MAKI 16

Chisɔsi‑a a kɔɔ sɔ, a ka saya ɔ

(Matiu 28:1-8; Duku 24:1-12; Chɔn 20:1-10)

1Mbɛ suin tee chɛ ben‑da kɛn, bɔɔɛ Mɛi, min ka‑a Makadaa duu ɔ, an fea Chimisi de Mɛi a, ni bɔɔɛ Sadome, an ta‑a, an‑na tu kunyɛ a diama san. Musu chɛ n toen ni, an ni tu kunyɛ a diama chɛ fasi fasi Chisɔsi su chɛ ma. 2Mbɛ sayi ma, Tɛnɛ kan kɔ dɔɛ ma, tee kainɛ a, an ta‑a wan Chisɔsi kamba ma. 3An ni kɛn ta tena, an‑na an nyɔn dɔ tisa wan, an dɔ, “Sen ba dɛgbɛ chɛ, nyɔn mbe a ka‑a kamba chɛ da a, mmɔ ye?” 4Chɛɛ an‑na an kunɛ kɔɔ sɔ kɛn, mbɛ an‑na a yen, mbɛ sen ba gbu chenchendenɛ ɛ, a ka kamba gbu da a. 5Mbɛ an don‑da kɛn kamba gbu bu ɔ, an‑na kamin tɔngbɔɛ yen nɔ. Kamin chɛ ni si ɔ an boo nyima ɔ wan. A sin, doma kai min ni a ma, a gbɛen fan ni. Chɛ‑a an kɔndɔ fii wan.

6Mbɛ a ɔ, “Wo kɔndɔ ma fii. N‑na a ɔ sɔn fan, mbɛ wo e Chisɔsi an yan tena, min ka‑a Nasaɛti duu ɔ, an‑na min gbangban kɔn gbengbandenɛ ma. A ee nɛ. Wo a yen, a ni sa ɔ kaina. Yataa‑a a kɔɔ sɔ, a ka saya ɔ. 7Chɛɛ wo ta gbɛ, wo ni a ɔ yian a fɛ denɛ n na. Wo a ɔ yian Pita wɛɛ a, wo ɔ, ɛ sɔ ɔ wo ya ɔ, a ta Kadidi chɛnyɛ ɔ, wo ɔ, nɔ mu wo e a yen‑da, yɔ a na‑a a fɔ buɛ min dɔ tee wo ye.”

8Mbɛ an ben‑da bui‑a, a bɔ an kamba chɛ ɔ. Koe min na mu, masamba basan kɔndɔfii a, a ni koo an dɔ. Chɛ sin‑na a ma wan, an ma che ni koɔ‑a mɔ ɔ mɔ tena, an chianden ba ɛ.

GBOO CHƐ A BAN‑DA BUƐ MIN DƆ, GBOO KƆMA SƐSƐ N DƆ#16:8 Gboo kɔma dɔ n dɔ, ni gboo kɔma dɔ nu miin‑na mun‑da tee, an mbe ee kaka chɛ nɛnɛ ma (kan tena 9-20). Gboo chɛ a ban‑da buɛ min dɔ gboo kɔma dɔ mende n dɔ: 9 Mbɛ musu chɛ n ta‑a Pita tena, a basan a dia nyɔɛ n na, mbɛ an‑na koe ɛnden dɔ yian an na, a si koe chɛ n gbɛɛ ma, kamin tɔngbɔɛ chɛ‑a miin dɔ yian an na. An nii ma tima yayi ni, koe chɛ n dɔ yian koe a Pita a. 10 Chɛ gbakɔ, Chisɔsi‑a a fɛ denɛ n sɔ wan dunya chɛ gbɛɛ ɔ, sakana bai chɛndɛ chɛ ɔ yian koe a mɔɛ n na, Yataa ɛ an baun‑da buɛ min dɔ kuɔ fɔ ko a. Sakana bai chɛndɛ chɛ an mbe ma‑a nɔ, aan dunya danka a. A sin, Yataa wandi an‑na a na.

Chisɔsi‑a a wandi yian, a fɛ denɛ n na

(Matiu 28:9-10, 16-20; Duku 24:13-49; Chɔn 20:11-23; Chisɔsi 'a Sɔ Mɔɛ Nu 1:6-8)

[ 9Mbɛ Chisɔsi na‑a a kɔɔ sɔ kɛn, Tɛnɛ kan kɔɔ dɔɛ ma, a‑a a wandi yian mɔɛ min pɛn na, an nɛ Mɛi a, min ka‑a Makadaa duu ɔ. A na‑a nyina yama wɔnfea chɛ n gbain an Mɛi chɛ an fɛ. 10Mbɛ Mɛi ta‑a, a‑a a fɛ mɔɛ kɔma chɛ n tan, an mbe sanka di chɛ‑a. Mbɛ a‑a a ɔ yian an na. 11Chɛɛ an nii ma che ni dan‑da a a, an‑na a a min kɛn, mbɛ a wan Mɛi‑a a yen fan, a ɛ fɔɛ ɔ.

12Chɛ gbakɔ, a fɛ den fea nu, an ni wan ta‑a konko dɔndɔ ɔ. Mbɛ Chisɔsi‑a a wandi yian an na pɛnɛnɛ mɔ ya dɔ mende ɔ. 13Mbɛ an yɛ‑a, an‑na a ɔ yian an bɔɛ tɔɛ n na, chɛɛ an bɛɛ ma dan ni an da a bai chɛ a.

14Chɛ gbakɔ, Chisɔsi fɛ den tan kun ma dɔndɔɛ chɛ nu, an ni wan si ɔ tebu ma, daun chɛ tena. Mbɛ Chisɔsi‑a a wandi yian an gbɛɛ a. A‑a an ma tɔɔ, a ɔ, an faa a kɔɔen mu, a sin, danaya ee an dɔ. A ɔ, koe min na mu, an ban‑da dan koe a mɔɛ saa an na, miin na‑a a wan Chisɔsi yen, a kɔɔ sɔenɛ gbakɔ saya ɔ. 15Mbɛ a ɔ an ma, “Wo ta dunya chɛ gbɛɛ ɔ, wo ni sakana bai chɛndɛ chɛ ɔ yian mɔ ɔ mɔ a. 16Mɔɛ miin mbe an kai fa‑a n na, yii ni chɛ an kunɛ ɔ Yataa chia a, an mbe bauncha ma sɔn‑da wan. Chɛɛ mɔɛ miin mbe ee an kai fa‑a n na, Yataa ɛ kaa a tɛ‑a wan an bakoe ma, an ni ma tɔɔya ɔ. 17Mbɛ a sin, chɛ an mbe ma‑a tɔmɔsi a, tee ɔ tee a, chɛ n ko a miin kai faen mu n na. An mbe nyina yama n gbain‑da wan mɔɛ n fɛ, n tɔɛ ɔ, an ni koɔ chɛnyɛ koɛ n dɔ, miin mbe fɔ chɛnyɛ dɔ mende n dɔ. 18Ni an‑na ka n bɛɛ bia, a ee ko ma‑a an na. Chɛ ma, an ni bɔɛɛ wɛɛ min, a ee ko ɔ ko ma‑a an na. An mbe an boo bun‑da wan gbandi mɔɛ n ma, mbɛ an baun‑da.”

Yataa‑a Chisɔsi ya, a sɛ banda bu ɔ

(Duku 24:50-53; Chisɔsi 'a Sɔ Mɔɛ Nu 1:9-11)

19Mbɛ Mansa Chisɔsi ban‑da kɛn koɔ‑a a fɛ den chɛ n tena, Yataa‑a a ya wan, a sɛ banda bu ɔ, mbɛ Chisɔsi si‑a a boo nyima ɔ. 20Mbɛ a fɛ denɛ n ta‑a kan kɔ kan, an mbe ben‑da sakana bai chɛndɛ chɛ ɔ yian‑da mɔɛ n na. Mansa Chisɔsi sin basan‑da wan an ma, an 'na wai gbɛɛ ɔ. A sin, a‑a a ɔ yian tɔmɔsi n dɔ, miin ni yen an 'na sakana bai gbaa chia a, mbɛ an mbe tea chia an na.]

Currently Selected:

MAKI 16: KONONT

Highlight

Copy