LEVI 8
8
Inzu yu Vusalisi
(Khur 29:1-37)
1Mwami Nyasaye yavoolela Musa, 2“Lera Haruni nende vaana veve vi shiyayi, tsinguvu tsiavo, nende makura ku khuvekhwa, shihunwa shi shihanwa shiu khurulitsaho vwoni, mamiiko kavili, nende muhinda kulimu ni mikati chialombwa vuchila mamela, 3ma ulaanje Vaisraeli voosi mu vwinjililu vwi Liheemo Litakatifu.”
4Musa yakhola khuli Mwami Nyasaye yali namuvoolele akhole. Lwa vandu voosi vakanila halala mu vwinjililu vwi Liheemo Litakatifu, 5Musa yavoolela Vaisraeli voosi, “Yako nako ku Mwami Nyasaye yenyanga khwikholekha.”
6Musa yalera imbeli Haruni nende vaana veve vi shiyayi, navavoolela visinji na matsi ku mulukha. 7Musa yafwala lishiati nende ikaanzu ya Haruni, khali namuvoha nu lukhanda luvambalalu mu shisiindi mwemwe. Yamufwala shiambala khandi nashivoha nu mu shisiindi mwemwe lukhanda lwa naavwa vulahi ni tsimbusi. 8Musa yamufwala inguvu yu mu shiliru, khali navikhamu Urimu nende Tsumimu. #8:8 Urimu nende Tsumimu: Ni vindu vivili via vasalisi varumishilanga, ni venyi khumanya ka Nyasaye yenyanga kikholeshe. 9Musa yafwala Haruni shilemba khu murwi kwekwe, navikha imbeli wi shilemba shienesho itaachi indakatifu yalombwa khu itsahabu, khuli Mwami Nyasaye yali navooli akhole.
10Nalwo lwa Musa yavukula makura ku khuvekhwa, navekha khu Liheemo Litakatifu, khandi khu shia shindu shiosi shiali nishilimu, khandi navikhola khuva vitakatifu. 11Yavukula makura mati nakamitsa hali saba khu vwaali, khandi khu shia shindu shiosi shiali nishili khu vwaali, khu lukalayi halala nu vwalilu vu lukalayi lwenolo, khuvikhola khuva vitakatifu. 12Musa yakhola Haruni khuva musalisi lwa yamuvekha makura mati khu murwi kwekwe. 13Lulondakhu, Musa yalera imbeli vaana va Haruni, navafwala tsikaanzu, navavoha tsikhanda tsimbambalalu muvisiindi viavo, khandi ni tsikofia khu mirwi chiavo, khuli Mwami Nyasaye yali navooli akhole.
14Nalwo lwa Musa yalera shihunwa shi shihanwa shiu khurulitsaho vwoni; ma Haruni nende vaana veve vi shiyayi, nivatiila makhono kavo khu murwi kwi shihunwa shienesho. 15Musa yasinza shihunwa shienesho, navukula masahi kashio mati. Yarumishila shitere shieshie khuvekha masahi kenako khu misala chiasinjilitswa mu tsimbeka tsiu vwaali, khuvukhola khuva vunihu. Yasuundula masahi kali nikarikale khu vwalilu vu vwaali. Yakhola vwaali khuva vutakatifu munjila iyi, khandi navukhola khuva vunihu. 16Musa yavukula shivana shiosi, shiali nishili khu viungu viu munda, luveka lulahi lwi ingurumani, nende tsimbiko tsivili ni shivana shili khutsio, nasambila khu vwaali. 17Navutswa Musa yavukula inyama yali nirikale yi shihunwa shienesho, khali liseelo liayo, inyama, nende mala ku munda, navisambila ihale wene, khurula mu maheemo ka vandu vamenyamu, khuli Mwami Nyasaye yali navooli akhole. 18Musa yalera limiiko li shihanwa shiu khusambwa. Haruni nende vaana veve vi shiyayi vatiila makhono kavo khu limiiko lienelo. 19Nalwo lwa Musa yasinza limiiko lienelo, namitsa masahi kalio mu tsimbeka tsiosi tsine tsiu vwaali. 20Musa yatonyanyinya limiiko lienelo mu vitonye, nasamba nu mulilu murwi kwalio, vitonye vi tsinyama tsi limiiko lienelo nende shivana. 21Musa yochitsa na matsi viungu viu munda nende vilenje, khandi nasamba nu mulilu limiiko liosi, khuli shihanwa shiu khusambwa khu vwaali, shiahuunyanga mwayu mulahi ku khuyaanzitsa, khandi shihanwa shiu khusambwa khu Mwami Nyasaye, khuli Mwami Nyasaye yali navooli akhole.
22Musa yalera limiiko lindi, liali liu khukhola vandu khuva vasalisi. Haruni nende vaana veve, vatiila makhono kavo khu murwi kwalio. 23Musa yasinza limiiko lienelo, navukula masahi kalio mati, khandi nakavekha khu liroyi lisatsa lia Haruni, khu shitere shikali shieshie shiu khu mukhono musatsa, khandi khu shitere shieshie shikali shi shilenje shisatsa. 24Nalwo lwa Musa yalaanga imbeli khandi vaana vi shiyayi va Haruni, navekha masahi mati khu viroyi viavo visatsa, khu vitere vikali viavo vi mikhono misatsa, khandi khu vitere viavo vi vilenje visatsa. Nalwo lwa Musa yamitsa masahi kali nikarikale mu tsimbeka tsiosi tsine tsiu vwaali. 25Musa yavukula shivana, shivana shiu musembe kwi limiiko, vivana viosi vili khu viungu viu munda, luveka lulahi lwi ingurumani, tsimbiko tsivili ni shivana shili khutsio, nende shilenje shinyuma shi limiiko. 26Musa yavukula shitonye shilala shiu mukati khurula mu muhinda kwi mikati chiali ni chialombwa vuchila mamela, chiakholwa khuva mitakatifu khu Mwami Nyasaye, mukati mulala kwalombwa na makura, nende shisukuti shilala; navikha ikulu wi shivana nende shilenje shinyuma shi limiiko. 27Musa yavukula vindu vienevo viosi navikha mu makhono ka Haruni nende vaana veve vi shiyayi. Yavukula naha Mwami Nyasaye khuli shihanwa. 28Nalwo lwa Musa yavukula vindu vienevo khurula khuvo nasambila khu vwaali, ikulu wi shihanwa shiu khusambwa, khuli shihanwa shiu khuvakhola khuva vasalisi. Yishi nashio shiali shihanwa shi shiukhulia, khandi mwayu kwahuunyanga khurula khushio kwa yaanzitsanga Mwami Nyasaye. 29Nalwo lwa Musa yavukula shiveele nahaana khuli shihanwa khu Mwami Nyasaye. Shiali shitonye shilala shia Musa shi limiiko, liu khukhola vandu khuva vasalisi. Musa yakhola shia shindu shiosi khuli Mwami Nyasaye yali namuvoolele akhole.
30Musa yavukula makura mati khu makura ku mundu avekhwangwa khwirecheshitswa khu muhinzilu nende masahi mati khurula khu vwaali, nakamitsa khu Haruni nende khu tsinguvu tsietsie, khandi khu vaana veve vi shiyayi nende khu tsinguvu tsiavo. Munjila yeneyo, Musa yakhola Haruni nende vaana veve vi shiyayi khuva vatakatifu khu Mwami Nyasaye halala ni tsinguvu tsiavo.
31Musa yavoolela Haruni nende vaana veve vi shiyayi, “Hili inyama mu vwinjililu vwi Liheemo Litakatifu, nu khuteekha inyama yeneyo. Muliitsa khuchinyanyila hawenaho, mikati chili mu muhinda kwi vihanwa viu khukhola vandu khuva vasalisi, khuli Mwami Nyasaye yali navooli. 32Muliitsa khusamba nu mulilu shia shindu shiosi shiliitsa khuva nishirikale khu tsinyama inoho khu mikati. 33Muliitsa khutsililila khumenya khumatukhu saba mu vwinjililu vwi Liheemo Litakatifu, khutukha lwa milukha chienyu chiu khukholwa khuva vasalisi chiliitsa khuvwa. 34Mwami Nyasaye yakhuvoolela khukhole ka khukholi nunundi, khumusemeha khurula mu vwoni vwenyu. 35Muliitsa khutsililila khumenya khumatukhu saba mu vwinjililu vwi Liheemo Litakatifu vutukhu nu mbasu, numukholanga ku Mwami Nyasaye yavoola mukhole, muvuli khukhutsa; shichila nako ku Mwami Nyasaye yavoola kakholwi.” 36Haruni nende vaana veve vakhola shia shindu shiosi, shiu Mwami Nyasaye yali navoolele Musa vakhole.
Currently Selected:
LEVI 8: LLLCATHOLIC
Highlight
Share
Compare
Copy
Want to have your highlights saved across all your devices? Sign up or sign in
© The Bible Society of Kenya, 2013