DUKU 9
9
Chisɔsi‑a a 'a sɔ mɔɛ n na ta Yataa bai sa tena, a basan mɔ baunɛ a
(Matiu 10:5-15; Maki 6:7-13)
1Mbɛ Chisɔsi‑a a 'a sɔ mɔ tan kun ma fea n chee a tena. Mbɛ a‑a gbasaya be an ma nyina yama n gbain koe a mɔɛ n fɛ, a basan mɔɛ n baun koe a an 'na gbandi n dɔ. 2Mbɛ a‑a an sɔ Yataa 'a mansaya ɔ yian koe a kan kɔ kan mɔɛ n na, a basan gbandi mɔɛ n baun koe a. 3A yɛ‑a wan to, mbɛ a‑a a fɔ an ye, a ɔ, “Ni wo ma‑a ta‑a, wo ma fen kɔ fen bia wo boo ɔ. Wo ma tungbɔɛ ya, wo ma basachi bia wo boo a, wo ma ta daun fenɛ a wo boo ɔ, wo ma ta kɔpɔ a, n mbe ee baa doma fea ya koe a. 4Ni an‑na wo yia chen kan kɔ kan na, wo ma an chen chɛ an na aan, wo ni bɔ an duu chɛ ɔ. 5Ni wo ta‑a duu kan kɔ kan dɔ, min dɔ mɔɛ n ma an too n ma sɔ ni wo ma, wo bɔ nɔ. Ni wo ma‑a bɔ‑a, wo wo chenɛ a gbɔngbɔn fifii chɛ a, min mbe ma‑a dasi a an tena, mbɛ an mbe ka a ma an na, Yataa faa ni tɛ an ma.”
6Chisɔsi ban‑da kɛn bai chɛ n fɔ‑a an ye, mbɛ an ta‑a, an ben ben‑da konko n gbɛɛ ɔ. An‑na sakana bai chɛndɛ chɛ ɔ yian fan mɔɛ n na, an mbe ta‑a mɔɛ n baun‑da, ni an che‑a kan kɔ kan.
Mansa Ɛdɔdi kɔndɔ fii‑a, a si Chisɔsi ma
(Matiu 14:1-12; Maki 6:14-29)
7Mansa Ɛdɔdi,#9:7 Mansa Ɛdɔdi Wa 'a denɛ dɔndɔ an nɛ, min tɔ ni Ɛdɔdi Andipasi. min ni Kadidi chɛnyɛ kun ma, a‑a koe chɛ n gbɛɛ a min, min ni ma tena gbɛ. A a fii‑a wan, koe min na mu, mɔɛ dɔ n ni wan a fɔ tena, mbɛ Chɔn, min ni yii chɛ mɔɛ n kunɛ ɔ, Yataa chia a, an yɛ‑a ka to fɔɛ ɔ. 8Mɔɛ dɔ n sin dɔ, Yataa 'a gbonka chɛ mɔ dɔndɔ an nɛ suun, min tɔ ni Idaicha, an bɔ‑a ka to. Mɔɛ dɔ n yɛ‑a, an dɔ, Yataa 'a gbonka chɛ mɔɛ dɔ gbɛɛ suun, an yɛ‑a ka to fɔɛ ɔ. 9Mbɛ Mansa Ɛdɔdi ɔ, “N na‑a a ma wan, an‑na Chɔn kunɛ tɛ a a. Chɛɛ nyɔn mu to mɔɛ chɛ a, n mbe ka koe chɛ n na min tena, a si min ma?” Chɛ‑a a ma wan, a‑a butuinɛ chɛ, min mbe a ma, a ni Chisɔsi wandi gbugbu yen.
Chisɔsi‑a kamin wu duu da kɔ
(Matiu 14:13-21; Maki 6:30-44; Chɔn 6:1-14)
10Mbɛ Chisɔsi 'a sɔ mɔɛ chɛ n yɛ‑a a tena, an si‑a ko ɔ ko ma, an‑na min ma, mbɛ an‑na a ɔ yian a a. A‑a an ya wan, an dechee, mbɛ an ta‑a duu dɔndɔ baima, min tɔ ni Besaida. 11Chɛɛ mɔɛ n‑na a ta koe kɔɔ sɔn, mbɛ mɔ fanka‑a a san, mbɛ an‑na an tan. Chisɔsi bu ɔ dia‑a wan an yen koe a. A koɔ‑a wan an tena a si Yataa 'a mansaya ma, mbɛ mɔɛ miin gbandien ni an tɛ ɔ, a‑a an baun.
12Tee bea ma, Chisɔsi fɛ den tan kun ma fea chɛ n gbɛn‑da wan a ma, an dɔ, “I boo ka gbɛ mɔɛ chɛ n na, min mbe a ma, an ni ta duu chɛ n dɔ nɛ a tindanɛ, an ni daun fenɛ san, mbɛ an‑na sa tena yan. Koe min na mu, mmɔ ɛ ka nɛ fia tamba ma wan.”
13Chɛɛ Chisɔsi ɔ an ma, “Wo wandi wo fen den be an ma, an ni a daun.”
Mbɛ an dɔ, “Fenɛ min mbe dechee nɛ nn boo ɔ, an mu biidi duu a, ni nyɛ fea. Nn mbe ee che ta‑a, nn ni daun fenɛ san fanka fanka chɛ gbɛɛ ko a.” 14Mɔ kaima miin ni nɔ, an taen fan ni wu duu nyɔn sima a.
Mbɛ Chisɔsi ɔ, “Wo a ma mɔɛ chɛ n ni si an kuunɛ ma, bi duu duu ma.”
15Mbɛ an‑na a ma, yɔ a‑a a fɔ buɛ min dɔ an ye, mbɛ mɔɛ chɛ n gbɛɛ si‑a. 16Mbɛ Chisɔsi‑a biidi duu chɛ ya, a basan nyɛ fea chɛ a. Mbɛ a‑a a ya a si banda a, mbɛ a‑a Yataa wai bɔ daun fen chɛ ko a. Mbɛ a‑a an dɔ kai kai, mbɛ a‑a a be a fɛ denɛ n ma, a du du koe a mɔɛ chɛ n ma. 17An gbɛɛ‑a an bu fa daun fenɛ daun fan. A sin, a fɛ denɛ n‑na an da tɔɛ min na sɔn, a bɛn‑da wan samba fa tan kun ma fea ma.
Pita ɔ te, Chisɔsi an mu Chasi a
(Matiu 16:13-20; Maki 8:27-30)
18Tee dɔndɔ a, Chisɔsi dɔndɔ gbe ni kɛn samun chɛ‑a, a fɛ denɛ n na‑a wan a tena. Mbɛ Chisɔsi ɔ, “Ɛ mɔɛ n yii ma, n mu nyɔn na?”
19Mbɛ an dɔ, “Mɔɛ dɔ n mbe a fɔ tena wan, mbɛ i mu Chɔn fan na, min ni yii chɛ mɔɛ n kunɛ ɔ, Yataa chia a. Dɔ n sin mbe a fɔ wan, mbɛ i mu Yataa 'a gbonka chɛ mɔ dɔndɔ an na suun, min tɔ ni Idaicha. Dɔ n sin bɛɛ ɔ te, mbɛ i mu Yataa 'a gbonka chɛ mɔɛ dɔ mende an na, min fa‑a suun, mbɛ a yɛ‑a to fɔɛ ɔ.”
20Mbɛ a‑a a fɔ to, a ɔ, “Chɛɛ wo wandi gbu, wo ta yiima ɔ, n mu nyɔn na?”
Mbɛ Pita ɔ, “I mu Chasi an na, nn kun ka mansa, Yataa‑a min sɔ.” 21Mbɛ Chisɔsi‑a an na si gbau gbau, a ɔ, an ma chɛ ɔ yian mɔ ɔ mɔ a.
Chisɔsi‑a a 'a mɔnɛ kɔɔ fɔ, a basan a 'a saya a
(Matiu 16:21-28; Maki 8:31—9:1)
22Chisɔsi yɛ‑a wan to, mbɛ a‑a a fɔ an ye, a ɔ, “N fan, Mɔ Gbu 'a Denɛ, n mbe tɔɔ‑a wan kaka. Mmɔ 'a chɛnyɛ gbakoo nu, an bɛ mɔɛ miin mbe Chu n tɛ ɔ Yataa a, an 'na mansa n na, an mbe an kan kɔ sɔ‑a wan n na. Mmɔ 'a sawa kan mɔɛ n bɛɛ‑a toa si wan an kɔɔ. N mbe fa‑a wan mɔ boo ɔ. Chɛɛ n mbe n kɔɔ sɔ‑a wan a ka saya ɔ, tee fea a sawan bɔɛ ma.”
23Mbɛ a‑a a fɔ an gbɛɛ ye, a ɔ, “Ni mɔ ɔ mɔ toen mu a ni bea n fɛ, an mɔɛ chɛ ni nyina a faa ma koe n ma. Mbɛ a‑a a ma bɛn tee ɔ tee a, mɔnɛ ɔ bia koe a n ko a, a basan fa koe a. 24Koe min na mu, ni mɔ ɔ mɔ ban‑da bea koe a n fɛ, a wandi fɔɛ ma kanda koe a, an mɔɛ chɛ ee kuɔ fɔ fɔɛ ma sɔn‑da. Chɛɛ mɔɛ min mbe a yii bɔ‑a a fɔɛ ɔ n ko a, an mɔɛ chɛ ɛ kuɔ fɔ fɔɛ ma sɔn‑da wan. 25Dunya chɛ ma nyanɛ gbɛɛ, min mbe a ma, mɔ ni fo kuɔ fɔ fɔɛ a, tɔnɔn ma a a. 26Ni mɔ ɔ mɔ ban‑da n dɔ, a basan n da a kuiɛ a, n bɛɛ, Mɔ Gbu 'a Denɛ, n mbe na‑a tima min na mansaya ɔ, n mbe ban‑da wan a ɔ. A tima chɛ a, n mbe ma‑a wan man‑da Fa Yataa 'a manɛ a, nn bɛ maeka n na. 27N ni a ma din wo tena, mbɛ mɔɛ dɔ nu nɛ sɔ ɔ sanche, an mbe ma‑a wan fɔɛ ɔ aan an ni chɛ ɔ yen. An mbe a ɔ yen‑da wan Yataa 'a mansaya ɔ ni yian.”
Chisɔsi kamaya‑a, kɔnkɔɛ kun tɛ
(Matiu 17:1-8; Maki 9:2-8)
28Chisɔsi bandenɛ a bai chɛ n fɔ‑a, tee sɛi gbakɔ, mbɛ a sɛ‑a kɔnkɔɛ ɔ samun chɛ koe a. An bɛ an na‑a sɛ Pita a, Chɔn, ni Chimisi. 29A to‑a samun chɛ chɛ an na, mbɛ a ya kɔɔɛ kamaya‑a, a yɛ to, a 'a doma kai wɛɛ gbɛ‑a fo fo, a ben fen gbɛ ma, ɛ ta man‑da taun. Chisɔsi ma fan‑da ka wan. 30Mbɛ a yen ko, mɔ fea n bɔ‑a a a. Mbɛ an‑na a kuu sɔ chia ɔ bɔɛ chɛ‑a, an bɛ Chisɔsi a. A mɔ fea chɛ n ni Mosisi an na, ni Idaicha. 31An ni man tena Yataa 'a manɛ an na. An sin ni chia ɔ bɔɛ chɛ tena, a si Chisɔsi ɛ fa‑a buɛ min dɔ Chuusaɛn duu ɔ. 32Chɛ gbɛɛ ɛ ma‑a, Pita ni chinɔɛ ɔ wan, an bɛ a bɔɛ n na. Chɛɛ an tima chɛ a gbɛ, an kunɛ‑a wan, mbɛ an‑na man ba dɛgbɛ chɛ yen fan Chisɔsi a tindanɛ, a basan mɔ fea chɛ n na, an bɛ ni sɔ ɔ miin na. 33Mosisi an fea Idaicha a, an ni gbɛ Chisɔsi to an na, an mbe ta‑a. Mbɛ Pita‑a a fɔ, a ɔ, “Kan mɔ, a nyan‑da wan mmɔ ɛ nɛ chɛ. Ka nn mbe ku sawa bun. Ku dɔndɔ i ko a, dɔndɔ kai Mosisi ko a, mbɛ dɔndɔɛ ma‑a kai Idaicha ko a.” Chɛɛ Pita gbu nii ma a ɔ sɔn ni, a ni ka fen fɔ tena.
34Pita to‑a chɛ an fɔ‑a, mbɛ dingbii yii‑a, mbɛ a‑a an na tunɛ. Chɛ‑a a ma wan, Chisɔsi fɛ den chɛ n chian‑da a ɔ benden ba a. 35Mbɛ an‑na Yataa kuiɛ a min dingbii chɛ ɔ, a ɔ, “N 'na denɛ an nɛ, n‑na n boo sɔ min ma, wo wo too ma sɔ a ma.”
36Yataa koɔen chɛ gbakɔ, an‑na Chisɔsi dɔndɔ gbe an yen gbɛ sɔ ɔ. A fɛ den chɛ n‑na koe chɛ n gbɛɛ sa wan an yii ma, an‑na miin gbɛɛ ɔ yen. An nii ma fua ni a ɔ yian‑da mɔ ɔ mɔ a.
Chisɔsi‑a nyina yama gbain kaienɛ fɛ
(Matiu 17:14-18; Maki 9:14-27)
37A banda ka, Chisɔsi yiienɛ ma, a ka kɔnkɔɛ chɛ ɔ, an bɛ a fɛ den sawa chɛ n na, mɔ fanka wa‑a a tan fan. 38Mbɛ kamin dɔndɔ yen ko an fanka chɛ ɔ, ɛ yee tɛ‑a, a ɔ, “Ticha, n 'na den kaima an nɛ, n 'na den dɔndɔ gbe. N mbe i disa tena, i ni n deman a a. 39A yen ko, nyina yama an mbe a a bea tima ɔ tima. Ni nyina chɛ‑a a a bea dechee, ɛ a kuu sɔ wan yee tɛ‑a, mbɛ a da yii fɔnfɔnɛ bun‑da bɔ‑a. Ɛ a ma chɛɛ chɛ wan tima ɔ yansama ko a, a ee fua a boo ka‑a a a. 40N‑na i fɛ denɛ n disa wan, an ni nyina yama chɛ gbain a fɛ, chɛɛ an ma kun ni.”
41Mbɛ Chisɔsi ɔ, “Wo e ka buɛ min dɔ, wo too ɔ gbɛ kaka, a sin wo ee dan ko a. A ɔ yansan gbɛ mmɔ bɛ ɛ mmɔ nyɔn fɛ, fen mu wo ee dan n na? N ma a ɔ sɔn, n mbe fen ma to wo ko a.” Mbɛ a‑a a fɔ kaminɛ gbu ye, a ɔ, “Na nɛ i 'a denɛ a.”
42Den chɛ to‑a na an na, mbɛ nyina yama chɛ‑a a a bea duu ma, mbɛ a bun‑da a ma chɛɛ chɛ‑a. Chisɔsi‑a a fɔ nyina yama chɛ ma, a ɔ, a ni ka den chɛ fɛ. Nyina yama chɛ ka‑a wan a fɛ. Mbɛ Chisɔsi‑a a a yɛ a fa ma. 43Mɔɛ miin gbɛɛ ni ka nɔ, an da a fa‑a wan, a si Yataa 'a gbasaya ko wa chɛ ma.
Chisɔsi‑a bai sa to, a si a 'a saya ma
(Matiu 17:22-23; Maki 9:30-32)
Mɔɛ chɛ n to‑a da ɔ gbaa chɛ an dɔ, a si koe chɛ n gbɛɛ ma, Chisɔsi ni miin ma tena, mbɛ a‑a a fɔ a fɛ denɛ n ye, a ɔ, 44“N mbe na tena bai min fɔ‑a wo ye, n toen mu wo ni wo too ma sɔ a ma chɛndɛ chɛ. N fan, Mɔ Gbu 'a Denɛ, an mbe na tena wan n ma tachɛ‑a, mɔɛ n ma.” 45Chɛɛ a fɛ den chɛ n nii ma bai chɛ ɔ gbɛ ni, a mu min na, a nunden fan ni an ma, a ɔ gbɛ koe a. An sin chian‑da wan a ɔ tisa koe a, bai chɛ fasai koe a an ye.
Chisɔsi‑a mɔ chenama yian a fɛ denɛ n tɛ
(Matiu 18:1-5; Maki 9:33-40)
46Mbɛ kɔɔsa don‑da Chisɔsi fɛ denɛ n tɛ ɔ, a si mɔ chenama wa wakoe ma an tɛ. 47Chɛɛ Chisɔsi na‑a a ɔ sɔn fan, an ni fen tɛnsɛ tena an nyɔn tɛ, min‑na a ma, a‑a den mɛsɛ ya, mbɛ a‑a a sɔ a tɔnfɛ. 48Mbɛ a‑a a fɔ an ye, a ɔ, “Ni mɔ ɔ mɔ‑a a boo si den den chɛ nyɔn sima kɔɔ n tɔɛ ɔ, a‑a a boo si ka n fan kɔɔ. A sin, ni mɔ ɔ mɔ‑a a boo si n kɔɔ, a‑a a boo si ka Yataa an kɔɔ, min‑na n na na. A mu min na, mɔ ɔ mɔ min mu mɔ dɔma a wo gbɛɛ wo tɛ ɔ, an mu mɔ chenama a.”
49Mbɛ Chɔn dɔ, “Kan mɔ, nn‑na kamin dɔndɔ yen fan, ɛ ben‑da i tɔɛ ɔ, nyina yama n gbain‑da mɔɛ n fɛ. Mbɛ nn‑na a a si, nn dɔ, a ni sɛmbɛ, koe min na mu, mmɔ bɛ ma a a.”
50Mbɛ Chisɔsi‑a a fɔ a ye, ni a fɛ denɛ tɔɛ chɛ nu, a ɔ, “Wo ma a a gban. Koe min na mu, ni mɔ ɔ mɔ ee i chɛɛ tena, wo fea mu a a.”
An ma Chisɔsi yia ni Samayia konko dɔndɔ ɔ
51Tima chɛ ma ni kɛn gbɛ dɔɔya tena, Yataa na‑a tima min dɔ bɛn, Chisɔsi ya koe a a sɛ banda bu ɔ, Chisɔsi‑a a yiima ɔ bɛn fan sɛ koe a Chuusaɛn duu ɔ. 52A‑a sɔ mɔɛ n na ta wan a ya ɔ. Sɔ mɔɛ chɛ n ta‑a wan konko dɔndɔ ɔ Samayia chɛnyɛ ɔ, min mbe a ma, an ni ko ɔ ko ɔ bɛn a ya ɔ. 53Chɛɛ mɔɛ chɛ nu an konko chɛ ɔ, an ma a yia tena be ni, a mu min na, an na‑a a ɔ sɔn fan, mbɛ a ni ta tena Chuusaɛn fan. 54A fɛ denɛ Chimisi n fea Chɔn na, an‑na chɛ ɔ yen kɛn, an dɔ, “Fa, i toen fan mu nn ni a ma, ta ni yii a ka banda bu ɔ, a ni mɔɛ chɛ n minda?”
55Chɛɛ Chisɔsi‑a a ya a yɛ wan, mbɛ a‑a an na gban, bai bonda chɛ fɔ koe a. 56Mbɛ an ta‑a konko dɔ mende ɔ.
Chisɔsi‑a bai sa, a si a sɔ koe ma a fɛ
(Matiu 8:19-22)
57An mbe tachɛ chia chɛ an ma, mbɛ kamin dɔndɔ‑a a fɔ Chisɔsi ye, a ɔ, “N ma bɛndenɛ mu bea koe a i fɛ kan kɔ kan, e ta‑a kaina min.”
58Mbɛ Chisɔsi ɔ, “Sonɛ n mbe fia ɔ soe n boo ɔ, a sin konde n bɛɛ nyanɛ n mbe. Chɛɛ kaina kan kɔ kan mbe ee n boo ɔ, n fan, Mɔ Gbu 'a Denɛ, n mbe n gbɛnku kaina, n ni n suin.”
59Mbɛ Chisɔsi‑a a fɔ kamin dɔndɔ wɛɛ ye, a ɔ, “Bea n fɛ.”
Chɛɛ kamin chɛ ɔ, “Fa, a ma n ni yɛ pɛn, n ni fa tɔn.”
60Mbɛ Chisɔsi wɛɛ ɔ, “Mɔɛ miin mbe yɔ mɔ faenɛ nu, an to nɔ, an ni an 'na mɔ faenɛ n tɔn. Chɛɛ i tana, a nyin i ni ta, i ni Yataa 'a mansaya ɔ yian mɔɛ n na.”
61Mbɛ mɔɛ dɔndɔɛ wɛɛ‑a a fɔ a ye, a ɔ, “Fa, n ma bɛnden mu n ni bea i fɛ, chɛɛ a ma n ni ta pɛn, n ni n saa n baa mɔɛ n na.”
62Mbɛ Chisɔsi ɔ, “Ni mɔ ɔ mɔ‑a a fɔ, e bea‑a n fɛ, chɛɛ i yiima duenɛ ɛ fea a, e ee che a ma‑a mɔɛ a, Yataa 'a mansaya kɔɔ.”
Currently Selected:
DUKU 9: KONONT
Highlight
Share
Copy
Want to have your highlights saved across all your devices? Sign up or sign in
New Testament in Kono © The Bible Society of Sierra Leone, 2006.
