LIVALITSWA 2
2
Khuli Vandu vi Tsimbia tsia Israeli Vamenya mu Maheemo
1Mwami Nyasaye yavoolela Musa nende Haruni, 2“Lwa Vaisraeli valiitsa khusimiikha maheemo ku khumenyamu, shia mulala aliitsa khumenya mu maheemo, kalondokhananga na vandu vuluhia lwelwe, khandi ni ipendera yi inzu yeye yarulamu mwene. Maheemo ku khumenyamu kenako, kaliitsa khumbakhwa khundulu khwi Liheemo Litakatifu liosi.
3“Vandu vamenyanga khuluveka luli ivukwi wi Liheemo Litakatifu, wa liuva liliitsa khuva nilirulilanga valiitsa khuva vandu vuluhia lwa Yuda, khulondokhana khu ipendera yavo. Mwimilili wa vandu venavo, yali Nahashoni mwana wa Aminadabu. 4Vandu vuluhia lwelwe, vali tsiheelefu makhomi saba na vane ni tsimia sita. 5Vandu vuluhia lwa Isakari, valiitsa khumenya himbi khuvo. Mwimilili wavo yali Netsaneli mwana wa Zuhari. 6Vandu vuluhia lwelwe, vali tsiheelefu makhomi karanu na vane ni tsimia tsine. 7Vandu vuluhia lwalondakhu, lwali lwa Zabuloni; mwimilili wavo yali Eliabu mwana wa Heloni. 8Vandu vuluhia lwelwe, vali tsiheelefu makhomi karanu na saba ni tsimia tsine. 9Vandu voosi vahandikwa vamenyanga, havundu hali nihaheelwa vandu vuluhia lwa Yuda, khulondokhana khu lwivulu lwavo, vali tsiheelefu imia indala makhomi munane na sita ni tsimia tsine. Navo valiitsa khuva vu khuraanga khuraanga luchendo.
10“Vandu vuluhia lwa Rubeni, valiitsa khumenya khuluveka luli ikuvanda wi Liheemo Litakatifu, khulondokhana khu ipendera ya vandu vuluhia lwavo. Mwimilili wa vandu vuluhia lwa Rubeni, yali Elizuri mwana wa Shedehuri. 11Vandu vuluhia lwelwe vali tsiheelefu makhomi kane na sita ni tsimia tsiranu. 12Vandu vuluhia lwa Simioni, valiitsa khumenya mu maheemo himbi khuvo. Mwimilili wa vandu vuluhia lwa Simioni, yali Shelumieli, mwana wa Zurishadai. 13Vandu vuluhia lwelwe, vali tsiheelefu makhomi karanu na tisa ni tsimia tsivaka. 14Vandu vuluhia lwa Gadi, navo valondakhu. Mwimilili wavo yali Eliasafu, mwana wa Rehuhelu. 15Vandu vuluhia lwelwe, vali tsiheelefu makhomi kane na varanu ni tsimia sita na makhomi karanu. 16Vandu voosi vamenyanga mu maheemo ka vandu vuluhia lwa Rubeni, khulondokhana khu lwivulu lwavo, vali tsiheelefu imia indala makhomi karanu nu mulala tsimia tsine na makhomi karanu. Navo valiitsa khuva va khavili khuraanga luchendo lu khurulaho.
17“Lwa Liheemo Litakatifu liasuundiwangwa, havundu ha vandu vu lwivulu lwa Levi vamenyanga mu maheemo, hatsilililanga khuva hakari ha havundu ha vandu vi tsimbia tsindi, tsia Israeli vamenyanga. Varulaho khuli vali nivavoolwa vamenye, shia mulala havundu ha kenyekhanga ave nali, khulondokhana khu ipendera ya vandu vuluhia lwarulamu.
18“Vandu vuluhia lwa Efurahimu, valiitsa khumenya mu maheemo khuluveka luli imbo wi Liheemo Litakatifu, khulondokhana khu ipendera ya vandu vuluhia lwavo. Mwimilili wa vandu vuluhia lwa Efurahimu yali Elishama mwana wa Amihudi. 19Vandu vuluhia lwelwe vali tsiheelefu makhomi kane ni tsimia tsiranu. 20Vandu vuluhia lwa Manaase, valiitsa khumenya himbi khuvo. Mwimilili wa vandu vuluhia lwa Manaase, yali Gamalieli mwana wa Pedahuzuri. 21Vandu vuluhia lwelwe, vali tsiheelefu makhomi kavaka na vavili. 22Vandu vuluhia lwa Benyamini, navo valondakhu. Mwimilili wavo, yali Abidani mwana wa Gidioni. 23Vandu vuluhia lwelwe, vali tsiheelefu makhomi kavaka na varanu ni tsimia tsine. 24Vandu voosi vamenyanga mu maheemo, kali nikaheelwa vandu vuluhia lwa Efurahimu, khulondokhana khu tsinzu nende tsinzivulu tsiavo vali tsiheelefu imia indala makhomi munane ni imia indala. Navo valiitsa khuva vakhavaka khuraanga luchendo lu khurulaho.
25“Vandu vuluhia lwa Dani, valiitsa khumenya khuluveka luli ivuluka wi Liheemo Litakatifu, khulondokhana khu ipendera ya vandu vuluhia lwavo. Mwimilili wa vandu vuluhia lwa Dani, yali Ahihezeri mwana wa Amishadai. 26Vandu vuluhia lwelwe, vali tsiheelefu makhomi sita na vavili ni tsimia saba. 27Vandu vuluhia lwa Asheri, navo valondakhu. Mwimilili wa vandu vuluhia lwa Asheri, yali Pagiheli mwana wa Okurani. 28Vandu vuluhia lwelwe, vali tsiheelefu makhomi kane nu mulala ni tsimia tsiranu. 29Vandu vuluhia lwa Nafutali, navo valondakhu. Mwimilili wa vandu vuluhia lwenolo yali Ahira mwana wa Enani. 30Vandu vuluhia lwelwe vali tsiheelefu makhomi karanu na vavaka ni tsimia tsine. 31Vandu voosi vamenyanga mu maheemo ka vandu vuluhia lwa Dani, vali tsiheelefu imia indala makhomi karanu na saba ni tsimia sita. Navo valiitsa khuva vukhumalilikha khuraanga luchendo lu khurulaho, khulondokhana khu ipendera ya vandu vuluhia lwavo.”
32Vaisraeli voosi vavalitswa, khulondokhana khu tsinzivulu tsiavo, voosi vali tsiheelefu tsimia sita na vavaka tsimia tsiranu na makhomi karanu. 33Navutswa vandu vu lwivulu lwa Levi, valekhwa khuvalitswakhu halala na Vaisraeli vandi, khuli Mwami Nyasaye yali navoolele Musa.
34Nalwo lwa Vaisraeli vakhola shia shindu shiosi, shiu Mwami Nyasaye yali navoolele Musa vakhole. Vamenya mu maheemo, shia luhia khulondokhana khu ipendera yavo, nivaroonjela khurulaho, shia mulala mu vandu vu lwivulu lwelwe.
Currently Selected:
LIVALITSWA 2: LLLCATHOLIC
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013
