CHISƆSI 'A SƆ MƆƐ NU 5
5
Ananiyasi‑a koe min ma, an fea a 'a musu Safiya a
1Chɛɛ kamin dɔndɔ dɔ gbɛɛ ni wan nɔ, min tɔ ni Ananiyasi. A 'a musu tɔ ni Safiya. A tima chɛ a, an bɛɛ‑a an 'na duu gboo ma tachɛ wan. 2Chɛɛ kamin chɛ n fea a 'a musu a, an‑na a ɔ bɛn fan kɔpɔɛ chɛ ɛnden ka koe a a ma, an fandi ko a. A ta‑a wan a tɔɛ chɛ a, mbɛ a‑a a konan Chisɔsi 'a sɔ mɔɛ chɛ n ma. 3Mbɛ Pita‑a a fɔ a ye, a ɔ, “Ananiyasi, fen‑na a ma i dɔn‑da Sitana kun‑da i yii ma, fania fɔ koe a Yataa Nyina ye? I 'a duu gboo sɔnkɔɛ gbɛɛ ma chɛ a, i‑a dɔ nun. 4I nii ma duu gboo chɛ ma tachɛ nin bɛ tima min na, i wan ta ni a a. I‑a a ma tachɛ kɛn, a kɔpɔɛ chɛ wɛɛ ni i ta an na, a sin, i ni kun fan i ni ko ɔ ko ma a a to, i faa ma a. Fen ko a mu, i‑a ko bonda chɛ ɔ bɛn i yii ma, a ma koe a? I ma fania chɛ fɔ ni, mɔ gbu n fan ye, chɛɛ i‑a a fɔ ka Yataa an ye.” 5Ananiyasi‑a bai chɛ a min kɛn, a ya kɔɔɛ a, a bea‑a, mbɛ a fa‑a. Mbɛ mɔɛ miin gbɛɛ‑a koe chɛ a min, an chian‑da wan a ɔ benden ba a. 6Mbɛ kamin tɔngbɔɛ dɔ nu, an na‑a, an‑na Ananiyasi su ma bɛn, mbɛ an ta‑a a a, an‑na a tɔn.
7Awa sawa benden gbakɔ, mbɛ Ananiyasi 'a musu Safiya don‑da an chen dɔndɔ gbe chɛ a, a chɛɛ fa‑a ka kaina. A nii ma a misi misi wɛɛ ɔ sɔn, koe min na‑a ma a chɛɛ a. 8Mbɛ Pita‑a a wɛɛ ɔ tisa, a ɔ, “A fɔ n ye tea a, ni kɔpɔɛ chɛ gbɛɛ an nii nɛ, wo‑a min ma sɔn, wo fea i chɛɛ a, kɛn wo 'a duu gboo chɛ ma tachɛ.”
Mbɛ a ɔ, “Tea gbu a, a kɔpɔɛ gbɛɛ gbu an nɛ.”
9Mbɛ Pita‑a a fɔ a wɛɛ ye, a ɔ, “Fen ko a mu wo fea i chɛɛ a, wo‑a wo yiima ɔ bɛn, Mansa Yataa Nyina ɔ siman koe a? Mɔɛ miin ta‑a i chɛɛ tɔn‑da, an yen ko sɔ ɔ chenɛ da a. An fan mbe ta‑a i wɛɛ tɔn‑da.” 10Mbɛ a ya kɔɔɛ a, musu chɛ wɛɛ bea‑a duu ma Pita chen kɔɔ, mbɛ a fa‑a. Mbɛ kamin tɔngbɔɛ chɛ n don‑da, mbɛ an‑na a wɛɛ faenɛ tan. Mbɛ an ta‑a a a, an‑na a tɔn a chɛɛ kaa a. 11Mbɛ chɛ ma‑a kɛn, mɔɛ miin gbɛɛ‑a an kai fa ka Chisɔsi a, ni mɔ dɔ mende nu, miin‑na koe chɛ a min, an gbɛɛ chian‑da wan a ɔ benden ba a.
Kamaya koe nu, miin mbe mɔ gbu da a fa
12Chisɔsi 'a sɔ mɔɛ chɛ n ni kamaya ko sɛsɛ ma wan mɔɛ chɛ n tɛ ɔ, min ni an da a fa gban. Mɔɛ chɛ n gbɛɛ, miin‑na an kai fa ka Chisɔsi a, an ni bɛn fan suun ma nyɔncha ɔ kaina dɔndɔ Yataa 'a kata ɔ, an ni min chee, an dɔ, Mansa Sɔɔmon 'na Pɛsa. 13Miin nii ma an kai fa ni ka Chisɔsi a, an faa nii gbɛa sa koe a an kaa a. Chɛɛ chɛ gbɛɛ ɔ, basɔmaya ni koo an boo ɔ mɔɛ chɛ n ko a, miin na‑a an kai fa ka Chisɔsi a. 14Chɛ gbɛɛ ɔ, mɔ kaima sɛsɛ, an bɛ musu sɛsɛ n na, an‑na an kai fa wan Mansa Chisɔsi a, mbɛ an sa‑a mɔɛ kɔma n kaa a. 15Chisɔsi 'a sɔ mɔɛ chɛ n ni kamaya koe sɛsɛ ma tena wan an tɛ ɔ. Chɛ‑a a ma wan, mɔ sɛsɛ n‑na an suun ma nyɔɛ n ya, miin gbandien ni, an na‑a an tena. An‑na gbandi mɔɛ chɛ dɔ n sa sofa ma wan, an‑na dɔ n sa waa ma chia tɔnfɛ. An‑na chɛ ma, min mbe a ma, ni Pita ma‑a ben‑da, a nininɛ wɛɛ ni che gbandi mɔɛ chɛ dɔ n ma. 16Mbɛ mɔ fanka fanka n na‑a wan, a ka duu chɛ n dɔ Chuusaɛn a tindanɛ. An ni kɛn na tena, an na‑a wan mɔɛ n na an boo a, miin gbandien ni, a yɛ to, ni nyina yama n ni miin fɛ. Chisɔsi 'a sɔ mɔɛ chɛ n‑na a ma wan, an gbɛɛ baun‑da.
Chisɔsi 'a sɔ mɔɛ n‑na mɔnɛ ɔ bia
17Mbɛ Chu n tɛ mɔ wa Yataa a, ni miin gbɛɛ ni a fɛ, miin ni Sadusii mɔɛ n na, an gbɛɛ too‑a wan yama yama Chisɔsi 'a sɔ mɔɛ chɛ n na. An gbɛɛ faa bɔ‑a wan. 18Mbɛ an‑na Chisɔsi 'a sɔ mɔɛ chɛ n bia, mbɛ an‑na an sa pimbi chenɛ a. 19Chɛɛ a yɛɛ chɛ ma, Mansa Yataa 'a maeka na‑a wan, mbɛ a‑a pimbi chen chɛ da gbɛɛ a ka gbasi. Mbɛ a‑a a ma, Chisɔsi 'a sɔ mɔɛ chɛ n bɔ‑a pimbi chen chɛ a. Mbɛ a‑a a fɔ an ye, a ɔ, 20“Wo ta Yataa 'a kata ɔ, mbɛ wo‑a bai sa mɔɛ n tena, a si fɔɛ nama chɛ ma.” 21Chisɔsi 'a sɔ mɔɛ chɛ n bɛɛ ma maeka chɛ da a kuiɛ yɔn ni. Mbɛ sau sau ma, an don‑da wan Yataa 'a kata chɛ ɔ, mbɛ an‑na a kuu sɔ mɔɛ n kan‑da.
Mbɛ Chu n tɛ mɔ wa Yataa a, an bɛ a bɔɛ n na, an‑na Chu kuti wa si kaina dɔndɔ, min mbe a ma, an ni bɛn ba bia. Mbɛ an bɛn‑da kɛn, an‑na mɔɛ a ta wan pimbi chen chɛ a, min mbe a ma, an ni na Chisɔsi 'a sɔ mɔɛ chɛ n na an chen kɔɔ. 22Chɛɛ poesi chɛ n che‑a kɛn pimbi chen chɛ a, an nii ma Chisɔsi 'a sɔ mɔɛ chɛ n tan ni nɔ. Mbɛ an yɛ‑a, an‑na a ɔ yian kun ti chɛ n na, an dɔ te, 23“Nn che‑a kɛn pimbi chen chɛ a, nn‑na a tan a da gbɛɛ a tɔndenɛ ɛ gban. Pimbi chen kun ma fɛn mɔɛ chɛ n gbɛɛ ni wan nɔ, an mbe an 'na wai chɛ‑a chen chɛ n da a. Chɛɛ nn‑na chen chɛ da chɛ n na ka kɛn, nn ma mɔ ɔ mɔ tan ni nɔ.” 24Chu n tɛ mɔɛ nu Yataa a, an 'na mansa nu, ni ya ɔ sɔɛ chɛ min ni Yataa 'a kata kun ma fɛn poesi chɛ n ya ɔ, bai chɛ‑a an na fii wan. An nii ma a ɔ sɔn, fen ma‑a Chisɔsi 'a sɔ mɔɛ chɛ n na. 25An to‑a chɛ an dɔ, mbɛ kamin dɔndɔ don‑da, mbɛ a‑a a fɔ an ye, a ɔ, “Wo wo too ma sɔ. Wo‑a mɔɛ miin sa pimbi chenɛ a, an yen ko sɔ ɔ Yataa 'a kata ɔ, an mbe mɔɛ n kan‑da.” 26Mbɛ a tima chɛ a gbɛ, ya ɔ sɔɛ chɛ, ni poesi miin ni a kɔɔ, an ta‑a Yataa 'a kata chɛ ɔ, mbɛ an na‑a Chisɔsi 'a sɔ mɔɛ chɛ n na. An nii ma gbasaya kan kɔ kan din ni an ma, na koe an na. Koe min na mu, an chianden fan ni, mbɛ ni an‑na gbasaya din an ma, mɔɛ n mbe an ma bon bon‑da wan.
27An na‑a wan Chisɔsi 'a sɔ mɔɛ chɛ n na. An na‑a kɛn an na, an ta‑a wan an na, Chu kuti wa chɛ bɛnden ni ka chenɛ min na. An toen ni, Chu n 'na tɛ mɔ wa Yataa tena, a ni an dɔ tisa. 28Mbɛ a‑a a fɔ an ye, a ɔ, “Nn‑na a ma din fan wo tena, mbɛ wo ma mɔɛ n kan to, a si Chisɔsi chɛ wakoe ma. Chɛɛ wo a ɔ yen, wo‑a koe min ma. Wo‑a a ma mɔɛ n gbɛɛ, miin mbe Chuusaɛn, an‑na a a min, wo‑a bai miin sa a si a ma. A sin, wo toen mu wo ni a fa koe dɛn nn fan na.”
29Chɛɛ Pita n bɛ Chisɔsi 'a sɔ mɔɛ tɔɛ chɛ n na, an‑na a fɔ wan mɔɛ chɛ n ye, an dɔ te, “A ma bɛnden mu nn ni Yataa faa ma koe an ma. Chɛɛ a ma din ni nn ma, nn ni mɔ gbu n fan faa ma koe n ma. 30Wo‑a a ma wan, Chisɔsi‑a mauma saya chɛ, kɛn wo‑a a gbangban kɔnɛ ma. Chɛɛ Yataa chɛ, nn bemba n ta bemba n ni min fai, an‑na a ma, a wan Chisɔsi chɛ‑a a kɔɔ sɔ a ka saya ɔ. 31Yataa‑a a a sɛ wan basɔmaya kaina chenama wa, a wan Yataa boo nyima ɔ. A‑a a ma wan to mansa a, ni mɔ gbu n baun mɔɛ a. Chɛ ni a ma, Isɔɛɛ mɔɛ n ni kun, an ya a mun koe ma Yataa ma, mbɛ Yataa‑a a boo bɔ an 'na ko yama n dɔ. 32Nn fan mu koe chɛ n gbɛɛ ma sii a. A yɛ to, Yataa Nyina wɛɛ, min mbe bea mɔɛ fɛ, miin mbe kooya be Yataa ma, sii mu to a wɛɛ a.”
33Chɛɛ Chu kuti wa chɛ‑a bai chɛ a min kɛn, Chisɔsi 'a sɔ mɔɛ chɛ n‑na min fɔ, an faa tɛ‑a wan aan. Chɛ‑a a ma wan, an‑na a ɔ bɛn an fa koe a. 34Chɛɛ kamin dɔndɔ ni wan nɔ, min tɔ ni Kamadiɛɛ. Fayisii mɔɛ ni, a sin, Chu n 'na sawa kan mɔɛ ni to a a. A sin to, mɔɛ n ni baa be wan a ma. An kamin chɛ‑a a kɔɔ sɔ wan, a sɔ‑a. Mbɛ a‑a a ma, an bɔ‑a Chisɔsi 'a sɔ mɔɛ chɛ n na baa ma, tima ɛnden ko a. 35Mbɛ a bɔɛ nu kuti wa chɛ ɔ, a‑a a fɔ an ye, a ɔ, “N bɔ Isɔɛɛ mɔɛ nu, wo wo kun ma fɛn koe chɛ n na, wo toen mu ka, wo ni min ma mɔɛ chɛ n na. 36Tima dɔndɔ a, kamin dɔndɔ ni wan nɔ, min tɔ ni Tudasi. A na‑a na wan, mbɛ a‑a a wandi yian, mbɛ mɔ chenama mu a a. Mɔ chɛmɛ naanin nyɔn sima bea‑a wan a fɛ. Chɛɛ mɔɛ n‑na a fa wan, mbɛ a fɛ mɔɛ n gbɛɛ na fasan‑da a ɔ gbusɛ, mbɛ ko ɔ ko nii ma bɔ ni to chɛ gbakɔ. 37Chɛ gbakɔ, Chudasi, min ni Kadidi mɔɛ a, a wɛɛ na‑a wan mɔ dan tima a. A wɛɛ‑a a ma wan, mɔ sɛsɛ bea‑a a fɛ. Chɛɛ an‑na a wɛɛ fa wan, mbɛ a wɛɛ fɛ mɔɛ n gbɛɛ fasan‑da a ɔ gbusɛ. 38Mɔɛ chɛ n sin bakoe sanche, n mbe a fɔ tena wo ye, mbɛ wo ma ko ma gbaaen kan kɔ kan sa an ma. Wo an to nɔ yɛdɛn. Ni an 'na dɔbɛn chɛ mu mɔ gbu n 'na dɔbɛnɛ an na, ɛ bea‑a wan. 39Chɛɛ ni Yataa 'a dɔbɛnɛ an nɛ, mbɛ wo ee kun‑da wo ni a a bea. Wo e a ɔ yen‑da wan, mbɛ wo e ka butuinɛ chɛ‑a Yataa an na.”
Mbɛ Chu kuti wa chɛ ɔ mɔɛ n‑na an too ma sɔ Kamadiɛɛ 'a dasi chɛ ma. 40Mbɛ an‑na Chisɔsi 'a sɔ mɔɛ chɛ n chee, mbɛ an‑na a ma, an‑na an boan pien. Mbɛ an‑na an na si gbau gbau, an dɔ, an ma bai ɔ bai sa to mɔɛ n tena, a si Chisɔsi ma. An‑na an na si kɛn, mbɛ an‑na an boo ka. 41Chɛɛ an bu ɔ ni di wan, an mbe kɛn ka‑a Chu kuti wa chɛ ɔ. Koe min na mu, an‑na a ɔ sɔn fan, mbɛ Yataa‑a an ya mɔ chɛndɛ n na, mauma koe ɔ bia koe a Chisɔsi ko a. 42A sin, tee ɔ tee a, an nii ma sɛmbɛ ni bai sa koe a, a si Chisɔsi ma. An ni a sa wan Yataa 'a kata ɔ, a yɛ to, chenɛ n bɛɛ a, an ni kanɛ chɛ wan, an mbe ta‑a a ɔ yian‑da mɔɛ n na, mbɛ Chisɔsi an mu kunka mansa a.
Currently Selected:
CHISƆSI 'A SƆ MƆƐ NU 5: KONONT
Highlight
Share
Copy
Want to have your highlights saved across all your devices? Sign up or sign in
New Testament in Kono © The Bible Society of Sierra Leone, 2006.
