Kuvayo 39

Bakora imyambaro y’abaherezi

1 # Kuv 28:2-5; 31:10; 35:19, 23, 25. Za nyuzi z’amasufe n’iz’ amashigisha n’izisa n’agahama bazijishamw’ imyambaro ijishitse neza yo kwambara mu gukora Ahēra, ni yo myambaro yejejwe yo kwambara Aroni, nk’uk’ Uhoraho yabariye Mose.

2 # Kuv 28:6-12. Besaleli ajishisha umwambaro witwa efodi intahe z’izahabu, n’ inyuzi z’amasufe, n’iz’ amashigisha, n’izisa n’agahama, n’izera derere nziza zihinzwe neza. 3Bacura amazahabu kugeza abaye uduhuhwa, badukebaguramw’intahe zo kujererenga mur’ izo nyuzi z’amasufe n’iz’amashigisha n’izisa n’agahama n’izera derere nziza, abahinga bavyo baba ari bo babikora. 4Bakora ibizāna vy’uwo mwambaro, babitēra kuri wo; babitēra ku nzāno zawo zompi. 5Umusipi ujishwe n’abahinga, ujishiwe kuri wo, wo kuwukenyeza, uba kimwe na wo, wajishwe nka wo; bawujishishije intahe z’izahabu n’inyuzi z’amasufe n’iz’ amashigisha n’izisa n’agahama n’ izera derere nziza zihinzwe neza, nk’uk’ Uhoraho yabariye Mose.

6Batunganya utubuyenge twitwa shohamu, baturumya mu tugenegene tw’izahabu, batwandikakw amazina y’abana ba Isirayeli mu buryo bgo guca amagarwe, nk’ abaca amagarwe ku kabuyenge ko kudoma ikimenyetso. 7Besaleli adutēra ahahera ku bitugu ku bizāna vya efodi, kugira ngo tubere Abisirayeli utubuyenge two kwibukwako, nk’uk’ Uhoraho yabariye Mose.

8 # Kuv 28:15-28. Ajishisha umupfuko wo kwambara mu gikiriza, abahinga bavyo baba ari bo babikora, nk’uko efodi yajishwe; bawujisha mu ntahe z’izahabu no mu nyuzi z’ amasufe n’iz’ amashigisha n’izisa n’agahama, n’izera derere nziza zihinzwe neza. 9Bawukora bawukubiranije, uringaniye impande zose; uburebure bgawo bgar’ itambge rimwe ry’intoke, n’ubgaguke bgawo bgar’ itambge rimwe nyene: war’ ukubiranije. 10Bawudombagizak’ utubuyenge mu mirongo ine: umurongo wa mbere war’ umurongo w’utwitwa odemu na pitida na bareketi; 11mu wa kabiri har’ utwitwa nofekina na safiro na yahalomu; 12mu wa gatatu har’ utwitwa leshemu na shevo na akilama; 13mu wa kane har’ utwitwa tarushishi na shohamu na yasipi; twagenda turumikwa mu tugenegene tw’izahabu. 14Utwo tubuyenge twanganya igitigiri n’amazina y’abana ba Isirayeli; twar’ icumi na tubiri, nk’ukw amazina yabo ar’ icumi n’abiri; twari tumeze nk’ utubuyenge two kudoma ibimenyetso, twagenda twandikwakw izina mu buryo bgo guca amagarwe, twar’ utw’ iyo miryango ukw ar’ icumi n’ibiri.

15Kur’ uwo mupfuko wo kwambara mu gikiriza bashirakw imigufu icuzwe mw izahabu iramuye, ikozwe nk’ imigozi itsivye. 16Bacura utugenegene tubiri mw izahabu, n’impeta zibiri z’izahabu nyene; izo mpeta zompi bazitera ku mitwe yawo yompi yo haruguru. 17Baraheza barumya iyo migufu yompi y’izahabu itsivye kur’ izo mpeta zompi zo ku mitwe y’uwo mupfuko wo ku gikiriza. 18Iyindi mitwe yompi y’ivyo bitsibo vy’ imigufu vyompi bayirumya kur’ utwo tugenegene twompi, bayitēra kuri vya bizāna vya efodi vyo ku bitugu, ku ruhande rw’imbere. 19Bacura izindi mpeta zibiri mw izahabu, bazitēra ku mitwe yompi yo hepfo y’uwo mupfuko wo ku gikiriza, ku mubuga wawo, ku ruhande rw’imbere ruhera kuri efodi. 20Bacura n’izindi mpeta zibiri mw izahabu, bazitēra ahahera imbere aho vya bizāna bibiri vya efodi vyo ku bitugu bitērewe, haruguru ya wa musipi wajishwe n’abahinga, wo gukenyeza efodi. 21Uwo mupfuko wo kwambara ku gikiriza bawufatanisha impeta zawo n’impeta zo kuri efodi akagozi ko mu nyuzi z’amasufe, kugira ng’ ugume kuri wa musipi wa efodi wajishwe n’abahinga, uwo mupfuko ngo woye gukūrwa kuri efodi, babigenjeje nk’uk’ Uhoraho yabariye Mose.

22 # Kuv 28:31-34. Kand’ umwinjiro wo kwambarirwako efodi Besaleli awujisha mu nyuzi z’amasufe gusa; 23asatura urwano muri wo hagati, nk’urw’ ikanzo y’icuma,#39:23 Ikanzo y’icuma: rāba Kuv 28:32. arutērakw akandi kajishano kameze nk’ umusōzo karukīkūje, kugira ngo ntiruze rucike. 24Ku mubuga w’uwo mwambaro bawutērak’ udusa n’amakomamanga dukozwe mu nyuzi z’amasufe n’iz’ amashigisha n’izisa n’agahama, n’izera derere zihinzwe neza. 25Bacura imidende mw izahabu iramuye, bayitēra hagati y’ayo makomamanga ku mubuga w’uwo mwambaro impande zose, babirobekeranije, 26iyo midende bayirobekeranya n’ayo makomamanga, bikīkūza umubuga w’uwo mwinjiro impande zose, uba uwo kwambarwa mu guhereza, nk’uk’ Uhoraho yabariye Mose.

27 # Kuv 28:39, 40, 42. Kandi bajishira Aroni n’ abana biwe amakanzo mu nyuzi zera derere nziza, 28bajisha n’ igitambara co kuzingīra mu mutwe mu nyuzi zera derere nziza, n’udukofero dushajije na two nyene mu nyuzi zera derere nziza, bo n’amabutura mu nyuzi zera derere nziza zihinzwe neza, 29n’ umukanda mu nyuzi zera derere nziza zihinzwe neza, no mu z’ amasufe n’iz’ amashigisha n’izisa n’agahama, wajererenzwekw amabara n’abahinga bavyo, nk’uk’ Uhoraho yabariye Mose.

30 # Kuv 28:36, 37. Maze bacura akabāte, ni co gitsibo cera, mw izahabu iramuye, bakandikakw amajambo mu buryo bgo guca amagarwe ku kabuyenge ko kudoma ikimenyetso, ngo YEREJWE UHORAHO. 31Bagapfundikakw akagozi ko mu nyuzi z’amasufe, ko kugafatisha hejuru kuri ca gitambara co kuzingīra mu mutwe, nk’uk’ Uhoraho yabariye Mose.

Bashīra Mose ivyo bahejeje gukora vyose

32 # Kuv 25:40. Uko ni ko barangije gukora ivy’ iryo hema vyose, ari ryo hema ry’ibonaniro; Abisirayeli bākoze vyose, nk’uk’ Uhoraho yabariye Mose: uko ni ko bābikoze.

33Bazanira Mose iryo hema ry’imbere, n’ihema ryo hejuru, n’ibintu vyaryo vyose, n’uturinda twaryo, n’imbaho zaryo, n’ ibiti vy’intumba vyaryo, n’inkingi zaryo, n’ibitereko vyo kuzirokezamwo, 34n’ico kurenza hejuru yaryo cakozwe mu nsāto z’amapfizi y’intama zazizwe mu gahama, n’ikindi co kurenza hejuru yaco cakozwe mu nsāto z’ ibikōko vyitwa tahashi,#39:34 Tahashi: rāba Kuv 25:5. n’igihuzu co gukingīra Ahēra cane; 35n’ isandugu y’Ibishinga intahe, n’ iminiho yayo, n’umutemere wo guhongerako; 36n’ameza, n’ ibintu vyayo vyose, n’imitsima y’ibiterekerwa; 37n’igiterekwakw amatara c’izahabu iramuye, n’ amatara yaco nyene, ari yo matara yo gushirwa kuri co, n’ibintu vyaco vyose, n’amavuta y’ayo matara; 38n’igicaniro cacuzwe mw izahabu, n’amavuta yo kurobanuza abahabga ibango n’imibavu itāmirana, n’igihuzu co gukinga ku muryango w’ihema; 39n’igicaniro cacuzwe mu miringa, n’ikintu caco c’insobane cacuzwe mu miringa nyene, n’iminiho yaco, n’ibintu vyaco vyose; n’ ikigārigāri, n’intebe yaco; 40n’ impuzu zo kubamba ngo zibe urugo, n’ibirimbi vyarwo, n’ibitereko vyo kubinegamwo, n’impuzu yo gukinga mw irembo ry’ urwo rugo, n’imigozi yarwo, n’ imambo zarwo, n’ibintu vyose vyo gukoresha mur’ iryo hema, ari ryo hema ry’ibonaniro; 41n’ imyambaro ijishitse neza yo kwambara mu gukora Ahēra, ni yo myambaro yejejwe yo kwambara Aroni umuherezi, n’imyambaro y’ abana biwe, yo kwambara mu gukora igikorwa c’ubuherezi. 42#Kuv 35:4, 10-19.Nk’uk’ Uhoraho yari yarabibariye Mose, Abisirayeli ni ko bābikoze vyose. 43Mose yitegereza ivyo bākoze vyose, asanga barabiroranije; nk’uk’ Uhoraho yari yaravuze, ni ko bābikoze: Mose arabahezagira.

Currently Selected:

Kuvayo 39: RUN1967

Highlight

Copy

Compare