MARIKO 14

1 # Thama 12.1-27. NA rĩrĩ, gwatigarĩte mĩthenya ĩĩrĩ kũgĩe na gĩathĩ kĩa Bathaka na kĩa mĩgate ĩrĩa ĩtarĩ mĩĩkĩre ndawa ya kũimbia. Nao athĩnjĩri-Ngai arĩa anene na aandĩki-marũa magĩcaria ũrĩa mangĩmũnyitithia na wara, makamũũragithie: 2tondũ moigire atĩrĩ, Ti hingo ya gĩathĩ, kĩrĩndĩ gĩtigathonje hihi.

3 # Luk 7.37,38. Na rĩrĩa aarĩ Bethania kwa Simoni ũrĩa warĩ na mangũ, aikaire irio-inĩ, gũgĩũka mũtumia e na cuba wĩ maguta mũthemba mwega ma, me goro mũno; akĩũraga cuba, akĩmũitĩrĩria maguta macio mũtwe. 4Na kwarĩ andũ amwe maarakarire, makĩĩrana atĩrĩ, Maguta macio maagĩitangwo ũũ nĩ ũndũ kĩ? 5Maguta macio-rĩ, nĩmangĩendirio moime ciringi gũkĩra magana matatũ, iheo arĩa athĩni. Magĩgĩtetia mũtumia ũcio. 6Nowe Jesu akiuga atĩrĩrĩ, Mũtigei; mũkũmũtanga nĩkĩ? nĩ wĩra mwega aanduta. 7#Gũcok 15.11.Nĩ gũkorũo arĩa athĩni mwĩ nao hingo ciothe, na ihinda o rĩothe mũngĩenda, mwahota kũmeka o wega: no niĩ-rĩ, mũtirĩ na niĩ hingo ciothe. 8Ũndũ o ũrĩa ekũhota, nĩaanjĩka guo: nĩaitĩrĩirie mwĩrĩ wakwa maguta mbere, gũthikwo gũgĩgakinya. 9Na ngũmwĩra atĩrĩ na ma, Kũndũ o guothe Ũhoro-ũrĩa-Mwega ũkahunjio, o thĩ yothe, ũguo naguo mũtumia ũyũ ekĩte no ũkeranagwo nĩguo aririkanagwo.

10Nake Judasi Mũisikariota, ũrĩa warĩ wa arĩa ikũmi na erĩ, agĩĩthiĩra kũrĩ athĩnjĩri-Ngai arĩa anene, nĩ getha akamũneana kũrĩ o. 11Nao maaigua ũhoro ũcio magĩkena, makĩmwĩra atĩ nĩmakamũhe mbia. Nake agĩcaria njĩra hũthũ ya kũmũneana.

12Na mũthenya ũrĩa wa kwambĩrĩria kũrĩa mĩgate ĩtarĩ mĩĩkĩre ndawa ya kũimbia, o ũrĩa wathĩnjagwo Bathaka, arutwo ake makĩmũũria atĩrĩ, Nĩ na kũ ũkwenda tũthiĩ tũgathondeke nĩguo ũkarĩĩre Bathaka kuo? 13Nake akĩrekia arutwo ake erĩ, akĩmera atĩrĩ, Tonyai itũũra, na nĩmũgũtũngwo kuo nĩ mũndũ ũkuuĩte ndigithũ ĩĩ maĩ: mũmũrũmĩrĩre; 14nake kũrĩa egũtonya, mwĩre mwene nyũmba ĩo atĩrĩ, Mũrutani ekuuga atĩrĩ, Nyũmba yakwa ya ageni ĩĩ ha, ĩrĩa ngũrĩĩra Bathaka twĩ na arutwo akwa? 15Nake we mwene nĩekũmuonia nyũmba nene ya igũrũ ĩĩkĩrĩtwo indo na ĩkarĩkia gũthondekwo: mũtũthondekere Bathaka yo 16Nao arutwo acio makiuma, magĩtonya itũũra, magĩkora o ta ũrĩa aamerĩte: magĩgĩthondeka Bathaka.

17Na gwakinya hwaĩ-inĩ magĩũka kuo na arĩa ikũmi na erĩ. 18#Thab 41.9.Na hĩndĩ ĩo maaikaire makĩrĩa, Jesu akiuga, Ngũmwĩra atĩrĩrĩ na ma, Ũmwe wanyu nĩarĩngunyanĩra, mũndũ ũkũrĩanĩra na niĩ. 19Magĩkĩrika kũigua kĩeha na kũmũũria atĩrĩ, ũmwe ũmwe, Nĩ niĩ? 20Nake akĩmera atĩrĩ, Nĩ ũmwe wa aya ikũmi na erĩ, ũrĩa tũraikanĩria guoko nake thani-inĩ. 21Tondũ Mũrũ wa Mũndũ nĩegũthiĩ, o ta ũrĩa ũhoro wake wandĩkĩtwo; no mũndũ ũrĩa ũgũkunyanĩra Mũrũ wa Mũndũ anyitwo, kaĩ ũcio e na haaro-ĩ! Wega wa mũndũ ũcio no atangĩaciarirũo.

22Ningĩ, o makĩrĩaga, akĩoya mũgate, na aarĩkia kũrathima, akĩwenyũranga, akĩmane, akiuga, Kai; ũyũ nĩguo mwĩrĩ wakwa. 23Agĩcoka akĩoya gĩkombe, na aarĩkia gũcokeria Ngai ngatho, akĩmane: nao othe magĩkĩnyuĩra. 24#Thama 24.8; Jer 31.31-34.Nake akĩmera atĩrĩ, Ĩno nĩyo thakame yakwa ya kĩrĩkanĩro, ĩrĩa ĩitĩirũo andũ aingĩ. 25Ngũmwĩra atĩrĩrĩ na ma, Ndigacoka kũnyua ya maciaro ma mũthabibu, nginya mũthenya ũrĩa ngamĩnyũa ĩrĩ njerũ ũthamaki-inĩ wa Ngai.

26Na maarĩkia kũina rũĩmbo makiumagara, magĩthiĩ kĩrĩma-inĩ kĩa Mĩtamaiyũ.

27 # Zek 13.7. Nake Jesu akĩmera atĩrĩrĩ, Inyuĩ inyuothe nĩmũrĩhĩngithio: tondũ ũhoro nĩwandĩkĩtwo atĩrĩ, Nĩngaringa mũrĩithi, nacio mbũri ihurunjũke. 28#Mat 28.16.No ningĩ, ndarĩkia kũriũkio, nĩngamũtongoria gũthiĩ Galili. 29Nake Petero akĩmwĩra atĩrĩ, O na othe mangĩhĩngithio, ndihĩngithio niĩ. 30Nake Jesu akĩmwĩra, Ngũkwĩra atĩrĩ na ma, atĩ ũmũthĩ-rĩ, o ũtukũ ũyũ, ngũkũ ĩtanagamba kerĩ, nĩũrĩngaana gatatũ. 31Nowe akĩrũmanĩria kuuga atĩrĩ, agwatĩirie mũno, O na gwatuĩka atĩ ndirĩ hingo itarĩkuanĩra nawe, niĩ ndirĩgũkaana. O nao othe makiuga o ro ũguo.

32Magĩkinya handũ hetagwo Gethisemane: nake akĩĩra arutwo ake, Ikarai thĩ haha, mũira ngahoe. 33Agĩtwara Petero na Jakubu na Johana, agĩitĩka kũmaka mũno, na gũtubunyĩka. 34Akĩmera atĩrĩ, Ngoro yakwa ĩkũigua kĩeha mũno o ta ingĩkua: ikarai haha, na mwĩhũge. 35Agĩthiathia hanini, akĩĩgũithia thĩ, akĩhoya atĩ, akorũo kwahoteka, ihinda rĩu rĩmũthengere. 36Akiuga, Abba,#14.36 Abba: nĩ kiugo kĩa Ayahudi. Gũtaũrũo, nĩ Baba. Baba, maũndũ mothe mahotekaga nĩwe; ũ’thengerie gĩkombe gĩkĩ: ĩndĩ ti ũrĩa ngwenda niĩ, no ũrĩa ũkwenda wee. 37Agĩũka akĩmakora makomete, akĩũria Petero atĩrĩ, Simoni, kaĩ ũkomete? Nĩũremirũo nĩ gũikara thaa ĩmwe wĩhũgĩte? 38Wĩhũgagei na mũhoyage, mũtigakinye magerio-inĩ: ti-itherũ ngoro nĩyenda, no mwĩrĩ ndũrĩ hinya. 39Agĩcoka ningĩ gũthiĩ, akĩhoya akiugaga ciugo o icio. 40Agĩũka rĩngĩ, akĩmakora makomete, tondũ nĩmaahĩtĩtwo nĩ toro; makĩrigwo nĩ ũrĩa mangĩmũcokeria. 41Agĩũka rĩa gatatũ, akĩmera atĩrĩ, Gĩkomei rĩu, mũhurũke: nĩikinye hau! hingo nĩ nginyu; atĩrĩrĩi, Mũrũ wa Mũndũ nĩekũneanwo moko-inĩ ma andũ ehia. 42Ũkĩrai tũthiĩ; onei, ũrĩa ũkũngunyanĩra e hakuhĩ.

43Na kahinda o kau, o akĩaragia, Judasi agĩũka, ũrĩa warĩ wa arĩa ikũmi na erĩ, magĩũka na andũ gĩkundi kĩnene me na hiũ na ndotono, moimĩte kũrĩ athĩnjĩri-Ngai arĩa anene na aandĩki-marũa na athuri. 44Na rĩrĩ, ũcio wamũkunyanĩire nĩaamaheete kĩmenyithia, akamera atĩrĩ, Ũrĩa ndĩĩmumunya, ũcio nĩwe; mũmũnyite, mũmũtware mũmũmenyereire. 45Nake aakinya, agĩthiĩ kũrĩ We o rĩmwe, akiuga atĩrĩ, Rabii; akĩmũmumunya. 46Nao makĩmũikia moko, makĩmũnyita. 47Na mũndũ ũmwe wa arĩa maarũngiĩ ho agĩcomora rũhiũ rũake, agĩtema ngombo ya mũthĩnjĩri-Ngai ũrĩa mũnene, akĩmĩtinia gũtũ. 48Nake Jesu agĩcokia ũhoro akĩmoria atĩrĩ, Anga mũgĩũkĩte na hiũ na ndotono mũ’nyite, ta ndĩ mũtunyani? 49#Luk 19.47; 21.37.Ndĩratindaga na inyuĩ hekarũ-inĩ ngĩrutanaga, na mũti’nyite. Ĩndĩ gwekĩka ũguo nĩ getha maũndũ marĩa maandĩkĩtwo mahingio. 50Nao arutwo magĩkĩmũtiga othe, makĩũra.

51Na mũndũ mwanake ũmwe akĩmuuma thutha, erigicĩirie tama wa gatani, atarĩ na nguo ĩngĩ: makĩmũnyita. 52Nake agĩtiga tama ũcio wa gatani, akĩũra e njaga.

53Magĩgĩtwara Jesu kwĩ mũthĩnjĩri-Ngai ũrĩa mũnene: na athĩnjĩri-Ngai arĩa anene othe, o na athuri, o na aandĩki-marũa, makĩũngana gwake. 54Nake Petero nĩaamũrũmĩrĩire e haraya, agĩkinya o mũciĩ ũcio thĩinĩ o nja ya mũthĩnjĩri-Ngai ũcio mũnene; agĩkorũo aikaranĩtie na makanga, agotagĩra mwaki harĩa haarĩ ũtheri. 55Na rĩrĩ, athĩnjĩri-Ngai arĩa anene o na kĩama gĩothe magĩcarĩria Jesu ũira nĩguo mamũũragithie; na matione. 56Tondũ andũ aingĩ nĩmaamũigĩrĩire igenyo, na ũira wao ũkĩaga kũiguana. 57Gũgĩcoka gũkĩrũgama andũ amwe, makĩmũigĩrĩra kĩgenyo, makiuga 58#Joh 2.19.Twaiguire akiuga atĩrĩ, Nĩngatharia hekarũ ĩno yaakirũo na moko, na mĩthenya ĩtatũ nĩngaaka ĩngĩ ĩtaakĩtwo na moko. 59O na hau naho, ũira wao ũkĩaga kũiguana. 60Nake mũthĩnjĩri-Ngai ũrĩa mũnene akĩrũgama gatagatĩ, akĩũria Jesu atĩrĩ, Kaĩ ũtarĩ ũndũ ũgũtũcokeria? nĩ atĩa ũhoro ũyũ andũ aya maragũthitaka naguo? 61Nake no gũkira aakirire, na ndacokie ũndũ. Nake mũthĩnjĩri-Ngai ũcio mũnene agĩcoka rĩngĩ kũmũũria, akĩmũũria atĩrĩ, Wee nĩwe Kristo, Mũrũ wa ũrĩa Mũgathe? 62#Dan 7.13.Nake Jesu akiuga, Nĩ niĩ: na nĩmũkona Mũrũ wa Mũndũ aikaire guoko-inĩ kwa ũrĩo kwa Ũhoti, agĩũka na matu ma igũrũ. 63Nake mũthĩnjĩri-Ngai ũcio mũnene agĩtembũra nguo, akiuga, Tũgũcoka kwenda aira angĩ a kĩ? 64#Alaw 24.16.Mũtieiguĩra akĩruma Ngai? Mũgwĩciria atĩa? Nao othe makĩmũtuĩra atĩ nĩaagĩrĩirũo nĩ kũũragwo. 65Na amwe magĩitĩka kũmũtuĩra mata, na kũmũhumba ũthiũ, na kũmũringa na ngundi, makĩmwĩraga, Ta ragũra. Makanga nao makĩmwamũkĩra makĩmũgũthaga na hĩ.

66Na hĩndĩ ĩo Petero aarĩ nja harĩa hakubu; gũgĩũka mũirĩtu ũmwe wa wĩra wa mũthĩnjĩri-Ngai ũrĩa mũnene; 67nake ona Petero agĩota mwaki, akĩmũbara, akĩmwĩra atĩrĩ, Wee nawe uuma na Mũnazari ũcio, Jesu. 68Nake agĩkaana, akiuga atĩrĩ, Ũguo ũkuuga-rĩ, niĩ ndiũĩ, o na ndingĩkũũrana: agĩgĩthiĩ na kĩhingo-inĩ; nayo ngũkũ ĩkĩgamba. 69Nake mũirĩtu ũcio aamuona, agĩitĩka rĩngĩ kwĩra arĩa maarũngiĩ ho atĩrĩ, Mũndũ ũyũ-rĩ, nĩ wao. 70Nake agĩkaana rĩngĩ. Na kahinda gaathira kanini, arĩa maarũngiĩ ho magĩcoka rĩngĩ kwĩra Petero atĩrĩ, Ti-itherũ wĩ wao; amu wĩ Mũgalili. 71Nake agĩitĩka kwĩgirithia na kwĩhĩta, akiugaga atĩrĩ, Niĩ-rĩ, ndiũĩ mũndũ ũcio mũragweta. 72Na kahinda o kau ngũkũ ĩkĩgamba hingo ya kerĩ. Nake Petero akĩririkana ũhoro ũrĩa Jesu aramwĩrĩte, atĩ, Ngũkũ ĩtanagamba kerĩ, nĩũrĩngaana gatatũ. Na eciria ũhoro ũcio, akĩrĩra.

Currently Selected:

MARIKO 14: OGKBIBLE

Highlight

Copy