MARIKO 15

1NINGĨ rũcinĩ o gwathera, athĩnjĩri-Ngai arĩa anene me na athuri na aandĩki-marũa, o na kĩama gĩothe, makĩgĩa ndundu, makĩohithia Jesu, makĩmũtwara, makĩmũneana kwĩ Pilato. 2Nake Pilato akĩmũũria atĩrĩ, Wee nĩwe Mũthamaki wa Ayahudi? Nake agĩcokia akĩmwĩra, Wee nĩwoiga. 3Nao athĩnjĩri-Ngai arĩa anene makĩmũthitakĩra maũndũ maingĩ. 4Nake Pilato agĩcoka akĩmũũria rĩngĩ atĩrĩ, Kaĩ ũtarĩ na ũndũ ũgũcokia? ndũgũkĩona ũrĩa maũndũ maingĩhĩte marĩa megũgũthitakĩra? 5No Jesu ndarĩ ũndũ aacokire kuuga; Pilato agĩkĩgega.

6Na rĩrĩ, hĩndĩ ya gĩathĩ kĩu nĩaamohoragĩra mũndũ ũmwe muohe, o ũrĩa mangĩmwĩtia. 7Na kwarĩ ũmwe wetagwo Baraba, wohetwo hamwe na arĩa maarutithĩtie mbaara, na nĩ andũ moraganĩte mbaara-inĩ ĩo. 8Nakĩo kĩrĩndĩ gĩkĩambata, gĩkĩrika kũmũhoya eke o ũrĩa aamenyerete kũmekaga. 9Nake Pilato akĩmacokeria, akĩmoria atĩrĩ, Mũkwenda ndĩmuohorere Mũthamaki wa Ayahudi? 10Amu nĩonaga atĩ athĩnjĩri-Ngai arĩa anene nĩmaamũneanĩte nĩ ũndũ wa ũiru. 11No rĩrĩ, athĩnjĩri-Ngai arĩa anene makĩringĩrĩria kĩrĩndĩ kiuge atĩ kaba amohorere Baraba. 12Nake Pilato agĩcokia rĩngĩ, akĩmoria atĩrĩ, Ningĩ ndĩmwĩke atĩa ũyũ mwĩtaga Mũthamaki wa Ayahudi? 13Nao makĩgũũthũka o rĩngĩ, makiuga atĩrĩ, Mwambithie mũtĩ igũrũ! 14Nake Pilato agĩcoka akĩmoria atĩrĩ, Nĩkĩ, kaĩ ekĩte ũũru ũrĩkũ? Nao makĩrũmanĩria kũgũũthũka, makiugaga, Mwambithie mũtĩ igũrũ! 15Nake Pilato, tondũ nĩendaga gũkenia kĩrĩndĩ, akĩmohorera Baraba, akĩneana Jesu akaambwo mũtĩ igũrũ, aarĩkia kũmũhũrithia na kĩboko kĩĩ njaaga.

16Nao athigari makĩmũtonyia nyũmba-inĩ ĩrĩa ya gũcirĩrũo; makĩũngania mbũtũ yao yothe. 17Makĩmũhumba nguo ndune, na magĩtuma thũmbĩ ya mĩigua makĩmwĩkĩra 18magĩitĩka kũmũgeithia atĩrĩ, Ũkĩrĩ mũhoro, Mũthamaki wa Ayahudi? 19Makĩmũringa mũtwe na kamũrangi, na makĩmũtuĩra mata, na makĩmũinamĩrĩra maturĩtie ndu. 20Na maarĩkia kũmũnyũrũria, makĩmũruta nguo ĩo ndune, makĩmũhumba nguo ciake mwene. Magĩkĩmuumagaria makamwambe mũtĩ igũrũ.

21 # Rom 16.13. Na makĩnyita mũndũ wahĩtũkaga, oimĩte na mĩgũnda-inĩ, wetagwo Simoni, ũrĩa Mũkurene, na nĩwe ithe wa Alekisandero na Rufusi, makĩmũnyita athiĩ nao, amũkuuĩre mũtĩ wake wa kwambĩrũo. 22Makĩmũkinyia handũ harĩa hetagwo Gologotha, naguo ũguo ũgĩtaũrũo nĩ atĩrĩ, Handũ ha kĩbuuri. 23Makĩmũnengera ndibei ĩtukanĩtio na manemane,#15.23 Manemane: rora kohoro kaandĩkĩtwo Mat 2.11. Wĩra ũmwe wayo nĩ kũnyihia ruo. na ndaamũkĩre. 24#Thab 22.18.Magĩkĩmwamba mũtĩ igũrũ, na makĩgayana nguo ciake na gũcicukĩra mĩtĩ, mamenye ĩrĩa o mũndũ egũtwara. 25Na kwarĩ thaa ithatũ, na makĩmwamba mũtĩ igũrũ. 26Narĩo irũa rĩandĩkĩtwo ũndũ ũrĩa aathitakĩirũo rĩgĩĩkĩrũo hau igũrũ rĩake, atĩrĩ, MŨTHAMAKI WA AYAHUDI. 27#Isa 53.12.Na makĩamba atunyani erĩ mĩtĩ igũrũ hamwe nake; ũmwe mwena wake wa ũrĩo, na ũrĩa ũngĩ mwena wake wa ũmotho. 28[Naguo ũhoro ũkĩhingio ũrĩa wandĩkĩtwo atĩrĩ, Nake nĩaataranĩirio hamwe na arĩa aagarari watho]. 29#Thab 22.7; 109.25; Mar 14.58; Joh 2.19.Na andũ arĩa maahĩtũkaga nĩmaamũrumaga, makĩinagia mĩtwe yao, makiugaga, Waa! wee ũtharagia hekarũ, ũkamĩaka na mĩthenya ĩtatũ, 30ndũkĩĩhonokie, uume mũtĩ-inĩ! 31Athĩnjĩri-Ngai arĩa anene nao, o ũndũ ũmwe, makamũnyũrũragia o ene me na aandĩki-marũa, makiuga atĩrĩ, Nĩaahonokagia andũ angĩ; na ndangĩhota kwĩhonokia we mwene. 32Kristo ũyũ, Mũthamaki wa Isiraeli, ta nĩakiume rĩu mũtĩ-inĩ, nĩguo tuone na twĩtĩkie. Arĩa maambĩtwo mĩtĩ igũrũ hamwe nake makĩmũruma o nao.

33Na thaa thita ciakinya, bũrũri wothe ũkĩgĩa nduma nginya thaa kenda. 34#Thab 22.1.Ningĩ thaa kenda Jesu akĩgũũthũka na mũgambo mũnene akiuga atĩrĩ, Eloi, Eloi, lama sabakithani? naguo ũguo wataũrũo nĩ atĩrĩ, Ngai wakwa, Ngai wakwa, ũndiganĩirie nĩkĩ? 35Na andũ amwe arĩa maarũngiĩ ho, maaigua ũguo, makiuga, Ta iguai, egwĩta Elija. 36#Thab 69.21.Na ũmwe agĩteng’era, akĩnyuithia thibanji thiki ĩkĩiyũra, agĩthecerera kamũrangi, akĩmũkundia, akiuga atĩrĩ, Ta tigai, tũrore kana Elija nĩegũgĩũka kũmũruta. 37Nake Jesu akĩgũũthũka, agĩtuĩkana. 38#Thama 26.31-33.Nakĩo gĩtama kĩrĩa kĩa hekarũ gĩgĩatũkana njatũ igĩrĩ gwata igũrũ nginya thĩ. 39Nake mũnene ũrĩa wa athigari igana, ũrĩa warũngiĩ hakuhĩ amũng’etheire, ona aatuĩkana ũguo, akiuga, Kaĩ ti-itherũ ũyũ oima mũrũ wa Ngai-ĩ! 40#Luk 8.2,3.Na nĩhaarĩ atumia meroragĩra me haraya: na amwe nĩ aa Mariamu Mũmagidali, na Mariamu ũrĩa nyina wa Jakubu ũrĩa mũnyinyi na wa Jose, o na Salome; 41nĩo maamũrũmagĩrĩra rĩrĩa aarĩ Galili, makamũtungatagĩra; na ningĩ hakagĩa na atumia angĩ aingĩ arĩa maambatire nake Jerusalemu.

42Na gwakinya hwaĩ-inĩ, tondũ kwarĩ mũthĩ wa Ihaarĩria, nĩguo mũthenya ũrĩa wĩ mbere ya thabatũ-rĩ, 43Jusufu ũrĩa wa Arimathea agĩũka, na ũcio aarĩ mũciri mwĩkĩrĩre, o nake mwene nĩaatũire atanyĩte ũthamaki wa Ngai; nake akĩũmĩrĩria agĩtonya kwĩ Pilato, akĩhoya aheo mwĩrĩ wa Jesu. 44Nake Pilato akĩgega, akĩũria kana nĩangĩkorũo arĩkĩtie gũkua o hĩndĩ ĩo: agĩĩta mũnene ũrĩa wa athigari, akĩmũũria kana nĩaninĩte ihinda nginya aakua. 45Na aarĩkia kwĩrũo nĩ mũnene ũcio wa athigari, akĩhe Jusufu kĩimba. 46Nake akĩgũra tama wa gatani, akĩmũruta mũtĩ igũrũ, akĩmũthaya na tama ũcio wa gatani, akĩmũiga mbĩrĩra-inĩ yenjetwo rũaro-inĩ rũa ihiga ta muungu: na akĩgaragarĩria mũromo wa mbĩrĩra ĩo ihiga rĩũhinge 47Nake Mariamu Mũmagidali na Mariamu ũrĩa nyina wa Jose makĩona harĩa aaigirũo.

Currently Selected:

MARIKO 15: OGKBIBLE

Highlight

Copy