KHURULA 4

Viloleshitsu viu Khuchenyinya via Musa Yakhola

1Navutswa Musa yavoolela Mwami Nyasaye, “Kanakanakhu, nikava Vaisraeli valiitsa khwambakhana khusuuvila mwinzi inoho khumbulishitsa, nivavoola, ‘Mwami Nyasaye ashili khukhuloleshelakhu.’ ”

2Mwami Nyasaye yavoolela Musa, “Ni shina shili mu mukhono kwokwo?” Musa yamuvoolela, “Indovoshi.” 3Nalwo lwa Mwami Nyasaye yamuvoolela, “Siuva hasi.” Musa yasiuva indovoshi yeneyo hasi, nikalukhana nikwa inzukha; ma Musa nachilukha. 4Navutswa Mwami Nyasaye yavoolela Musa, “Yinaminya mukhono kwokwo hasi, uchikumile mushila.” Musa yinaminya mukhono hasi, manachikumila mushila. Nalwo lwa yakalukhana nikwa khandi indovoshi. 5Mwami Nyasaye yavoola, “Ukhole kenako, khu Vaisraeli vamanye ndi ninzi Mwami Nyasaye, uli Nyasaye wa vakuuka vavo, Nyasaye wa Aburahamu, Isaka, nende Yakobo, umali khulolekha khu yivi.”

6Mwami Nyasaye yavoolela khandi Musa, “Nyeleshitsa mukhono kwokwo mu ikaanzu yoyo.” Musa yanyeleshitsamu mukhono. Lwa yarulitsamu mukhono kwekwe, kwali nu vulwale vu vuchele, khuli machina ki imparafu. 7Nalwo lwa Mwami Nyasaye yamuvoolela, “Nyeleshitsa mukhono kwokwo khandi mu ikaanzu yoyo.” Yanyelishitsa mukhono kwekwe mu ikaanzu yeye. Lwa yakurulitsamu isaa yeneyo, kwali mulamu, khuli vivelo vindi viu mmbili kwekwe. 8Mwami Nyasaye yamuvoolela, “Niiva valiitsa khwambakhana khukhusuuvila, inoho vambakhane khulola shiloleshitsu shiukhuraanga, vanyala khusuuvila shiloleshitsu shia khavili. 9Navutswa niiva valiitsa khwambakhana khusuuvila khali viloleshitsu vivili yivi, inoho khuhulishitsa likhuva liolio, nalwo lwa uliitsa khuteeha matsi mati mu Muchela kwa Naili, ukasuundule hasi humakanu. Matsi ka uliitsa khuva nuteehi mu muchela kwenoko, kaliitsa khukalukhana kakwi masahi hasi henaho.”

10Navutswa Musa yavoolela Mwami Nyasaye, “Mwami Nyasaye, uli Nyasaye wanje, khurula khale, inzi nakorwa khulomoloma vulahi. Khali nali nakorwa khulomoloma vulahi khurula lwa wa nomolomela, khandi mbulakhu vunyali vukhulomoloma khu mundu. Ndi wakalaha mulilomoloma, khandi ndi ni shilimi.”

11Nalwo lwa Mwami Nyasaye yamuvoolela, “Ni viina uchilanga vandu nivalomoloma? Ni viina uvalombanga khukhaywa khulomoloma, inoho khwikala maroyi inoho khuvekhula? Ninzi Mwami Nyasaye wu kholanga ndio. 12Rula hanu utsi, niitsa khukhukhonya khulomoloma, khandi khwechitsi makhuva ka uvoola.”

13Navutswa Musa yamuvoolela, “Mwami Nyasaye, uli Nyasaye wanje, nuyaanza ruma mundu wundi vutswa.”

14Nalwo lwa Mwami Nyasaye yavukulila Musa vurima navoola, “Amwavo wowo, ulaangwangwa Haruni, khurula mu vandu vu lwivulu lwa Levi anyala khuva avulakhuho? Manyi ndi neye wamanya khulomoloma vulahi. Khali nunundi ali khunjila yitsanga khukhwakanila yivi, khandi lwa aliitsa khukhulolakhu yivi, nalwo lwa asangala mu mwoyo kwekwe. 15Uliitsa khulomoloma khu Haruni, khali umuvoolele kavoola. Niitsa khumukhonya munyi voosi vavili khulomoloma, khandi muvoolele shia muliitsa khukhola. 16Aliitsa khuvoolela vandu shia shindu shiosi, shia nuvoole. Neye uliitsa khulomoloma havukono hoho, nivi uliitsa khuva khuli Nyasaye khuye. 17Uliitsa khuvukula indovoshi iyi; shichila nayo ya uliitsa khurumishila khukhola viloleshitsu viu khuchenyinya.”

Musa Yakalukha Misri

18Musa yakalukha khu kuuka wewe Yetsero, namuvoolela, “Lekha ngalushi khu vandu vaanje mu shivala shia Misri, khutsia khulola niiva vashili mwoyo.” Yetsero yavoolela Musa, “Tsia mu milembe.”

19Mwami Nyasaye yavoolela Musa, nali mu shivala shia Midiani, “Kalukha mu shivala shia Misri, shichila vandu voosi vali nivachelitsa khwenya khukhwiira, vakhutsa khale.” 20Musa yavukula mukhali wewe nende vaana veve vi shiyayi, navaninyinya khu ipunda, nakalukha mu shivala shia Misri. Yali mu mukhono kwekwe ni indovoshi ya Nyasaye.

21Mwami Nyasaye yavoolela Musa, “Lwa uliitsa khukalukha mu shivala shia Misri, uchelitsi khukhola imbeli wu Mwami wa Misri viloleshitsu viosi via khuheele tsingulu tsiu khukhola. Niitsa khukhola Mwami wa Misri, khuva muhaaka, avuli khuhuchilila vandu vaanje khutsia. 22Nalwo lwa uliitsa khuvoolela Mwami wa Misri: ‘Mwami Nyasaye avoolanga: Israeli neye mwana wanje mukhulundu.’ 23Khuvoolela, ‘Lekha mwana wanje atsi, nikanyalikha andumishile. Niiva uliitsa khwambakhana khumulekha khutsia, nzitsanga khwiira mwana wowo wi shiyayi mukhulundu.’ ”

24Nivali khunjila, nivakalukhanga mu shivala shia Misri, havundu ha vakona mu vutukhu vwenovo, Mwami Nyasaye yakana na Musa, nachelitsa khumwiira. 25Navutswa Zipora yavukula lichina liuchi, nasheva mwana wewe wi shiyayi. Yatiilitsa khu vilenje via Musa likhanda, lia yali nakhalaache khurula khu mwana wewe, navoola, “Mwana wanje wa nayaanza, musahi yuku kulakhulinda.” 26Mwami Nyasaye yalekhana na Musa. Nalwo lwa Zipora yavoola, “Musatsa wanje umali khuhonyinywa, shichila shishevo.”

27Navutswa Mwami Nyasaye yavoolela Haruni, “Simukha utsi mwichendanyama khwakanila Musa.” Haruni yasimukha natsia; yakanila Musa ha shikulu shitakatifu, namukhumbelela. 28Musa yavoolela Haruni shia shindu shiosi, shiu Mwami Nyasaye yali namurumi khutsia khuvoola. Yamuvoolela khandi makhuva khulondokhana khu viloleshitsu viu khuchenyinya, via yali namuvoolele akhole. 29Nalwo lwa Musa nende Haruni vasimukha, nivatsia mu shivala shia Misri, nivalaanga halala vimilili voosi va Vaisraeli. 30Haruni yavavoolela shia shindu shiosi, shiu Mwami Nyasaye yali navoolele Musa; ma Musa nakhola viloleshitsu viosi imbeli wa vandu. 31Vandu vasuuvila; khandi lwa vahulila ndi Mwami Nyasaye umali khwitsa khukhonya Vaisraeli, khandi uloli khuli vanyashitswangwa, voosi vinama hasi, nivasaala khuye.

Currently Selected:

KHURULA 4: LLLCATHOLIC

Highlight

Copy