KHURULA 6
6
1Navutswa Mwami Nyasaye yavoolela Musa, “Uliitsa khulola nunundi ka nzitsanga khukhola Mwami wa Misri. Ni kilikali, niitsa khurumishila tsingulu khutukha, lwa aliitsa khuvahuchilila khurula mu shivala shieshie.”
Khuli Nyasaye Yalaanga Musa
2Nyasaye yavoolela Musa, “Ninzi Mwami Nyasaye. 3Ninzi walolekha khu Aburahamu, Isaka, nende Yakobo, khuli Nyasaye Uli Ikulu khu Viosi; navutswa shinali ni lienya liu khwenya vamanye, khuvirila khu lira lianje litakatifu Mwami Nyasaye tawe. 4Ninzi wakhola khandi navo lilakano lianje, liu khuvaha shivala shia Kanaani, shivala shia vamenyamu khuli vandu vacheni. 5Mali khuhulila nunundi khuli Vaisraeli, va Vamisri vakhola khuva varukwa valilanga tsikhwili, khandi nzitsushitse lilakano lianje. 6Voolela Vaisraeli, ‘Ninzi Mwami Nyasaye! Niitsa khumuhonyinya, khandi mukhole khuva vavoholole khurula mu vurukwa mu shivala shia Misri. Niitsa khuvasalilitsa vululu muno, khandi muhonyinyi. 7Niitsa khumukhola khuva vandu vaanje mwene, ninzi niliva Nyasaye wenyu. Nalwo lwa muliitsa khumanya ndi ninzi Mwami Nyasaye, uli Nyasaye wenyu wamukhola khuva vavoholole khurula mu vurukwa mu shivala shia Misri. 8Niitsa khumuhila mu shivala shia nali nisuuha niitsa khuha Aburahamu, Isaka nende Yakobo. Niitsa khumuha shive shienyu shiu khumenyamu. Ninzi Mwami Nyasaye.’ ” 9Musa yavoolela Vaisraeli makhuva kenako. Navutswa vambakhana khumuhulishitsa, shichila vali vakhutsa mwoyo, khandi shichila vanyashitswangwa vululu muno mu vurukwa.
10Nalwo lwa Mwami Nyasaye yavoolela Musa, 11“Simukha utsi khuvoolela Mwami wa Misri aleshe Vaisraeli varuli mu shivala shieshie.”
12Navutswa Musa yavoolela Mwami Nyasaye, “Niiva Vaisraeli valambakhana khumbulishitsa. Mwami wa Misri anyala khumbulishitsa ndina, lwa ndi mundu wakorwa khulomoloma?”
13Navutswa Mwami Nyasaye yavoolela Musa nende Haruni makhuva khulondokhana khu Vaisraeli nende Mwami wa Misri, ku khurulitsa Vaisraeli mu shivala shia Misri.
Lwivulu lwa Musa nende Haruni
14Rubeni, mwana mukhulundu wa Yakobo yali wayivula vaana vi shiyayi vane, nivali Hanoku, Palu, Hezironi, nende Karami. Navo vali vakuuka vi tsinzivulu tsia vakulikhwa. 15Simioni yali wayivula vaana vavaka sita vi shiyayi. Mira kavo ni Yemweli, Yamini, Ohadi, Yakini, Zohari, nende Shahuli, mwana wayivula khu mukhali wali Mukanaani. Navo vali vakuuka vi tsinzivulu tsia vakulikhwa. 16Levi yali wayivula vaana vi shiyayi. Mira kavo ni Gerishoni, Kohaatsi, nende Merari. Navo vali vakuuka vi tsinzivulu tsia vakulikhwa. Levi yamenya mihika imia indala na makhomi saba. 17Gerishoni yali wayivula vaana vavili vi shiyayi. Mira kavo ni Libuni nende Shimei, khandi vali na vitsukhulu vanyishi. 18Kohaatsi yali wayivula vaana vi shiyayi vane. Mira kavo ni Amuramu, Izuhari, Heburoni, nende Uzieli. Kohaatsi yamenya mihika imia indala makhomi kavaka na kavaka. 19Merari yali wayivula vaana vi shiyayi vavili. Mira kavo ni Mahuli nende Mushi. Navo vali tsinzivulu tsia Levi nende vitsukhulu vavo.
20Amuramu yahila mbotso wa tata wewe wali ni lira Yokebedi, khuva mukhali wewe. Yivula khuye Haruni nende Musa. Amurami yamenya mihika imia indala makhomi kavaka na saba. 21Izuhari yali wayivula vaana vavaka vi shiyayi, nivali Kora, Nefegi, nende Zikuri. 22Uzieli yali wayivula khandi vaana vi shiyayi vavaka. Mira kavo ni Mishaheli, Elizafani nende Sitsiri.
23Haruni yahila mukhali walaangwangwa Elisheba, mwana wi shikhana wa Aminadabu, wali nali mbotso Nahashoni. Haruni yivula khuye Nadabu, Abihu, Eliazari, nende Itsamari. 24Kora yali wayivula vaana vi shiyayi vavaka. Mira kavo ni Asiri, Elikana nende Abiasafu. Navo vali vakuuka vi tsinzivulu tsi tsinzu tsia Kora. 25Eliazari, wali mwana wa Haruni yahila mulala khu vaana vi shikhana va Putieli. Yivula khuye mwana walaangwangwa Finiasi. Navo vali vimilili vi tsinzu nende tsinzivulu tsia vandu vu lwivulu lwa Levi.
26Haruni nende Musa, navo vu Mwami Nyasaye yavoolela, “Rulitsi vandu vi tsimbia tsia Israeli mu shivala shia Misri.” 27Musa nende Haruni navo vandu vavoolela Mwami wa Misri, avoholole Vaisraeli khurula mu shivala shia Misri.
Haruni Alalomoloma mu Vwiyangu vwa Musa
28Lwa Mwami Nyasaye yalomoloma khu Musa, wali nali mu shivala shia Misri, 29yamuvoolela, “Ninzi Mwami Nyasaye. Uvoolele Mwami wa Misri shia shindu shiosi shia khuvoolela.”
30Navutswa Musa yamuvoolela, “Lwa yivi mwene wamanya vulahi ndi inzi nakorwa khulomoloma, usuuvilanga Mwami wa Misri anyala khumbulishitsa?”
Currently Selected:
KHURULA 6: LLLCATHOLIC
Highlight
Share
Copy
Want to have your highlights saved across all your devices? Sign up or sign in
© The Bible Society of Kenya, 2013
