MAŨNDŨ MA ALAWII 4
4
1NINGĨ Jehova akĩarĩria Musa, akĩmwĩra atĩrĩ, 2Aria na ciana cia Isiraeli, ũciĩre ũũ: Mũndũ o na ũrĩkũ angĩkehia wĩhia uumanĩte na maũndũ marĩa Jehova aathanĩte matikanekwo, eke ũndũ ũmwe wa maũndũ macio atekũmenya atĩ nĩ ũũru areka-rĩ, 3kũngĩkorũo nĩ mũthĩnjĩri-Ngai ũrĩa ũitĩrĩirio maguta ũkehia, na tondũ wa wĩhia ũcio atũme andũ arĩa angĩ monwo atĩ ti-itherũ nĩmahĩtĩtie-rĩ, nĩakarutĩra Jehova ndegwa ĩmwe ĩtarĩ ngũrũ, na ĩtarĩ na kaũũgũ, nĩ ũndũ wa wĩhia wake ũcio ehĩtie, ĩtuĩke ya igongona rĩa mehia. 4Nake agatwara ndegwa o mũromo-inĩ wa hema-ya-gũtũnganwo mbere ya Jehova, na aambe aigĩrĩre guoko gwake mũtwe wa ndegwa ĩo, acoke amĩthĩnjĩre o hau mbere ya Jehova. 5Nake mũthĩnjĩri-Ngai ũcio ũitĩrĩirio maguta oe thakame ya ndegwa ĩo, amĩtware hema-inĩ-ya-gũtũnganwo, 6nake mũthĩnjĩri-Ngai ũcio atobokie kĩara gĩake thakame-inĩ, aminjaminje thakame ĩo maita mũgwanja mbere ya Jehova, hau mbere ya gĩtama kĩrĩa gĩa kũhakania kĩa handũ harĩa haamũre. 7Ningĩ mũthĩnjĩri-Ngai ekĩre thakame ĩo ĩmwe hĩa-inĩ cia kĩgongona kĩa mahuti marĩa manungaga wega, kĩrĩa kĩrĩ hema-inĩ-ya-gũtũnganwo, hau mbere ya Jehova; nayo thakame ĩrĩa ĩngĩ yothe ya ndegwa ĩo amĩite thĩ kĩgongona-inĩ kĩa mahaki ma njino, o kĩu kĩrĩ mũromo-inĩ wa hema-ya-gũtũnganwo. 8Nayo ndegwa ĩo ya igongona rĩa mehia amĩrute maguta mayo mothe; namo nĩ rũambũ rũrĩa rũhumbagĩra nyama cia nda, o na maguta ma nda mothe, 9o na higo cierĩ hamwe na maguta marĩa magwataine nacio honge-inĩ, o na habaya wa ini-inĩ aũrutanĩrie na higo; 10akaruta maguta mayo o ta ũrĩa ndegwa ya igongona rĩa ũiguano ĩrutagwo; nacio nyama icio ciothe mũthĩnjĩri-Ngai acicinĩre kĩgongona-inĩ igũrũ kĩu kĩa mahaki ma njino. 11Naguo mũgũgũta wa ndegwa ĩo, na nyama ciayo ciothe, hamwe na mũtwe wayo, na mathagiro mayo, na nyama ciayo cia nda, o na tatha wayo, 12naguo ũguo nĩ ta kuuga ndegwa ĩo yothe, akamĩkuua, amĩtware na kũu gĩthaka-inĩ mbarĩ ĩrĩa ĩngĩ ya hau kĩraaro-inĩ, handũ hatarĩ gĩko, harĩa haitagwo mũhu, amĩcinĩre na mwaki ngũ-inĩ igũrũ; o handũ hau mũhu ũitagwo-rĩ, nĩho ĩgacinĩrũo.
13Na rĩrĩ, kũngĩkorũo nĩ kĩrĩndĩ gĩothe gĩa Isiraeli gĩkehia, naguo ũndũ ũcio ũikare ũhithĩtwo wage kũmenyeka nĩ ũũngano wakĩo, nakĩo gĩkorũo nĩgĩĩkĩte ũndũ o na ũrĩkũ wa maũndũ marĩa Jehova aathanire matikanekwo, nakĩo kĩonwo atĩ ti-itherũ nĩkĩĩhĩtie, 14hĩndĩ ĩrĩa wĩhia ũrĩa kĩĩhĩtie ũkamenyeka-rĩ, kĩrĩndĩ kĩu gĩkaruta ndegwa ĩtarĩ ngũrũ, ĩtuĩke igongona rĩa mehia, kĩmĩtware hau mwena wa na mbere wa hema-ya-gũtũnganwo. 15Nao athuri arĩa me kĩrĩndĩ-inĩ kĩu maambe maigĩrĩre moko mao mũtwe wa ndegwa ĩo mbere ya Jehova; nayo ndegwa ĩo ĩcoke ĩthĩnjĩrũo hau mbere ya Jehova. 16Nake mũthĩnjĩri-Ngai ũrĩa ũitĩrĩirio maguta atware thakame ĩmwe ya ndegwa ĩo hema-inĩ-ya-gũtũnganwo; 17nake mũthĩnjĩri-Ngai atobokie kĩara gĩake thakame-inĩ ĩo, amĩminjaminje maita mũgwanja mbere ya Jehova, o hau mbere ya gĩtama kĩrĩa gĩa kũhakania. 18Ningĩ ekĩre thakame ĩmwe hĩa-inĩ cia kĩgongona kĩu kĩrĩ mbere ya Jehova, o kĩu kĩrĩ hema-inĩ-ya-gũtũnganwo thĩinĩ, nayo thakame ĩrĩa ĩngĩ yothe amĩite thĩ kĩgongona-inĩ kĩa ihaki rĩa njino, kĩu kĩrĩ mũromo-inĩ wa hema-ya-gũtũnganwo. 19Ningĩ arute maguta mayo mothe, amacinĩre kĩgongona-inĩ kĩu igũrũ. 20Ũguo nĩguo ageka ndegwa ĩo; o ta ũrĩa ekire ndegwa ya igongona rĩa mehia, ũguo noguo ageka ĩo o nayo; mũthĩnjĩri-Ngai akĩhoroherie kĩrĩndĩ kĩu, na nĩgĩkoherũo. 21O nayo ndegwa ĩo amĩoe, amĩtware na kũu gĩthaka-inĩ mbarĩ ĩrĩa ĩngĩ ya hau kĩraaro-inĩ, amĩcine o ta ũrĩa aacinire ndegwa ĩrĩa ya mbere; ĩo nĩyo ya igongona rĩa mehia ma kĩrĩndĩ kĩu.
22Na rĩrĩ, kũngĩkorũo nĩ mwathi wa andũ arĩa angĩ wĩhĩtie atekũmenya atĩ ũrĩa egwĩka nĩ ũũru, eke ũndũ ũmwe wa maũndũ marĩa Jehova Ngai wake aathanĩte matikanekwo, nake onwo atĩ ti-itherũ nĩ mwĩhia-rĩ, 23hĩndĩ ĩrĩa angĩmenyithio wĩhia ũcio ehĩtie, kĩndũ gĩake kĩrĩa akaruta nĩ mbũri, nayo ĩtuĩke nĩ thenge ĩtarĩ na kaũũgũ; 24na aambe amĩigĩrĩre guoko mũtwe, acoke amĩthĩnjĩre o handũ hau hathĩnjagĩrũo nyamũ cia ihaki rĩa njino mbere ya Jehova; mbũri ĩo-rĩ, nĩyo ya igongona rĩa mehia. 25Nake mũthĩnjĩri-Ngai oe thakame ĩmwe ya igongona rĩu rĩa mehia na kĩara gĩake, amĩĩkĩre hĩa-inĩ cia kĩgongona kĩa ihaki rĩa njino, nayo thakame ĩrĩa ĩngĩ yothe amĩite thĩ kĩgongona-inĩ kĩu kĩa ihaki rĩa njino. 26Namo maguta mayo mothe amacinĩre kĩgongona-inĩ kĩu igũrũ, o ta ũrĩa maguta ma igongona rĩa ũiguano macinagwo; mũthĩnjĩri-Ngai akĩmũhoroherie nĩ ũndũ wa wĩhia wake, na nĩakoherũo.
27 #
Ndar 15.27,28. Na rĩrĩ mũndũ o na ũrĩkũ wa andũ anyu arĩa angĩ angĩĩhia eke ũndũ o na ũrĩkũ wa maũndũ marĩa Jehova aathanĩte matikanekwo, atekũmenya atĩ ũrĩa egwĩka nĩ ũũru, nake onwo atĩ ti-itherũ nĩ mwĩhia, 28hĩndĩ ĩrĩa angĩmenyithio wĩhia ũcio ehĩtie-rĩ, kĩndũ gĩake gĩa kũruta nĩ mbũri, nayo ĩtuĩke nĩ harika ĩtarĩ na kaũũgũ, ĩrutwo nĩ ũndũ wa wĩhia ũcio ehĩtie. 29Nake aambe aigĩrĩre guoko mũtwe wa harika ĩo ĩkũrutwo igongona rĩa mehia, acoke amĩthĩnjĩre o handũ harĩa nyamũ cia ihaki rĩa njino ithĩnjagĩrũo. 30Nake mũthĩnjĩri-Ngai oe thakame ĩmwe yayo na kĩara gĩake, amĩĩkĩre hĩa-inĩ cia kĩgongona kĩa ihaki rĩa njino, nayo thakame ĩrĩa ĩngĩ yothe amĩite thĩ kĩgongona-inĩ kĩu. 31O namo maguta mothe mayo amarute, o ta ũrĩa marutagwo thĩinĩ wa nyamũ cia magongona ma ũiguano; nake mũthĩnjĩri-Ngai amacinĩre kĩgongona-inĩ kĩu igũrũ ma gũtũma mũtararĩko ũrĩa ũnungaga wega ũiguwo nĩ Jehova; mũthĩnjĩri-Ngai akĩmũhoroherie, na nĩakoherũo.
32Na rĩrĩ, kĩndũ gĩake gĩa kũruta gĩkoniĩ igongona rĩu rĩa mehia kĩngĩkorũo nĩ kagondu-rĩ, akaruta kamwatĩ gatarĩ na kaũũgũ. 33Na aambe aigĩrĩre guoko mũtwe wa kamwatĩ kau ka igongona rĩa mehia, acoke agathĩnjĩre o handũ harĩa nyamũ cia mahaki ma njino ithĩnjagĩrũo, gatuĩke ka igongona rĩa mehia. 34Nake mũthĩnjĩri-Ngai oe thakame ĩmwe ya kamwatĩ kau ka igongona rĩa mehia na kĩara gĩake, amĩĩkĩre hĩa-inĩ cia kĩgongona kĩa ihaki rĩa njino, nayo thakame ĩrĩa ĩngĩ yothe amĩite thĩ kĩgongona-inĩ kĩu; 35namo maguta mako mothe amarute, o ta ũrĩa maguta ma kagondu ka igongona rĩa ũiguano marutagwo, nake mũthĩnjĩri-Ngai amacinĩre kĩgongona-inĩ igũrũ, o ta ũrĩa nyamũ cia mahaki ma gũcinwo na mwaki marĩa marutagĩrũo Jehova macinagwo; mũthĩnjĩri-Ngai akĩmũhoroherie ũhoro-inĩ wa wĩhia ũrĩa ehĩtie, na nĩakoherũo.
Currently Selected:
MAŨNDŨ MA ALAWII 4: OGKBIBLE
Highlight
Share
Compare
Copy
Want to have your highlights saved across all your devices? Sign up or sign in
©Bible Society of Kenya, 2019