Mar 9
9
1Jesû areeta na mbere kûbeera, “Ndîbwîra na mma atî kûrî bamwe barûngi aja batîkua mbere ya boona Ûnene bwa Mûrungu bûgîkinya bûrî na inya.”
Kûgarûka kwa Jesû
(Mat 17.1-13; Luk 9.28-36)
2 #
2Pet 1.17-18
Nyuma ya ntukû ithanthatû, Jesû nî eetîre Peterû na Jakubu na Johana, na araitia nabo kîrîmeene gîkîraaja. Bamûtegeete, aragarûka na 3nguû ciaawe iraa injerû cwee, ûntû gûtî muntû ûthambia nguû cierûa mûthemba ta jûu. 4Rîu Elija na Musa baraumîra na baraaranîria na Jesû. 5Peterû areera Jesû, “Mûritani, Bwabua mono tûgakara aja. Ga twaake tûgaanda tûthatû: kamwe gaaku, na kangî ka Musa na kangî ka Elija.” 6Peterû atamenyaga ûrîa akuuga nîûntû nî baamakîte mono. 7#Mat 3.17; Mar 1.11; Luk 3.22 Rîu îtu rîreenama rîrabathika na kajû karauma îtuune karauga, “Ûûjû nî Mûtaana waakwa ûrîa mpendeete, mûthikagîîreni.” 8O ntûti aritwa bau bakûraithîîria batoonere muntû ûngî arî nabo tiga Jesû wenka.
9Beenamîte kuuma kîrîmeene, Jesû arabakaania arabeera, “Bûkéera muntû kinya ûrîkû mantû jarîa bwona mwanka rîrîa Mûtaana wa Muntû akariûka kuuma kîrî akuû.” 10Bareeka mantû jau nkoroone kinya këethîra nî booranagia bongwa atîrî, “Nîatîa agûtwîra rîrîa akuuga ‘Akariûka kuuma kîrî akuû?’”
11 #
Mal 4.5; Mat 11.14 Nî boorîrie Jesû atîrî, “Nîkî aritani ba Waatho baugaga atî no mwanka Elija aambe eeje mbere?” 12Nawe arabeera, “Elija no mwanka eeje nîkenda acokanîîria mantû jonthe. Îndî nîkî kwaandîki atî no mwanka Mûtaana wa Muntû amenwe na athaangîkue mono? 13Ndîbwîra atî, Elija nî eejîre na baramûthithîria jarîa jonthe beendaga kûmûthithîria, o ta ûrîa kwaandîki mantû jamwegiî.”
Jesû kworia mûtaana waarî na roho înthûûku
(Mat 17.14-21; Luk 9.37-43)
14Rîrîa baakinyîre kîrî aritwa bangî nî beethîîre aritani ba Waatho bagîkararanagia nabo na antû babaingî bathikîrîtie. 15Rîrîa antû bau baamwonere nî baamakîre mono na baroogîa kîrî we kûmûthagaana. 16Jesû arabooria, “Nî mantû jarîkû jau bûgûkararanagia?” 17Muntû ûmwe aramûcokeria, “Mûritani, nî ngûkûreterete mwana waakwa arî na roho înthûûku îrîa îtûmîte aremwa kwaria. 18O arîa îramûgwatîra nîka îmwarûkagia nthî, na akarita mûûjî na agakabakaba maîgo na mwîrî jûkoomagara ng'a. Nî mbîrîre aritwa baaku bamîînge îndî baremwa.”
19Jesû arabeera, “Buî bûrî nthukî yaagîte wîtîkio! Ka ngakara naabuî mwanka rî? Ngeteera bûmenya mantû mwanka rî? Ndetereni mwana ûu.” 20Baramwikia kîrî we. Roho îîu îkwona Jesû, îraringa mwana ûu nthî aragaragara na aragirîka akîritaga mûûjî. 21Jesû arooria îthe wa mwana ûu, “Mûtaana ûû atwîre akari ûû kuuma rî?” Nawe aracokia, “Kuuma arî ûmûnini. 22Magiita jamaingî roho îîu nthûûku nî mûgeraga mwankiine kana rûûjîîne nîkenda îmûûraga. Tontû bûû, këethîra woomba, twigîîrue kîaao na ûtûteethie!” 23Jesû aramwîra, “Këethîra woomba! Mantû jonthe nî joombîkaga kîrî muntû ûrîa wîîtîkagia.” 24O rîo îthe wa mwana ûu ararîra na kajû akiugaga, “Nî ngwîtîkia, nteethia ntige kûrega gwîtîkia.” 25Rîrîa Jesû oonere antû beetîte kîrî we na rwîro, nî aagondokeere roho îîu nthûûku aramîîra, “Gwe roho îrîa îtiigagua na îtîaragia, ndîkwîra uma kîrî mwana ûûjû na ûkorokûrûka kîrî we kaîrî!”
26Roho îîu îragandûka na kajû gakanene na îkiuma, îramûringa nthî na aragirîka. Mwana ûu aratigwa akari ta muntû ûmûkuû. Antû barauga “Nî akuîre.” 27Îndî Jesû aramûgwata njara na aramûkîîria na ararûngama.
28Jesû agûkûrûka nyomba, aritwa baawe baramûûria barî bonka, “Nîkî îndî tuî tûremerwe kûmîînga?” 29Nawe arabeera, “Gûtî kîo kîûmba kwînga roho ya mûthemba jûu tîga maromba akî.”
Jesû kwaria kaîrî mantû jegiî gîkuû kîaawe
(Mat 17.22-23; Luk 9.43-45)
30Jesû na aritwa baawe nî baaumîre au na barakûrûkîîra nthîgûrû ya Galili. Jesû ateendaga antû bamenya kûrîa aarî 31nîûntû aaritanaga aritwa baawe akîbeeraga, “Mûtaana wa Muntû nî akunyanîri na akanenkaîrwa kîrî barîa bakamûûraga. Îndî ooragwa, akariûka nyuma ya ntukû ithatû.” 32Aritwa bataaciûrîre gîtûmi gîa ûntû bûu na barakîra kûmûûria.
Ûrîa mûnene buru nkûrûki ya bangî
(Mat 18.1-5; Luk 9.46-48)
33Rîu bagûkinya Kaperinaumu baratonya nyomba na arabooria, “Nî mantû jarîkû bûgûkararanagia bûrî njîreene?” 34#Luk 22.24 Barakira ki, nîûntû barî njîreene nî baakararanagia bakîûranagia ûrîa mûnene buru kîrî bangî nûû. 35#Mat 20.26-27; 23.11; Mar 10.43-44; Luk 22.26 Jesû arakara nthî, na areeta bau îkûmi na baîrî arabeera, “Muntû akëenda kwaa wa mbere, no mwanka ae wa mûthia na atumîkîre bangî.” 36Rîu arajûkia kaana kaniini arakarûngîka gatîgatîîne kaao. Ningî arakagwata na arabeera, 37#Mat 10.40; Luk 10.16; Joh 13.20 “Ûrîa ûgwataga kaana ta gaka ûgeni nîûntû bwa riîtwa rîaakwa, nî ni agwataga ûgeni. Ûrîa ûngwataga ûgeni, tî ni agwataga ûgeni îndî nî ûrîa waantûmîre.”
Ûrîa ûtî ûthû naatuî tûrî kîmwe
(Luk 9.49-50)
38Johana aramwîra, “Mûritani, nî twonere muntû akîînga roho inthûûku agîtumagîra riîtwa rîaaku, naatuî twamûkaania nîûntû tî wa mûûrû jweetû.” 39Îndî Jesû arauga, “Bûkámûkaania, nîkwîthîrwa gûtî muntû ûringa biama agîtumagîra riîtwa rîaakwa, ûûmba kwaria mantû jamaaî jambegiî nyumeene. 40#Mat 12.30; Luk 11.23 Nîkwîthîrwa ûrîa ûtî ûthû naatuî nî wa mûûrû jweetû. 41#Mat 10.42 Ga nkûbwîra na mma muntû wonthe ûrîa ûkabûkundia gîkombe kîa rûûjî rwa kunyua nîûntû bûrî ba Kristû, nî mma atîaga îtuui rîaawe.”
Mûcaara jwa ûrîa ûgatûma ûngî eeyia
(Mat 18.6-9; Luk 17.1-2)
42“Muntû kinya ûrîkû ûrîa ûgatuma ûmwe wa baba baniini barîa bambîtîkîtie beeyia, bwabua akoogeerwa iiga rîa kîthii nkingo na akagerwa îrieene. 43#Mat 5.30 Këethîra njara yaaku îgaatûma wîyia, mîgiite! Nî kaaba ûkûrûke ûtûûroone bwa kenya na kenya ûrî na njara îmwe nkûrûki gwîta mwankiine jwa kenya na kenya, jûrîa jûtîoraga, ûrî na njara cio-ijîîrî. [ 44Kûu ing'inyo birîa bibarîjaga bitîkujaga na mwanki jwa kûu jûtîoraga kinya rî.]#9.44 Maandîko jamwe jatî na gîchunchî gîkî. 45Këethîra kûgûrû gwaaku gûgatûma wîyia, Kûgiite! Nî kaaba ûkûrûke ûtûûroone bwa kenya na kenya ûtî na kûgûrû kûmwe, nkûrûki ya gwîta mwankiine jwa kenya na kenya ûrî na magûrû jo-jaîrî. [ 46Kûu, ing'inyo birîa bibarîjaga bitîkujaga na mwanki jwa kûu jûtîoraga kinya rî.]#9.46 Maandîko jamwe jatî na gîchunchî gîkî. 47#Mat 5.29 Këethîra riitho rîaaku rîgatûma wîyîa, rîkûûre! Nî kaaba ûkûrûke Ûneneene bwa Mûrungu ûrî na riitho rîmwe nkûrûki ya kûgerwa mwankiine jwa kenya na kenya ûrî na meetho jo-jaîrî. 48#Isa 66.24 Kûu ing'inyo birîa bibarîjaga bitîkujaga na mwanki jwa kûu jûtîoraga kinya rî. 49Nîkwîthîrwa antû bonthe bakatherua na mwanki. 50#Mat 5.13; Luk 14.34-35 Chumbî nî înjega, îndî îkëeja kwaga mûchemo, nîatîa yûûmba gwîkîrwa mûchemo kaîrî? Karageni bûrî na mûchemo jwa chumbî ndeene yeenu, na bûtûûrage na thîîrî gatîgatîîne keenu.”
Currently Selected:
Mar 9: KIMERUBIBLE
Highlight
Share
Copy
Want to have your highlights saved across all your devices? Sign up or sign in
KIMERU BIBLE WITH DC
©Bible Society of Kenya, 2009, 218
