KHURULA 3

Nyasaye Yalaanga Musa

1Litukhu lindi, lwa Musa yali niyayitsanga tsimbuli nende makondi ka kuuka wewe Yetsero, wali musalisi wa Midiani, yahila miruku chienecho mwichendanyama. Yatukha khu Shikulu shia Sinai, nishili Shikulu shia Nyasaye. 2Injelosi yu Mwami Nyasaye yalolekha khu Musa hawenaho, khuli lumemo lu mulilu lwakhanga khurula hakari mu shisakha. Musa yalola mulilu nu kwakhanga mu shisakha, navutswa shisakha shishialaalitswa tawe. 3Nalwo lwa Musa yavoola, “Nisuunda himbi ndole shindu shiu khuchenyinya yishi -- manye shindu shichilanga shisakha, nishivula khulaalitswa.”

4Lwa Mwami Nyasaye yalola ndi Musa umali khwisuunda haluveka khulola, Nyasaye yalaanga Musa khurulila hakari hi shisakha, “Musa! Musa!”

Musa yamuvoolela, “Ndi hanu.”

5Nalwo lwa Nyasaye yavoolela Musa, “Lekha khwisuundakhu himbi; navula vilaro viovio mu vilenje, shichila wusinjile Havundu Hatakatifu. 6Ninzi Nyasaye wa kuuka wowo, uli Nyasaye wa Aburahamu, Isaka, nende Yakobo.” Nalwo lwa Musa yakhunikha makhono mumoni mwemwe, shichila yaria khulola Nyasaye.

7Nalwo lwa Mwami Nyasaye yavoola, “Ni kilikali, mali khulola khuli vandu vaanje vanyakhananga vululu muno mu shivala shia Misri. Mali khuhulila khulila khwavo, khurulananga khu vandu va vasinjililanga mu mihinzilu. Manyi vulahi vwene khuli vanyakhananga. 8Mali khwitsa khuvahonyinya khurula khu Vamisri, nu khuvarulitsa mu shivala shia Misri, khuvahila mu shivala shi lilova lilahi khandi linuulu, nende vushi -- shivala shia Vakanaani, Vaahitse, Vaamori, Vapeerizi, Vaahivi nende Vayeebusi vamenyamu. 9Ni kilikali, mali khuhulila khulila khwa vandu vaanje; khandi mali khulola khuli Vamisri va vanyashitsanga vululu muno. 10Niitsa khukhuruma khu Mwami wa Misri, khutsia khurulitsa vandu vaanje mu shivala shieshie.”

11Navutswa Musa yavoolela Nyasaye, “Ninzi viina, unyala khutsia khu Mwami wa Misri, khurulitsa Vaisraeli mu shivala shia Misri?”

12Nyasaye yamuvoolela, “Navutswa niitsa khuva nivi. Yishi nashio shimanyilu khu yivi ndi ninzi wakhurumayo, ‘Lwa uliitsa khurulitsa Vaisraeli mu shivala shia Misri, uliitsa khurumishila Nyasaye khu shikulu yishi.’ ”

13Navutswa Musa yavoolela Nyasaye, “Niiva niitsa khutsia khu Vaisraeli, khuvavoolela, ‘Nyasaye wa vakuuka venyu undumi khu munyi,’ navo vandeve, ‘Alaangwangwa viina?’ Nyala khuvavoolela shina?”

14Nyasaye yavoola, “Ninzi Uliho. Simukha utsi khuvoolela Vaisraeli, ‘Woyo ulaangwangwa: Ninzi Uliho undumi khu munyi.’ ” 15Nyasaye yavoolela Musa, “Voolela Vaisraeli, ‘Mwami Nyasaye, uli Nyasaye wa vakuuka venyu, Nyasaye wa Aburahamu, Isaka, nende Yakobo undumi khu munyi.’ Nalio lira lianje mihika ni mihika, lira liliitsa khumukhola munzitsushitse khumatukhu koosi. 16Simukha utsi khulaanga vimilili va Vaisraeli, nu khuvavoolela ndi Mwami Nyasaye, uli Nyasaye wa vakuuka venyu, Nyasaye wa Aburahamu, Isaka nende Yakobo undoleshele, navoola, ‘Mali khulola vindu vikholekhanga khu munyi, khandi khuli Vamisri vamukholanga mu shivala shiavo.’ 17Mali khulaaka ndi niitsa khumurulitsa mu shivala shia Misri, wa vamunyashitsilanga, khumuhila mu shivala shilahi khandi shi lilova linuulu, nende vushi -- nishili shivala shia Vakanaani, Vaahitse, Vaamori, Vapeerizi, Vaahivi nende Vayeebusi vamenyamu.

18“Vimilili va Vaisraeli valiitsa khuhulishitsa makhuva koko. Nalwo lwa yivi nende vimilili va Vaisraeli, muliitsa khutsia khu Mwami wa Misri khumuvoolela, ‘Mwami Nyasaye, uli Nyasaye wa Vahebrania, umali khukhuloleshela. Lekha khuraanje luchendo lweru lu khutsia mwichendanyama khumatukhu kavaka, khukholela Mwami Nyasaye, uli Nyasaye weru musango.’ 19Navutswa manyi ndi Mwami wa Misri, aliitsa khwambakhana khumuhuchilila khutsia nakharumishilwi tsingulu khukhola ndio. 20Niitsa khurumishila tsingulu tsianje, khandi nilisalilitsa Vamisri khuvirila mu vindu viu khuchenyinya via niitsa khukholayo. Nimali khukhola kenako, nalwo lwa aliitsa khumuhuchilila khutsia.

21“Niitsa khukhola Vamisri vamuyaanze munyi Vaisraeli, nikanyalikha lwa muliitsa khuva numutsitsanga, mulivula khutsia makhono makhaya. 22Shia mukhali Muisraeli wosi aliitsa khutsia khu mureende wewe Mumisri, khandi khu mukhali wosi Mumisri wumenyanga munzu mwemwe, mareeve tsinguvu tsiu khwifwala, itsahabu nende vindu vialombwa khu ifetsa. Vaisraeli valiitsa khufwala vaana vavo vi shiyayi nende vi shikhana vindu yivi. Nalwo lwa muliitsa khuyaaya miandu chia Vamisri.”

Currently Selected:

KHURULA 3: LLLCATHOLIC

Highlight

Copy