TAUNET 21
21
Kesichei Isak
1Kirutochi Jehovah Sara ko u ye kiga mwa, kiyachi Jehovah Sara ko u ye kiga ng’alalji. 2Ak kimanach Sara, ak kisikyi Abraham werit eng’ osindanyi, eng’ betunoto ne kiga koarorji Kamuktaindet. 3Ak kiguure Abraham kainetab werinnyi ne kigisikyi, Isak, ne kisikyi Sara. 4Ak kiyatita Abraham werinnyi Isak eng’ betut ne bo sisiit, ko u ye kiga ng’at Kamuktaindet inendet. 5Ak kiga kotar Abraham kenyisiek bogol, si kesikyin werinnyi Isak. 6Ak kile Sara, Kagona Kamuktaindet arori; ak age tugul ne kasei ng’olyondoni kororiei kobota. 7Ak kile, Ng’o ne kita mwachin Abraham kolenjin, reriei lagok Sara? Amu kaasikyi werit eng’ osindanyi. 8Kiner anyun lakwet, ak kigiluge: ak kiyai Abraham igorta ne o eng’ betut ne kigiluge Isak.
Keonei Hagar ak Ismael
9Ak kigeer Sara weritab Hagar Chemisriot, ne kiga sikyi Abraham, kosasei. 10Kimwachi anyun Abraham kolenji, On chebiosoni otwogin ak werinnyi: amu manamei tuguk weritab chebiosoni otwogin koboto werinnyu Isak. 11Ak kiyait mising’ ng’olyondoni eng’ Abraham agobo werinnyi. 12Kimwachi Kamuktaindet Abraham kolenji, Amegeer ko ya ng’olyondoni eng’ inye amu weri, ak amu chebiosoning’ung’ otwogin; kas ng’alekab Sara eng’ tuguchoto tugul kamwaun: amu bunu Isak oretab iyoteng’ung’. 13Ak tun ayae weritab chebiosoni otwogin agine koek bororiet, amu inendet ko iyoteng’ung’. 14Ak king’eet anyun Abraham karon mising’ ak kiib amitwogik ak sotet ne bo beek, kogochi Hagar ak lakwet, ak kiindechi tigikyennyi, ak kilenji, Ui, anyun: ak kiwa anyun, koombenot eng’ ong’atetab Beer-Seba. 15Ak kiigesgei beek eng’ sotet, ak kibagakta lakwet eng’ sondit orit. 16Yeityo kwo koteb ng’ony kotoorjigei inendet, eng’ ye loo kitigin, ye itei kipchabet ngemwokto: amu kile, Si mageer meetab lakwet. Kitebi kotoorjigei inendet, ak kiwaach korir. 17Ak kigas Kamuktaindet kutitab weroto ak kiguur malaikaiyatab Kamuktaindet ne mi kipsengwet Hagar, ak kilenji inendet, Amin nee, Hagar? Ameiywei; amu kagogas Kamuktaindet kutitab lakwet eng’ ole mi. 18Ng’eet, ui ing’eet lakwet, ak inamate eng’ eung’ung’; amu tun ayae inendet koek bororiet ne o. 19Ak iyat Kamuktaindet konyekab kwonyoto, kogeer keringetab beek; ak kiwa, konyiit beek sotet, ak konaga lakwet. 20Kimi Kamuktaindet koboto lakwet, ak kiner koeet; ak kimeng’ot ong’atet, koek mwogindet. 21Ak kimeng’ot ong’atetab Paran; ak kocheng’ji kamet Chemisriot kotun.
Koyosiechingei Abraham ak Abimelek
22King’alalji eng’ betusiechoto Abimelek ak Pikol inendet ne ki kiptaiyatab askarikyik, Abraham, kolenji, Mitei Kamuktaindet koboten eng’ tuguk tugul che iyae: 23iyosiewa anyun nguno eng’ Kamuktaindet si metila let, anan eng’ werinnyu, anan eng’ mochogoronikyuk; ago ko u rirenet ne kiayaun iyaiywa aginye ko u noto, agot eng’ emet ole kigeegune toondet. 24Ak kilenji Abraham, Ayostosi. 25Ak kiger kong’ Abraham Abimelek amu keringetab beek, ne kiga rebe otwogikab Abimelek eng’ koromnatet. 26Ak kile Abimelek, Mangen inendet ne kiyai kioto: ak kima imwawa, ak kitomo agas ko u ni, kobate ra. 27Kinam anyun Abraham kechirek ak tuga, kogochi Abimelek; ak kiiyomisgei ichek tuwai. 28Ak kiitaban Abraham subenwek tisab che bo kechir, koba taban ichegei. 29Ak kiteebe Abimelek Abraham, kolenji, Bo nee subenwechu bo kechir tisab chu ketaban ichegei? 30Ak kile, Subenwechu tisab bo kechir, ko mie ikweri eng’ eunnyu, si koek baornatet eng’ ane, kobor kole, ane ne kiabale keringonito bo beek. 31Kiguure yoto anyun Beer-Seba amu noto; amu kiiyosiechigei tuwai eng’ oloto. 32Kiiyomisgei anyun eng’ Beer-Seba: ak king’eet Abimelek, ak Pikol ne ki kiptaiyatab askarikyik, koweeigei koba emetab Pilistik. 33Ak kimin Abraham ketit eng’ Beer-Seba, ak kiguur eng’ oloto kainetab Jehovah, Kamuktaindet ne bo Koigeny. 34Ak kiek toondet Abraham eng’ emetab Pilistik betusiek che chang’.
Currently Selected:
TAUNET 21: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
