LIRAANGA 45

Yosefu Yavoolela Vamwavo Veve Ye ni Amwavo Wavo

1Yosefu yakhaywa khwikhutsila imbeli wa varumishi veve voosi, va yali nali navo, navavoolela varuli ilwanyi. Mundu avulakhuho wali himbi na Yosefu, lwa yilavushitsa khu vamwavo veve. 2Yosefu yalila nu mwoyo mukali ikulu, khali Vamisri nivahulila, khandi vandu vamenyanga mu inzu yu vwami nivahulila makhuva khulondokhana khuye. 3Yosefu yavoolela vamwavo veve, “Ninzi Yosefu! Ni kilikali, tata wanje anyala khuva ashili mwoyo?” Navutswa lwa vamwavo veve vahulila ndio, vali niliheenda mwoyo, nivahonjela. 4Nalwo lwa Yosefu yavavoolela, “Nzikombanga mwisuunde himbi khwinzi.” Lwa vakhola ndio, yavavoolela, “Ninzi amwavo wenyu Yosefu, wa mwakuulitsa mu shivala shia Misri! 5Muvuli khuheendakhu mwoyo inoho khwivukulila vene vurima, lwa mwangulitsa hanu. Nyasaye naye wanduma khumwimilila imbeli wenyu, khulu khuhonyinya vulamu vwa vandu. 6Yuku nakwo muhika kwa khavili kwi inzala imali mu shivala; mihika chindi chiranu, chiliitsa khutukha lwa vandu valiitsa khuvula khulima milimi inoho khuchesa viraakwa mu milimi. 7Nyasaye yanduma khwimila imbeli wenyu khumuhonyinya munjila yu khuchenyinya iyi, khandi khuchelitsa khuli nyala nombe munyi halala na vitsukhulu venyu muhone. 8Khulwa yako, shikali nu munyi va mwanduma hanu tawe, navutswa Nyasaye neye wanduma. Neye wanomba khuva mwimilili mukali khukhonyanila Mwami wa Misri muliamiha. Ninzi sinjililanga shivala shieshie shiosi. Ninzi wamihanga Vamisri voosi.

9“Kholi vwangu mutsi khu tata wanje, mumuvoolele ndi mwana wewe Yosefu avoolanga, ‘Nyasaye wanomba khwamiha shivala shiosi shia Misri; hamba khwinzi vwangu vuchila khucheleva. 10Unyala khumenya mu lusomo lwa Gosheni, wa numenye himbi khwinzi -- yivi, vaana vovo, vakoko na vakuuka vovo, makondi koko, tsimbuli tsiotsio, tsing'ombe tsiotsio, halala ni vindu viosi via uli navio. 11Niiva ulamenya mu lusomo lwa Gosheni, nakhulinda munjila indahi yene. Khushili ni mihika chindi chiranu chi inzala itsitsanga khuvaho; shinyenyikhu inzala imale yivi, vandu vi inzu yoyo, halala ni miruku chiochio tawe.’ ”

12Yosefu yatsililila khuvoola, “Munyi voosi, khali yivi amwavo wanje Benyamini, munyala khulola nunundi ndi ni kilikali, ninzi Yosefu. 13Mulavoolela tata wanje makhuva koosi khulondokhana khu luyali lwandi nalwo mu shivala shia Misri, khandi khulondokhana khu shia shindu shiosi, shia mumali khulola. Kholi vwangu mutsi khunderela tata wanje hanu.”

14Yosefu yakhumbelela amwavo wewe Benyamini khandi naraanga khulila. Khali Benyamini yalila, lwa yakhumbelela Yosefu. 15Yosefu yakhumbelela vamwavo veve voosi khandi naraanga khulila. Namali khukhola ndio, vamwavo veve varaanga khulomoloma naye.

16Lwa makhuva katukha mu inzu yu vwami ndi vamwavo va Yosefu vamali khutukha, Mwami wa Misri nende varumishi veve vali nu vuyaanzi vunyishi muno. 17Mwami wa Misri yavoolela Yosefu, “Voolela vamwavo vovo vachikhi vindu viavo khu tsipunda tsiavo, khukalukha mu shivala shia Kanaani. 18Lekha vatsi khuvukula tata wavo na vandu vu munzu mwenyu, khwitsa khwinzi hanu. Nzitsanga khumuha havundu hali ni lilova linuulu mu shivala shia Misri, khandi muliitsa khuchesa viukhulia vinyishi. 19Vavoolele khandi vavukuli makaare mu shivala shia Misri, ka vachinjilakhu vakhali vavo, vaana vavo vati, khwitsa hanu na tata wavo. 20Vavuli khuheendelakhu mwoyo miandu chiavo, shichila lusomo lulahi lwene mu shivala shia Misri lutsitsanga khuva lwenyu.”

21Vaana va Yakobo vakhola khuli vavoolelwa. Yosefu yavaha makaare, khuli Mwami wa Misri yali namuvoolele, khandi shiukhulia shiu khurumishila khu luchendo. 22Yosefu yaha shia mulala khu vamwavo veve tsinguvu tsimpia; navutswa yaha Benyamini ifetsa vitonye tsimia tsivaka nende tsinguvu tsiranu tsimpia. 23Yoseph yarumila tata wewe tsipunda likhomi, nitsichinji vindu vilahi muno viu mu shivala shia Misri, khandi tsipunda tsindi likhomi nitsichinji imu, mikati, nende viukhulia vindi viu khu luchendo. 24Yaheleshitsa vamwavo veve. Lwa vali nivatsitsanga, yavavoolela, “Muvuli khulembanila khunjila.”

25Varula mu shivala shia Misri, nivakalukha khu tata wavo Yakobo wamenyanga mu shivala shia Kanaani. 26Vavoolela Yakobo, “Yosefu ashili mwoyo! Khali neye wamihanga shia havundu hosi mu shivala shia Misri.” Yakobo yarimukha ikholo; navula khusuuvila makhuva ka vali nivamuvoolele.

27Navutswa lwa vamuvoolela shia shindu shiosi shia Yosefu yali navavoolele, khandi lwa yalola makaare ka Yosefu yali narumi khwitsa khumuvukula nu khumuhila mu shivala shia Misri, nalwo lwa tata wavo Yakobo, yaraanga khwihulila vulahi mu mwoyo. 28Yakobo yavoola, “Mali khusuuvila! Mwana wanje Yosefu ashili mwoyo. Natsiayo khumulola, nishili khukhutsa.”

Currently Selected:

LIRAANGA 45: LLLCATHOLIC

Highlight

Copy