TAUNET 22
22
Ketiemei kayanetab Abraham eng’ kagoitoetab Isak
1Kingobata tuguchoto, kotiem Kamuktaindet Abraham, kolenji, Abraham; ak kile, Ami yu. 2Kolenji, Imut wering’ung’, noto ne inegei, ne ichame, Isak, ui agoi emetab Moria; si igoite eng’ oloto koek kagochinet ne kibeelei eng’ tulwet age ne tun amwaun. 3Ak king’eet Abraham karon mising’ komusta, ak kiito kit ne kitebe eng’ sigiriennyi si kobiit kolany, ak kiimut murenik aeng’ eng’ che kitinyei, koba koboto inendet, ak Isak werinnyi; ak kibet kwenik che bo kagochinet ne kibeelei, yeityo koba ole kiga koarorji Kamuktaindet. 4Kitobendo Abraham eng’ betut ne bo somok ak kigeer koronoto kota ko loo. 5Ak kilenji Abraham murenjoto chiget, Otebi eng’ yu koboto sigiriet, ak kebe olin ak weri; si kesa, ak keweeige kogeny. 6Ak kinam Abraham kwenik che bo kagochinet ne kibeelei, kosutyi Isak werinnyi; ak kiib inendet eng’ eunnyi mat ak rotwet; ak kiba tuwai. 7King’alalji anyun Isak kwandanyi Abraham, kolenji, Aba, ak kile, Ami yu, werinnyu. Ak kile, Keero, mi yu mat ak kwenik: ago mi ano aruetab kechir ne egu kagochinet ne kibeelei? 8Ak kilenji Abraham, Werinnyu, cheng’jingei Kamuktaindet aruetab kechir ne egu kagochinet ne kibeelei: yeityo koba tuwai.
9Ak kiit koronoto ole kiga koarorji Kamuktaindet; ak koteech Abraham kaptisisiet eng’ oloto, ak kitet kwenik, yeityo korat werinnyi Isak, ak kiinde inendet kwenik barak eng’ kaptisisiet. 10Kiiyogoito anyun eunnyi Abraham, konam rotwet kolen kobare werinnyi. 11Eng’ yoto anyun koguur inendet malaikayatab Jehovah eng’ kipsengwet kolenji, Abraham, Abraham: kole, Ami yu. 12Kolenji, Ametwa lakwet, ameyachi kiy tugul: amu kaanai nguno ale, igonyiti Kamuktaindet, amu ma ietena wering’ung’, ne wering’ung’ ne inegei. 13Kotobendo Abraham ak kogusgong’; ogeero, mengit ne kanam sondit kuinoikyik; ak kiwa Abraham koget mengit, si koeny koek kogochinet ne kibeelei, kogeere werinnyi. 14Ak kiguure Abraham yoto Jehovah-jireh: ko u ye kimwaei agoi kora, kele, Kigonune tulwetab Jehovah. 15Ak kiguur ne bo aeng’ malaikaiyatab Jehovah Abraham eng’ kipsengwet, 16kolenji, Kayosiechige anege, mwaei Jehovah, amu keyai kii, ma ietena wering’ung’ ne inegei. 17Eng’ kaberuret aberurin, ak eng’ kayabet ayabi iyoteng’ung’ kobarait kotenit kecheik che bo kipsengwetisiek, ak kotenit ng’aniek che bo ngegutab nyanjet; ak tun nyoboni lagoguk kurgetab bunikwak; 18ak tun kiberuri bororiosiek tugul che bo ng’ony eng’ keswondeng’ung’; amu kegas it kutinnyu. 19Ak kiweeigei anyun Abraham kwo ole mi murenjugachiget, ak king’eetyo koba tugul agoi Beer-Seba; ak kimeny Abraham Beer-Seba.
20Kingobata tuguchuto, kemwachi Abraham, kelenji, Keero, kogosikyi Milka agine ng’etab komet Nahor lagok; 21lakwet ne bo tai ko ki Us, ak ng’etab kamet Bus, ak Kemuel kwandab Aram; 22ak Kesed, Haso, Pildas, Jidlap, ak Betuel. 23Ak kisich Betuel Rebeka: chuto sisiit ko kisikyi Milka Nahor ng’etab kametab Abraham. 24Ak kisikyi Reuma chebaigeiyandennyi Teba, Gaham, Tahas, ak Maaka.
Currently Selected:
TAUNET 22: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
