LIRAANGA 46

Yakobo nende Vandu vi inzu Yeye Vatsia Misri

1Yakobo yavukula miandu chiechie chiosi, naraanga luchendo lwelwe. Lwa yatukha mu litaala lia Beresheba, yakholelamu musango khu Nyasaye wa tata wewe Isaka. 2Nyasaye yalomoloma khu Yakobo mu malolo mu vutukhu, nalaanga, “Yakobo, Yakobo!” Yakobo yamuvoolela, “Ndi hanu.”

3Nyasaye yavoolela Yakobo, “Ninzi Nyasaye, uli Nyasaye wa tata wowo; ukharia khutsia mu shivala shia Misri tawe. Niitsa khulomba vitsukhulu vovo khwivulana mu vunyishi, vave luhia lwi tsingulu tsinyishi iweneyo. 4Niitsa khutsia nivi mu shivala shia Misri, khandi nilikalushitsa vitsukhulu vovo mu shivala yishi. Yosefu aliitsa khuva nivi, lwa uliitsa khuva nu wakhakhutsa.”

5Yakobo yasimukha narula mu litaala lia Beresheba. Vaana va Yakobo vachinga tata wavo, vaana vavo vatititi, halala na vakhali vavo, nivamuvikha mu likaare liu Mwami wa Misri yali namurumile khumuchinga. 6Vavukula miruku chiavo, halala ni miandu chiavo chiosi chia vali nivanyola mu shivala shia Kanaani, nivatsia Misri. Yakobo yasimukha, natsia halala na vitsukhulu veve voosi, 7vaana veve vi shiyayi, vakuuka veve vayayi, vakhana, halala na vakuuka veve vakhana.

8Vandu vi inzu ya Yakobo vasimukha, nivatsia Misri halala naye, vali mwana wewe mukhulundu Rubeni 9halala na vaana va Rubeni nivali Hanoki, Palu, Hezironi, nende Karumi. 10Simioni nende vaana veve nivali Yemweli, Yamini, Ohadi, Yakini, Zohari, nende Shahuli, mwana wivulwa khu mukhali Mukanaani. 11Levi nende vaana veve vi shiyayi nivali Gerishoni, Kohaatsi, nende Merari. 12Yuda nende vaana veve vi shiyayi nivali Shela, Perezi nende Zera. (Vaana va Yuda vandi nivali Eru nende Onani vali nivakhutsila mu shivala shia Kanaani.) Vaana vi shiyayi va Perezi vali Hezironi nende Hamuli. 13Isakari nende vaana veve vi shiyayi nivali Tola, Puha, Yashubu, nende Shimuroni. 14Zabuloni nende vaana veve vi shiyayi nivali Serede, Eloni, nende Yahaleli. 15Yava navo vaana va Leya yivula khu Yakobo nali mu shivala shia Mesapotamia, khumeeta khu mwana wewe wi shikhana walaangwangwa Dina. Isavu yosi ya vitsukhulu va Leya yali niyivula yali vandu makhomi kavaka na vavaka.

16Gadi nende vaana veve vi shiyayi nivali Zefoni, Hagi, Shuni, Eziboni, Eri, Arodi, nende Areli. 17Asheri nende vaana veve vi shiyayi nivali Imuna, Ishuva, Ishuvi, Beria, nambotso wavo Sera. Vaana va Beria vayayi nivali Heberi nende Malakieli. 18Vandu likhomi na sita yava navo vitsukhulu va Yakobo yivula khu Zilipa, mukhali murukwa wa Labani yali niyaha mwana wi shikhana wewe Leya. 19Raheli, wali mukhali wa Yakobo yivula khu Yakobo vaana vi shiyayi vavili nivali Yosefu nende Benyamini. 20Yosefu yivula vaana vi shiyayi vavili nali Misri nivali Manaase nende Efurahimu khu mukhali walaangwangwa Asenatsi, mwana wi shikhana wa Potifera, wali nali musalisi wa Heliopolisi. 21Vaana va Benyamini vi shiyayi vali Bela, Bekeri, Ashubeli, Gera, Nahamani, Ehi, Roshi, Mupimu, Hupimu, na Arudi. 22Vandu likhomi na vane yava navo vali vitsukhulu va Yakobo yivula khu Raheli.

23Dani halala nu mwana wewe wi shiyayi walaangwangwa Hushimu. 24Nafutali nende vaana veve vi shiyayi nivali Yahazeli, Guni, Yezeri, nende Shilemi. 25Vandu saba yava navo vali vitsukhulu va Yakobo yivula khu Bilia, mukhali murukwa wa Labani yali niyaha mwana wewe Raheli.

26Isavu ya vitsukhulu voosi va Yakobo vasimukha nivatsia mu shivala shia Misri, vali vandu makhomi sita na sita, vuchila khuvalitsakhu vakhali va vaana veve vi shiyayi. 27Yosefu yali wayivulila mu shivala shia Misri vaana vi shiyayi vavili. Isavu ya vandu voosi vi inzu ya Yakobo vali mu shivala shia Misri vali vandu makhomi saba.

Yakobo nende Vandu vi inzu Yeye Nivali Misri

28Yakobo yaruma Yuda khwimila imbeli khutsia khuvoolela Yosefu avakanile mu lusomo lwa Gosheni. Lwa vali nivakhatukhaho, 29Yosefu yinjila mu likaare lielie li tsingamia, natsia khwakanila tata wewe mu lusomo lwa Gosheni. Lwa vali nivakhakana, Yosefu yakhumbelela tata wewe khandi nalila khuluhono. 30Yakobo yavoolela Yosefu, “Khali nikhutsa nunundi, mbulakhu shindu shianyala khukoritsa, shichila mali khukhulola nushili mwoyo.”

31Yosefu yavoolela vamwavo veve nende vandu vandi vu mu inzu ya tata wewe, “Nzitsanga khutsia khuvoolela Mwami wa Misri, ‘Vamwavo vaanje nende vandu vi inzu ya tata wanje, vali nivamenya mu shivala shia Kanaani vamali khwitsa vali hanu. 32Vandu venavo ni vayi vi miruku; shichila nivavayi vi tsing'ombe; khandi vitsi hanu ni shiayo shia makondi, tsimbuli nende tsing'ombe, halala ni vindu vindi viosi via vali navio.’ 33Lwa Mwami wa Misri amulaanga khandi amureeve, ‘Nu muhinzilu shina kwa mwayaanza khukhola?’ 34Mulamuvoolela, ‘Khutsi varumishi vovo, khwali vayi vi tsing'ombe khurula nu khushili vavukha khutukha nunundi, khuli vakuuka veru vakholanga.’ Niiva muliitsa khumuvoolela ndio, alamuhuchilila khumenya mu lusomo lwa Gosheni, shichila Vamisri valechelitsa vayi vi miruku.”

Currently Selected:

LIRAANGA 46: LLLCATHOLIC

Highlight

Copy