LEVI 9
9
Haruni nende vaana veve Vakhola Misango
1Khulitukhu lialondanga litukhu li milukha chiu khukhola vandu khuva vasalisi, chiali nichivwele, Musa yalaanga halala Haruni nende vaana veve, halala na vimilili va Vaisraeli. 2Musa yavoolela Haruni, “Vukula shihunwa nende limiiko, vuchila imbala yosi; ma uhaane khu Mwami Nyasaye. Shihunwa nashio shiliitsa khuva shihanwa shiu khurulitsaho vwoni, khandi limiiko liliitsa khuva shihanwa shiu khusambwa. 3Uliitsa khuvoolela Vaisraeli, ‘Vukuli imbuli ikhole yi shihanwa shiu khurulitsaho vwoni, nende shimoli shiu muhika mulala nende likondi limiiko, liu muhika mulala vuchila imbala yosi, khuli shihanwa shiu khusambwa, 4nende shihunwa nende limiiko, li shihanwa shiu khulera milembe. Valiitsa khukholela Mwami Nyasaye, musango kwi shihanwa shi imu ya tsukanywa makura. Valiitsa khukhola kenako, shichila Mwami Nyasaye atsitsanga khulolekha khuvo nunundi.’ ”
5Valera shia shindu shiosi imbeli wi Liheemo Litakatifu shia Musa yali navooli valere. Vaisraeli voosi vivunjelitsa havundu henaho khusaala khu Mwami Nyasaye. 6Musa yavoola, “Yaka nako koosi ku Mwami Nyasaye avooli mukhole, khu vukhumi vwevwe vuloleshele munyi.” 7Nalwo lwa Musa yavoolela Haruni, “Simukha utsi himbi khu vwaali, uhaane shihanwa shiu khurulitsaho vwoni nende shihanwa shiu khusambwa khusemeha khurula mu vwoni vwo vwo, nende vwoni vwa vandu vandi. Muliitsa khuhaana shihanwa shiu khusemeha vandu khurula mu vwoni, khuli Mwami Nyasaye yali navooli ukhole.”
8Haruni yasimukha natsia himbi khu vwaali, nasinza shimoli shinunwa khuli shihanwa shiu khurulitsaho vwoni vwevwe. 9Vaana veve vi shiyayi vamulerela masahi, niyinikha shitere shieshie mu masahi kenako, navekha masahi malala khu misala chiasinjilitswa ikulu mu tsimbeka tsiu vwaali. Yasuundula masahi kali nikarikale khu vwalilu vu vwaali. 10Navutswa Haruni yasambila khu vwaali shivana, tsimbiko, nende luveka lulahi lwi ingurumani, khuli Mwami Nyasaye, yali navoolele Musa akhole. 11Navutswa Haruni yasambila inyama nende liseelo ihale wene, khurula mu maheemo ka vandu vamenyamu.
12Haruni yasinza muruku kwali kwi shihanwa shiu khusambwa shieshie mwene. Vaana veve vayayi vamulerela masahi, nakamitsa mu tsimbeka tsiosi tsine tsiu vwaali. 13Vamuha khandi murwi nende vitonye vindi viu muruku kwenoko, navisambila khu vwaali khuli shihanwa shiu khusambwa. 14Haruni yochitsa na matsi viungu viu munda nende vilenje vinyuma, navisambila khu vwaali ikulu wi shihanwa shiu khusambwa.
15Nalwo lwa Haruni yalera shihanwa shia vandu venyanga khuhaana. Yavukula imbuli yi shihanwa shiu khurulitsaho vwoni vwa vandu, nachisinza khandi nahaana khuli shihanwa shiu khurulitsaho vwoni, khuli yali nakholele shihanwa shiali shiukhuraanga yeshio. 16Haruni yalera khandi muruku kwi shihanwa shiu khusambwa, nashihaana khulondokhana khuli kenyekhanga. 17Yalera khandi shihanwa shi imu, navukula khu lukhovi, nasambila khu vwaali, khumeeta khu shihanwa shiu khusambwa, shiali shiu mu mavwevwe. 18Haruni yasinza shihunwa nende limiiko, khuli shihanwa shiu khulera milembe. Vaana veve vi shiyayi vamulerela masahi, nakamitsa mu tsimbeka tsiosi tsiu vwaali. 19Vavikha vitonye vi shivana shi shihunwa shienesho nende limiiko lienelo, 20ikulu wi tsimbele tsi miruku, nahila viosi khu vwaali. Yasambila shivana shienesho khu vwaali; 21khandi nahaana tsimbele nende vilenje vinyuma visatsa vi miruku, khuli shihanwa shilahi khu Mwami Nyasaye, shichila vasalisi, khulondokhana khuli Musa yali namuvoolele akhole.
22Lwa Haruni yali namali khukhola misango chiosi, yachinguula makhono keke khu vandu navakasitsa. Yaka kikholekha, namali khukhola musango kwi shihanwa shiu khurulitsaho vwoni, shihanwa shiu khusambwa nende shihanwa shiu khulera milembe. 23Musa nende Haruni vasimukha nivatsia khwinjila mu Liheemo Litakatifu. Lwa vali nivakhitsa ilwanyi, vakasitsa vandu; ma vukhumi vu Mwami Nyasaye, nuvulolekha khu vandu voosi. 24Nonoho lwa Mwami Nyasaye yaruma mulilu, nu kulaalitsa shihanwa shiu khusambwa nende vitonye vi vivana, viali nivili khu vwaali. Lwa vandu valola mulilu kwenoko, voosi valaanjilila nu vuyaanzi, nivakwa hasi mahunama.
Currently Selected:
LEVI 9: LLLCATHOLIC
Highlight
Share
Compare
Copy
Want to have your highlights saved across all your devices? Sign up or sign in
© The Bible Society of Kenya, 2013