LIRAANGA 16
16
Hakari nende Ishimaeli
1Sarai, wali nali mukhali wa Abramu, shiyali wayivulakhu mwana wosi tawe. Navutswa yali nu mwana wi shikhana murukwa Mumisri walaangwangwa Hagari. 2Sarai yavoolela Abramu, “Khali yivi mwene wamanya ndi Mwami Nyasaye wanzikalila khwivula vaana. Tsia, ukone nu murukwa wi shikhana wanje; haundi nyala khwivula vaana khuvirila khuye.” Abramu yahuchilila makhuva ka Sarai yali namuvoolele. 3Lwa Abramu yali niyakhamenya mu shivala shia Kanaani khumihika likhomi, mukhali wewe Sarai yavukula Hagari, wali nali Mumisri wali nali murukwa wewe, naha Abramu khuva mukhali wewe. 4Abramu yakona na Hagari, naheelitsa. Lwa Hagari yalola ndi waheelitsa, yali nu vwiloli khandi nachaya Sarai.
5Nalwo lwa Sarai yavoolela Abramu, “Nivi uchilanga Hakari nanjaya. Inzi mwene nakhuha, khandi lwa yakhamanya ndi waheelitsa, anjayanga. Mwami Nyasaye akhukhalachili niiva mulala khu khutsi, yivi inoho inzi nu wi likhola liu vulunji mu likhola!”
6Abramu yavoolela Sarai, “Nu vulahi muno, nu murukwa wowo khandi ali hasi hoho; mukhole koosi ka wenyanga.” Khulwa yako, Sarai yanyashitsa vululu muno Hagari, khali niyilukha.
7Injelosi yu Mwami Nyasaye yanyola Hagari nali himbi ha isieveye ya matsi mwichendanyama. Isieveye yali khunjila itsitsanga mu litaala lia Shuri 8navoola, “Hagari, murukwa wa Sarai, ni hena uruli khandi utsitsanga?”
Hagari yamuvoolela, “Nzilukhanga muruchi wanje Sarai.”
9Injelosi yu Mwami Nyasaye yavoolela Hagari, “Kalukha khu mukhali, wa wu kholelanga muhinzilu wowo Sarai; khandi uve mwichehitsi khuye.” 10Injelosi yu Mwami Nyasaye yavoolela khandi Hagari, “Niitsa khukhukhola khwivula vitsukhulu vanyishi, va mundu anyala khuvula khuvalitsa. 11Nunundi waheelitsa, khandi utsitsanga khwivula mwana wi shiyayi; khandi uliitsa khumukulikha lira Ishimaeli, shichila Mwami Nyasaye umali khuhulila khuli unyakhananga. 12Aliitsa khumenya khuli ipunda yumbulimu. Aliitsa khuhima shia mundu wosi, khandi shia mundu wosi aliitsa khwenya khumwiira. Aliitsa khumenya ihale wene khurula mu viikho veve voosi.”
13Khulwa yako, Hagari yakulikha Mwami Nyasaye wali nalomolome khuye, “Nivi Nyasaye Ulolanga”; shichila yavoola, “Ni kilikali, nyala khuva ndoli Nyasaye khandi nzilililanga khuva mwoyo ni nakhamulola?” 14Nashio shivune shiachila isieveye yeneyo, nilaangwa Beheri Lahai Roi; isieveye yeneyo ili hakari ha mataala ka Kadeshi nende Beredi.
15Hagari yivula khu Abramu mwana wi shiyayi; Abramu nakulikha mwana mwenoyo lira Ishimaeli. 16Abramu yali nali ni mihika makhomi munane na sita mumatukhu ka yivula Ishimaeli.
Currently Selected:
LIRAANGA 16: LLLPRO
Highlight
Share
Copy
Want to have your highlights saved across all your devices? Sign up or sign in
© The Bible Society of Kenya, 2013
