũrakũra, ũgĩĩtigagĩre Ngai waku; niĩ nĩ niĩ Jehova. 33#Thama 22.21; Gũcok 24.17,18; 27.19.Na rĩrĩ, mũgeni angĩũka gũtũũrania nawe bũrũri waku-rĩ, ndũkanamwĩke ũũru. 34Mũgeni ũrĩa ũtũũranĩtie na inyuĩ mũtuagei o ta arĩ wa bũrũri wanyu, na ũmwendage o ta ũrĩa wĩendete wee mwene; nĩ gũkorũo o na inyuĩ nĩmwatũire mũrĩ ageni bũrũri wa Misiri; niĩ nĩ niĩ Jehova Ngai wanyu. 35#Gũcok 25.13-16; Thim 20.10; Ezek 45.10.Mũtikaneke ũndũ ũtarĩ wa kĩhooto mũgĩtua cira, kana mũgĩthima ũraihu, kana ũritũ, kana kũingĩha. 36No mũhaka mũgĩe na ratiri ĩtangĩhenania, na mahiga ma gũthima namo matangĩhenania, na eba ĩtangĩhenania, o na hini ĩtangĩhenania. Niĩ nĩ niĩ Jehova Ngai wanyu ũrĩa wamũrutire bũrũri wa Misiri. 37Menyagĩrĩrai irĩra ciothe cia watho wakwa wa kũrũmĩrĩrũo, o na matuĩro makwa mothe ma cira, mũmekage; niĩ nĩ niĩ Jehova.
Currently Selected:
MAŨNDŨ MA ALAWII 19: OGKBIBLE
Highlight
Share
Compare
Copy
Want to have your highlights saved across all your devices? Sign up or sign in
©Bible Society of Kenya, 2019