MAŨNDŨ MA ALAWII 3
3
1Na rĩrĩ, kĩndũ gĩake gĩa kũruta kĩngĩkorũo nĩ kĩa igongona rĩa ũiguano, nake akorũo egũkĩruta ũhiũ-inĩ wa ng’ombe-rĩ, o na gĩĩ kĩa njamba, kana nga, agakĩrutĩra Jehova gĩtarĩ na kaũũgũ. 2Nayo nyamũ ĩo yake ya kũrutwo aambe amĩigĩrĩre guoko mũtwe, acoke amĩthĩnjĩre hau mũromo-inĩ wa hema-ya-gũtũnganwo; nao ariũ a Haruni, acio athĩnjĩri-Ngai, maminjaminje thakame yayo igũrũ rĩa kĩgongona mbarĩ ciothe. 3Na rĩrĩ, thĩinĩ wa igongona rĩu rĩa ũiguano-rĩ, nĩakarutĩra Jehova nyama imwe cia gũcinwo na mwaki; nacio nĩ rũambũ rũrĩa rũhumbagĩra nyama cia nda, na maguta ma nda mothe, 4na higo cierĩ hamwe na maguta marĩa magwataine nacio honge-inĩ, na habaya wa ini-inĩ ũrutanĩrio na higo. 5Nao ariũ a Haruni macinĩre nyama icio kĩgongona-inĩ igũrũ, o igũrũ rĩa ihaki rĩa njino rĩrĩa rĩigĩrĩirũo ngũ-inĩ iria irĩ mwaki-inĩ; rĩu nĩrĩo ihaki rĩa gũcinwo na mwaki rĩa gũtũma mũtararĩko ũrĩa ũnungaga wega ũiguwo nĩ Jehova.
6Na rĩrĩ kĩndũ gĩake gĩa kũrutĩra Jehova kĩa igongona rĩa ũiguano, kĩngĩkorũo kiumĩte rũũru-inĩ rũa ng’ondu-rĩ, o na gĩĩ kĩa njamba kana nga, no mũhaka arute ĩtarĩ na kaũũgũ. 7Na kĩngĩkorũo nĩ gatũrũme kana kamwatĩ, agakaruta akaige mbere ya Jehova, 8na aambe aigĩrĩre guoko gwake mũtwe wa kau ekũruta, acoke agathĩnjĩre o hau mbere ya hema-ya-gũtũnganwo; nao ariũ a Haruni maminjaminje thakame yako igũrũ rĩa kĩgongona mbarĩ ciothe. 9Na rĩrĩ, thĩinĩ wa igongona rĩu rĩa ũiguano, akarutĩra Jehova nyama imwe cia gũcinwo na mwaki; nacio nĩ maguta mothe ma kagondu kau, o gĩthita gĩako kĩrĩ kĩgima gĩtinĩirio ihĩndĩ-inĩ rĩa rũcuthĩ, na rũambũ rũrĩa rũhumbagĩra nyama cia nda, na maguta ma nda mothe, 10o na higo cierĩ hamwe na maguta marĩa magwataine nacio honge-inĩ, o na habaya wa ini-inĩ aũrutanĩrie na higo. 11Nake mũthĩnjĩri-Ngai acinĩre nyama icio kĩgongona-inĩ kĩu igũrũ; ĩo nĩyo ndĩa ĩrĩa ĩrutĩirũo Jehova ya ihaki rĩa gũcinwo na mwaki.
12Ningĩ kĩndũ gĩake gĩa kũruta kĩngĩtuĩka nĩ mbũri-rĩ, nĩakamĩruta amĩige mbere ya Jehova, 13na aambe aigĩrĩre guoko gwake mũtwe wa nyamũ ĩo ekũruta, acoke amĩthĩnjĩre o hau mbere ya hema-ya-gũtũ-nganwo; nao ariũ a Haruni maminjaminje thakame yayo igũrũ rĩa kĩgongona mbarĩ ciothe. 14Na nĩakaruta nyama imwe ciayo ituĩke kĩndũ kĩrĩa arutĩire Jehova kĩa ihaki rĩa gũcinwo na mwaki; nacio nĩ rũambũ rũrĩa rũhumbagĩra nyama cia nda, na maguta ma nda mothe, 15na higo cierĩ hamwe na maguta marĩa magwataine nacio honge-inĩ, o na habaya wa ini-inĩ aũrutanĩrie na higo. 16Nake mũthĩnjĩri-Ngai acinĩre nyama icio kĩgongona-inĩ kĩu igũrũ; ĩo nĩyo ndĩa ĩrĩa ĩrutĩirũo Jehova ya ihaki rĩa gũcinwo na mwaki ya gũtũma mũtararĩko ũrĩa ũnungaga wega ũiguwo; maguta mothe nĩ ma Jehova. 17Ũndũ ũyũ ũgũtuĩka watho wa gũtũũra ũrũmagĩrĩrũo hingo ciothe njiaro-inĩ cianyu ciothe, kũndũ kũrĩa guothe mũrĩtũũraga, wa atĩ mũtikanarĩe maguta kana thakame.
Currently Selected:
MAŨNDŨ MA ALAWII 3: OGKBIBLE
Highlight
Share
Compare
Copy
Want to have your highlights saved across all your devices? Sign up or sign in
©Bible Society of Kenya, 2019