LIRAANGA 15
15
Lilakano lia Nyasaye na Abramu
1Vindu vienevo nivimali khwikholekha, Mwami Nyasaye yavoolela Abramu mu malolo, “Abramu, uvuli khuria. Ninzi uli khuli ingavo yoyo yu khukhushinga; khandi uliitsa khukasitswa mu vunyishi muno.”
2Navutswa Abramu yavoola, “Mwami Nyasaye, ni shina shia uliitsa khumba, lwa mbula mwana wa nivula, khandi Eliezeri wa Damasika neye uliitsa khuvukula miandu chianje chiosi?” 3Navutswa Abramu yavoola, “Wanyima mwana; mulala khu varukwa vivulwa mu inzu yanje, neye uliitsa khuvukula miandu chianje.”
4Navutswa Mwami Nyasaye yavoolela Abramu, “Mundu ulaangwangwa Eliezeri uyu, shialiitsa khuvukula miandu chiochio tawe. Mwana wowo wa yivi mwene uliitsa khwivula, neye uliitsa khuvukula miandu chiochio.” 5Nalwo lwa Mwami Nyasaye yahila Abramu ilwanyi; navoola, “Heenza ikulu mu malesi khulu khuvalitsa tsinyining'ini; nikava uli nu vunyali vu khutsivalitsa;” namuvoolela, “Nindio khandi uliitsa khwivula vitsukhulu vanyishi.”
6Abramu yasuuvila mu Mwami Nyasaye; ma Mwami Nyasaye namuhuchilila khuva wi likhola liu vulunji imbeli wewe.
7Nalwo lwa Mwami Nyasaye yavoolela Abramu, “Ninzi Mwami Nyasaye wa khurulitsa mu litaala lia Uri lili mu shivala shia Babilonia, khu khuhe shivala shiumenyamu yishi.”
8Navutswa Abramu yareeva, “Mwami Nyasaye, nyala khumanya ndina shiliitsa khuva shianje shiu khumenyamu?”
9Mwami Nyasaye yavoolela Abramu, “Nderela shimoli shi mihika chivaka, imbuli yi mihika chivaka, limiiko li mihika chivaka, shituti, nende shinamusotsi.”
10Abramu yalera vindu vienevo khu Nyasaye, nareemamu mu vitonye vivili, khandi navikha vitonye vivili vienevo mu tsimbaso tsivili niviheenzane; navutswa shiyareema manyonyi tawe. 11Makhokho kitsa ni kenya khulia mivili chienecho, navutswa Abramu yakakhunga khurulaho.
12Lwa liuva liali niliyeelanga, tsindolo tsikumila Abramu, khandi shindu shiosi nishikwa shisuundi nu khumurishitsa. 13Nalwo lwa Mwami Nyasaye yavoolela Abramu, “Vitsukhulu vovo valiitsa khuva vacheni mu shivala shicheni; valiitsa khuva varukwa iweneyo, khandi valiitsa khusalilitswa vululu muno khumihika tsimia tsine. 14Navutswa niitsa khusalilitsa shivala shia varumishilanga khuli varukwa, khandi nivakharula mu shivala shienesho, valiitsa khurulamu nu vuhinda. 15Yivi mwene uliitsa khusakhula, ulikhutsila mu milembe, ma mmbili kwokwo nu khuyeveelwa mu shilindwa. 16Mulikhula lia khane, vitsukhulu vovo valiitsa khukalukha hanu, shichila shinzitsanga khukhunga Vaamori, nivashili khukhola vwoni vunyala khuchila vasalilitswi tawe.”
17Lwa liuva liali nilimali khuyeela, khandi shisuundi nishiliho, inyungu yu mulilu ku mwooshi khandi itochi imemanga, vialolekhaho vwangu, nivivira hakari hi vitonye vi tsinyama. 18Khulitukhu lienelo, Mwami Nyasaye yakhola lilakano na Abramu. Yavoola, “Mbetsanga vitsukhulu vovo shivala yishi shiosi, khurula khu mupaka kwi shivala shia Misri khutukha khu Muchela kwa Efurate, 19khumeetakhu shivala shia Vakenizi, Vakeni, Vakadimoni, 20Vaahitse, Vapeerizi, Varefahimu, 21Vaamori, Vakanaani, Vagiraakashi, nende Vayeebusi.”
Currently Selected:
LIRAANGA 15: LLLPRO
Highlight
Share
Copy
Want to have your highlights saved across all your devices? Sign up or sign in
© The Bible Society of Kenya, 2013
