TAUNET 25
25
Meetab Abraham
1Ak kiitun Abraham osotiot age ne kiguure Ketura. 2Ak kisikyi Simran, Joksan, Medan, Midian, Isbak, ak Sua. 3Ak kisich Joksan Sheba, ak Dedan. Ak werikab Dedan ko ki Asurik, Letusik, ak Leumik. 4Ak werikab Midian ko ki: Epa, Eper, Hanok, Abida, ak Eldaa. Chuto tugul ko ki lagokab Ketura. 5Ak kiigochi Abraham Isak tuguk tugul che kitinyei. 6Ago kiigochi Abraham werikab chebaigeinikyik, che kitinyei, kagochinoik; ak kilenji koba eng’ ole mi werinnyi Isak, koba emetab kong’asis, ye kita kosobei inendet. 7Chu ko kenyisiek che kitar Abraham kosobei, kenyisiek bogol ak tamanwogik tisab ak mut. 8Kiilil anyun Abraham koga koosit mising’, boiyot ne kiga konyi betusiekyik; ak kigiyum koboto bikyik. 9Ak kitub inendet werikyik Isak ak Ismael eng’ kebenetab Makpela, ne mi mbaretab Epron, weritab Sohar Hitindet, ne tokyingei Mamre; 10mbaret ne kiale Abraham bikab Het: yoto ye kigitupchi Abraham, ak Sara osotiondennyi. 11Ak kingo kagobata meetab Abraham, koberur Kamuktaindet Isak werinnyi; ak kimeny Isak ole negite keringetab beek ne kiguure Beer-lahari-roi.
12Chu ko ortinwekab Ismael, weritab Abraham, ne kisikyi Hagar Chemisriot otwogindetab Sara, Abraham. 13Chu ko kainaikab werikab Ismael, ko u kainaikwak, ko u ortinwekwak: lakwet ne bo tai ne bo Ismael ko Nebaiot; ak Kedar, Adbeel, ak Mibsam, 14Misma, Duma ak Masa; 15Hadad, Tema, Jetur, Napis, ak Kedema: 16chu ko werikab Ismael, ak chu kainaikwak, eng’ nganasokwak, ak eng’ meng’otenywa; bounik taman ak aeng’ ko u bororiosiekwak. 17Ak chu ko kenyisiekab Ismael che kitar kosobei, kenyisiek bogol ak sosom ak tisab: si kome; ak kigiyum koboto bikyik. 18Ak kimeng’ot koboch Abila agoi Sur ne tokyingei Misri, eng’ oret ne wendi Asuria: kiwa komeny oloto eng’ taitab tupchosiekyik tugul.
Sigetab Esau ak Jakobo, ming’inatenywa
19Chu ko ortinwekab Isak, weritab Abraham: kisichei Abraham Isak: 20ki bo Isak kenyisiek artam si kotuni Rebeka, cheptab Betuel Suriaindet ne bo Padan-aram, chepkametab Laban Suriaindet. 21Ak kirirji Isak Jehovah mising’ agobo osotiondennyi, amu ki sonen: ak kigasyi Jehovah rirekyik, ak kimanach Rebeka osotiondennyi. 22Ak kiibelgei lagok eng’ moennyi; ak kile, Ngot ko u noto, ko kalya si ateb ko u ni? Ak kiwa koteebe Jehovah. 23Ak kilenji Jehovah,
Mitei moeng’ung’ bororiosiek aeng’u,
Ak tun pcheegei bororiosiek aeng’u che bunu moeng’ung’;
Ak kogimitu bororiet age kosiir age;
Ak koot ne o ne ming’in.
24Ak kingoit anyun betunnyi ne bo siget, ogeero, kimi saramek moennyi. 25Ak kiindoi ne o ak ki birir, ki sabul borto tugul ko u sambut; ak kiguure kainennyi Esau. 26Ak kongobata noto kesich ng’etab kamet, ak kinamonu kwariatab Esau; ak kigiguure kainennyi Jakobo: ak ki bo Isak kenyisiek tamanwogik lo ye kingosichei osotiondennyi lagochoto.
27Kieegitu werjoto: ki kiplogotiot ne ng’om Esau, chito ne bo timin; ak Jakobo ko ki chito ne tala ne kimeng’oti emaisiek. 28Ak kichamei Isak Esau, amu kiamei banyek che kiibune loget: ak kichamei Rebeka Jakobo. 29Ak kochob Jakobo sogoriek, ak kiit Esau kobunu timin, ko kang’et mising’. 30Kolenji anyun Esau Jakobo, Kaigai, ibaena tuguchu biriren amu katanui: kigiguure kainennyi anyun Edom amu noto. 31Ak kilenji Jakobo, Aldawa rani etunateng’ung’ ne bo siget. 32Ak kole Esau, Keero, negit ame: tos tilei nee eng’ ane etunatet ne bo siget? 33Ak kilenji Jakobo, Iyosiewa rani; ak kiiyosiechi anyun inendet ak kialdochi Jakobo etunatennyi ne bo siget. 34Ak kiigochi Jakobo Esau makatiat ak sogoriek; ak kiam ak koee, ak king’eet kwo: mata koiit anyun Esau etunatennyi ne bo siget koek kiy.
Currently Selected:
TAUNET 25: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
