Mar 3
3
Jesû kworia muntû waarî na njara împonju
(Mat 12.9-14; Luk 6.6-11)
1Rîu Jesû arakûrûka kîromberoone kaîrî na areethîra muntû waarî na njara împonju ku. 2Antû bamwe barîa baarî kîromberoone nî baacwaga ûntû bwa kûthitangîra Jesû. Tontû bûû, nî baakarîre beeteerete boona këethîra Jesû akooria muntû ûu ntukû ya sabatû. 3Jesû nî eerîre muntû ûu, “Njû aja.” 4Rîu arabooria atîrî, “Waatho bwîtîkîîrîtie muntû athithia atîa ntukû ya sabatû? Bûrîtîkîîria muntû ateethia bangî kana athithia untû bûbûthûûku? Nî bûgwîtîkîîria muntû ateethua atîgakue kana bûriuga atiganîîrue akue?” Îndî bo barakira ki. 5Rîu Jesû arabakûûrîra meetho athûûri na aigîtue bûbûûî nîûntû bwa ûrîa baarî na nkoro injûmû. Nyumeene areera muntû ûu, “Tambûrûkia njara yaaku!” Nawe aratambûrûkia njara na îrabua. 6Afarisayo baraumagara oome, na baraireba ntûti na antû barîa baagwataga Herode mbaru, ûrîa bakamûûragithia.
Jesû kwarîria ntundu înene rûteere rwa îria
7Jesû na aritwa baawe nî baaumîre arîa baarî na bareeta rûteere rwa îria. Ntundu înene nî yaamûthingatîre yuumîte Galili na Judea, 8na Jerusalemu, na Idumea, na kuuma rwongo rwa mûuro jwa Jorodani, na bangî kuuma Tiro na Sidoni. Ntundu îîu yonthe yeetîre kîrî Jesû nîûntû bwa mantû jarîa baigîtue nî aathithîtie. 9#Mar 4.1; Luk 5.1-3 Jesû nî eerîre aritwa baawe barete gîtarû akuî nawe nîkenda atîkeeje gûkinyangwa nî antû. 10Nîkwîthîrwa nî aarî akwooria antû babaingî, barîa baajîtue nî baatîkanaga bakîenda kûmûringithia.
11Antû barîa baarî na roho inthûûku bakûmwona, nî bairingîre nthî mbere yaawe bagîkayaga na kajû gakanene bakiugaga, “Gwe ûrî Mûtaana wa Mûrungu!” 12Îndî Jesû arabakaania na inya batîkamûmenyithanie kîrî antû.
Jesû kûthuura atûmwa îkûmi na baîrî
(Mat 10.1-4; Luk 6.12-16)
13Jesû nî aitîrie kîrîmeene na areeta antû barîa eendaga gwîta, nabo bareeta kîrî we. 14Rîu arathuura antû îkûmi na baîrî barîa bagakaraga nawe na agatûmaga gwîta gûtûmîîria 15barî na inya ya kwînga roho inthûûku. 16Bau îkûmi na baîrî baathuurîrwe nîbo baba: Simioni ûrîa Jesû eetîre Peterû, 17na Jakubu na Johana, ataana ba Zebedii, barîa Jesû eetîre Boanerigesi, ûu nî kuuga “Ataana ba ngorogoro.” 18Bangî nî Anderea na Filipû na Batholomeo na Mathayo na Toma na Jakubu mûtaana wa Alifayo, na Thadeo na Simioni wa kuuma Kanaani, 19na Judasi Iskarioti, ûrîa waakunyanîîre Jesû.
Jesû na Beelizebuli
(Mat 12.22-32; Luk 11.14-23; 12.10)
20Rîu Jesû araana nja. Antû babaingî baroothûrana au kaîrî mwanka Jesû na aritwa baawe baraaga kaanya ga kûrîa. 21Rîrîa antû ba nja yaao baigîrue ûntû bûu, bareeta kûmûgîîra nîûntû antû baugaga “Arî na nthû.”
22 #
Mat 9.34; 10.25 Aritani ba Waatho barîa baumîte Jerusalemu nî baugîre, “Beelizebuli nî atonyete ndeene yaawe na ningî nîwe ûmweejaga inya ya kwînga roho inthûûku.” 23Tontû bûû, arabeeta na arabaarîria na ngerekano arabeera, “Nîatîa Nkoma oomba kwînga Nkoma? 24Ûnene bûkëethîrwa bwathûkeene ikundi ikundi bikirûjaga, ûnene bûu bûtîûmba gûtûûra. 25Kinya mûciî jûkeethîrwa jwathûkeene na jûkîrûjaga jungwa, mûciî jûu jûtîûmba gûtûûra îndî nîka jûthiraga. 26Tontû bûû, ûnene bwa Nkoma bûkëethîrwa bûgaûkeene ikundi ikundi bûtîûmba gûtûûra îndî nîka bûkathira.
27“Gûtî muntû ûûmba kûûna nyomba ya muntû ûrî na inya na ajûkia into biaawe, tiga aambe amûtheeke, rîu amûtuunye into. 28Ndîbwîra na mma atî antû bakarekerwa meeyia jaao na kinya irumi birîa barumîte Mûrungu.
29 #
Luk 12.10
“Îndî ûrîa ûkaruma Roho Ûmûtheru atîkororekerwa meeyia jau nîûntû nî ja kenya na kenya.” 30Jesû augîre ûu nîûntû antû nî baarî bakuuga, “Arî na roho înthûûku.”
Ataana ba ng'ina ba Jesû na ng'ina
(Mat 12.46-50; Luk 8.19-21)
31Ng'ina wa Jesû na ataana ba ng'ina ba Jesû barakinya na bararûngama oome baratûmana barauga atî nî bakwenda kûmwona. 32Antû barîa baakari nthî bamûthiûrûkîte baramwîra, “Nyakwe na ataana ba nyakwe nî barûngî oome bakîendaga gûkwona.” 33Jesû arabeera, “Chiaa na ataana ba chiaa nî barîkû?”
34Rîu Jesû aratega antû barîa baakari nthî bamûthiûrûkîte arauga, “Baba nîbo chiaa na ataana ba chiaa. 35O muntû wonthe ûrîa ûthithagia ûrîa Mûrungu eendaga, ûu nîwe mûtaana wa chiaa na mwarî wa chiaa na chiaa.”
Currently Selected:
Mar 3: KIMERUBIBLE
Highlight
Share
Copy
Want to have your highlights saved across all your devices? Sign up or sign in
KIMERU BIBLE WITH DC
©Bible Society of Kenya, 2009, 218
