LIRAANGA 40

Yosefu Yavoola shia Malooro ka Vavohe Kavoolanga

1Matukhu mati nikakhavira, murumishi wahaananga idivai khu Mwami wa Misri nende mwimilili wa vandu vakandanga mikati vakholela Mwami wa Misri vindu vitamanu. 2Mwami wa Misri yali nu vurima khu vandu vavili venavo, 3navavoha mucheela mu inzu yu mwimilili wimililanga valindi vi inzu yu vwami, mucheela indala yene ya Yosefu yali niyavohwamu. 4Vamala matukhu manyishi mucheela, ma mwimilili wimililanga valindi vi inzu yu vwami naha Yosefu vunyali vu khusinjilila vavohe.

5Vutukhu vundi, murumishi wahaananga idivai nende mwimilili wa vandu vakandanga mikati vali nivali mucheela valoora malooro, shia mulala malooro keke. Malooro kenako kali ni livoola lukanu. 6Lwa Yosefu yitsa khuvalola mu mavwevwe, yavalola khuli vanyakhane. 7Yosefu yavareeva, “Shichila shina muvelele mu mwoyo nunundi?”

8Vamuchipa, “Shia mulala khu khutsi aloori malooro, khandi mundu avulakhuho unyala khukhuvoolela shia kavoolanga.”

Yosefu yavavoolela, “Nyasaye neye uhaananga vunyali vu khwivaala shia malooro kavoolanga. Khamboleli malooro kenyu kamuloori.”

9Murumishi wahaananga idivai khu Mwami wa Misri yavoola “Ndoli mu malooro kaanje musala ku musabibu imbeli wanje 10nu kuli ni tsisia tsivaka. Lwa masambu kameela, matunda kalolekha ni kaseevukhanga khandi matunda ki misabibu nikenga. 11Nali ningumile mu mukhono kwanje shikombe shiu Mwami wa Misri. Navukula matunda ki misabibu niminila mu shikombe khandi nimuha shikombe shienesho.”

12Yosefu yamuvoolela, “Yaka nako ka malooro kenako kavoolanga: Tsisia tsivaka nako matukhu kavaka. 13Mwami wa Misri aliitsa khukhuvoholola mumatukhu kavaka, akhusamehe nu khukhukalushitsa khu muhinzilu kwokwo kwa wakholanga. Uliitsa khumuha shikombe shieshie, khuli lwa wamuheetsanga khale lwa wali nuli murumishi wewe wamuheetsanga idivai. 14Navutswa nuyaanza unzitsushitse, lwa vindu viosi viliitsa khuva vilahi khu yivi, khandi nuyaanza nyanzila uralekhu lira lianje khu Mwami wa Misri, khandi ukhonye khurula mucheela yumu. 15Khali ndio, nakumilwa ni tsingulu mu shivala shia Vahebrania, khali khandi hanu mu shivala shia Misri mbulakhu shindu shia nali nikholi shinyala khuchila mbohwi mucheela.”

16Lwa mwimilili wa vandu vakandanga mikati yalola ndi livoola lia malooro ku murumishi wahaananga idivai ni lilahi, yavoolela Yosefu, “Khali inzi khandi naloora malooro. Nali ninjinji khu murwi kwanje mihinda chivaka chi mikati. 17Khwali ni viukhulia mu muhinda ikulu viakandwa lukanu lundi viu Mwami wa Misri, navutswa manyonyi kavivootselanga mu muhinda kwa nali ninjinji khu murwi kwanje.”

18Yosefu yamuvoolela, “Yaka nako ka malooro kenako kavoolanga: Mihinda chivaka nako matukhu kavaka. 19Mwami wa Misri aliitsa khukhuvoholola mumatukhu kavaka nikashili khuvira, khandi ahaane lilako liu khukutula murwi kwokwo! Aliitsa khusunga mmbili kwokwo khu musala, khandi manyonyi nikavootse mmbili kwenoko.”

20Matukhu kavaka nikakhavira, Mwami wa Misri yalombela varumishi veve muhikha kwi lilia khulitukhu liu khwitsushitsa khwivulwa khwekwe mwene. Yavoholola murumishi wewe wamuheetsanga idivai nende mwimilili wewe wa vandu vakandanga mikati navalera imbeli wa varumishi veve. 21Mwami wa Misri yakalushitsa murumishi wamuheetsanga idivai khu muhinzilu kwekwe kwa yakholanga, 22navutswa yiira mwimilili wa vandu vakandanga mikati. Kosi kakholekha vutswa khuli Yosefu yali niyavavoolela. 23Nikhali, murumishi wahaananga idivai khu Mwami wa Misri, shiyitsushitsakhu shindu shiosi khu Yosefu tawe; yamwivilila.

Currently Selected:

LIRAANGA 40: LLLCATHOLIC

Highlight

Copy