Mar 8
8
Jesû kûrera antû ngiri inya
(Mat 15.32-39)
1Kagiiteene o kau, antû babaingî nî boothûranîte na bataarî na gîntû giakûrîa. Jesû areeta aritwa baawe arabeera, 2“Nî nkwigîîrua antû baba kîaao nîûntû nî bakarîte naani ntukû ithatû na batî na biakûrîa. 3Nkëeja kûbeera baane na mpara boomba kûgirîkîra njîreene, nîûntû bamwe baao baaumîte kûraaja mono.”
4Aritwa baawe baramûcokeria, “Nîatîa muntû oomba kûnyiria antû baba bonthe na mîgaate na aja tûrî nî rwanda?” 5Nawe arabooria, “Bûrî na mîgaate îng'ana?” Nabo baramûcokeria, “Tûrî na mîgaate mûgwanja.”
6Areera antû bakare nthî na arajûkia mîgaate îîu mûgwanja, na aathiria gûcokeria Mûrungu nkaatho aramîng'enyûranga na aranenkera aritwa baawe bagaîra antû. Nabo baragaîra antû mîgaate îîu. 7Ningî nî baarî na tûkûyû tûtûkai. Jesû nî aatharimîre tûkûyû tûu na arauga tûgaîrwe antû. 8Antû bararîa baranyira. Rîu aritwa baroothûrania matigi ikabû mûgwanja. 9Barîa baarîîre baarî antû ta ngiri inya (4,000). 10Akwîra antû baane, na o rîo aratonya gîtarûûne amwe na aritwa baawe, areeta nthî ya Dalimanutha.
Afarisayo kuuria baringîrwe kîama
(Mat 12.38-42; 16.1-4)
11 #
Mat 12.38; Luk 11.16 Afarisayo nî beetîre kîrî Jesû na baraambîrîria gûkararania nawe bakîmwîraga abaringîre kîama kuuma îgûrû. Baathithagia ûu bakîendaga kûmûgeria. 12#Mat 12.39; Luk 11.29 Jesû araigua bûbûûî nkoroone, na arauga, “Nîmbi îgûtûma nthukî îîjî îcwaa kîama? Ndîbwîra na mma atî gûtî kîama antû ba nthukî îîjî bakoonua.” 13Rîu arauma kîrî bo na araitia gîtarûûne kaîrî, araambîrîria kuuna îria eeta rwongo rûrîa rûngî.
Jesû kwîra aritwa baawe baimenyere Afarisayo na Herode
(Mat 16.5-12)
14Aritwa nî baarî bakûûrîîrua gûkamata mîgaate. Tontû bûû, baarî na mûgaate jûmwe junka gîtarûûne. 15#Luk 12.1 Jesû arabeera, “Imenyagîreeni mûtheega jwa kwimbithia mûgaate jwa Afarisayo na jwa Herode.” 16Aritwa baraambîrîria kûringanîra nkaanja bongwa bakiugaga, “Ariuga ûu nîûntû tûtî na mîgaate.” 17Jesû akûmenya ûu baaciîraga arabeera, “Nîmbi îgûtûma buuga atî nî ûrîa bûtî na mîgaate? Bûtîraciûkîrwa kana bûmenya mwanka nandî? Ka nkoro cieenu itîûmba kûgwata noo mbi? 18#Jer 5.21; Ezek 12.2; Mar 4.12 Keeke! Bûrî na meetho na bûtîkwona? Bûrî na matû na bûtîkwigua? Ka bûtîkûririkana 19rîrîa ndaang'enyûrangîîre antû ngiri ithaano mîgaate îtaano? Nî ikabû bia matigi bing'ana bwothûranîrie?” Nabo baramwîra, “Nî ikabû îkûmi na biîrî.” 20“A rîrîa yaarî mîgaate mûgwanja kîrî antû ngiri inya, nî ikabû bia matigi bing'ana bwothûranîrie?” Nabo baramwîra, “Nî ikabû mûgwanja.” 21Tontû bûû arabeera, “Kinya rîu bûtîraciûkîrwa nî mantû?”
Jesû kworia mûtumuumu kûu Bethisaida
22Bagûkinya Bethisaida, antû nî baamûreteere muntû ûmwe waarî ntumuumu na baramwerenca amûringithie. 23Jesû aragwata muntû ûu njara na aramwikia oome ya ntûûra. Aramûtwîra mata meetho na aramûrîkîîra njara na aramûûria, “Kûrî gîntû ûkwona?” 24Muntû ûu aratega arauga, “Ndîona antû, îndî bakari ta mîtî îgwîtaîta.” 25Jesû aramûrîkîîra njara meetho kaîrî, nawe aratega kûnûû, na meetho jaawe jarabua na araambîrîria kwona into bionthe bwega. 26Jesû aramwîra aane kwaao na aramwîra, “Ûgácoka ntûûreene!”
Peterû kuuga atî Jesû nîwe Mesia
(Mat 16.13-20; Luk 9.18-21)
27Rîu Jesû na aritwa baawe bareeta ntûûreeene ya Kaisaria Filipi. Barî njîreene, Jesû arooria aritwa baawe atîrî, “Antû baugaga ûûni nî ni ûû?” 28#Mar 6.14-15; Luk 9.7-8 Nabo baramûcokeria, “Bamwe baugaga gwe ûrî Johana Mûbatithania, na bangî bakauga ûrî Elija, ningî bangî bakauga ûrî ûmwe wa iroria.” 29#Joh 6.68-69 Nawe arabooria, “A buî rî, buugaga ûûni ndî ûû?” Peterû aramûcokeria, “Gwe nîgwe Kristû.” 30Rîu Jesû arabeera, “Bûkéera muntû noo ûrîkû mantû jambegiî.”
Jesû kwaria mantû jegiî kûthangîkua na gûkua kwaawe
(Mat 16.21-28; Luk 9.22-27)
31Rîu Jesû araambîrîria kûritana aritwa baawe arabeera, “Mûtaana wa Muntû no mwanka athangîkue mono na aregwe nî akûrû atongeeria, na athînjîri-Mûrungu barîa anene, na aritani ba Mawaatho. Akooragwa, na nyuma ya ntukû ithatû akariûka.” 32Jesû nî aaugîre ûu carûrûkû. Tontû bûû, Peterû aramwikia rûteere na araambîrîria kûmwîra atî tî bûbwega kwaria mantû ta jau. 33Îndî Jesû aragarûka araraithîîria aritwa baawe na aragondokera Peterû aramwîra, “Uma akuî naani Nkoma! Mathûgaanio jaaku jatiumîte kîrî Mûrungu îndî ûrîthûgaania ta muntû tu.”
34 #
Mat 10.38; Luk 14.27 Rîu Jesû areeta antû bonthe amwe na aritwa baawe na arabeera, “Këethîra muntû nî akwenda kûnthingata, nî airege na akamate mûtharaba jwaawe na anthingate. 35#Mat 10.39; Luk 17.33; Joh 12.25 Nîkwîthîrwa ûrîa ûkenda kwonokia ûtûûro bwaawe akabûta. Îndî muntû ûrîa ûgata ûtûûro bwaawe nîûntû bwaakwa na nîûntû bwa Nteto Injega cia Mûrungu, akabwonokia.
36“Nî umithio bûrîkû muntû akoona, këethîra nthîgûrû yonthe îkaa yaawe îndî aage ûtûûro? 37Nîmbi muntû oomba gûkûrania ûtûûro bwaawe nayo? 38Muntû wonthe ûrîa ûkaigua nthoni nîûntû bwaakwa na aigue nthoni kûthingata nteto ciaakwa, nthukîîne îîjî ya antû batîkîraga Mûrungu na eeyia, kinya Mûtaana wa Muntû akaigua nthoni nîûntû bwa muntû ûu, rîrîa akeeja na araîka babatheru arî mwagoone jwa Îthe.”
Currently Selected:
Mar 8: KIMERUBIBLE
Highlight
Share
Copy
Want to have your highlights saved across all your devices? Sign up or sign in
KIMERU BIBLE WITH DC
©Bible Society of Kenya, 2009, 218
