LIRAANGA 14

Abramu Yahonyinya Loti

1Mumatukhu kenako, Mwami Amurafeli wa Babilonia, Mwami Ariochi wa Elasari, Mwami Kedora-laoma wa Elamu, nende Mwami Tidali wa Gohimu, 2vasimukha nivatsia muliihe khukwana Mwami Bera wa Sodomu, Mwami Birisha wa Gomora, Mwami Shinabu wa Adima, Mwami Shemeberi wa Zebohimu nende Mwami Bela (Inoho Zohari). 3Yava voosi viyunga muliihe liavo mu luhoongo lwa Sidimi (inoho Inyanza yi Ichumbi). 4Kedora-laoma yali wavimilila khumihika likhomi na chivili, navutswa khumihika kwi likhomi na chivaka vamuhinjitsa. 5Khumuhika kwi likhomi na khane, Mwami Kedora-laoma nende vami vamukhonyanilanga muliihe, vatsia khukwana nivakuura Varefahimu vamenyanga Ashiterotsi Karanahima, Vazuzimu vamenyanga Hamu, vandu Vaemimu vamenyanga Kiriatsahimu, 6khandi Vahoori vamenyanga mu vikulu via Edomu, nivavalonda khutukha mu litaala lia Eliparani himbi mwichendanyama. 7Vakomokha nivakalukha Kadeshi (lira lindi Enimushipati). Vakwana nivakuura Vaamaleki, khandi nivakuura Vaamori vamenyanga mu litaala lia Hazazoni Tamari. 8Navutswa vami va Sodomu, Gomora, Adima, Zebohimu, khandi Bela virecheshitsa vasikali vavo mu luhoongo lwa Sidimi nivakwana 9vami vamihanga Elamu, Gohimu, Babilonia, nende Elasari, vami vane khukwana varanu. 10Luhoongo lwa Sidimi lwali nu vwina vwayevwa vwilaamu, khandi lwa vami va mataala ka Sodomu nende Gomora vachelitsa khwilukha vavuli khukwana, vakwa mu vwina vwenovo; navutswa vami vandi vavaka vali nivarikale vilushila mu vikulu. 11Vami vane venavo vavukula shia shindu shiosi mu mataala ka Sodomu nende Gomora, khali vavukula shiukhulia, khandi nivilukha. 12Vavukula khandi Loti, mwana wali wa amwavo Abramu halala ni miandu chiechie, shichila yali wamenya mu litaala lia Sodomu.

13Navutswa mundu mulala yihonolokha navoolela Abramu, wali Muhebrania, wamenyanga himbi khu misala chi miseno chia Mamure wali Mwamori shia shindu shiosi. Mamure nende vamwavo veve Eshikoli nende Aneri vali valina va Abramu. 14Lwa Abramu yahulila ndi mwana wa amwavo wewe umali khukumilwa khuva muvohe, yalaanga halala vasikali voosi vamenyanga naye, voosi nivava tsimia tsivaka likhomi na munane; nivahitsanyinya vami vane venavo, khutsia khutukha mu litaala lia Dani. 15Abramu yakavula vandu veve mu vituma hawenaho, niyinjilila mutsiku mu vutukhu, nivakuura mutsiku mwenoyo. Yavakhunga khutukha Hoba, litaala lili ivuluka wa Damasika. 16Abramu nende valina veve vakalushitsa vindu via vali nivavukula. Abramu yakalushitsa khandi Loti mwana wa amwavo wewe nende miandu chiechie, nende vakhali halala na vavohe vandi.

Melikizedeki Yakasitsa Abramu

17Lwa Abramu yakalukha niyakhakuura Kedora-laoma nende vami vamukhonyanga liihe, Mwami wa Sodomu yatsia khumwakanila mu Luhoongo lwa Shavehi (lilaangwangwa khandi luhoongo lu mwami). 18Mwami Melikizedeki wa Salemi yalera mikati nende idivai. Melikizedeki yali Musalisi wa Nyasaye Uli Ikulu khu Viosi, 19khandi yakasitsa Abramu, navoola,

“Nyasaye Uli Ikulu khu Viosi,

waloonga likulu nende lilova, akasitse Abramu.

20Nyasaye Uli Ikulu khu Viosi,

wa khuha tsingulu tsiu khukuura vatsiku vovo,

yitsominywi!”

Abramu yahaana khu Melikizedeki shitonye shi likhomi, khu vindu via yali niyayaaya khurula muliihe.

21Mwami wa Sodomu yavoolela Abramu, “Vikha vulahi shia shindu shiosi shia wayaaya khurula muliihe, navutswa ngalushitsila vandu vaanje voosi.”

22Abramu yavoolela Mwami wa Sodomu, “Mali khwisuuha khu Mwami Nyasaye, uli Nyasaye Uli Ikulu khu Viosi, walomba likulu nende lilova, 23ndi shimbukulakhu shindu shiosi, shive luvusi inoho shiseelo shi shilaro inoho shindu shioshio shiosi tawe; khu ulivula khwichinjilila nuvoola, ‘Ninzi nachila Abramu, nava muhinda.’ 24Shinzitsanga khwivukulila mwene shindu shiosi tawe. Nzitsanga khuhuchilila vindu via vandu vaanje, vamali khurumishila vionyene. Navutswa lekha valina vaanje, Aneri, Eshikoli nende Mamure, vavukuli shitonye shiavo.”

Currently Selected:

LIRAANGA 14: LLLPRO

Highlight

Copy