LIRAANGA 42
42
Vamwavo va Yosefu Vatsia Misri
1Lwa Yakobo yavoolelwa ndi shiukhulia shili mu shivala shia Misri, yavoolela vaana veve, “Shichila shina munyi vene muheenzananga vutswa? 2Mali khuvoolelwa ndi shiukhulia shili mu shivala shia Misri. Kholomoshi mutsiyo mukuule shiukhulia khu inzala ivuli khukhumala.” 3Khulwa yako, vamwavo likhomi va Yosefu, vakholomokha nivatsia mu shivala shia Misri khukuula shiukhulia. 4Navutswa Yakobo shiyaruma Benyamini, wali amwavo Yosefu, khutsia na vamwavo veve tawe; shichila yali waria haundi, shindu shitamanu shinyala khwikholekha khuye.
5Khulwa yako, vaana va Yakobo vitsa na vandu vandi khukuula shiukhulia, shichila inzala yali yatukha mu shivala shia Kanaani. 6Mumatukhu kenako, Yosefu neye wali gavana wimililanga shivala shia Misri. Neye wakuulitsilanga vandu voosi mu shivala shienesho shiukhulia. Vamwavo veve vitsa, nivamusikamila. 7Lwa Yosefu yalola vamwavo veve, yavamanyishitsa; navutswa yavavukula khuli vandu vacheni, khandi navalulila mulilomoloma. Yavareeva, “Ni hena wamurulanga?” Vamuvoolela, “Khuruli mu shivala shia Kanaani, khwitsa khukuula shiukhulia.”
8Khali niiva Yosefu yali wamanyishitsa vamwavo veve, vo vali vamukorwa. 9Yosefu yitsushitsa malooro, ka yali niyaloora khulondokhana khu vamwavo veve venavo. Yavavoolela, “Mumali khwitsa khurunishitsa! Mumali khwitsa khurunishitsa mulole havundu hi shivala shieru shili nu vuteteshele.”
10Vamwavo venavo vamuvoolela, “Shikali kario tawe. Khutsi varumishi vovo khumali khwitsa hanu khukuula shiukhulia. 11Khutsi voosi ni vaana vu mundu mulala yivula. Khuli vandu valahi; khutsi, varumishi vovo shiukhuli varunishitsi tawe.”
12Yosefu yatsililila khuvavoolela, “Shikali kario tawe! Mumali khwitsa hanu khurunishitsa mulole havundu hi shivala shieru shili nu vuteteshele.”
13Vamwavo venavo vamuvoolela, “Khutsi khwivulwa vaana vi shiyayi voosi likhomi na vavili, vaana vu mundu mulala yivula khurula mu shivala shia Kanaani. Mwana mushie urikale na tata weru; na wundi wakhutsa.”
14Navutswa Yosefu yavavoolela, “Kali vutswa khuli lwa mali khumuvoolela khale. Munyi mwenyanga khurunishitsa! 15Nindi mutsitsanga khuchelwa; Nzisuuhanga khuvirila mu lira liu Mwami wa Misri ndi shiumunyala khuhuchililwa khurula mu shivala shia Misri, numukhaleri hanu amwavo wenyu mushie tawe. 16Leshi mulala khu munyi atsi khulera amwavo wenyu mushie. Navutswa vandi vamurikala, mulatsililila khuvohwa mucheela khutukha lwa katoto kaliitsa khurweshitswa. Nikhali nzisuuhanga khuvirila mu lira liu Mwami wa Misri uli mwoyo ndi muli varunishitsi.” 17Yosefu yavavoha voosi mucheela khumatukhu kavaka.
18Khulitukhu lia khavaka, Yosefu yavavoolela, “Kholi kambolanga, mutsililile khuva mwoyo; shichila ndi mundu uheetsanga Nyasaye luyali. 19Niiva muli vandu vatoto, nu vulahi mulala khu vamwavo venyu arikale mucheela mwa mwavohwa yumu. Munyi vamuva numurikale, munyala khuhila shiukhulia khu vandu vu munzu mwenyu vi inzala yenyanga khumala yavo. 20Navutswa tsi munderele amwavo wenyu mushie, khu muve muvoolanga katoto khuvula khwiirwa.”
Vahuchilila khukhola, ka vali nivamali khuvoolelwa. 21Vireevana vene, “Ni kilikali, khurunganga ka khwakholela amwiru. Khwalola khuli yanyakhana lwa yililila khu khutsi khuleshe khumwiira; navutswa khwambakhana khuhulishitsa.”
22Rubeni yavavoolela, “Shikali katoto namukaya khusalilitsa mwana wi shiyayi uyu? Navutswa mwambakhana khumbulishitsa. Khuvanzwangwa nunundi likhutsa lia yali yakhutsa.” 23Shivali vamanyikhu Yosefu avahulilanga tawe; shichila yalomolomanga khuvo khuvirila khu mukalukhanyinyi wa makhuva. 24Yosefu yalekha khulomoloma navo, naraanga khulila. Yishevukha wa vali nivali, nalomoloma navo. Yarovola Simioni, nahaana lilako avohwi nivalolanga.
Vamwavo va Yosefu Vakalukha Kanaani
25Nalwo lwa Yosefu yahaana lilako liu khusumeelitsa shiukhulia mu makunia ka vamwavo veve, khandi khura tsisenti mu likunia lia shia amwavo wewe; nu khuheelwa shiukhulia shia valia khu luchendo lwavo. Vakholelwa kenako. 26Vamwavo venavo vachikha khu tsipunda tsiavo makunia ki shiukhulia, shia vali nivakuuli, nivarulayo. 27Lwa mulala khuvo yavoholola mu likunia lielie, nali havundu ha vali nivamali khutukha khukona tsindolo, khuha ipunda yeye shiukhulia; yanyola tsisenti tsietsie ikulu mu likunia. 28Yavoolela vamwavo veve, “Vangalushitsile tsisenti tsianje. Natsio tsili mu likunia lianje yitsi!” Lwa valola ndio, varia nivaraanga khutechela, nivareevana vene, “Ni shina shia Nyasaye anyala khuva nakhukholele yishi?”
29Lwa vatukha mu shivala shia Kanaani khu tata wavo Yakobo, vamuvoolela shia shindu shiosi shiali ni shikholekha khuvo. Vamuvoolela, 30“Gavana wimililanga shivala shia Misri akhulomolomele nu vululu muno; nakhuvukula khuli khurunishitsanga shivala shieshie. 31Navutswa khwavoolela gavana, ‘Khuli vandu valahi! Shiukhwitsi khurunishitsa shindu shiosi tawe. 32Khuli vamwavo likhomi na vavili, vaana vu mundu mulala yivula. Mulala wakhutsa khale, navutswa amwiru mushie urikale na tata weru mu shivala shia Kanaani.’ 33Mundu mwenoyo, nali mwimilili wi shivala shienesho yakhuvoolela, ‘Nindi nzitsanga khumanya nikava muli vandu valahi: Leshi mulala khu munyi arikale hanu ninzi. Munyi vamuva numurikale, mulahila shiukhulia khu vandu vu munzu mwenyu vi inzala yenyanga khumala yavo. Numwakhakhola ndio, munyala khutsia ha mwenyanga. 34Navutswa tsi munderele amwavo wenyu mushie; nalwo lwa manya ndi shiumuli varunishitsi tawe; navutswa vandu valahi. Numukholi ndio, namukalushitsila amwavo wenyu, khandi munyala khukholela vukhala mu shivala shinu.’ ”
35Khulwa yako, lwa vali nivavohololanga mu makunia kavo, shia mulala khuvo yanyola shisiko shi tsisenti mu likunia lielie. Lwa vo vene nende tata wavo valola visiko vi tsisenti tsienetso, vali niliheenda mwoyo. 36Tata wavo yavavoolela, “Munyala khuva mwenyanga mbe ningoritsanga vaana vaanje voosi? Khali Yosefu wamala khukhutsa khale. Simioni wamala khukhutsa; nunundi mwenyanga khuvukula Benyamini. Nikamali khwikholekha kario, ninzi utsitsanga khunyakhana muno!”
37Nalwo lwa Rubeni yavoolela tata wewe, “Unyala khwiira vaana vaanje vavili, nikava nyala khuvula khumukalushitsa khu yivi. Lekha ave mu makhono kanje, ninzi niitsa khumukalushitsa khu yivi.”
38Navutswa Yakobo yavoola, “Mwana wanje shianyala khutsia na munyi tawe; shichila amwavo wewe wakhutsa, khandi neye wonyene vutswa warikala. Niiva shindu shitamanu shinyala khumukwila nali khu luchendo lwenyu, ndi mundu wasakhula, khandi vuveleli vwambirilamu mu mwoyo vunyala khunziira khutukha lwa nzia mu shihatisi.”
Currently Selected:
LIRAANGA 42: LLLCATHOLIC
Highlight
Share
Copy
Want to have your highlights saved across all your devices? Sign up or sign in
© The Bible Society of Kenya, 2013
