MARIKO 13
13
1NA rĩrĩa oimaga kũu hekarũ-inĩ, mũrutwo wake ũmwe akĩmwĩra, Mũrutani, ta rora, mahiga maya matirĩ mwago! nyũmba ici nacio itirĩ mwago! 2Nake Jesu akĩmwĩra, Nĩũkuona nyũmba ici nene ũũ? handũ hau-rĩ, hatigatigario ihiga o na rĩmwe rĩikarĩte igũrũ rĩa rĩrĩa rĩngĩ, rĩtagũithĩtio.
3Na hingo aaikaire kĩrĩma-inĩ kĩa Mĩtamaiyũ ang’etheire hekarũ, Petero na Jakubu na Johana na Andarea makĩmũũria atĩrĩrĩ, me ndundu, 4Twĩre atĩrĩ, rĩrĩa maũndũ macio magakinya nĩ rĩ? na nĩ kĩ gĩgatuĩka kĩmenyithia, rĩrĩa maũndũ macio mothe magatua gwĩkĩka?
5Nake Jesu akĩrika kũmera atĩrĩrĩ, Wĩmenyagĩrĩrei mũtikahĩtithio nĩ mũndũ. 6Andũ aingĩ magoka magĩĩtuaga rĩĩtwa rĩakwa, makiugaga atĩrĩ, Niĩ nĩ niĩ Kristo; na nĩmakahĩtithia andũ aingĩ. 7Na rĩrĩa mũkaigua ũhoro wa mbaara na mbugĩrĩrio cia mbaara, mũtikamake: maũndũ macio matirĩ hingo matagakinya; no rĩrĩ, ithirĩro ti ikinyu. 8Tondũ o rũrĩrĩ nĩrũgokĩrĩra rũrĩa rũngĩ, na o ũthamaki ũũkĩrĩre ũrĩa ũngĩ: na nĩgũkagĩa ithingithia cia thĩ kũndũ na kũndũ, na kũgĩe ng’aragu; maũndũ macio nĩmo kĩambĩrĩria kĩa ruo ta rũa kũrũmwo.
9 #
Mat 10.17-20; Luk 12.11,12. Na inyuĩ-rĩ, wĩmenyagĩrĩrei: tondũ makamũneana gwĩ ciama cia athuri; na mũkahũrĩrũo thunagogi-inĩ; na mũrũgame mbere ya aathani na athamaki nĩ ũndũ wakwa, mũtuĩke aira kũrĩ o. 10Naguo Ũhoro-ũrĩa-Mwega ndũrĩ hingo ũtakaamba kũhunjĩrio ndũrĩrĩ ciothe. 11Na maamũtwara cira-inĩ na maamũneana, mũtikanaambe gwĩtanga mbere nĩ ũndũ wa ũrĩa mũriuga: no rĩrĩ, ũndũ o ũrĩa mũkaheo hingo ĩo, ugai guo: amu ti inyuĩ mũkaaria, nĩ Roho Mũtheru. 12Na mũndũ nĩakaneana mũrũ wa nyina oragwo, na ithe aneane mwana; na ciana nĩigokĩrĩra aciari imoragithie. 13#Mat 10.22.Na nĩmũgathũũrũo nĩ andũ othe nĩ ũndũ wa rĩĩtwa rĩakwa: no ũrĩa ũgũtũũra akirĩrĩirie nginya o ithirĩro, ũcio nĩakahonokio.
14 #
Dan 9.27; 11.31; 12.11. No rĩrĩ, rĩrĩa mũkona kĩrĩa kĩrĩ thahu na gĩa gũkiria ihooru kĩrũngiĩ harĩa hatakĩagĩrĩire, (ũrĩa ũrathoma nĩamenye ũhoro ũcio), hĩndĩ ĩo-rĩ, arĩa matũire Judea nĩmorĩre irĩma-inĩ: 15#Luk 17.31.nake ũrĩa wĩ nyũmba igũrũ nĩatige gũikũrũka, kana atonye akarute kĩndũ nyũmba yake thĩinĩ: 16nake ũrĩa wĩ mũgũnda ndagacoke na thutha akoe nguo yake. 17Nao arĩa magakorũo me na mahu, na arĩa magakorũo makĩongithia twana matukũ macio kaĩ nĩmakagĩa na haaro-ĩ! 18Na mũhoyage atĩ ũndũ ũcio ndũgakinye hingo ya heho. 19#Dan 12.1; Kũg 7.14.Amu matukũ macio magatuĩka ma thĩna ũtarĩ wonwo taguo gwata kĩambĩrĩria rĩrĩa Ngai ombire indo ciothe nginya rĩu, na ũtakonwo ũngĩ taguo o na rĩ. 20Na tiga Mwathani aakuhĩhirie matukũ macio, gũtirĩ mũndũ ũngĩkahonoka: no tondũ wa arĩa aamũre, o arĩa eyamũrĩire, nĩaakuhĩhirie matukũ macio. 21Na hĩndĩ ĩo mũndũ angĩkamwĩra, Atĩrĩ, Kristo e na gũkũ; kana amwĩre, Atĩrĩrĩ, e na kũu; mũtikanetĩkie: 22tondũ nĩgũkagĩa na Makristo ma maheni o na anabii a maheni, nao monanie ciama na morirũ, nĩguo mahĩtithie arĩa aamũre, ũngĩkorũo ũguo wahoteka. 23No inyuĩ-rĩ, mwĩmenyagĩrĩre: atĩrĩ, nĩndakĩmwĩra maũndũ mothe o mbere.
24 #
Isa 13.10; Joel 2.10,31; 3.15; Kũg 6.12;
Isa 13.10; Ezek 32.7. No rĩrĩ, matukũ macio, thutha wa thĩna ũcio-rĩ, riũa nĩrĩgekĩrũo nduma, naguo mweri ũtige kwara, 25#Isa 34.4; Kũg 6.13; Joel 2.10.nacio njata irike kũgũa ciume igũrũ, namo mahinya marĩa me igũrũ nĩmakenyenyio. 26#Dan 7.13; Kũg 1.7.Na hĩndĩ ĩo andũ nĩmakona Mũrũ wa Mũndũ agĩũka na matu e na hinya mũnene o na riri. 27Na hĩndĩ ĩo nĩagatũma araika, no onganie andũ arĩa ake aamũre moime mĩena ĩrĩa ina yumaga rũhuho, kwarũma o gĩturi gĩa thĩ nginya o gĩturi kĩa Igũrũ.
28Na rĩu mũkũyũ-rĩ, mwĩrute ngerekano yaguo: honge ciaguo ciarĩkia kũgĩa thundo na ciaruta mathangũ, mũmenyaga atĩ hingo ya riũa ĩĩ hakuhĩ; 29noguo na inyuĩ, mwona maũndũ macio magĩkinya, mũmenye atĩ arĩ hakuhĩ, o ta mũromo-inĩ. 30Ngũmwĩra atĩrĩ na ma, Rũciaro rũrũ rũtigathira maũndũ macio mothe matahingĩtio. 31Igũrũ na thĩ nĩgũgathira: no ũhoro wakwa ndũgathira. 32#Mat 24.36.No ũhoro wa mũthenya ũcio kana wa ihinda rĩu, gũtirĩ mũndũ ũũĩ, o na araika arĩa me Igũrũ, o na kana Mũriũ, tiga o Ithe witũ.
33Wĩmenyagĩrĩrei, mwĩhũgage na mũhoyage: amu mũtiũĩ ihinda rĩrĩa rĩgakinya. 34#Luk 12.36-38.Nĩ ta mũndũ ũtũire ũgeni-inĩ, atigĩte nyũmba yake, na agatigĩra ngombo ciake ũramati, o ngombo wĩra wayo, na agĩtiga aatha mũikaria wa mũrango o nake aikarage ehũgĩte. 35Tondũ ũcio ikaragai mwĩhũgĩte: amu mũtiũĩ rĩrĩa mwene nyũmba arĩũka, kana nĩ hwaĩ-inĩ, kana ũtukũ gatagatĩ, kana ngũkũ ĩikĩgamba, kana rũcinĩ 36ndakae gũũka na kĩguũ amũkore mũkomete. 37Na ũguo ndamwĩra inyuĩ, noguo ndera andũ othe, atĩrĩ, Ikaragai mwĩhũgĩte.
Currently Selected:
MARIKO 13: OGKBIBLE
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
