CHISƆSI 'A SƆ MƆƐ NU 4
4
An na‑a Pita a Chu kuti wa ɔ, an fea Chɔn na
1Pita ni tun koɔ tena wan, an fea Chɔn na, mbɛ mɔɛ dɔ n na‑a, an‑na an tan. An mɔɛ chɛ n ni Chu n tɛ mɔɛ n fan na Yataa a, ni mɔɛ min ni ka Yataa 'a kata kun ma fɛn poesi n ya ɔ, a basan mɔɛ n na, an ni miin chee, an dɔ Sadusii #4:1 Sadusii mɔɛ n ni Chu mɔ kuun den fan na. Nyan tɔ wa ni an na. A yɛ to, an sɛsɛ ni mɔɛ n fan na, miin ni Chu n tɛ ɔ Yataa a. An danden ni koe miin na, an kaen fan ni Fayisii n ta ma. mɔɛ nu. 2An faa tɛ‑a wan Pita ma, an fea Chɔn na. Koe min na mu, an dɔ, an mbe mɔɛ n kan‑da, a si Chisɔsi kɔɔ sɔ koe ma, a ka saya ɔ. An dɔ, kan chɛ, ɛ a ɔ yian tena wan, mbɛ tea mu a a, mbɛ Yataa ɛ a ma wan mɔɛ ni a kɔɔ sɔ, a ka saya ɔ. 3Chɛ‑a a ma wan, an‑na an bia, mbɛ an‑na an sa pimbi chenɛ a, aan banda ɔ ka‑a. Koe min na mu, an na‑a an bia tee bea ma wan. 4Chɛɛ mɔɛ miin sɛsɛ na‑a Pita 'a sakana bai chɛ a min, a si Chisɔsi ma, an dan‑da wan a a. A sin, mɔ kaima miin gbɛɛ‑a an kai fa gbɛ Chisɔsi a, an danɛ ta‑a wan gbɛ wu duu ɔ.
5Banda ɔ ka‑a kɛn, Chu n kun ti nu, ni Chu n 'na gbakoo nu, an bɛ Chu n 'na sawa kan mɔɛ n na, an gbɛɛ bɛn‑da Chuusaɛn duu chɛ ɔ. 6An gbɛɛ bɛn‑da wan, an bɛ Chu n 'na tɛ mɔɛ wa a, Yataa tena. An tɛ mɔ wa chɛ tɔ ni Anasi.#4:6 A tima chɛ a, Anasi nii ma to Chu n 'na tɛ mɔ wa a, Yataa tena. Chɛɛ Kayafasi, min ni Anasi bian kai a, an gbu ni tɛ mɔ wa chɛ a. Chɛɛ Chu mɔɛ n ni basɔmaya be wan tun Anasi ma, an mbe a chee, an dɔ, an 'na tɛ mɔ wa. Kayafasi wɛɛ, Chɔn, ni Adɛsanda, a basan mɔɛ tɔɛ chɛ n na, miin bɛɛ na‑a bɔ an tɛ mɔ wa dambi chɛ ɔ, an bɛɛ ni wan nɔ, an bɛn dɔndɔ gbe chɛ ɔ. 7An‑na a ma wan Chisɔsi 'a sɔ mɔɛ chɛ n sɔ‑a an chen kɔɔ. Mbɛ an‑na an dɔ tisa, an dɔ te, “Wo ma‑a ka ma namaa chɛ‑a tachɛ chɛ? Gbasaya minan dɔ mu, wo‑a ko bonda chɛ ma? Nyɔn 'na gbasaya ɔ mu, wo‑a koe chɛ ma?”
8Yataa Nyina ni wan gbɛ Pita fɛ gban, min‑na a ma, a‑a a fɔ an ye, a ɔ, “Chɛnyɛ gbakoo n bɛ mansa n na, Isɔɛɛ mɔɛ n kun ma, 9wo e ka nn gbɛmbo tena wan bi, a si ko chɛndɛ ma, min ma‑a namaa chɛ a. Wo e nn dɔ tisa‑a, ni a baun‑da buɛ min dɔ. 10Nn mbe a ɔ yian‑da wan gbɛ wo a, a basan mɔɛ tɔɛ n gbɛɛ a Isɔɛɛ chɛnyɛ ɔ, kamin chɛ ɛ sɔ ɔ nɛ, mɔɛ min 'na gbasaya ɔ. Nasaɛti duu ɔ mɔɛ chɛ mu, Chisɔsi Chasi, wo‑a min gbangban kɔn gbengbandenɛ ma, mbɛ a fa‑a. Chɛɛ Yataa‑a Chisɔsi kɔɔ sɔ wan, a ka saya ɔ. An Chisɔsi Chasi chɛ 'a gbasaya ɔ mu kamin chɛ, wo e ka min yen tena, a‑a bauncha ma sɔn. 11Chisɔsi chɛ mu, Yataa 'a gboo‑a bai sa a si min ma, a ɔ,
‘Wo wan chen sɔ mɔɛ n na‑a ban senɛ min dɔ, wo ɔ, a ma nyin,
an gbu ma‑a gbɛ senɛ kuu ba wandi a, chenɛ gbu ko a.’
12Yataa‑a gbasaya be Chisɔsi dɔndɔ gbe an ma, a ma koe a mɔ gbu gbɛɛ ni bauncha ma sɔn. Yataa ma tɔ dɔ mende a bɔ ni to dunya chɛ ɔ, mmɔ ɛ min chee bauncha ma sɔn koe a, a fɔ dechee Chisɔsi dɔndɔ gbe.”
13Chu kuti wa chɛ a fii‑a wan, a ɔ yen koe a Pita an fea Chɔn na, an ni bai sa tena buɛ min dɔ yaagbɛa a. Kun ti chɛ n‑na a ɔ sɔn fan, mbɛ mɔ gbama gbama ni Pita n na, miin gbu nii ma gboo sɔn ba chɛ. A yɛ to, an‑na a ɔ sɔn fan to a tima chɛ a, mbɛ an ni wan tee Chisɔsi fɛ. 14Chɛɛ an da ɔ gbaa‑a wan, min‑na a ma, bai ɔ bai ma bɔ ni an da a a fɔ koe a, min ni mabɔ bai a. Koe min na mu, an‑na kamin chɛ yen fan, min na‑a baun, ɛ sɔ ɔ Pita tɔnfɛ, an fea Chɔn n na. 15Mbɛ Chu kuti wa chɛ, an‑na a fɔ, an dɔ, Pita ni an kafai, an fea Chɔn na. Mbɛ an‑na an nyɔn dɔ tisa, an dɔ te, 16“Mmɔ ɛ fen ma‑a mɔɛ chɛ n na? Mɔ ɔ mɔ min mbe Chuusaɛn duu ɔ, an‑na a ɔ sɔn fan, mɔɛ chɛ n‑na kamaya ko wa min ma ka. Mmɔ ee che a fɔ‑a, mbɛ an fan ma a ma ni. 17Chɛɛ min mbe a ma, an ma na a ma mɔ dɔ mende n ni a ɔ sɔn, mmɔ an na si gbau gbau. Mbɛ an ma bai kan kɔ kan sa to mɔɛ n tena, a si Chisɔsi chɛ ma.”
18Mbɛ an‑na Pita chee, an fea Chɔn na. Mbɛ an‑na a fɔ an ye, an dɔ, an ma bai ɔ bai sa to mɔ ɔ mɔ tena, a si Chisɔsi wakoe ma. A yɛ to, an dɔ, an ma mɔ ɔ mɔ kan to, a si Chisɔsi 'a wai n ma. 19Chɛɛ Pita an fea Chɔn na, an dɔ, “Wo wandi gbu, wo a fɔ wɛ, ni a ma bɛnden fan mu Yataa chen kɔɔ, nn ni nn too ma sɔ a ma, chɛ ma, ni nn mbe a ma sɔ wo wan ma. 20Koe min na mu, nn mbe ee che nn da a tɔn‑da koe n ma, nn fandi‑a koe miin dɔ yen, a yɛ to, nn too‑a miin na min.” 21Chɛ gbakɔ, Chu kuti wa chɛ, an‑na Pita n na si wan to gbau gbau, mbɛ an‑na an boo ka. Koe min na mu, mɔɛ n gbɛɛ ni wan Yataa tando‑a, koe chɛ ko a, min ma‑a ka. An fandi gbu kuti ɔ, an kuiɛ nii ma bɛn ni kaina dɔndɔɛ, a si ni an mbe an tɔɔ buɛ min dɔ. 22Kamin chɛ min baun‑da ka kamaya chia chɛ a, a suun sanɛ benden fan ni gbɛ san bi naanin ma.
Mɔɛ miin‑na an kai fa Chisɔsi a, an‑na samunɛ chɛ
23An‑na an boo ka kɛn dechee Pita a, an fea Chɔn na, an yɛ‑a wan an bɔɛ n tena. An‑na a ɔ yian fan an bɔɛ chɛ n na, Chu n tɛ mɔɛ nu Yataa a, an 'na mansa nu, an bɛ Chu gbakoo n na, an na‑a bai min fɔ an fan Pita n ye. 24Mɔɛ chɛ nu, miin na‑a an kai fa ka Chisɔsi a, an‑na bai chɛ n na min kɛn, mbɛ an gbɛɛ bun‑da samun‑da Yataa tena, kuiɛ a kanɛ ɔ. An dɔ, “Mansa Yataa, i wan‑na banda a dan, an fea duu gboo a, kɔ yii wɛɛ, a basan fen kɔ fen na, miin mbe an dɔ. 25I wan‑na a ma, nn bemba n ta bemba Defidi koɔ‑a. I 'a bɔi denɛ ni a a. Mbɛ a sin, Yataa Nyina na‑a bai don fan a da a, a fɔ koe a. A na‑a a fɔ wan i 'a gboo ɔ, a ɔ,
‘Mɔɛ tɔɛ n gbɛɛ dunya ɔ, miin ma Chu mɔ a, an faa ɛ tɛ‑a,
an mbe dɔbɛn yama chɛ‑a, a si Mansa Wa ma, ko ee bɔ‑a min dɔ.
Fen mu an mbe chɛ ma tena?
26Mbɛ dunya ɔ mansa n‑na an fandi ma bɛn,
mbɛ kun ti n na kan‑da kaina dɔndɔ, butuin chɛ koe a Mansa Yataa a,
an fea kunka mansa a, a‑a a boo sɔ min ma.’
27Tea gbu sin ko a, nɛ ni Chuusaɛn duu chɛ ɔ, an‑na an kun puin kaina, i 'a wai chɛ mɔɛ Chisɔsi Chasi ma, min mbe tenchen i ko a. I‑a i boo sɔ an ma kunka mansa a. Mansa Ɛdɔdi, ni Kɔfana Pɔnchɔsi Padeti, an bɛ an na‑a an kun puin chɛ chɛ, an bɛ mɔɛ chɛ n na miin ma Chu mɔ n na, a basan Isɔɛɛ mɔɛ n gbɛɛ a, ko yama ma koe a kunka mansa chɛ a. 28An na kan‑da wan kaina dɔndɔ, min mbe a ma, an ni koe chɛ n dɔ bɛn, miin dɔ bɛnden ni gbɛ i boo ɔ, yɔ i toen ni a a buɛ min dɔ. 29Sanche gbɛ Mansa Yataa, an 'na da chianɛ n ma fɛn, mbɛ i‑a gbasaya be nn ma. Nn fɛn mu i 'a wai chɛ mɔɛ n na, i ni a ma, nn ni faagbɛa ma sɔn. I 'a sakana bai chɛndɛ chɛ, a si Chisɔsi ma, nn ni kun a ɔ yian‑da mɔɛ n na. 30A ma mɔɛ n ni i 'a gbasaya ɔ yen, i 'a baun chɛ ɔ. Gbasaya be nn ma, nn ni kun a ma‑a, kamaya ko wa n ni ma, i 'a wai chɛ mɔɛ Chisɔsi tɔɛ ɔ, min mbe tenchen i ko a.”
31An ban‑da kɛn samunɛ chɛ‑a, an na sɔnden ni ka kaina, Yataa‑a a ma wan, nɔ ɔ samba‑a gbigbi. A sin, Yataa Nyina ni wan gbɛ an gbɛɛ fɛ gban. Mbɛ an‑na a kuu sɔ Yataa 'a sakana bai sa‑a, faagbɛa a.
Mɔɛ miin na‑a an kai fa Chisɔsi a, an‑na an nyɔn deman, boo fenɛ n dɔ
32Mɔɛ miin gbɛɛ na‑a an kai fa ka Chisɔsi a, an 'na yiinachii ni dɔndɔ gbe, an faa ma koe ni dɔndɔ gbe. Mɔ ɔ mɔ nii ma kankan ni a ta boo fenɛ kun ma, chɛɛ an boo fenɛ n ni boo fen dɔndɔɛ n fan na. An ni an boo fenɛ n be wan an nyɔn ma, yɔ an nyɔn ma gbɔsɔɛ ni ma buɛ min dɔ. 33Chisɔsi 'a sɔ mɔɛ chɛ n da a kuiɛ ni gbasa kaka, an ni koɔ wan mɔɛ n tena, a si Yataa‑a a ma buɛ min dɔ, Mansa Chisɔsi‑a a kɔɔ sɔ a ka saya ɔ. A sin, Yataa‑a mɔɛ chɛ n gbɛɛ dua wan, a sɛmbɛnden na, miin na‑a an kai fa Chisɔsi a. 34Fen kɔ fen ma gbɔsɔ ma mɔ ɔ mɔ bia ni an tɛ ɔ. Koe min na mu, duu gboo ni an fɛn gbɛɛ boo ɔ, a basan chenɛ n na, an ni an ma tachɛ wan, mbɛ an na‑a a kɔpɔɛ chɛ a, 35mbɛ an‑na a be Chisɔsi 'a sɔ mɔɛ chɛ n ma. An ni an kɔpɔɛ chɛ du wan mɔɛ chɛ n ma, miin na‑a an kai fa ka Chisɔsi a, yɔ mɔɛ ma gbɔsɔɛ ni ma buɛ min dɔ.
36A tɔmɔsi ni kamin dɔndɔ an na, min tɔ ni Chosɛfi. Chisɔsi 'a sɔ mɔɛ n ni an kamin chɛ chee, an dɔ, Banabasi, min fasaien ni, mɔɛ min mbe a bɔɛ n faa ma nande. A na‑a bɔ Difai dambi an dɔ. A sin na‑a suun Saipɔsi wan, yii tinɛ ɔ. 37A wɛɛ, a‑a a 'a duu gboo ma tachɛ wan. Mbɛ a na‑a an kɔpɔɛ chɛ a, mbɛ a‑a a konan Chisɔsi 'a sɔ mɔɛ chɛ n ma.
Currently Selected:
CHISƆSI 'A SƆ MƆƐ NU 4: KONONT
Highlight
Share
Copy
Want to have your highlights saved across all your devices? Sign up or sign in
New Testament in Kono © The Bible Society of Sierra Leone, 2006.
