Mar 4
4
Ngerekano ya mwaandi wa mbeeû
(Mat 13.1-9; Luk 8.4-8)
1 #
Luk 5.1-3
Jesû nî aambîrîrie kûritana kaîrî arî rûteere rwa îria rîa Galili. Antû babaingî mono nî boothûranîre au aarî mwanka kûraa atî no mwanka aitie gîtarûûne akare nthî ku. Nabo antû barakara mpwîroone cia îria. 2Nî aabaritanîre mantû jamaingî agîtumagîra ngerekano. Nî aabeerîre atîrî, 3“Thikîîreeni! Mwaandi nî eetîre kwaanda mbeeû. 4Akîminyaga mbeeû, imwe nî ciagwîre njîreene na irarîîwa nî nyoni. 5Ingî iragwa maigeene, gûntû gûtaarî na mûthetu jûmwingî. Mbeeû iu iraumanga ntûti nîûntû mûthetu jwaarî jûmûkai. 6Riûa rîkuuma nî cianyaarîre na nîûntû itaarî na mîri îmîraaja irooma. 7Mbeeû ingî iragwa gûntû kwaarî na matî jarî na miigua. Miigua îîu îrakûra na îraciinya, iraaga maciara. 8Ingî iragwa mûthetuune jûmûnoru, na irakûra na iraciara: imwe iraciara maita mîrongo îthatû, na ingî iraciara maita mîrongo intantatû, na ingî iraciara maita îgana.”
9Rîu Jesû arabeera atîrî, “Ûrîa ûrî na matû ja kwigua nî aigue.”
Gîtûmi kîa ngerekano
(Mat 13.10-17; Luk 8.9-10)
10Bamwe barîa baigîtue akîaria, amwe na barîa îkûmi na baîrî nî beetîre kîrî Jesû rîrîa aarî wenka, na baramûûria gîtûmi kîa ngerekano îîu. 11Nawe arabeera, “Buî nî bûmenyithîtue witho bwa Ûnene bwa Mûrungu, îndî bangî barîa barî oome bakaigagua mantû jonthe jakîritanwa na ngerekano, 12#Isa 6.9-10 nîkenda,
‘Batege,
îndî baremwe kûmenya,
bathikîîre,
îndî baremwe gûciûra.
Nîkwîthîrwa barîngîûmba kûmenya na bagaciûra, barîngîcokera Mûrungu na akabarekera.’”
Jesû kûbaciûrîra ngerekano ya mwaandi wa mbeeû
(Mat 13.18-23; Luk 8.11-15)
13Rîu Jesû arabooria, “Ka bûtîûmba gûciûra ngerekano îîu? Nîatîa îndî bûkoomba gûciûra ngerekano irîa ingî? 14Mwaandi aandaga rûteto rwa Mûrungu. 15Antû bamwe bakari ta mbeeû iria ciagwîre njîreene. Baigagua rûteto rwa Mûrungu na o rîo Nkoma akabatuunya rûteto rûrîa rûgûkarî rûkwaandwa ndeene yaao. 16Bangî bakari ta mbeeû irîa ciagwîre gûntû kwaarî maiga. Baigagua rûteto rwa Mûrungu, bakarwîtîkîîria o rîo bagwîrîtue, 17îndî rûtîrikaga ndeene yaao. Tontû bûû, boomagîria îgiita rîîkaî. Thîîna kana mîthangîko yaabeejîra nîûntû bwa gwîtîkia rûteto rûu bagatiga gwîtîkia ntûti. 18Antû bangî bakari ta mbeeû irîa ciagwîre kûrîa kwaarî na matî ja miigua. Baba baigagua rûteto 19îndî nîûntû bwa kwimakîra nthîgûrûûne îîjî, na kwenda ûtonga na mairîrîîria ja mîthemba yonthe, jakabatonya jakaiinya rûteto rûu bakaaga maciara. 20Îndî antû bangî bakari ta mbeeû irîa ciagwîre mûthetuune jûmûnoru. Baigagua rûteto na rûkarika nkoroone ciaao na bagaciara maciara: bamwe bagaciara maita mîrongo îthatû, bangî bagaciara maita mîrongo îtantatû, na bangî maita îgana.”
Tawa îkunîkîri na mpakûri
(Luk 8.16-18)
21 #
Mat 5.15; Luk 11.33 Jesû areeta na mbere kûbeera, “Ka kûrî ûgwatagia taawa na amîkunîkîra na mpakûri kana amîîka rungu rwa gîtanda? Teeka îrîîkagîîrwa rûtareene îgûrû? 22#Mat 10.26; Luk 12.2 Tontû bûû, gûtî gîntû kiithi gîtiithûrwa kana kîrî withoone gîtiumîrua weerûûne. 23Ûrîa ûrî na matû ja kwigua nî aigue!” 24#Mat 7.2; Luk 6.38 Kaîrî arabeera, “Rikieni mantû jarîa bûkwigua! Kîthimi kîrîa bûthimanagîra na kîo, nîkîo Mûrungu akabûthimîra nakîo na kinya nkûrûki. 25#Mat 13.12; 25.29; Luk 19.26 Ûrîa ûrî nabio akaewa bibingî; ûrîa ûtî nabio, kinya tûniini tûrîa arî natu agatunywa.”
Ngerekano ya mbeeû îgûkûra
26Jesû areeta na mbere kuuga, “Ûnene bwa Mûrungu bûkari ta muntû waandîte mbeeû muundeene jwaawe. 27Amamaga ûtukû na mûthenya agatinda kûrita ngûgî ciaawe, na îgiita rîu rîonthe mbeeû nîka îkuuma na gûkûra, na atîîthagîrwa akîmenyaga ûrîa îgûkûra. 28Nî mûthetu jûtûmaga mbeeû yuuma na îgîa mabûûra na îraa na mûthieene îciara mpîndî. 29#Joe 3.13 Kîmera gîakûra, muntû ûu nî ajûkagia gachiû kaawe ageeta gûketha, nîûntû îgiita rîa gûketha rîgûkinya.”
Ngerekano ya mpîndî ya mûthandûkû
(Mat 13.31-32,34; Luk 13.18-19)
30Jesû arauga, “Nîmbi tûûmba kûng'uanania na Ûnene bwa Mûrungu? Nî ngerekano îrîkû tûûmba gûtumîra kwonania ûrîa bûkari? 31Bûkari ta mpîndî ya mûthandûkû îrîa muntû ajûkagia akaanda. Mpîndî îîu nîyo niini buru nkûrûki ya mpîndî cia mîtî îngî yonthe. 32Îndî yaandwa îkauma îkaa mûtî jûmûnene nkûrûki na mîtî îngî yonthe. Mpang'i ciaaju nî ineneaga na nyoni igaaka biuru ku.”
33Jesû nî aabaritanîre rûteto agîtumagîra ngerekano inyingî, irîa boombaga kûmenya. 34Gûtî rîo aarîria antû atî gûtumîra ngerekano. Îndî nî aaciûragîra aritwa baawe ûritani bwa ngerekano iu rîrîa barî bonka.
Jesû gûkaania kîbubani kuurutana
(Mat 8.23-27; Luk 8.22-25)
35Ûgoro bwa ntukû îîu, Jesû nî eerîre aritwa baawe, “Tuuneni îria, twîte rwongo rûrîa rûngî.” 36Rîu baratiga antû bangî na baraitia gîtarûûne kîrîa Jesû aarî bareetania nawe. Itarû bingî nî biabathingatîre. 37Ruuo rûrûnene rûraambîria kurutana na mîgombe ya rûûjî îraringa gîtarû na kîrambîrîria kûûjûra rûûjî. 38Jesû nî aarî mûthieene jwa nyuma jwa gîtarû amamîrîte pilû. Aritwa nî baamûkîrie baramwîra, “Mûritani, ka ûtîkûmaka tûrî akuî gûkua?” 39Jesû ararûngama na aragondokera ruuo na areera îria, “Kira! Rîkîria!” Rîu ruuo na mîgombe birakira na kûragea na ûkiri bûbûnene. 40Rîu Jesû arooria aritwa baawe, “Nîkî bûgûkîra? Ka bûtî na wîtîkio?” 41Baramaka mono na baroorania, “Ka ûjû arî ûû ûkwathîkîrwa kinya nî îria na ruuo?”
Currently Selected:
Mar 4: KIMERUBIBLE
Highlight
Share
Copy
Want to have your highlights saved across all your devices? Sign up or sign in
KIMERU BIBLE WITH DC
©Bible Society of Kenya, 2009, 218
