TAUNET 26
26
Komi Isak Gera ak koyosiechingei ak Abimelek
1Kibiit rubet eng’ emonoto ne ter eng’ rubet ne ki bo tai, ne kimi eng’ betusiekab Abraham. Kiwa Isak oldab Abimelek, laitoriatab Pilistik, agoi Gerar. 2Ak kimong’ji Jehovah inendet, ak kolenji, Amerekte iwe Misri; tebe emet ne ta aborun; 3egu toondet eng’ emoni, ami koboten, ak aberurin; amu agonin inye, koboto lagoguk, emotinwechuto tugul, ak agimit kayosiet, ne kiayosiechi kwandang’ung’ Abraham; 4Ak abaroi iyoteng’ung’ ko u kecheik che bo kipsengwetisiek, ak agochini iyoteng’ung’ emotinwechu tugul; ak kiberuri bororiosiek tugul che bo ng’ony eng’ iyoteng’ung’; 5amu kigas it kutinnyu Abraham, ak kinam kotigonutikyuk, ak karureiywekyuk, ak etanutikyuk, ak ng’atutikyuk. 6Ak kimeny Isak Gerar. 7Ak kiteebe bikab oloto agobo osotiondennyi; ak kile, Inendet ko chebeiyo: amu kiiywei komwa kole, Osotiondennyu; amu kilen, si mabara bikab emoni agobo Rebeka: amu ki kararan kwonyoto. 8Ak ye kingo kagotebe oloto betusiek che chang’, koititoe Abimelek, laitoriatab Pilistik, tirisiet, kogeer kole, urerendos Isak ak Rebeka osotiondennyi. 9Ak kiguur Abimelek Isak, nyo kolenji, Osotiondeng’ung’ ni iman: kalya si imwa ile, Inendet ko chebeiyo? Ak kilenji Isak inendet, Kiamwae ko u noto ale, si mamei agobo inendet. 10Ak kilenji Abimelek, Nee ni koiyaiywech? Kota iibwech ng’ogisto, amu ko nyamnyum koruiyo chi ak osotiondeng’ung’. 11Ak king’at Abimelek bik tugul kolenji, Kibarei chi age tugul ne twaei chichi anan osotiondennyi.
12Ak kigolso Isak eng’ emonoto, ak kinyor eng’ kenyinoto konyil bogol: ak kiiberur Jehovah inendet. 13Ak kigieet mising’, ak kotesak berurtanyi kot kochang’it agoi koeet kot: 14ak kitinyei akwotisiek che bo kechirek, ak che bo tuga, ak bik che chang’ che bo gonnyi: agoi koam ng’etkong’ Pilistik amu inendet. 15Ak kiger Pilistik beek che bo keringonik tugul, che kiga kobal otwogikab kwandanyi Abraham, ak kotime ng’ung’unyek. 16Kolenji anyun Abimelek Isak, Istoeneige; amu kiieetu, igimitu, isiirech. 17Ak kiwa Isak eng’ oloto, kwo koteech emaisiekyik eng’ atebwetab Gerar, ak komeny oloto.
18Ak kibal Isak kogeny keringonikab beek che kiga kebal eng’ betusiekab kwandanyi Abraham; amu kiga kotim Pilistik ye kingo kagome Abraham: ak kiguure kainaik che kiga kotochi kwandanyi. 19Ak kibal otwogikab Isak atebwet, konyor keringetab beek che kutu. 20Ak kiborio mestowekab Gerar ak che bo Isak, kolen, Chechok beechu: ak kiguure keringonoto bo beek Esek; amu kicham komoitos. 21Ak kibal keringetab beek age, ak koboriechi noto agine: ak kiguure noto Sitna. 22Ak kiu eng’ oloto, yeityo kwo kobal keringet age; ak kima boriechi noto: ak kiguure noto Rehobot: ak kile, Kagobaroiywech Jehovah emet nguno, si keichi emonito.
23Ak kiwa eng’ oloto kotogosta agoi Beer-seba. 24Ak kimong’ji Jehovah kemounoto ak kolenji, A Kamuktaindet ne bo kwandang’ung’ Abraham: ameiywei, amu ami koboten, ak aberurin, ak abaroi iyoteng’ung’ amu otwogindennyu Abraham. 25Ak kiteech kaptisisiet eng’ oloto: ak koguur kainetab Jehovah ak kiteech emainnyi eng’ oloto: ak kibal otwogikab Isak keringetab beek eng’ oloto.
26Kiba oldab Isak Abimelek kobunei Gerar koboto choruennyi Ausat, ak Pikol kiptaiyatab lugennyi. 27Ak kiteebe Isak kolenji, Kobwanja amu nee, ak owecha, ak kioonwa eng’ oling’wong’? 28Kilenji ichek, Kigigeer komie kele, mi Jehovah koboten: ak kigile, Ingobiit kayosiet eng’ kwenunnyo, achek ak inye, ak kiyomisge; 29kele, si meyaiywech kiy ne ya, ko u ye kima kitwain, ak ko u ye kigiyaun ne mie kityo, ak kigiuten eng’ kalyet: ak inye nguno ko iberurot eng’ Jehovah. 30Kiyachi anyun igorta, ak kiamis ak koeeiso. 31King’eetyo karon mising’ koyosiechigei: yeityo kounda Isak ichek ak kiba eng’ kalyet. 32Ak eng’ betunoto anyun, kobwa otwogikab Isak, kobwa komwachi agobo keringetab beek ne kiga kobal, kolenji, Kagenyoru beek. 33Ak kiguure Siba: noto anyun, kiguure kainetab nganasanato Beer-seba agoi kora.
34Kingo kagotar Esau kenyisiek artam kotun Judit cheptab Beri Kitindet, ak Basemat cheptab Elon Hitindet. 35Ak kiarogenso Isak ak Rebeka mising’ agobo tipchoto.
Currently Selected:
TAUNET 26: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
