MAKI 15
15
An na‑a Chisɔsi a, Kɔfana Padeti chen kɔɔ
(Matiu 27:1-2, 11-14; Duku 23:1-5; Chɔn 18:28-38)
1A sau sau chɛ ma, Chu n tɛ mɔɛ nu Yataa a, an 'na mansa nu, ni Chu gbakoo nu, a basan Chu n 'na sawa kan mɔɛ n na, an bɛ Chu kuti wa ɔ mɔɛ n gbɛɛ a, an bɛn‑da kun puinɛ ɔ. Mbɛ an‑na Chisɔsi chii fɔin, an ta‑a a a, mbɛ an‑na a konan Kɔfana Padeti#15:1 Pɔnchɔsi Padeti ni kɔfana an na, Chudia chɛnyɛ ɔ. Domi mɔɛ mu a a, a sin Domi kun ti wa an na‑a sɔ tena chɛ be a ma. ma. 2Mbɛ Kɔfana Padeti‑a a ɔ tisa, a ɔ, “I wan mu Chu mɔɛ n 'na mansa a?”
Mbɛ Chisɔsi ɔ, “I‑a an fɔ ka.”
3Mbɛ mɔɛ chɛ nu, Chu n tɛ Yataa a, an 'na mansa chɛ nu, an‑na kun sɛsɛ si wan Chisɔsi kun ma. 4Mbɛ Kɔfana Padeti‑a a ɔ tisa to, a ɔ, “Bai ɔ bai ee i da a, e min fɔ? A ɔ yen bɛ, an mbe kun sɛsɛ wa min si tena i kun ma.”
5Chɛɛ chɛ wɛɛ ɔ to, Chisɔsi ma a tɛ ni a ma gbukuu wɛɛ. Chɛ‑a Kɔfana Padeti da a fa wan gban.
Kɔfana Padeti‑a kaa a tɛ, Chisɔsi fa koe ma
(Matiu 27:15-26; Duku 23:13-25; Chɔn 18:39—19:16)
6San kɔ san na, kun bɔ a ɔ bɛnɛ kun ma, manda ni dɔndɔ, Kɔfana Padeti ni min na tachɛ. A ni mɔ dɔndɔ boo ka wan, min mbe sa ɔ pimbi chenɛ a, an ni a ɔ tisa min boo ka koe a. 7A san chɛ a, kamin dɔndɔ min tɔ ni Baabasi, a ni wan pimbi chenɛ a, an bɛ a bɔɛ dɔ mende n na. An ni mɔɛ n fan na, an na‑a miin bia butuin chɛ koe a Domi mansa n na. Baabasi chɛ na‑a mɔɛ an fa, yɔ a bɔɛ chɛ dɔ n bɛɛ. 8Kɔfana Padeti ni kɛn Chisɔsi gbɛmbo‑a, mɔ fanka wa a kan‑da a ma. An‑na a ɔ tisa wan, an dɔ, a ni manda chɛ a ben, min‑na ɛ ben tee. 9Mbɛ a ɔ, “Wo toen mu, n ni n boo ka nyɔn na wo ye, Chu n 'na mansa chɛ?” 10Kɔfana Padeti na‑a chɛ fɔ, koe min na mu, a na‑a a ɔ sɔn fan, mbɛ toomaya gbama, an na‑a a ma, Chu tɛ mɔɛ nu Yataa a, an 'na mansa n na‑a Chisɔsi a a chen kɔɔ.
11Chɛɛ a che‑a kɛn an kaina chɛ, Chu n tɛ mɔɛ nu Yataa a, an 'na mansa chɛ n‑na a ma wan, an‑na fanka fanka chɛ a sɛ. An dɔ, an ni yee tɛ Baabasi an boo ka koe a. 12Chɛɛ Kɔfana Padeti‑a an dɔ tisa wan to, a ɔ, “Mbɛ wo toen mu gbɛ n ni fen ma kamin chɛ a, wo e min chee, wo ɔ, wo wan Chu n 'na mansa?”
13Mbɛ an‑na yee tɛ to, an dɔ, “A ni gbangban kɔnɛ ma, a ni fa.”
14Chɛɛ Kɔfana Padeti ɔ, “Fen ko a chɛ ɛ ma? Kamin chɛ gbu, a‑a fen ko yama ma?”
Chɛɛ an‑na yee gbu ma munda wan gbɛ, an dɔ, “A ni gbangban kɔnɛ ma, a ni fa.”
15Mbɛ Kɔfana Padeti‑a a boo ka wan Baabasi a, fanka fanka chɛ faa chima koe a. Mbɛ a‑a a ma, an‑na Chisɔsi gbasi bosa a pien, mbɛ a‑a a be, an ni a gbangban kɔn gbengbandenɛ ma, a ni fa nɔ.
Soya n‑na Chisɔsi ma yɛn
(Matiu 27:27-31; Chɔn 19:2-3)
16Chɛ gbakɔ, soya chɛ nu, miin ni Kɔfana Padeti kɔɔ, an ta‑a Chisɔsi a, mbɛ an don‑da a a Kɔfana Padeti 'a kata chɛ ɔ. Mbɛ an‑na an bɔɛ tɔɛ n gbɛɛ a kan. 17Mbɛ an‑na a ma chii mansa doma a, min kɔ yawaen ni. Mbɛ an yɛ‑a wan to, an‑na banfua nyan wai ɔ, mbɛ an‑na a si a kun na. An dɔ, a 'a mansa banfua an nɛ. 18Mbɛ an bun‑da mansa kɔndɔnɛ chɛ‑a a a, an dɔ, “Chu mɔɛ n 'na mansa chɛ ni mɛ.” 19Mbɛ an bun‑da Chisɔsi kun tɛ gbasi‑a kɔn kundu a. An mbe ta‑a an da yii wɛɛ fasi‑a a ma, mbɛ an mbe ta‑a to an kumbai gbangban‑da a chen kɔɔ. 20Mbɛ an ban‑da kɛn a ma yɛn‑da, an‑na a ma bɔ wan gbae an ta mansa doma chɛ a, mbɛ an‑na a ta don a ma. Mbɛ an bɔ‑a a a, ta koe a fa a, kɔn gbengbandenɛ ma.
An‑na Chisɔsi gbangban kɔn gbengbandenɛ ma
(Matiu 27:32-44; Duku 23:26-43; Chɔn 19:17-27)
21An to‑a ta an na Chisɔsi a, mbɛ an bɛn‑da kamin dɔndɔ a. A tɔ ni Saimɔn, a sin na‑a ka Sayini duu ɔ wan, ɛ na‑a Chuusaɛn duu ɔ. A 'a denɛ n fan nii nɛ Adɛsanda a, ni Dufɔsi. Soya chɛ n‑na a yen kɛn dechee, an‑na a din fan a ma, ta koe a kɔn gbengbanden chɛ a, Chisɔsi ko a. 22Mbɛ an che‑a Chisɔsi a kaina dɔndɔ, an ni min chee, an dɔ, Kɔkɔta, min fasaien mu, kun konkon ma. 23Nɔ ni, mbɛ an‑na gbɛ be a ma, min dɔ basandenɛ ni gboo ɔ dumɛ bui#15:23 Kiisi koɛ ɔ, an ni an bui chɛ chee, an dɔ, maa. a. Chɛɛ Chisɔsi ma dɔn ni a ni a min. 24Mbɛ an‑na a gbangban kɔn gbengbandenɛ chɛ ma nɔ. Mbɛ an yɛ‑a, an‑na chɛ fenɛ chɛ a ma koa n ko a, an ni a ɔ sɔn, ni mɔɛ ɛ min ma sɔn.
25Tee kaina kɔɔɛ a ni, kɛn an‑na Chisɔsi gbangban kɔn gbengbandenɛ ma. 26Mbɛ koe min gbu na‑a a ma, an‑na a gbangban kɔn gbengbanden chɛ ma, an‑na a nyɛn fan kɔn dɛnfɛ ma, an dɔ, Chu mɔɛ n 'na mansa an nɛ. 27-28An na‑a a gbangban kɔn gbengbanden chɛ ma kaina dɔndɔɛ wan, an bɛ kanka fea an na. Dɔndɔɛ ɛ a boo nyima ɔ, dɔndɔɛ ɛ a manɛ ɔ.#15:27-28 Bai chɛ n fan saen mu a kun ma Maki 'a gboo kɔma dɔ n dɔ. Bai chɛ n dɔ: Mbɛ min nyɛnden ni Yataa 'a gboo ɔ, a bɔ‑a wan a a, min‑na a fɔ, a ɔ, “Mɔɛ n‑na a bia wan, yɔ an mbe sawa yɔn mɔ wa chɛ n bia buɛ min dɔ.” (Duku 22:37) 29Mbɛ chia a ben mɔɛ n‑na an kunɛ fichi fichi wan. Mbɛ an bun‑da a main‑da, an dɔ, “Wua! O, i wɛn‑na a fɔ, i ɔ, e Yataa 'a chenɛ te wan, mbɛ i‑a a sɔ tee sawa tɛ. 30Mbɛ puin bɛ kɔn gbengbanden chɛ ma, i ni i wandi kun bɔ saya yuu chɛ ɔ.”
31Mɔɛ miin ni Chu n tɛ ɔ Yataa a, an 'na mansa nu, an bɛ Chu n 'na sawa kan mɔɛ chɛ n bɛɛ a, an‑na mayɛma koe n sɛ wan Chisɔsi ma. An mbe a fɔ an nyɔn ye, an dɔ, “A‑a mɔ dɔ mende n baun, chɛɛ a ee che a ni a wandi baun. 32Ni a wan mu kunka mansa chɛ a, Chu mɔɛ n 'na mansa, a ni puin bɛ kɔn gbengbanden chɛ ma. Chɛ an mbe a ma‑a, nn ni a wakoe ɔ yen, mbɛ nn dan‑da a a.”
An bɛ gbangban‑da ka mɔ fea miin na dɔndɔ a, an bɛɛ, an‑na a main ka wan.
An‑na Chisɔsi fa
(Matiu 27:45-56; Duku 23:44-49; Chɔn 19:28-30)
33Tee che‑a kɛn kun tɛ, an tee chɛ ma, pimbi bun‑da wan chɛnyɛ gbɛɛ ɔ, aan awa sawa ko a. 34Mbɛ tee kɔ kai ma, Chisɔsi‑a yee tɛ wan gbankon, a ɔ, “N 'na Yataa, n 'na Yataa, fen mu i ban‑da n dɔ?”#15:34 An ta chɛnyɛ koɛ ɔ, a na‑a a fɔ ka wan, a ɔ, “Ɛdoi, ɛdoi, dɛma sabakitani?”
35Mbɛ mɔɛ dɔ nu nɔ sɔ ɔ, an‑na a a min kɛn a‑a min fɔ, an dɔ, “Wo a yen ko, ɛ ka kai Idaicha an chee‑a, Yataa 'a gbonka chɛ mɔɛ chɛ suun.” 36Mbɛ an dɔndɔ‑a bui sa a a, mbɛ a ta‑a, a na‑a fen yɔfu yɔfu a. Mbɛ a‑a a chima gbɛ a, min baa nii ma gbɛ. Mbɛ a‑a a don kɔnɛ a, a don koe a Chisɔsi da a, a ni a susu, ɛ ta‑a a fɔ‑a a bɔɛ n ye, a ɔ, “Mmɔ a ma kɔn, kɔkɔɛ Idaicha ɛ na‑a wan, a ni a a yii kɔn gbengbanden chɛ ma.”
37Mbɛ Chisɔsi‑a yee tɛ to gbankon, mbɛ a fa‑a.
38Mbɛ tɛndi, min ni dɛn dɔ Yataa 'a chen chɛ bu ɔ, a tɛka‑a fea a, a ka a kandɔɛ, aan a yii a denka ɔ. 39Mbɛ Domi soya gbakoo chɛ, min ni sɔ ɔ nɔ Chisɔsi ya kɔɔɛ, a‑a a ɔ yen kɛn, mbɛ Chisɔsi fa‑a, a‑a a fɔ wan, a ɔ, “Kamin chɛ ni Yataa 'a denɛ chɛndɛ chɛndɛ gbu an na.”
40Musu n bɛɛ, an ni wan nɔ, an mbe sɔ ɔ pɔɔ, an ya bɛndenɛ ɛ a ma. Bɔɔɛ Mɛi min ka‑a Makadaa duu ɔ, a ni wan nɔ. Bɔɔɛ Mɛi dɔndɔɛ wɛɛ ni wan nɔ. A 'a denɛ ni Chimisi dɔɔma a, ni Chosesi. Bɔɔɛ Sadome wɛɛ ni wan nɔ. 41Musu chɛ n fan na‑a a sɔ Chisɔsi fɛ, a ni Kadidi chɛnyɛ ɔ tima min na. A sin, an fan ni a deman chia sɛsɛ a. Musu sɛsɛ ni wan to nɔ, miin bea‑a a fɛ, a sɛ‑a tima min na Chuusaɛn duu ɔ.
An‑na Chisɔsi sa a kamba ɔ
(Matiu 27:57-61; Duku 23:50-56; Chɔn 19:38-42)
42An tee chɛ bea ma, min ni tee a Chu n ni an ma bɛn an 'na suin tee chɛ ko a,#15:42 Chu n 'na sawa nii dɔn suun, an ni mɔɛ tɔn Simbii ma, an 'na suin tee a. N mbe ee baa wai dɔ mende chɛ koe a, a tee chɛ ma. Chɛ an fɛ ni, Chosɛfi na‑a Chisɔsi tɔn Anyima yɛɛ ma tee a wan, min banda ka ni suin tee a. 43kamin dɔndɔ na‑a wan nɔ, a ka Ayimatia duu ɔ. A tɔ ni Chosɛfi, a sin baa ni wan a ma kaka, Chu gbakoo n tɛ, miin ni si Chu kuti wa ɔ. A yɛ to, a ya ni wan tima chɛ ya ɔ, tima min na Yataa ɛ a 'a mansaya ɔ yian‑da. A sin, a na‑a a faa sɔ wan, mbɛ a ta‑a Kɔfana Padeti tena, a‑a Chisɔsi su ɔ tisa a ma. 44Chɛɛ yiinachii ni wan Kɔfana Padeti ɔ, ni Chisɔsi gbu faen fan ni gbɛ. Mbɛ a 'a soya gbakoo chɛ, a‑a a chee, a‑a a ɔ tisa ni Chisɔsi faen fan ni gbɛ. 45Mbɛ soya gbakoo chɛ, a‑a a fɔ, a ɔ, Chisɔsi fa‑a. Kɔfana Padeti‑a chɛ a ɔ gbɛ kɛn, mbɛ a dɔn‑da a su be koe a Chosɛfi chɛ ma. 46Mbɛ Chosɛfi‑a fen gbɛ san. Mbɛ a‑a Chisɔsi su a yii, a‑a a a mendemende fen gbɛ chɛ a. Mbɛ a‑a a sa kamba ɔ, min nyandenɛ ni senɛ ɔ.#15:46 Chu n ni sen gbuu wa an dɔ bɔ suun, mbɛ an‑na a ma kamba a. An ni a nyan fan yɔ dumu. A da a tɔnɛ sin, a ni sen dɛnfɛ wa an na. Ni an‑na su sa a ɔ, mbɛ an‑na sen chɛ tundun, a da a chɛndɛ chɛ. Mbɛ a‑a faa gban ba tundun kamba chɛ da a. 47Mbɛ Mɛi, min ka‑a Makadaa, ni Mɛi dɔndɔɛ, min ni Chosesi de a, an ya ni wan kaina chɛ a, Chisɔsi na‑a tɔn ka kaina.
Currently Selected:
MAKI 15: KONONT
Highlight
Share
Copy
Want to have your highlights saved across all your devices? Sign up or sign in
New Testament in Kono © The Bible Society of Sierra Leone, 2006.
